Patraidor nga ginratsada sang nagligad nga senimana ang pagpasar sang lain-lain nga hagna sang Senado kag Kongreso agud palawigon ang arkila sang kadutaan sang Pilipinas sa mga dumuluong nga imbestor sa 99 ka tuig halin sa 75 ka tuig. Nagahulat na lang ini sang pirma sang presidente para mangin layi. Gingamit ini nga iskema sang rehimen Marcos Jr sa mando sang iya imperyalistang amo nga US agud tiyugan ang lapnagon nga pagpamatuk sang pumuluyo sa pagbag-o sang konstitusyon.

Paagi sini nga hagna, ginapahanugutan ang hilway nga paggamit sang kadutaan sang pungsod sang mga dumuluong monopolyong korporasyon sa sulod sang 99 ka tuig ukon malapit sa isa ka siglo nga magpatigayon sang mga joint venture agreement (JVA) para sa mga negosyo nga industrial estate, paktorya, assembly ukon processing plants, agro-industriyal nga negosyo, land development para sa industriyal ukon komersyal nga gamit, turismo, agrikultura, agroforestry, ecological conservation, kag iban pa sa Pilipinas.

Sa pagkamatuod, katumbas na ini sa pagpanag-iya sang mga imperyalista nga mga pungsod nga ginatiglawasan sang ila multinasyunal kag transnasyunal nga mga koroporasyon sang kadutaan sang pungsod nga ginadumilian sa subong nga konstitusyon. Naghimbon ang mga nagahari nga sahi nga nagapungko sa duha ka kapulungan sa pagtraidor sa pumuluyo. Solo ang tatlo ka tiglawas sang matuod-tuod nga oposisyon nga Makabayan amo ang nagpamatuk.

Kon madayon nga mapasar ini bilang layi magatuga ini sang grabe nga halit sa pumuluyo kasubong sang:

(1) Ligal nga lapnagon nga pagpang-agaw sang kadutaan sang mga mangunguma kag mga agrarian reform beneficiaries (ARB) sang ila kadutaan nga bag-o lang ginpanghatagan sang mga indibidwal nga titulo paagi sa programang Support to Parcelization of Land for Individual Titling (SPLIT). Magadagsa ang mga nanarisari nga mga agro-industriyal nga mga plantasyon sa Pilipinas. Indi man luwas ang industriya sang kalamay sa Negros tungod sa todo larga nga importasyon sang kalamay kag artipisyal nga pangpatam-is nagahana na ini nga mawasak. Magatuga ini sang pagpamierde sang mga plantador sang tubo ilabi na ang 80% nga magagmay nga plantador nga mga ARBs. May katalagman nga ila na lubos nga mabuhian ang ila ginhimakasan nga kadutaan kag magbalik sa lubos nga mamumugon sa mga dumuluong nga mga plantasyon kag industriya.

(2) Todo-larga na ang pagkambyo ukon reklasipikasyon sang kadutaan halin sa agrikultural padulong sa agro-industriyal nga gamit, pagmina, solar farms, kag iban pa. Magatuga ini sang paglala sang kawad-on sa seguridad sa pagkaon ukon kagutom sa pungsod. Sa report sang isa ka pamantalaan, sa Western Visayas sa ikatatlo nga kwarto sining tuig, 47,335 ka ektarya ang gin-nubo sa ginatamnan sang humay kag may 384,798 metriko tonelada ang gin-nubo sang produksyon sang humay. Lubos na nga magsalig sa import ang kinahanglanon nga pagkaon sang pumuluyo sa pungsod. Sa subong nagamanipestar na ini sa pagkanumero uno nga importer sang Pilipinas sa bugas sa bug-os nga kalibutan.

(3) Mas maglala ang pagkawasak kag kahalitan sa kapalibutan sa pagsulod sang mga plantasyon, mina kag iban pa nga mga industriyal nga negosyo nga magahilo sa mga kadutaan kag mga kasubaan kag magapangkalbo sa nabilin nga mga lasang sa kabukiran. Mas magalala ang maga-igo nga kalamidad sa pungsod sobra pa sa gin-antus nga El Nino, La Nina, mga pagbaha kag landslide sini nga tuig nga naghalit sa palangabuhian sang pumuluyo.

(4) Mangin ulipon na sang dumuluong kag lokal nga nagahari nga sahi ang pumuluyong Pilipino. Tungod wala na sang kaugalingon nga duta nga talaumahon kag wala na sang palangabuhian, mapilitan nga mangin obreros sang plantasyon kag mga industriya ang pumuluyo. Magabaton sila sang tuman ka nubo nga sweldo, wala ukon kulang sang benepisyo kag indi makatawo nga kundisyon sa trabahuan. Pareho ukon sobra pa sa ginaantus subong nga maka-ulipon ukon indi makatawo nga kahimtangan sang mga mamumugon sa kampo sa isla sang Negros.

Wala sang pag-ulikid ukon pagkabalaka ang rehimen Marcos Jr kag iya kahimbon nga mga nagahari nga sahi sa kaayuhan kag maayo nga buasdamlag sang pumuluyo. Sa ila pagpasar sini nga hagna, mangin lubos na nga eskwater sa kaugalingon nga pungsod ang mga Pilipino. Ginpakita lang nila ang ila lubos nga pagkatuta sa imperyalismong US. Paglapak sa pungsodnon nga patrimonya ang lubos nga pagtugyan sa dumuluong sang kadutaan kag manggad sang pungsod.

Ang NDF-Negros nagapawagan sa tanan nga mga mamumugon, mangunguma kag mga progresibong sektor nga kolektibo nga batikuson kag pamatukan ang pagpasar sining hagna nga mangin layi. Batikuson kag dal-on ini nga adyenda sa magaabot nga eleksyon 2025.

Lapnagon nga edukaron, organisahon kag pahulagon ang pumuluyo para sa mabaskog nga paglunsar sang kahublagan masa agud mapunggan ining patraidor nga padihot sang nagahari nga sahi.