Download: PDF

Sa okasyon sang ika-56 nga anibersaryo sang Communist Party of the Philippines (CPP), ang Komiteng Rehiyunal sang Partido Komunista sa Isla sang Negros (KRPIN) lubos nga nagadayaw sa mataas nga determinasyon kag kaisog sang mga kadre kag katapuan sang Partido, mga Pulang kumander kag hangaway sang banwa sang lima ka larangan gerilya sa idalom sang Apolinario Gatmaitan Command-New People’s Army Negros Island Regional Operations Command (AGC-NPA) upod sa mga katapuan sang organisasyon masa sang National Democratic Front- (NDF) Negros, mga abyan, kaalyado kag pigos kag ginahimuslan nga pumuluyong Negrosanon sa ila nga pagpakigbahin sa mainantuson kag buhi-kamatayon nga pagpakig-away kag paghimakas agud pangibabawan ang kontra-rebolusyonaryong kampanya sang korap, inutil kag idu-ido nga rehimeng US-Marcos II.

Ubos kusog nga ginabayaw namon ang amon tuo nga inumol tanda sang wala paglubad, mapula kag militante nga pagsaludo sa aton mga rebolusyonaryong martir. Sila ang ginkilala nga mga baganihan nga naghalad sang ila bilidhon nga kabuhi agud ipatuman ang mga rebolusyonaryong tahas sa tunga sang mga unos sa maragtason nga paghimakas nga aton ginasaulog subong. Namartir sila Rogelio Posadas (Ka Cocoy), Ericson Acosta (Ka Fredo), Romeo Nanta (Ka Juanito Magbanua) kag ang Candoni 7 nga sanday Ka Jovani/Namie, Janine, Art, Nonoy, Chocolate, Pedyok, Jacob kag iban pa nga hugot nanindugan sa ila rebolusyonaryong prinsipyo kag ginsumpaan tubtob sa ila kamatayon. Nagserbe sila nga sulondon, inspirasyon kag iwag sa husto nga banas sang armadong rebolusyon. Ginapasidunggan man naton ang mga rebolusyonaryong masa nga nagbuhis sang ila kinaalam, ikasarang kag labaw sa tanan ang ila kabuhi sa padayon nga pagpasulong sang armadong paghimakas sa balayon sang Kahublagan Panadlong nga ginapanawagan sang Partido.

Ginasaulog naton ang ika-56 nga pagsukat sang CPP gikan sa iya pagkatukod sadtong Disyembre 26, 1968 nga puno sang militansya kag optimismo bangud sang aton nakurit nga mga kadalag-an sa patag sang ideolohiya, pulitika kag organisasyon diin nakapangibabaw kita sa mga kabudlayan kag pagpanghangkat subong nga tuig. Kadungan man sini ang lubos nga rebolusyonaryong katampad sa pagtadlong sa aton mga kahuyangan kag kasaypanan agud makuhaan sang mga bulawanon nga leksyon. Subongman, dugang nga kakahas sa pagpatuman sang partikular nga tahas kag mga rebolusyonaryong hilikuton. Militante nga atubangon ang mga hangkat sang panahon kag determinado magmatinukibon sa pagpangita sang kamatuoran kag angot nga yabe sa pagpa-abante sang demokratikong rebolusyon paagi sa pangmalawigon nga inaway banwa padulong sa mas mataas nga halintang.

I. Dugang nga pagpa-antus sa pumuluyong Negrosanon ang “Bagong Pilipinas” ni Marcos Jr

Indi matabunan sang “Bagong Pilipinas” ni Marcos Jr ang nagalala kag pagkabangkarote sang sistemang mala- kolonyal kag malapyudal sa pungsod. Ang kampanyang indoktrinasyon ni Marcos Jr sang “Bagong Pilipinas” ang wala man kinalain sa “Bagong Lipunan” sang iya amay nga si anay diktador Ferdinand Marcos Sr. Gusto sini tabunan ang malala nga krisis sa ekonomiya, pulitika kag pagpang-abuso sang nagligad nga “batas militar” kag bag-ohon ang imahen sang tiraniko nga paghari ni Marcos. Ginapatalang ni Marcos Jr sa “Bagong Pilipinas” ang Pilipinhon ilabe na ang pumuluyong Negrosanon sa mga ilusyon sa isa ka “bag-o” nga palaabuton. Wala sang bisan ano nga pagbag-o kundi mas naglala pa ang pag-antus sang pumuluyong Pilipino sa madalom nga kumunoy sang kaimulon kag kagutom.

Ang kamatuoran, wala sang bisan ano nga pundamental nga pagbag-o sa mapiguson kag mahimuslanon nga malakolonyal kag malapyudal nga sistemang Pilipino kag sa daan nga korap nga paghari sang dalagkong burgesya komprador kag dalagkong agalon may duta. Padayon sila nga nagakamasa sang dunang manggad kag nagahari gamit ang mga instrumento nga terorismo sang estado.
Padayon ang paglala sang krisis sang sistema sang pungsod sa idalom sang bogus nga paghari ni Marcos Jr. Wala sang kinatuhay nga diktador kaangay sa iya amay kag lubos nga tuta sang imperyalismong US. Nagamanipestar ini sa iya tampad nga pagsunod kag pagpatuman sang mga neoliberal nga patakaran sang liberalisasyon, deregulasyon kag pribatisasyon kabaylo sa dislokasyon sang demokratikong interes kag kinamatarung sang katawhan Pilipino.

Ginpalig-on ang paghimbon sang Marcos-Romualdez nga dinastiya. Kakunsabo ang mga ini nga hugakumon ang gahum kag kontrolon ang ekonomiya kag pamulitika sa pungsod. Sila ang utok sa pagmaniobra agud bag-ohon ang pundamental nga laye sang pungsod paagi sa Cha-cha. Gusto nga palawigon ang pagpabilin sa poder kag buksan ang ekonomiya sang pungsod para sa interes sang mga dumuluong nga kapitalista. Ginsakripisyo ang sobereniya kag seguridad sang pungsod kag nagbutang sa katalagman sa kabuhi sang pumuluyong Pilipino batok sa mga imperyalistang agresyon bangud sang hilway nga presensya sang 19 ka mga baseng militar sang US sa pungsod (siyam ka deklarado kag napulo ang indi deklarado) sa idalom sang Enhanced Defense Cooperation Agreement (EDCA) kag Visiting Forces Agreement (VFA).

Dikta sang imperyalismong US nga gamiton ang pungsod Pilipinas paagi kay Marcos Jr nga ipiton ang China bilang karibal kag kaaway sini. Ginpanginpuslan man sini ang isyu sa pagdepensa sang sobereniya sa West Philippine Sea. Sa esensya, gamiton sang US ang reaksyonaryong armadong pwersa sang pungsod agud pasingkion ang inter-imperyalistang kinagamo. Suno sa kasaysayan, kahibalo ang US nga matambok ang kondisyon sa liwat nga pagluntad kag pagpanumbalik sang proletaryong rebolusyon sa bug-os nga kalibutan kon padayon nga nagasingki ang inter-imperyalistang kinagamo. Gani, nangin mahinalungon sa pagpanutsot ang US sa iya mga kolonya kag malakolonya nga mga pungsod kaangay sang pungsod Pilipinas.

Pasulit-sulit nga nagamando si Marcos Jr bilang chief of staff sa Armed Forces of the Philippines (AFP), Philippine National Police (PNP) kag NTF-ELCAC nga dugmukon ang CPP-NPA-NDF. Ang pasistang makinaryas sang estado nga AFP kag PNP, ginpalapnag ang puguso nga deklarasyon sang State of Internal Peace and Security (SIPS) agud gilayon hatagan prayoridad ang panggwa nga seguridad.

Ang pagpamatok ni Marcos Jr sa China sa mando sang imperyalismong US, ang nagadabok sa naga-igting nga kontradiksyon sang magkaribal nga mga imperyalistang pungsod. Kadungan man ang paghingabot sa pamilya Duterte bilang nagapanguna nga mangin kasumpong sa pulitika. Ginmaniobra sang Marcos-Romualdez ang pagdis-og sa pamilya Duterte agud punggan ang pagkonsolida nga indi makaporma sa pulitika sa palaabuton nga 2025 mid-term election. Ginsakyan man sini ang lapnagon nga reklamo kag sentimyento sang pumuluyo ilabe na ang mga biktima batok sa maduguon nga kampanyang drug war sang nagligad nga rehimeng Duterte. Sa kabilugan, wala na sang Uni-Team sa hubon sang Marcos kag Duterte kundi isa na ka antagonistiko nga kontradiksyon kag pagkarera sa pulitika sang magkaribal kag pareho korap, inutil, tuta kag pasista. Wala sang malauman nga masanag nga buasdamlag ang pumuluyong Negrosanon kundi dugang nga pagpaantus.

Ginalaragway sang Negros ang nagalala nga krisis sang sistema sang katilingban Pilipino. Nagasalig ini sa atrasado nga sistema sang ekonomiya nga monocrop sang industriya sang kalamay. Nagpabilin nga atrasado ang mga kagamitan sa produksyon. Pipila lang ang nagagamit sang mekanisado nga mga kagamitan kaangay sang traktora, samtang ang kapin sa 380,000 nga mga mamumugon sa kampo lakip na ang masobra sa 25,000 ka mga sakada halin sa iban nga probinsya nga mga organisado nga pwersa sa produksyon sang tubo ang nagpabilin pa nga nagagamit sang mga ispading, guna, karabaw kag iban pa nga mga atrasadong kagamitan.

Kadam-an sa ila ang biktima sang barato nga balor sang kusog-pangabudlay, mapiguson nga sistemang pakyaw, wala sang benepisyo kag mapiguson nga sistema sa pagtrabaho sa iskema sang kontraktwalisasyon.

Naga-antus man sang tuman ka nubo nga sweldo kag wala sang benepisyo ang 18,000 ka mamumugon sa mga sentrales sa isla sang Negros. Bisan pa nga nagdugang sang P35 ang kada adlaw halin sa daan nga P480 nga minimum nga sweldo sa Western Visayas, indi gihapon makatrespaser sa nagaluntad nga implasyon sang pungsod. Biktima man sila sang lapnagon nga kontraktwalisasyon. Halos 80% sa hubon-pangabudlay ang mga kontraktwal samtang 20% lamang sini ang makabig nga permanente ang istatus sa pagtrabaho.

Sa pihak nga bahin, ang 13 ka mga sentrales sa isla ang ginapanag-iyahan kag ginadominar sang mga Multi- National Corporations (MNC’s) kag dalagkong burgesyang komprador kaangay sang pamilya Tan, Chan, Lopez kag Gokongwei. Ang isla sang Negros nangin gatasan sang ila dalagko nga ganansya gikan sa pagpanghimulos sa resorsa kag kusog-pangabudlay. Sila ang nagamonopolyo sa industriya sang kalamay, nagakontrol sa presyo sa merkado kag pagbaligya sa luwas sang sini nga produkto. Bangud sang kasakon, imbolbado man sila sa pagpatuman sang mapiguson nga sistemang aryendo kag iban pa nga iskema kag paghigot sa mahimuslanon nga pagpautang kag iban pa nga kinaiya sang usura agud agawon ang duta sa kamot sang mga mangunguma.

Samtang nagapagusa ang mga dalagkong komprador burgesya kag despotikong agalon mayduta sa ila wala kabulusgan nga paghakot sang ganansya kag pagsabat sang ila personal nga mga luho, baliskad naman ang nadangtan nga sitwasyon sang magagmay nga mga plantadores sang tubo. Sila ang nagapanag-iya kag naga- ugmad sang lima ka ektarya paubos nga duta, naga-atubang sila sang grabe nga krisis sa ekonomiya sa kada adlaw bangud sang pagtimbuok sang presyo sang krudo, gasolina, mga pyesa kag arkila sang kagamitan panguma, abono, pestisidyo kag tuman ka barato nga presyo sang kalamay. Labi na ang pag-agi sang asud-asod nga kalamidad kaangay sang El Niño, La Niña kag pag-atake sang mga armyworms kag iban pa nga mga peste resulta sang climate change nga nagtuga sang dako nga kahalitan sa ila mga pananom.

Ang mga mamumugon sa uma ang naga-antus sa barato nga kusog-pangabudlay. Haluson ini makakaon sa tatlo ka beses sa kada adlaw bangud kalabanan ang nahigot sa P250-350 ang inadlaw sa sweldo bangud sang indi pagpatuman sang kadam-an nga mga dalagkong plantadores sang P480 nga minimum nga sweldo. Nangin lapnagon ang paggamit sang asyendero sang mga kontratista sa pagpatigayon sang pakyaw nga sistema sang obrahanay. Ini ang nagadula sang responsibilidad sang mga asyendero sa ila mga mamumugon kag nagatuga sang paggamay pa gid sang kita sang mga mamumugon sa kampo kag mangunguma. Kon may inadlaw man sa sweldohanay, duha tubtob tatlo nalang ka adlaw ang pagtrabaho sa sulod sang isa ka semana. Ang ini nga kinaiya sa pagtrabaho sang mga obreros sa kampo ang wala man kinalain sa iskema sang pagtrabaho sang mga trabahador sa mga kahumayan.

Sa tunga sang nagalala nga krisis sa industriya sang kalamay sa isla sang Negros, padayon nga nagapuga sang dalagko nga ganansya ang mga dalagkong agalon may duta. Gintulod sini nga ipatuman ang land-use conversion, pagkambyo sang katubuhan sa pangkomersyal nga gamit pareho sang solar farms, plantasyon, real- estate, eco-tourism, pagpatindog sang mga airport kag iban pa.

Sa pihak nga bahin, wala man sang kabulusgan ang mga dalagkong komprador agalon may duta kag despotikong asyendero kasosyo ang mga lokal nga pulitiko sa paghugakom sang malagpad nga kadutaan upod sa reaksyunaryo nga ahensya sang gobyerno. Bisan sa peke nga implementasyon sang reporma sa duta sa Negros Occidental, imbes nga ipanagtag ang 30,311 ektarya nga duta sa mga ARB’s halin sa wala pa napanagtag nga 235,725 ektarya, mas ginaduso sini ang mga kontra-mangunguma nga mga patakaran pabor sa mga kahimbon nga nagahari nga sahi sang mga agalon mayduta, burgesya komprador kag mga burukrata kapitalista.
Diri sa Negros, tuman ka hinay ang implementasyon sang Comprehensive Agrarian Reporm Program (CARP) kabangdanan nga madamo pa ang wala nakabaton sang Certificate of Land Ownership Award (CLOA).

Ginabulubanta, nagpabilin sa pito kada napulo ka mga mangunguma ang wala sang kaugalingon nga duta nga ginatalauma. Imbes nga ipatuman ang matuod nga reporma sa duta, ang mga mangunguma sa isla lakip na ang mga ARB’s ang labi pa gindingutan sang kaugalingon nga pagpanag-iya sang gamay nga parsela sang duta. Ang World Bank amo ang nagabugaw sa madasig nga pag-agaw sang duta sang mga mangunguma paagi sa pagpautang sang P20.4 bilyon agud mapatuman ang Support to Parcelization of Land for Individual Titling (SPLIT) sang Department of Agrarian Reform. Ginsuportahan pa gid ini sang mando ehekutibo ni Marcos Jr nga New Agrarian Emancipation Patent Act (NAEA) nga nagapanas sang utang sang mga ARBs agud mapadasig ang rekonsentrasyon sang kadutaan sa nagahari nga sahi kag dumuluong kapitalista.

Ginpasingki ang implementasyon sang pribatisasyon sang kadutaan sa isla sang Negros. Ang kabukiran, kasyudaran kag kabaybayunan gikan sa sur tubtob norte nga bahin sang isla, hugot nga ginpatuman ang reklasipikasyon sang mga kadutaan kag reklamasyon sang kabaybayunan. Sa Candoni, Negros Occidental, nagkunsabuhay ang Hacienda Asia Plantation Incorporated (HAPI/Araneta), DENR kag pamilya Consunji upod sa lokal nga gobyerno sa pagpatuman sang pagpatanom sang oil palm nga nagasakop sang 6,652.32 ektarya sang lasangon kag pampubliko nga mga kadutaan sang banwa. Magadislokar man ini sang palangabuhian sang kapin sa 1,000 ka mga mangunguma sa Brgy. Agboy, Payawan kag Gatuslao sang Candoni kag Brgy. Damutan sang Hinobaan, Negros Occidental. Ginsakop man diri ang 4,000 ektarya nga dutang ginpanubli sang Tribu Magahat kag Tribu Bukidnon.

2. Pabaskugon ang pagpakig-away gerilya paagi sa pag-angkon sang inisyatiba sa absoluto nga pagpamuno sang Partido

Sini nga tuig, nagaplano ang Silinga Mining Corporation nga magbalik operasyon sa pagmina sa ila ginbayaan nga mga lugar sa Sipalay City, Negros Occidental kag iban pa nga kasikbit nga banwa. Ginsugdan na ang eksplorasyon sining bulan sang Nobyembre. Samtang, nagapadayon naman ang mineral exploration sang Midan Corporation sa mga banwa sang Santa Catalina, Siaton kag Basay sa Negros Oriental.

Nagpasar na sang ordinansa ang syudad sang Kabankalan, Negros Occidental kaangot sa reklasipikasyon sang mga kadutaan nga nagasakop sang 2,110.7882 ektarya sa mga Brgy sang Orong, Camansi, Hilamonan kag Talubangi. May mga bahin na nga naimplementar samtang may iban nga napa-untat bangud sang wala-tuo nga pakigbato sang mga pumuluyo. Sa pihak nga bahin, ang Central Philippine State University (CPSU) ang ginpartineser sang lokal nga gobyerno para patindugan sang mga opisina sang Negros Island Region (NIR).

Sa Central kag North Negros, madata man ang operasyon sang mga kwari nga nagaguba sang manggad sang mga kasubaan kag nagabutang sa katalagman sang kabuhi sang mga residente kag nagahalit ini sa mga pananom sang mga mangunguma. Bulnerable sila nga mangin biktima sang mga trahedya kaangay sang pagbaha, pagkatiphag sang duta kag iban pa nga mga kalamidad. Amo man ang malaparan nga plantasyon sang komersyal nga mga kakahuyan sang Mosser Environment Corporation. Ginakamasaan ang dunang manggad sang kadutaan kag kalasangan sang mga banwa sang Binalbagan kag Isabela amo man sa mga syudad sang Himamaylan kag Silay.

Tudo-buylo man ang operasyon sang mga solar farms sa duha ka probinsya sa isla. Ginasakop sini ang indi magnubo sa 500 ektarya sang duta sa San Carlos City, La Carlota City, Cadiz City sang Negros Occidental kag Mabinay, Negros Oriental. Sa karon, padayon pa ang konstruksyon sang pito ka solar farm projects sa siyam ka banwa kag syudad lakip na sa sentrong syudad sang Bacolod.

Sandig sini nga sitwasyon, sa mga kaumahan, mas naga-antus ang mga mangunguma sa tanan nga patag sang produksyon bangud sang nagapadayon nga paglala sang pyudal kag malapyudal nga pagpanghimulos. Ang tuman ka puraot nga kabuhi sang mga mangunguma mas naggrabe pa itandi sa nagligad nga mga tinuig. Ang kagutom kag kawad-on sang trabaho ang nagtulod sa kadam-an nga mga mangunguma kag mamumugon sa uma nga magpasimpalad sa syudad agud magpangita sang trabaho. Napamatud-an nila nga wala katibawasan ang ila pagpangabuhi bangud sobra pa nga krisis ang ila nadangatan.

Partikular sa Bacolod City, ginsugdan na ang implementasyon sang peke nga “Super City” sa pagpanguna ni Mayor Albee Benitez. Ginpaidalum sa reklamasyon ang 1,090 ka ektarya nga higad-baybay sa mga Brgy. sang Banago kag Pahanocoy. Samtang sa Brgy Granada, 240 ektarya sang duta ang gindebelopar para sa komersyal nga gamit sang produktong agrikultural kag malapit katunga sini nabakal na sang SM kag lokal nga gobyerno sang Bacolod. Samtang sa Negros Oriental, ginahandum ni Mayor Felipe Remollo nga himuon “Smart City” ang Dumaguete City. Target ang masobra 700 ektarya para sa reklamasyon sang duha ka pantalan diin magadulot ini sang lapnagon nga demolisyon kag dislokasyon sang pumuluyo sa sentrong syudad sa Negros Oriental.

Dismayado ang Negrosanon sa inutil nga pangserbisyo sang pribadong kumbuyahan. Kaangay sang pagpribatisa sang Prime-water sang pamilya Villar sang BACIWA sa Bacolod, Cadiz kag Himamaylan City nga mga water- district utilities. Ginpaidalum man sang probinsya ang Negros Bulk Water Project ni Gov. Eugenio Bong Lacson sa Malugo River kag Embang River sa North Negros sa Private Public Partnership (PPP) nga ginpondohan sang US Agency for International Development (US-AID) kag Asian Development Bank (ADB) kag mga DKB. Subong man, ginpribatisa ang Central Negros Electric Cooperative (CENECO) sang pamilya Razon pakadto sa Negros Electric Power Corporation (NEPC). Dako man nga epekto sang dislokasyon sa adlaw-adlaw nga pangabuhian sang mga drayber kag gagmay nga opereytor ang pagpatuman sang Jeepney Modernization Progrman.

Apektado man sang aktwal nga sitwasyon ang mga kabataan kag kababaenhan. Ang ispesyal nga sektor sang kabataan mas nagdako pa ang porsyento sang wala nakapadayon sa pag-eskwela tungod nagtimbang sa ginikanan sa pagpangita sang palangitan-an.

Ginlatum sang gutom kag kapigaduhon ang kadam-an nga Negrosanon. Gindingot sa ila ang pag-angkon sang sandigan nga mga kinamatarung kaangay sang pagkaon, beste, edukasyon kag ikaayong-lawas. Kubos kag ulipon ang sitwasyon tungod sa kawad-on kag kakulang sang trabaho. Bangud sang kakulang sang serbisyo sosyal gikan sa gobyerno, dugang nag-antus sila sa naga-abot nga mga kalamidad. Ang El Niño, nagtuga sang dako nga kahalitan sa mga tanum nga humay, mais, tubo kag ang asud-asod nga bagyo Ferdie, Gener, Helen kag Kristine nga nag-igo sa rehiyon, nagdulot man sang mga kahalitan sa agrikultura, pangisdaan kag kasapatan. Samtang, natabo man ang paglupok sang bulkan Kanlaon sadtong Hunyo 3 kag Disyembre 9. Nagtuga ini sang masobra binilyon nga kahalitan sa agrikultura, pangisdaan kag kasapatan sa mga banwa kag syudad sang Canlaon sa Negros Oriental, La Carlota City, Bago City, Himamaylan City, banwa sang Hinigaran, Pontevedra, Murcia, Moises Padilla ilabe na gid ang banwa sang La Castellana tanan sang Negros Occidental. Linibo ka pumuluyo ang nadislokar kag yara sa mga sentro sang ebakwasyon nga nagahulat sang daw bao nga ayuda sang gobyerno.

Ginpasingki sa isla ang pasismo sang estado. Ang Armed Forces of the Philippines (AFP) sa idalom sang 3rd Infantry Division, Philippine National Police (PNP), National Task Force-Elcac (NTF-Elcac) kag paramilitar ang gingamit sang burgesya komprador kag burukrata, haciendero-agalon mayduta bilang mapintas nga instrumento agud ipatuman ang de facto martial law sa isla. Kaangay ni Duterte, padayon nga ginmando sang rehimen US-Marcos ang focused military operations (FMO) kag Retooled Community Support Program (RCSP) nga may impyunidad. Sa karon, padayon nga nagasabwag sang kahadlok kag dugang nga kalisod sa bilog nga isla ilabe na sa kaumahan sa mga komunidad sang mangunguma kag mamumugon sa uma ang nakaposisyon nga anum ka Infantry Batalion sang AFP sa idalom sang 302nd Brigade (11th IB, 15th IB, kag 47th IB) 303rd Brigade (62nd IB, 94th IB kag 79th IB) kag mga ispesyal nga tatlo ka batalyon sang PNP nga pwersa (Special Action Force, Regional Mobile Force kag Regional Public Safety).

Wala man sang kaseguruhan ang ila kabuhi sa kamot sang pasistang AFP, PNP kag paramilitar sa mga komunidad nga ila nahamtangan. Nagbutyog pasaka ang isip sang pagpanglapas sang tawhanon nga kinamatarung indi lang sa kaumahan pati na sa mga sentrong banwa kag syudad. Matingkad sa gihapon ang ekstrahudisyal nga pagpamatay iligal nga pagpang-aresto, tortyur, pagpangkastigo, pagpamahug, pagpamomba kag iban pa nga direkta ginahimo sang pasistang militar, kapulisan, paramilitar kag iban pa nga armadong hubon sang estado. Sa idalom sang rehimen Marcos II, gikan Enero-Disyembre naglab-ot sa 243 sang lain-lain nga kaso sang pagpanglapas sang AFP kag PNP kag iya mga paramilitar sa internasyunal nga makitawhanon nga laye kag sa Comprehensive Agreement on Respect for Human Rights and International Humanitarian Law (CARHRIHL). May 19, 560 ka mga biktima upod na diri ang 3,666 ka mga menor de edad nga kabataan.

Mas ginpalanog sang AFP, PNP kag NTF-Elcac ang ila mga kabutigan kag pagpatalang paagi sa ila mga tagtaghol. Pilit nga ginatursi ang mga datus, sirkumstansya sang paghitabo kag mga panaysayon nga nagmadinalag-on ang ila kontra-insurhensiya nga kampanya sa Negros. Ang nakomiter nga mga krimen sang militar batok sa pumuluyo kag inosenteng sibilyan kaangay sang tortyur, pagpamatay kag iban pa, ang muklat man nga ginatabunan sa pagdeklarar sang peke nga mga armadong engkwentro. Halin Enero-Disyembr, nakarekord sang 20 ka peke nga engkwentro. Sa 16 ka mga biktima sa ekstrahudisyal nga pagpamatay sa sini nga tuig, siyam (pito ka mangunguma, duha ka hors de combat) sa ila ang gindeklarar nga napatay sa peke nga engkwentro. May duha ka hitabo sang pagpamomba halin sa kahawaan sa Trangkal Range sa Escalante City sadtong Pebrero 22 kag Brgy. Agboy, Candoni sadtong Nobyembre 24.

Ginagamit sang AFP ang Barangay Development Program (BDP) sa pagpanginto nga “para sa katawhan” kag pag-engganyo sa peke nga pagpasurender sang mga inosenteng mangunguma, mamumugon sa uma kag mga sibilyan paagi sa pagpasulod sa Enhanced Comprehensive Local Integration Program (E-CLIP). Ang BDP, E-CLIP kag mga badyet para sa NTF-ELcac sang mga lokal nga gobyerno kag ahensya ang nahimo nga gatasan sang mga korap nga heneral kag burukrata sa isla. Sa likod sang ila pagpahambog nga napukan kag naghuyang na ang NPA sa isla, wala man untat ang pagbubo sang pondo para sa kontra-insurhensiya nga kampanya.

Karon man nga tuig, labi pa ang pagtaas sang tensyon sa West Philippine Sea. Samtang naga-igting man ang banggianay sa tunga sang magkaribal nga imperyalismong US kag China. Ang ido-ido sang US nga rehimen Marcos Jr, ang nagbutang sa peligro sang kabuhi sang pumuluyong Pilipino. Gingamit sang US ang pungsod nga base sang iya nga tropa kag mga kagamitan militar. Ginhimo nga hampanganan ang kadutaan kag kadagatan sang pungsod paagi sa paglunsar sang mga joint patrols sa West Philippines Sea kag garbuso kag makahalalit nga mga Balikatan exercises. Agud lubos nga magamit ang bug-os nga tropa sang AFP batok sa karibal nga imperyalistang China paagi sa commander in-chief nga si Marcos Jr, ginmando ang pagpatuman nga tapuson na ang insurhensiya sa pungsod sa pasistang tropa. Partikular sa isla sang Negros, agud mahinabunan ang kahuy- anan kag kapaslawan sang Visayas Command (VISCOM) kag 3rdID sa pagpukan sa bilog nga rebolusyonaryo nga kahublagan, naghingagaw ini sa pagpaidalom sa isla sang Negros sa State of Internal Peace and Security (SIPS) matapos magtikal nga nadismantol na ang mga larangan gerilya sa isla. Indi matuod ang kalinong sa isla kundi nangin target ang pumuluyo sang pasismo kag terorismo sang mga reaksyonaryo kag mersenaryo nga armadong pwersa.

Repleksyon sang mas nagadalom kag naga-igting nga kontradiksyon sang hubon Duterte-Marcos ang pamulitika sa isla sang Negros. Kabahin sang maniobra kag pagposisyon sang tagsa ka hubon agud dominahon ang poder ang nagalapit nga 2025 mid-term election. Panugod ini nga tikang kag pagpulso sang magkaribal sa pulitika agud hugakumon kag monopolyuhon ang posisyon sa palaabuton nga 2028 presidential election.

Sa Negros, pilit nga ginaduso sang mga lokal nga burgesya komprador-burukrata kag asyenderong agalon may duta ang laye sa Kongreso sa pagtukod sang Negros Island region (NIR) sa interes sini nga pagmonopolyo sang ekonomiya kag pulitika sa rehiyon. Partikular sa NIR, gusto ini dominaran kag kontrolon sang Negros Occidental nga mga burukrata kapitalista sa pagpanguna nanday Gov. Eugenio “Bong” Lacson kag Mayor Albee Benitez sang Bacolod City. Sin-o man ang ara sa poder sa Negros Occidental bilang dominante nga ginagamhan sang mag dalagkong agalon mayduta kag dalagkong komprador burgesya amo man ang magagahum sa bag-o nga gintukod nga NIR dira sa Negros Oriental kag Siquijor.

Ang “balimbing” kag “kapit sa patalim” nga kinaiya sang mga burukrata kag mga tradisyunal nga politiko (TRAPO) sa isla agud makapabilin sa poder, kag lubos man nga ginpanginpuslan sang blokeng Marcos-Romualdez. Nangin lapnagon man ang dinastiya-pulitikal nga pipila lang ka pamilya ang nagabulos-bulos sa poder kaangay nila Benitez-Lacson-Marañon-Alvarez-Zayco nga hubon sa Negros Occidental kag sa Negros Oriental naman sila Sagabarria-Teves-Reyes-Limkaichung-Degamo.

Sa kabilugan, bisan ano pa man, wala sang malauman nga masanag nga buasdamlag ang kadam-an nga pumuluyong Negrosanon. Nagapabilin nga ilusyon ang pagbag-o nga ginapangako sang rehimen US-Marcos Jr sa pumuluyo. Ginabubu-an sang tinipik nga ayuda ang naga-antus nga masang anakbalhas nga wala naman ginasabat sang panguluhan ang ugat sang problema sang kaimulon kag kagutom. Ginalingaw lang ini sang mga pangako kag mga kabuangan sang mga korap nga nagapungko sa poder kag burukrasya pareho sang pagpatalang kag pagpanginto sang “Bagong Pilipinas” sang rehimeng Marcos II.

Ang kongkreto nga sitwasyon nga nagaluntad sa isla ang nagapaindakal sa nagabalingaso nga bulkan sosyal sa Negros. Ang ginapabugal nga “Bagong Pilipinas” sang inutil nga rehimen kag lokal nga burukrasya, dugang nga nagapa-antus sa pigos kag ginahimuslan nga Negrosanon. Naga-indakal ang ila nga kainit kag kaugot nga nagtulod sa ila pagpakigbahin sa lain-lain nga porma sang paghimakas ilabi na ang armadong paghimakas para sa kaayuhan kag pagbag-o sang katilingban.

II. Determinado nga ginpamanuan sang Partido ang nagahinurusgan nga mga rebolusyonaryong Negrosanon sa pagpakig-away batok sa imperyalismo, pyudalismo, kag burukrata-kapitalismo

Determinado nga ginpamunuan kag ginpahulag sang KRPIN ang masa kag bug-os nga rebolusyonaryong Negrosanon agud atubangon ang mga mapanghangkat nga katungdanan kadungan sa pagpursige sa pagpatuman sang Kahublagan Panadlong sa kubay sang mga rebolusyonaryo. Wala duha-duha nga nakigsumpong ang masang Negrosanon kag rebolusyonaryong pwersa batok sa imperyalismo, pyudalismo kag burukrata kapitalismo sa tunga sang mapintas nga pagpatuman sang reaksyonaryong estado sang de facto martial law sa isla. Sa dalagan sang pagpakig-away, naka-angkon kita sang mga kadalag-an sa pihak sang mga pipila ka mga kakulangan nga nagkurit sang komprehensibo nga pag-uswag kag pagpa-abante sang demokratikong rebolusyon sang banwa paagi sa pangmalawigon nga inaway banwa.

Karon nga tuig, maukod nga gin-analisa sang Partido ang mga kahuyangan kag kadalag-an sa ideolohiya, pulitika kag organisasyon agud kuhaan sang mga bulawanon nga leksyon gikan sa aton pag-atras kag pagsulong sang nagliligad nga mga tinuig. Sa ginhiusa nga bag-ong kusog sang Partido, ginpamunuan kag nagbuylog ang KRPIN sa panugod nga pagtikang sa pagpangibabaw nga mag-abante padulong sa mas malambuon nga komprehensibong pag-uswag kag pagsulong. Ang kampanya sang pagbalik tuon sa mga sandigan nga prinsipyo sang Partido, pagsuma sang komprehensibong rebolusyonaryong inagihan kag paglunsar sang pagsaway kag pagsaway sa kaugalingon sang rehiyon, amo ang pinaka-esensya sang Kahublagan Panadlong nga panawagan sang Komite Sentral sang 2016 kag sa ika-55 nga Anibersaryo sang Partido sang nagligad nga tuig (2023). Paagi sini, pursigido nga ginpatuman sang mga responsableng kadre tubtob sa katapuan sang Partido ang pagpalig-on sang ideolohikal nga pundasyon sa giya sang Marxismo-Leninismo-Maoismo.

Sini nga tuig, nagmadinalag-on ang maukod nga pagbalik-tuon sang nasumada na nga 22 ka tuig nga rebolusyonaryong inagihan sang rehiyon. Nagserbe ini nga panukaran nga proseso sa pagdihon sang lima ka tuig (2017-2022) nga sumada sang KRPIN. Nagsubay sa maragtason nga inagihan sang rebolusyonaryong paghimakas sa isla, ilabe na ang paghatag sang tum-ok sa kaundan kag esensya sang lima ka tuig nga inagihan sa aspeto sang armadong paghimakas. Nakatipon kita sang mga bulawanon nga leksyon bilang mabakod nga basehan sang pangkabilugan nga plano kag direksyon nga dugang makapalig-on sa pundasyon sang aton Partido.

Sa partikular, positibo ang kolektibo nga pagpaninguha sang mga organo nga komprehensibo masuma ang ila mga rebolusyonaryong inagihan sandig sa tagsa sini nga nasakupan. Panugod nga kadalag-an sa mga prenteng gerilya ang kolektibo nga pagtigayon kag paghim-os sang pagsuma sa tanan nga aspeto sang pagsulong kadungan man sang kritikal nga pagtumod sang naamot nga mga kahuyangan sang indibidwal nga kabangdanan sang pag-atras. Subongman, ang pag-apresyar sang mga positibong kontribusyon nga nagpa-abante sa kahublagan sa paglunsar sang tampad nga pagsaway kag pagsaway sa kaugalingon. Ginasigahum nga ang mga leksyon ang makaabot man sa masang katapuan sang Partido para sa dululungan nga pagmartsa sa pagpangibabaw.

Kadalag-an man ang pagkonsolida sang mga katapuan sang lain-lain nga organo kag yunit sang Partido sa tunga sang wala-puas nga atake sang kaaway sa pagpatigayon sang FMO kag RCSP. Natigayon nga nalunsar ang tatlo ka lebel nga kurso sang Partido sa nagkalain-lain nga organo kag masang katapuan sandig sa nabalay nga plano sa edukasyon sang rehiyon. Nakapatuhaw kita sang mga bag-ong mga instruktor, nakarekrut sang bag-ong katapuan sa Partido kag labaw sa tanan malig-on nga nag-armas sa Partido sang mga sandigan nga prinsipyo gamit ang siyentipiko kag rebolusyonaryong panindugan,panan-awan kag metodo agud atubangon kag pangibabawan ang bag-o kag mapanghangkat nga sitwasyon. Sa pagsabat kag pagpatuman sang Kahublagan Panadlong nga pangkabilugan nga panawagan, nakalunsar kita sang kolektibo nga pagtuon sa mga dokumento sang Kahublagan Panadlong agud pangibabawan ang suhetibismo sa dagway sang empirismo bilang nagapanguna nga sakit sa ideolohiya nga naglatum sa mga katapuan sang Partido sa rehiyon. Balik nga gintun- an man Ang Aton Gilayon nga Hilikuton, Tadlungon ang mga Kasaypanan kag Tukoron Liwat ang Partido, Partikular nga Kinaiya sang Inaway Banwa sa Pilipinas kag Programa sang Demokratiko nga Rebolusyon sang Banwa kag ang Konstitusyon kag Programa sang Partido Komunista sa Pilipinas agud hakson sang hugot ang aplikasyon sang teorya kag mga sandigan nga prinsipyo sang rebolusyon Pilipino sa kabilugan kag kongkreto nga kahimtangan sa isla sang Negros sa partikular.

Daku nga bulig ang paglubad sa hiligaynon sang mga dokumento, kurso kag pagtulun-an para sa madasig nga paghangop sang mga katapuan sang Partido, ilabi na ang halin sa mga sandigan nga sahi.

Praktikal kag maundanon nga nakabulig ang kolektibo nga pagtuon sang Rebolusyon, kag mga memorandum nga ginpapanaug sang pungsodnon nga sentro sa pagpangibabaw sa sayop nga kagawian sa pagpakitid sa kaugalingon kag sobra nga konsentrasyon nga nagbunga sang madamo nga kahalitan sa baseng masa kag bug- os nga rebolusyonaryong kahublagan ilabe na sa hanay sang NPA kag mga kadre sang Partido sang nagligad nga mga tinuig.

Kadalag-an ang pagrepaso kag pagpalambo sang naabot nga sosyal nga imbestigasyon kag pag-analisa sa sahi sang rehiyon agud mapadalman ang pagtuon sa balanse sang pwersa. Maukod nga gintun-an kag gin-analisa ang mga datus para tukion ang mga nagapanguna kag sekundaryo nga mga problema, isyu kag kontradiksyon sang mga sahi sandig sa isa ka panahon kag panghitabo. Positibo ang pagpaninguha nga mahim-os sang mga larangan gerilya ang neoliberal nga pagpang-atake sa kada lugar nga nasakupan kag padayon nga pagtuon sini kag sang pulitikal nga aspeto agud epektibo nga mapatuman ang mga plano nga gintalana sa isa ka panahon upod na ang kadalag-an kag benepisyo sang malapad nga masa.

Sa tunga sang pasulit-sulit kag peke nga dedlayn sang AFP/PNP kag NTF-Elcac nga tapuson ang insurhensiya sa isla, padayon nga ginapatuman ang integradong hilikuton sang armadong paghimakas, agraryong rebolusyon kag pagtukod sang baseng masa sang NPA sa lima ka larangan gerilya sa idalom sang Apolinario Gatmaitan Command-New People’s Army (AGC-NPA)- Negros Island Operations Command nga absoluto nga ginapamunuan sang KRPIN. Bisan pa man, naabot ang pagdako sang mga nahulagan nga lugar kumparar sa nagligad nga tuig. Nakatukod sang madamo nga organisasyon masa bilang binhi sang organong gahum pulitika upod ang linibo-libo nga katapuan sini. Kadungan man ang wala kahubasan nga suporta sang masa nga nangin katimbang sang Partido kag NPA sa pagpukaw, pag-organisa kag pagpahulag sa masa.

Relatibo napangibabawan sang masang katapuan ang kahadlok kag kakugmat nga ginpalapnag sang mapintas nga estado paagi sa pagpahulag sang organisasyon masa kag paglunsar sang kampanyang konsolidasyon. Subongman, ang paghiwat sang sekreto apang maundanon nga mga pulong masa, pagtasa kag paglunsar sang mga rebolusyonaryong pagtuon sa mga kurso sang Pambansang Demokratikong Paaralan, mga pahayag sa ika-55 nga Anibersaryo sang CPP, NPA, KRPIN sa Ang Paghimakas, Ang Bayan, Rebolusyon kag Liberation nga mga rebolusyonaryong publikasyon kag iban pa.

Dako nga kadalag-an ang sustinido nga propaganda sa bug-os nga rebolusyonaryo nga kahublagan sa pagbinuligay sa tit-for-tat nga pagpakig-away batok sa black-propaganda kag mga kabutigan sang AFP, PNP kag NTF-Elcac. Wala hulot sa publiko ang pagpanginto, pagpatalang kag pagpanghaylo sang estado sa pagtanyag sang peke nga amnestiya, E-CLIP kag iban pa nga mga padugi sa pagpasurender paagi sa ila mga tagtaghol.

Ang subong nga tuig nga paghilway sa mga detinidong pulitikal kaangay sang Himamaylan 7 kag isa pa ka ulihi nga ginpaguwa nga kabahin man sang sini nga kaso, anum ka mangunguma sa Escalante City kag NDF consultant nga si Ramon Patriarca kag duha ka kaupod niya, ang naghublas sang mga kabutigan sang hinimu- himo nga mga kaso sang AFP, PNP kag NTF-Elcac para pahipuson ang mga nagahimakas nga pumuluyong Negrosanon. Sila ang biktima sang pagpangkastigo, mental torture, pagtanum sang mga ebidensya, iligal nga pagpang-aresto kag iban pa nga tipo sang pagbayolar sa tawhanon nga kinamatarung. Pilit nga ginpanglupot sila sa karsel nga wala sang basehan kag ginpa-antus ang mga ini sang halos duha tubtob lima ka tuig sa bilangguan nga nagdislokar sang ila pangabuhi upod sa ila mga pamilya.

Subongman, ang manipestasyon sa pagpatuman sang martial law sa sentrong syudad, pareho sang natabo nga pagpamomba sang tubig, pagpangharas, iligal detensyon kag pagpang-aresto sa mga drayber kag operator nga nagpatigayon sang aksyon protesta batok sa kontra-pumuluyo nga jeepney modernization kag pagkansela sang ila mga prangkisa sang Septyembre 18 sang mga pasista nga kapulisan sang Bacolod.

Samtang yara ang bagyo sang pasismo kag terorismo sang estado, nagaluntad man ang masingki nga pagpanghimulos kag pagpamigos sa pumuluyong Negrosanon.
Naglanog sa bug-os nga isla kag pungsodnon nga sakop ang makatarunganon nga paghimakas sang Negrosanon.

Nagkurit sang mga kadalag-an ang asud-asod nga pagmuntar sang mga aksyon masa, rali-protesta kag iban pa nga porma sang paghimakas masa sa kaumhan kag kasyudaran. Paagi sa linyang masa, aton gindala sa dalanon bilang patag-awayan sa ligal demokratiko nga paghimakas ang interes sang masa. Ini ang nagtay-og sa reaksyonaryong estado kadungan sa nagalanog man nga singgitan sang mga mangunguma kag mamumugon sa uma sa pagpatuman sang repormang agraryo. Nagakahulugan ini sang kumplimentasyon sang kontra-pyudal kag kontra-pasismo nga linya sang paghimakas sa kaumahan sa kontra-imperyalista kag kontra-pasismo nga linya sang paghimakas sa kasyudaran.

Nangin signipikante man ang hulag sang intelihensya, patriyotiko kag demokratikong pwersa ilabe na ang tawong-simbahan sa pagpanawagan nga ipadayon ang peace talk agud sabton ang ugat sang problema sa armadong konplikto kag nagaluntad nga gyera sibil sa pungsod.

Sa tunga sang mga sakripisyo kag kabudlayan sa pagpasulong sang armadong rebolusyon, napunggan ang habyog nga paatras. Sa baylo, nagdako ang isip sang NPA subong nga tuig kumparar sa nagligad nga tuig. Nagluntad ang bag-ong kusog nga may kumpyansa sa tunga sang mga Pulang hangaway bangud sang naabot nga pulitiko-militar nga paghanas kag konsolidasyon. Nangin kabuhi na sang NPA ang adlaw-adlaw nga paghanas pulitiko-militar kaangay sang crash course sang Sandigan nga Kurso Militar, literacy-numeracy, instruksyonal kag hilikuton propaganda. Signipikante nga nagpapel ang NPA sa iya sentral nga katungdanan ilabe na ang paglunsar sang mga atritibo kag anihilatibong taktikal nga opensiba. Nagsabat man ini sa mga demanda nga hustisya sang pumuluyong Negrosanon nga biktima sang pagbayolar sang tawhanon nga kinamatrung. Sa sulod sang isa ka tuig, nakalunsar ang NPA sang 36 ka opensiba sa nagkalain-lain nga porma batok sa AFP, paramilitar, aset militar kag kaaway sa sahi. Madinalag-on nga nakakumpiska sang 17 ka mga armas, mga bala kag iban pa nga kagamitan militar nga sarang mapa-armas sa bag-ong rekrut nga hukbo sang banwa. Nagtuga ini sang mga kahalitan sa mersenaryo kag pasistang AFP kag mga aset sini nga indi magnubo sa 33 ang naagum nga kaswalti sa ila hanay. Samtang, ang NPA naka-agum man sang 7 ka depensibang aksyon kag pagkamartir sang 12 tanan ka Pulang hangaway.

Lubos nga gina-alagaran sang NPA ang katawhan. Sa balayon sang rebolusyonaryong hustisya, hilway man nga natungdan sang NPA ang paghatag sang patas kag nagakaigo nga kasolbaran sa mga problema kag kontradiksyon sa tunga sang masa, rason sang wala kahubasan nga suporta sang masa sa NPA kag bug-os nga rebolusyonaryong kahublagan sa isla. Sa ginasiling na, “wala bisan ano ang pumuluyo kon wala sila sang kaugalingon nga hangaway sang banwa.”

Ginpaslaw sang KRPIN ang pag-utod sang ulo sang Partido sa isla. Handum sang reaksyonaryong estado paagi sa ila mga pasistang makinarya nga punggan ang hugot nga paghiliusa kag pagbinuligay sang mga pumuluyo nga nagahimakas sa kaumahan kag kasyudaran. Ang pasismo kag terorismo nga kampanya sang papet nga rehimen batok sa CPP-NPA kag bug-os nga rebolusyonaryong kahublagan, ang militante man nga ginbatuan kag ginpangibabawan sang tanan nga katapuan paagi sa hugot nga angot sang KRPIN sa masang katapuan sang nagkalain-lain nga organo sang Partido nga may hugot nga pag-isa sa balayon sang demokratikong sentralismo.

Madinalag-on nga nakarekrut sang dugang nga mga bag-ong katapuan sang Partido nga handa maghulag kag magpamuno. Subongman, nakadebelopar kag nakapatuhaw kita sang mga kadre sang Partido agud absoluto nga pamunuan ang NPA nga mabutang sa husto nga dalan sang kadalag-an ang pangkabilugan nga linya sang demokratiko nga rebolusyon sang banwa paagi sa pangmalawigon nga inaway banwa nga may sosyalistang perspektiba. Kadungan sini ang militante nga pagpahulag sang sandigan nga alyansa sang sahing mamumugon kag mangunguma upod sa nagkalain-lain nga sektor sa bug-os nga isla nga ginapamunuan sang sahing proletaryado. Sila ang mga nagahinurusgan nga bag-ong kusog nga may kaisog, disiplina kag determinasyon nga makig-away agud lutuson ang parasitikong imperyalismo, pyudalismo kag burukrata-kapitalismo. Paagi sa mga gamhanan nga hinganiban nga CPP, NPA kag NDF, napanguluhan kag napanginpuslan nila ang mas paborable nga sitwasyon bunga sang malala nga krisis sang nagahuyango nga nagaharing sistema kag pabulusok nga krisis sang monopolyong kapitalismo.

Sini nga tuig, masiling naton nga parsyal pa nga kadalag-an ang aton naangkon sa patag sang ideolohiya, pulitika kag organisasyon (IPO). Apang sa aton tayuyon kag ululupod nga pagpakig-away, upod ang pag-isa sang malapad nga masa sa NPA nga absoluto ginapamunuan sang CPP, maangkon naton ang lubos nga kadalag-an nga may pungsodnon nga kahilwayan kag demokrasya batok sa tigreng-papel nga kaaway kag mapintas nga reaksyonaryong estado paagi sa lapnagon kag dasok nga pakig-away gerilya sandig sa nagalapad kag nagadalom nga baseng masa.

III. Angkunon ang kaisog nga may disiplina kag determinasyon para sa signipikante nga pagpangibabaw kag kadalag-an sa tanan nga bahin sang pagsulong

Sa sulod sang isa ka tuig nga pagpatuman sang Kahublagan Panadlong nga panawagan sang CPP paagi sa KRPIN, matuod nga nakapangibabaw kita apang indi pa signipikante ang aton pagbawi sa mga kahuyangan nga kabangdanan sang madamo nga kahalitan sa Partido, hukbo kag baseng masa. Nagaluntad sa gihapon ang nagkalain-lain nga dagway, porma kag tendensiya sang suhetibismo, wala-tuo nga opurtunismo, konserbatismo, burukratismo, ultra-demokrasya, liberalismo kag indibidwalismo.

1. Konsolidahon ang Partido sa Marxismo-Leninismo-Maoismo! Dugang kakahas nga isulong ang Kahublagan Panadlong!

Agud agumon ang signipikanteng kadalag-an, makahason kag padayon nga isikway naton ang suhetibismo sa dagway sang empirisismo. Pamatukan kag pangibabawan ang mekanikal kag empirisistang metodo kag pagsolbar sang mga problema. Gamiton naton ang MLM, ang diyalektika, ang laye sang kontradiksyon bilang matalom nga hinganiban sa pag-atubang sang masingki nga pagpamintas sang estado. Mapintas ang kontra- rebolusyonaryong gyera sang nagaharing reaksyonaryong rehimen nga kinahanglan naton nga paslawon. Ini man ang tunukon nga banas nga aton bagtason.

Ang pagpursige nga paghim-os kag pagpatagus sa tanan nga katapuan sang Partido sa isla sang lima ka tuig nga sumada ang magalaragway sang aton internal nga kapasidad kag ikasarang sa paglunsar sang rebolusyonaryong gyera batok sa kontra-rebolusyonaryong gyera sang rehimeng US-Marcos II. Samtang magserbe man ini nga giya sa aton wala duha-duha nga pagtadlong sang aton mga kasaypanan upod ang militante nga paghimakas para sa mas mataas nga halintang sang pagsulong.

Kinahanglan ang kritikal kag tampad nga pagsaway kag pagsaway sa kaugalingon sa espiritu sang “pagsalbar sang pasyente,” agud awayon ang pesimismo kag pasibo nga mga tendensiya; pagpanginpulos sa nagaluntad nga domestiko kag kalibutanon nga krisis dira sa paghatag sang mabug-at nga balor sa hilikuton SICA agud mapukaw, ma-organisa kag mapahulag ang kadam-an nga masa sandig sa ila nga suhetibong kusog agud angkunon ang ila mga demokratikong interes kag kinamatarung; ang pagpursige nga mahim-os ang popular nga bersyon kag mapatagus sa masang katapuan ang nagligad nga lima ka tuig nga sumada sang rehiyon nga makuhaan sang leksyon bilang armas para relatibo malampuwasan ang naagum nga kahalitan kag mga pag- atras.

Gani diri naton ginakonsolida ang aton Partido. Magapangalapkap kita sa dulom kon ang praktika masami ginahamulag kag wala gina-ubayan sang teorya; samtang wala naman sang pulos kon ang teorya ang ginahamulag man kag wala ginagamit nga ubay sa praktika. Kinahanglan nga ang teorya kag praktika hugot nga maga-angtanay. Magkabanggi man ang teorya kag praktika apang naghiliusa ang duha sa wala untat nga proseso sa paghulag. Ang teorya matransporma sa praktika sa mas mataas nga lebel samtang ang praktika matransporma man sa teorya sa lain kag mataas pa nga halintang. Ang ila pagkumbina wala sang untat; ang daan madula kag may bag-o nga magtuhaw. May teoritikal nga praktika kag may praktikal nga teorya.

Daku nga hangkat subong ang pagpangibabaw sa makitid, emperisista kag mekanikal nga metodo sa pagtuon sa mga problema sang aton inaway banwa sa isla. Apang kon mauyatan naton sang husto ang mayor nga yabe sa pagpatuman sang aton mga gintalana nga katungdanan, makapatuhaw kita sang madamo nga bag-ong rekrut, makadebelopar sang mga kadre sa Partido kag mga opisyal kag kumander nga hukbo sang banwa nga may kaisog, disiplina kag determinasyon padulong sa mas mataas nga pag-igpaw kag pangibabaw.

2. Pabaskugon ang pagpakig-away gerilya paagi sa pag-angkon sang inisyatiba sa absoluto nga pagpamuno sang Partio

Ang demokratiko nga rebolusyon sang banwa paagi sa pangmalawigon nga inaway banwa nga may sosyalistang perspektiba ang absoluto nga ginapamunuan sang abanseng destakamento sang sahing proletaryado nga CPP agud buslan ang mapiguson kag mahimuslanon nga nagahari nga sistema. Gamit ang mga gamhanan nga hinganiban sang CPP nga NPA bilang armadong pwersa sa pagrumpag sa nagahari nga sahi kag pag-agaw sang gahum pampulitika kag ang Pungsodnon Nagahili-ugyon nga Prente (PNP) nga amo ang magahi-usa sa pumuluyo agud iligwin kag wasakon ang kontra-rebolusyonaryo kag reaksyonaryong gahum sang lokal nga nagahari nga sahi kag imperyalistang agalon nila.

Ginapahulag sang Partido ang pungsodnon nagahiliugyon nga prente sa esensya bilang hinganiban para buyokon ang mga pwersa kag elemento nga nahanunga para maligwin ang mga bat-ulan sa hanay sang kaaway. Ang absoluto nga pagpamuno sang Partido sa NPA, amo ang pagpahangup sang sandigan nga mga prinsipyo kag halintang sang inaway banwa sa kada pag-uswag sang panahon dira sa paglunsar sang armadong paghimakas, agraryong rebolusyon kag pagtukod sang baseng masa bilang integrado nga hilikuton. Dapat hakson sang mga Pulang hangaway ilabe na sang mga Pulang kumander ang laye sang gyera para lutuson ang kaaway kag makakumpiskar sang mga armas gikan sa husto nga aplikasyon sang estratehiya kag taktika sang inaway banwa.

Ang aton rebolusyonaryong gyera ang antagonistiko nga pamaagi sa pagsolbar sang banggianay sa tunga sang mga ginahimuslan kag pigos nga mga mamumugon, mangunguma kag iban pa nga sahi batok sa dalagkung komprador-agalon mayduta, dalagku nga burukrata kag ila imperyalistang amo. Ang kasaysayan sang pagpanghimulos nagapakita nga indi ini magbiya sa entablado sang kasaysayan sa iya nga kagustohan, kinahanglan ini wasakon paagi sa demokratiko-rebolusyonaryong kahublagan sang pumuluyo.

Pagkatapos maresolbar ang mga pulitikal nga basehan sa gyera, ang magkasumpong nga pwersa magtinguha nga wasakon ang iya kaaway kag ipreserbar ang kaugalingon. Wasakon ang kaaway para mapreserbar ang kaugalingon kag ipreserbar ang kaugalingon para mawasak ang kaaway.

Sa subong bangud daku kag mabaskog ang kaaway, ang kaaway yara sa estratehikong opensiba; ang BHB tungod gamay pa kag mahuyang yara sa estratehikong depensiba. Ginasabat sang BHB ang estratehikong opensiba sang kaaway sa estratehikong depensiba. Ang kaaway pila ka beses nga daku kag mabaskog kumparar sa BHB sa hambalanon sa kadamuon kag kadakuon sang mga tawo, kadamuon kag kabaskogon sang armas, iban pa nga mabaskug nga mga kagamitan pang-gyera parehas sang mga kanyon, helikopter kag eroplanong pang-ataki, dalagku nga bomba, mga eroplano kag drones pangsarbeylans, bastante nga mga lohistika, pagkaon kag mga suportang serbisyo. Tuman ka layo ang kahimtangan sang BHB sa kaaway. Ang kaaway sobra ka superyor kag ang BHB tuman ka imperyor. Masiling naton nga away ini sang agalon nga manggaranon batok sa tuman ka imol nga ulipon.

Apang indi kita dapat magpangduha-duha kag makugmat sa superyoridad sang kaaway tungod una sa tanan, ang ginalunsar nga gyera sang kaaway kontra-rebolusyonaryo kag kontra-pumuluyo; nagapamatok sa interes sang malapad nga masa sang mga mamumugon, mangunguma kag iban pang ginahimuslan kag pigos nga sahi. Nagaprotektar sa interes sang isa ka porsyento nga mga dalagku nga komprador-asyendero-agalon mayduta kag dalagku nga mga burukrata batok sa mayoriya sang pumuluyo sa isla sang Negros. Gani sa ila mga kontra- insurhensya nga operasyon militar, ginahalitan ang mga mangunguma kag mamumugon sa uma; ginalapakan ang ila tawhanon nga kinamatarung paagi sa mga puguso nga pagpasurender, pangdakop kag pangastigo nga wala sang basehan, ekstrahudisyal nga pagpamatay, pag-akusar nga NPA ukon tigsuporta sang NPA kag iban pa. Ang ila kontra-rebolusyonaryong gyera indi makatarungan.

Samtang ang NPA nagaagum sang indi mahubas nga suporta sang malapad nga masa sang mga mangunguma, mamumugon sa uma, mga mangingisda, mga imol sa syudad kag mga gagmay nga propesyunal bangud nagasuporta kag nagapangapin ini sa ila demokratikong kinamatarung kag interes kag nagapakig-away para sa matuod nga reporma sa duta kag pungsodnon nga industriyalisasyon. Ang rebolusyonaryong gyera sang NPA nga ginasuportahan kag ginpartisiparan sang mga pumuluyo, isa ka makatarungan nga gyera. Sa sini nga punto, ang BHB superyor kag ang kaaway imperyor.

Manubo man ang moral kag motibasyon sa pagpakig-away sang mga tropa sang reaksyunaryong hukbo. Hayag sa mga soldado sang reaksyunaryong estado ang lapnagon nga korapsyon sa kubay sang matag-as nga upisyal militar sa mga pagpamakal sang mga kagamitan panggyera, mga uniporme, kombat nga sapatos, ECLIP kag amnestiya para sa mga surendere kag BDP. Kahibalo sila nga ginagamit lang sila sang mga ambisyoso nga mga opisyal nga nagahamdum sang promosyon. Indi man lipod sa ila ang ginproklamar nga mga peke nga mga enkwentro, peke nga mga surendere kag pagpamatay sangmga hors d’ combat. Ang pulitikal nga paghiliusa sang mga tropa sang kaaway tuman ka huyang ukon manabaw kag madasig lang mabugto samtang ang mga hangaway sang NPA napanday sa hugot nga pulitikal nga paghiliusa, sa mga sakripisyo kag kabudlayan, hugot nga magkaupod nga relasyon sang mga opisyal kag hangaway, may suod nga relasyon ang NPA sa mga masang pigos kag ginahimuslan. Sa ini nga bahin, ang BHB superyor kag ang kaaway imperyor.

Bisan damo pa ang mga pasistang tropa sang kaaway, malapad pa gihapon ang kadutaan sa isla sang Negros para sa maniobra sang NPA. Malapad man kag nagalapta sa kaumhan ang mayoriya sang pumuluyo sa Negros nga mga mangunguma, mamumugon sa uma, mangingisda nga madalum nga nagasuporta sa pakig-away sang NPA. Ang kumbinasyon sang paborableng pisikal nga tereyn kag sosyal nga tereyn sa isla sang Negros pinakamaayo nga kondisyon para sa gamay kag mahina nga mga yunit gerilya sang NPA nga makasusteni sa paglunsar sang mga pakig-away gerilya nga segurado nga magdaug kag para sa padayon nga pagpadaku kag pagpabaskog sa NPA. Kinahanglan pangibabawan sang pila ka yunit sang NPA ang pag-ubod-ubod sa mga konsolidado apang limitado ang kadakuon nga lugar kag napabay-an ang malapad nga lugar nga indi pa nalab- ot. Ang oportunidad sa malapad nga ispasyo dapat mahingalitan sang NPA dira sa mapangahas kag madasig nga pagpalapad kag pagkonsolida sa mga larangan gerilya kag pagpundar sang mga bag-o nga larangan gerilya nga lampas na sa kaaway nga ma-okupar base sa pulitiko-militar nga linya nga lapnagon kag dasok nga inaway gerilya base sa nagalapad kag nagadalom nga baseng masa sa halintang sang estratehikong depensiba.

Pagkatapos nga masuma ang aton lima ka tuig nga inagihan sa inaway banwa, ginkuhaan naton ini sang leksyon kag nagamit naton ining aton mga prinsipyo nga amo ang aton nangin bentaha sa kaaway, nga rason nga napunggan ang aton paatras nga habyog sa paglunsar sang inaway banwa sa isla. Dapat padayunon naton ang aton momentum sang amat-amat nga pagbawi paagi sa padayon nga pagsolbar sang problema sang pagpakitid sang kaugalingon sa pamaagi nga padayon nga magpalapad sang aton ginahulagan kag magtukod sang malapad nga baseng masa agud mahalog ang lugar sang aton maniobra sa inaway. Padayon man nga magpakahanas sa taktika sang konsentrasyon, dispersal kag shifting agud makuhaan sang target ang kaaway sa ila inserkulo kag pangdugmok nga katuyuan. Pahuyangon ang kaaway paagi sa pagplano sang mga madaog kag santo sa masarangan nga mga taktikal kag atritibong operasyon agud mapadug-an ang kaaway sa madamo nga bahin sang iya lawas. Tungod ang aton ginalunsar inaway banwa, dapat nga tudluan kag hanason ang masa sa pagpakigbahin sa paglunsar kag pagpatuman sang mga taktikal nga opensiba kag atrisyon. Dapat man nga silutan ang mga bat-ulan nga traidor sa rebolusyon kag mga aset sang kaaway, siradhan ang mga buslot sa seguridad nga aton napunting agud himuon nga bulag kag bungol ang kaaway sa aton presensya kag pagpanghalit sa masa.

Kinahanglan ang lubos nga pagpaandar sang kumand sa operasyon sang NPA sa rehiyon tubtob sa mga larangan gerilya. Magtuon, mag-analisa kag hakson ang kahimtangan sang gyera. Magbalay sang komprehensibong plano kontra-kampanya batok sa dumog kag kubkob nga taktika sang kaaway.

Sandig sa nagaluntad nga kusog kag ikasarang, pamatukan kag pangingibabawan ang konserbatismong militar kag ang mekanikal kag empirisistang metodo sa pagtuon sang inaway banwa.

3. Isulong ang malaparan nga kontra-pyudal kag kontra-pasista nga kahublagan sa kaumhan kag i-angot sa kahublagan kontra-imperyalista kag kontra-pasistang linya nga paghimakas sa kasyudaran

Ang hambalanon sa duta amo ang esensyal kag pinaka-unod sang demokratikong rebolusyon sang banwa. Ginasabat sang Partido ang sandigan nga demanda sang mga mangunguma bilang mayor nga pwersa sa pagtib- ong sang armadong paghimakas paagi sa ila kolektibo nga paghulag. Paagi sa absoluto nga pagpamuno sang Partido sa NPA, ginatungdan sini ang mga magka-angot nga hilikuton nga amo ang armadong paghimakas, agraryong rebolusyon kag pagtukod sang baseng masa.

Sa kaumahan, ang kahublagan kontra-pyudal ang kabahin sang agraryong rebolusyon nga ginalunsar sang rebolusyonaryong kahublagan sa pagpalig-on sang baseng masa dira sa mga organong gahum pulitika nga naga- isa sa pagsuporta sa kadalag-an sang armadong paghimakas paagi sa NPA. Sa maksimum, amo ang pagkumpiska sang kadutaan sa mga monopolyo kag despotikong agalon may duta paagi sa kusog sang Pulang hangaway sang banwa. Ginatugot man ang pamaagi sang kolektibo kag simpleng kooperasyon sa tunga sang masa, ang pagpataas sang produksyon sa tunga sang baseng masa kag organo sang gahum pulitika sa mga kaumahan. Kadungan sini ang pagduso man sang kontra-pasismo nga kahublagan sang mangunguma agud pangapinan ang naagum nga kadalag-an sa reporma agraryo batok sa mapintas nga makinaryas sang agalon mayduta kag estado.

Bangud man sang tuman ka lala nga krisis sa malakolonyal kag malapyudal nga reaksyonaryong sistema kag nagbiktima sa mga pumuluyo, ginakinahanglan man nga minimum kag malaparan nga mamobilisa ang mga masa sa mga pang-ekonomiya kag pangpulitika nga mga paghulag para isulong ang ila mga demanda sa pagpataas sang sweldo, pagpataas sa presyo sang produkto sang mga mangunguma, pagpanubo sa interes sang usura, pagpanubo sa presyo sang mga abono kag pestisidyo; pagpamatok sa mga abuso kag paglapak sa tawhanon nga kinamatarung sang reaksyonaryong militar, pagpamatok sa pagpang-agaw sang duta sa pormang land use conversion, reklasipikasyon sang duta, reklamasyon kag demolisyon sa mga pamalay para sa ekoturismo kag iban pa.

Ang krisis sang sistema nagresulta man sang lapnagon nga implasyon sa pungsod rason sang mabaskug nga demanda sang katawhan sang makatarunganon nga subsidyo kag serbisyo sosyal sa pihak sang asud-asod nga pagluntad sang mga kalamidad nga naghalit sa kabuhi kag palangabuhian sang malapad nga pumuluyo sa kasyudaran kag kaumahan.

Samtang ang kasyudaran, ginalaragway nga balwarte sang dalagkong komprador burgesya, burukrata-kapitalista kag despotikong asyendero agalon may duta upod sa ila mga imperyalistang agalon nga ginagwardyahan sang mapintas nga AFP, PNP kag pribadong armadong hubon. Sila ang sentro nga kaaway kag nagapanguna nga target sang rebolusyon sa isla nga nagamonopolyo sang mga kadutaan kag nagasuyop sang super-ganansya para sa ila personal nga interes kag luho. Diri ginasulong ang kahublagan anti-imperyalista kag anti-pasismo sa giya sang duha ka taktika sang pagpakig-away paagi sa iligal-legal kag likom-hayag nga paghulag kag paghimakas gamit ang mga reaksyonaryong laye para sa interes sang nagkalain-lain nga sektor ilabe na sang imol nga taga- syudad, mamumugon sa industriya kag serbisyo, mga drayber kag iban pa nga sahing mala-proletrayado. Kalakip nga ginatib-ong ang interes sang ispesyal nga sektor sang kabataang-estudyante, pamatan-on kag kababaihan upod sa ginahimuslan nga kusog kag kinaalam sang sahing peti-burgesya.

Sa hugot nga pagbinuligay kag pag-angtanay, dapat todo-larga ang hilikuton alyansa para makaagum sang malapad nga suporta kag ma-engganyo man ang iban nga sektor kag sahi sa mga nahanunga nga pwersa nga isulong ang ila mga kinamatarung batok sa hampak sang imperyalistang neoliberal nga opensiba. Buyokon ang suporta sang mga tawong simbahan, akademya, mga pulitiko, abogado kag iban pa nga nagasimpatiya sa nagalarga nga kahublagan masa sang pumuluyo.

Ang pagsulong sang kontra-pyudal, kontra-pasista kag kontra-imperyalista nga kahublagan sa kaumahan kag kasyudaran ang magaserbe nga alagyan sang hilikuton konsolidasyon, pagpalad kag rekoberi. Sa konsolidasyon, dapat magpakamaayo kita sa solido nga pag-organisa. Tukuron ang mga organisasyon masa sa proseso sang huluhalintang nga pag-organisa. Tukuron ang mga grupo, sanga sang Partido sa mga lugar nga ginahulagan bilang bag-as sang bug-os nga rebolusyonaryong kahublagan. Kinahanglan nga madasig nga mapundar ang mga pangteritoryo nga komite sang Partido sa mga distrito nga magtahi kag magpayong sa mga ginalunsar nga kahublagan masa sa isla. Sa pagpalapad, lab-uton ang mga populado kag estartehikong lugar kag balikan ang mga madugay na nga lugar nga wala na mahulagan para sa hilikuton rekoberi.

Kadungan man sini, ang pagpataas sang pampulitika nga kamuklatan sang masa paagi sa paglunsar sang mga pampulitika nga pagtuon kag paghanas. Dapat nga ikampanya ang pagtuon sa PADEPA. Ipaseguro nga matun-an ang Malip-ot nga Kurso sang Katilingban kag Rebolusyon Pilipino, Pagtulun-an para sa Aktibista, Espesyal nga Kursong Masa kag Rebolusyonaryong Giya sa Reporma sa Duta. Ikampanya man ang pagtuon sa CARHRIHL kag ang rehiyunal nga publikasyon sang Ang Paghimakas.

Ipatuman ang rehiyunal nga plano sang kahublagan masa nga “Isla sang Negros: Isla sang mapagsik kag malapad nga kontra-pyudal nga mga paghimakas masa.” Paagi diri, makapatuhaw kita sang mga bag-o kag epektibo nga mga instruktor nga magpaseguro sang aton hilikuton edukasyon.

Ikampanya man ang paghanas sang hilikuton propaganda. Dapat nga mapahibalo sa publiko ilabe na sa mainstream media kag social media ang naagum nga mga kadalag-an sang kahublagan masa sa isla kag lubos nga ibuyagyag ang mga kalakasan, kapintas kag kabutigan sang reaksyonaryo, mersenaryo kag pasistang kaaway nga AFP, PNP kag NTF-Elcac.

Sa kabilugan, ang pagpausbong sang kahublagan masa sa kaumhan kag kasyudaran sang isla ang nagapalig-on sang Pungsodnon Nagahili-ugyon nga Prente nga armas sang Partido nga aplikable sa nagkalain-lain nga porma sang legal nga paghimakas subongman sang rebolusyonaryo nga porma sang paghimakas. Ang sandigan nga alyansa sang mamumugon kag mangunguma amo ang malig-on nga pundasyon para sa tanan nga tipo sang alyansa sa tunga sang progresibo kag patriyotiko. Ini ang malapad nga pundasyon apang temporaryo. Magamit ini para mapalapad ang kusog kag impluwensya sang mga rebolusyonaryong pwersa agud ihamulag, mapahuyang kag mapukan ang kaaway sa sahi nga sa karon ginatiglawas sang nabugto na nga hurangos nga alyansa sang Marcos-Duterte.

Sa karon, ang grabe nga pag-indakal sang krisis sa ekonomiya kag pulitika sang katilingban Pilipino ang matambok nga duta para hakupon ang pinaka-malapad nga bahin sang katawhan nga maghimakas para sa pagbag-o sosyal. Paagi sini, ginasigahum ang makusog nga pagpabukal sang bulkan sosyal sa isla samtang nagabaskog ang inaway banwa sang ginahimuslan kag ginapigos nga Negrosanon. Ang paglupok sang bulkan sosyal, ang liwat magakurit sang bag-o nga halintang sa kasaysayan sa isla sang Negros.

Mabuhay ang demokratiko nga rebolusyon sang banwa!

Mabuhay ang masang pigos kag ginahimuslan!

Mabuhay ang ika-56 nga Anibersaryo sang Communist Party of the Philippines!