Bayat nga lumlumned ti umili a Pilipino iti taaw ti kinarigat ken bisin, tumtumpaw iti nagarbo a panagbiag dagiti burukrata kapitalista ken dagiti kakumplot da iti panagkurakot. Bayat nga agsagsagaba ti reprep a nakurapay iti nakaro a danag nga iyanod ti dumanarudor a layus, natalged ken nasimbeng ti turog dagiti bukatot ken mannanakaw kadagiti mansion da ken agkakangina a lugan da.

Iti pananglagip iti maika-53 anibersaryo ti deklarasyon ti Martial Law ti diktador a Marcos Sr, naibutaktak ti krisis pampulitika ti agar-ari a sistema iti rehimen a US-Marcos Jr. Iti pannakaibulgar dagiti anomalya iti proyekto a flood control, ad-adda pay a naiparang ti kinabulok ti malakolonyal nga estado ken ti dumakdakkel a rengngat iti nagbabaetan dagiti paksyon ti agari-ari a dasig. Awan nagdumaan da iti ama na, napnuan korapsyon ken kinarungsot ti rehimen a Marcos Jr a no sadinno ket us-usaren na ti bileg tapno makakimar ti bilyon-bilyon a piso babaen ti panagkurakot ken panagtakaw, ken panangparmek kadagiti demokratiko a karbengan ti umili.

Korapsyon ken anomalya: basaran nga aspeto ti burukrata kapitalismo

Inaldaw a bakbaklayen ti umili a Pilipino dagiti agkakadagsen a buwis, ti napartak ken saan a malapdan a panagngato ti presyo dagiti gagatangen, ken ti nakaro a ngina ngem nalungsot a serbisyo sosyal ken yutilidad. Agnanayon a nakalumlom iti utang dagiti mannalon, saan a makalung-aw iti kinarigat dagiti mangmangged ken nakurapay iti siyudad, ken agngangabit ti pangkabiagan dagiti akin-tengnga a saray.

Saan a mailibak ti tinawen a pannakalipos ti biag ken pangkabiagan dagiti agindeg iti Tanap ti Cagayan a gapuanan ti awan sarday a panangminas kadagiti kabambantayan, karayan ken baybay; komersyal nga operasyon dagiti kwari, dredging ken panagtarikayo; panangitakder kadagiti dadakkel a dam ken panangbulos ti gabur a danum ti Magat dam iti panawen a matutudo; ken ti nasaknap a monocropping wenno maymaysa a klase ti mula ken panagusar kadagiti produkto nga agrokemikal. Ngem ti inaldaw ken nakaro a mangilumlom iti masa iti kumarkaro a rigat, bisin ken kinaawan hustisya ket ti anomalya ken korapsyon.

Inkapilitan nga iyan-anay dagiti mangmangged-talon iti rehiyon ti P300-P450 barya a sweldo, nakaad-adayo iti P1,125 kada aldaw a makabiag a sweldo para iti maysa a pamilya, bayat nga agtaktakaw ti binilyon a kwarta ni Marcos Jr, dagiti kontraktor ken kongresista. Agarup P545 bilyon ti naituding para kadagiti proyekto a flood control ket naibutaktak a dumanon iti 60% iti kabuklan a gatad ti maysa a proyekto ket maibulsa iti naduma-duma a tukad babaen iti SOP ken komisyon. Banag a saanen a pagsiddaawan nu apay nga adu dagiti ghost project ken substandard a pasdek. Maysa a pangarigan laeng ti nalusdak a rangtay ti Cabagan- Sta.Maria ken nargaay nga alad iti igid ti karayan ken dike iti naduma-duma a paset iti Cagayan ken Isabela.

Ti nakaro pay, dagiti met laeng kongresista, burukrata ken dadduma a dinastiya ti nakakontrata kadagitoy a proyekto. Ti EGB Construction Corporation, ti maysa kadagiti kompanya a makin-iggem iti kaaduan a proyekto iti rehiyon ket ka-joint venture ti kabsat ni Mayor Diaz ti Ilagan, Isabela, ken subcontractor ti Alpha & Omega Gen. Contractor and Development Corp, kasta met a ti JLL Pulsar Construction a kompanya ni Cagayan 3rd District Rep. Joseph Lara a karaman kas maysa a subcontractor ti kompanya a St. Gerrard Construction Gen. Contractor and Development Corp, agpada a bagi dagiti bukatot nga Discaya.

Maysa a sintomas laeng ti nakaro a sakit ti malakolonyal nga estado ti pannakaibulgar iti sistematiko a korapsyon ken panagtakaw iti kuarta ti umili ti iskandalo mainaig iti flood control projects. Nabayagen a kunkunnoten dagiti alimatek iti reaksyunaryo a gobyerno ti kinabaknang ti pagilian a maipaay kuma a pagsayaatan ti nalawa nga umili. Ti panagi-innagaw iti bileg ken posisyon iti tunggal eleksyon ti pakakitaan ti pannakaaramat ti estado poder tapno mangalunkon ti kinabaknang ken bileg iti interes dagiti burukrata kapitalista, dadakkel a burgesya kumprador ken apo’t daga nga isu’t makin-tengngel kadagiti dinastiya iti pulitika ken agserserbi iti mandar ti imperyalista nga US. Dagitoy ti mamagbalin a ligal kadagiti kontra-umili a paglintegan ken pagannurutan a manglaplapped ken mangbekbekkel iti kaaduan.

Burukrata kapitalismo: ramut ti ranggas ti estado

Instrumento ti agar-ari a dasig ti panagraira ti sistematiko a kinaranggas kontra iti umili a lumablaban. Babaen iti armado a pwersa ti estado, dagiti militar ken pulis, ket salakniban da ti bukod da nga interes ken mapagtalinaed ti agbugbugsoten a malakolonyal a sistema.

Iti rehiyon, aktibo nga aso-aso dagiti pulitiko, dinastiya, kontraktor ken dagiti korporasyon ti minas ti 5th Infantry Division Philippine Army (5IDPA) ken Philippine National Police (PNP-RMFB2). Dagitoy a pasista a tropa ti mangbanbantay iti makadadael nga operasyon ken makinarya iti panagminas ti OceanaGold Phils Inc ken FCF Minerals iti Nueva Vizcaya, kasta met ti nickel mining iti Dinapigue, Isabela ken black sand mining iti Cagayan. Dagitoy met laeng a pasista a pwersa ti manglaplapped iti demokratiko a karbengan dagiti umili kangrunaan dagiti aktibista, ken dagiti mangitantandudo iti karbengan-tao ken iti aglawlaw. Atiddogen ti listaan ti panaglabsing iti karbengan-tao ti 5IDPA-NTF-Elcac saan laeng nga iti Red-tagging ken panangmarka a terorista nu di ti ekstrahudisyal a pammapatay.

Dalluyon ti gubat ti umili ti mangrippuog iti burukrata kapitalismo

Aginggana a saan a mapag-ot ti tallo a basaran a parikut a nauneg a nairamut iti gimong a Pilipino—ti imperyalismo nga US, pyudalismo ken burukrata kapitalismo—agtultuloy a mailangdet ti umili a Pilipino ti agnanayon a krisis ti sistema a malakolonyal ken malapyudal. Aginggana nga agtultuloy nga agturturay dagiti burukrata kapitalista ken dinastiya iti pulitika, agtultuloy latta ti pannakailumlom ti nauneg a pitak ti kinapanglaw ken pannakairurumen ti umili a Pilipino.

Awan sabali a dalan tapno magun-od ti pudpudno a nawaya a gimong nu saan a ti panangiyabante ti naunday a gubat ti umili kangrunaan ti rebolusyonaryo nga armado a dangadang. Rumbeng a gibusan ti agdama a reaksyunaryo a panagari, agawen ti pampulitika a bileg ken itakder ti demokratiko a gobyerno ti umili. Tulbek ditoy ti panangpapigsa ti New People’s Army (NPA) a kangrunaan a pwersa ti umili a Pilipino laban iti reaksyunaryo a bileg. Kagiddan daytoy ti panangreppet iti pwersa ti nalawa nga umili ken panangitakder kadagiti bin-i ti Nalabbaga a bileg bayat nga irusrussuat ti agraryo a rebolusyon kas pangrugianan a sungbat iti problema ti kaadduan a mannalon. Iti kastoy a wagas laeng a mapakapsut ti bileg ken mapunas ti monopolyo iti daga dagiti despotiko nga apo’t daga ket maipaima iti mannalon ti karbengan iti daga.

Naganagan ti kadagaan iti Tanap ti Cagayan para iti rebolusyon. Ti nasaknap a kinaawan hustisya ken ti sistema a manangikuspil ti mangsindi ti unget ken gura ti umili a mangiwaras ti gumilgil-ayab nga apoy iti tanap. Ti panagdalluyon dagiti protesta kadagiti kalsada ken armado a pannakidangadang iti kaaw-awayan ti mangrippuog ti panagari dagiti sumagmamano a manangikulbo ken mananggundaway tapno itakder ti gimong a pudno a demokratiko, nawaya ken agserserbi iti interes ti umili.