Kausa han kabatan-unan ha bug-os nga nasud, hul-os karayhak nga ginseselebrar yana han kabatan-unan ha Eastern Visayas an ika-61 nga anibersaryo han katukod han Kabataang Makabayan (KM). Ginsasaludaran namon an tanan nga kaapi han KM ha pagserbe komo madig-on nga butagtok han kagiusan kabatan-unan tikang han pagkakatukod hini hadton 1964. Ngan hasta yana, ginpapatuman hini an makasaysayan nga buruhaton han paghatag hin bag-o nga dugo han mga rebolusyunaryo para ha dirudiretso ngan panmaihaan nga pagpapasulong han gerra han katawhan.

Hini nga okasyon, handumon ngan pasidunggan naton an narunapulo kayukot nga mabayanihon nga kaapi han KM nga ginhalad an kinabuhi para ha pagtatalwas han katawhan. Tagan naton yana hin nalalain nga pagkilala hira Alex “Ka Xenon” Lagunzad ngan Joshua “Ka Miyong” Sagdullas, mga Pula nga mangaraway nga produkto han militante nga kagiusan kabatan-unan-estudyante ha Eastern Visayas, nga namartir ha nakalabay nga mga tuig. Ginbayaan nira an komportable nga kinabuhi agud ighalad an ira kusog ngan kabaltok para ha kawsa han masa nga tiniyupi ngan gintatalumpigos. Gindadayaw naton hira nga mga bayani han katawhan.

Kilal-on liwat naton an kabatan-unan nga parag-uma nga amo an kadak-an han kaapihan han Bagong Hukbong Bayan. Ginsasaludaran naton an mga sugad kanda Jennifer “Ka Jenny” Paclita, Edmun “Ka Dalisay” Oros, Edwin “Ka Alas” Ventura, ngan Rowie “Ka Lysan” Macatane, nga nareyalisar nga diri angay makuntento an masa nga parag-uma ha kabkab-tuka nga klase han kinabuhi. Nakit-an nira an paglaum ha demokratiko nga rebolusyon han katawhan ngan nag-amot ha pagtukod han rebolusyunaryo nga gubyerno ha kabaryuhan.

Hustisya an nagpapadayon naton nga guliat para ha mga sugad kan Maureen Japzon ngan iba pa nga aktibista tikang ha sektor han kabatan-unan nga madarahug nga ginpatay han estado. Hustisya liwat an panawagan naton para ha milyun-milyon nga kabatan-unan ngan katawhan nga nag-aantos yana ilarum han pasista, pakuri ngan papet nga rehimen US-Marcos.

Puno an bantayog han mga bayani han mga martir tikang ha Sinirangan Bisayas. Ha pagkilala naton ha ira ngatanan, hinaot magserbe hira nga inspirasyon ha pag-atubang naton ha natikadako nga mga ayat han dirudiretso nga pag-ato ha rehimen US-Marcos.

Nag-aantos an kabatan-unan ilarum han sistema nga bagakolonyal ngan bagapyudal. Nagpapabilin nga komersyalisado, kolonyal ngan mapanmuypoy an sistema han edukasyon. Ginhihimo hini an dako nga hukbo han kusog-pagtrabaho nga nag-aagaway ha manipis nga empleyo ngan ginpapaantos ha diri-regular nga suhol ngan trabaho, para ha lokal ngan langyaw nga kapitalista nga nagtutumuyo la pumiga hin maksimum nga kita. Madarahug nga ginpupuypoy ngan binubusalan an militante nga kabatan-uan nga nakikigbisog para ha pagbabag-o ha naghahadi nga sistema.

Abrido gud an kabatan-unan nga mapukaw ngan hangkupon an programa han nasyunal-demokratiko nga rebolusyon. Ha paggrabe han krisis han sistema nga bagakolonyal ngna bagapyudal, mas natikaupay an mga kundisyon para ha dugang nga pagpapahiluag ngan pagpapakusog han kagiusan nga kabatan-unan-estudyante. Naglalaum kita nga marabunos tikang ha aton ranggo an mga bag-o nga dugo han mga kadre nga mag-aamot ha pagpapakusog han rebolusyunaryo nga kagiusan masa ha kasyudaran ngan kabaryuhan, ngan ha armado nga pakig-away ha kabaryuhan. Ngatanan ini importante para ha panmaihaan nga pagpapasulong han demokratiko nga rebolusyon han katawhan tubtub ha makab-ot an hul-os nga kadaugan.

Mabuhay an Kabataang Makabayan! Mabuhay an rebolusyon Pilipino!
Kabatan-unan, kumadto ha kabaryuhan, umapi ha Bagong Hukbong Bayan!