Naanep a salsaluduan ti Regional Committee-Communist Party of the Philippines ken ti Chadli Molintas Command-NPA Regional Operational Command iti Ilocos-Cordillera Region ni Kadwa Victor “Ka Changli” Daligdig. Napatay isuna ti pasista ken reaksyunaryo nga AFP idiay Barangay Allaguia, Pinukpuk, Kalinga agarup alas tres ti malem idi Nobyembre 23, 2025. Ti rinnupak a nakapasagan ni Ka Changli ket napasamak dua nga aldaw kalpasan ti umuna a rinnupak idi Nobyembre 21 idiay Barangay Bayao, Pinukpuk, nu sadinno a maysa ti napapatay (killed-in-action) ken maysa ti nasugatan (wounded-in-action) manipud iti terorista a pwersa ti AFP.

Ni Ka Changli ket mabigbig tattan a maysa kadagiti kalaingan a martir ken banwar ti Nailyan Democratiko a Rebolusyon para iti pannakawayawaya ti pagilyan tayo manipud iti imperyalismo a US, pyudalismo ken burukrata kapitalismo agturong iti pannakabuangay ti pudno a demokrasya ti umili ken ti nalawag a sosyalista a masakbayan iti gimong a Pilipino.

Ni Ka Changli ket agtaud iti tribu a Butbut ken inaudi iti innem nga agkakabsat. Naipasngay isuna idi Abril 17, 1979 idiay Barangay Buscalan, Tinglayan, Kalinga. Gapu iti kinakurapay ti pamilya na, first year iti high school laeng ti naleppas na idi 1996.

Idi simmina ti kontra-rebolusyonaryo a ni Conrado Balweg ken ti reaksyunaryo a Cordillera People’s Liberation Army (CPLA) iti CPP-NPA idi Abril 4, 1986, ti agtutubo a ni Victor ket maysa kadagiti masa ti katutubo a mannalon a nangpili a pumanig iti proletaryo a CPP-NPA kasta met iti rebolusyonaryo a Cordillera People’s Democratic Front (CPDF). Idi Abril 2000, ni Ka Changli ket nagbalin a kameng ti rebolusyonaryo a Kabataang Makabayan-Demokratiko nga Alyansa ti Agtutubo iti Kordillera (KM-DATAKO). Kas aktibo a kameng ti KM-DATAKO, saan laeng a nagpamulat, nagorganisa ken nagpatignay kadagiti agtutubo iti barangay na ken kadagiti kaasideg a barangay, ngem nagipatungpal met ti rebolusyonaryo trabaho iti intar ti katutubo a masa a mannalon a lallaki ken babbai ken binukel na isuda kas grupo a pang-organisa ti Pambansang Katipunan ng mga Magsasaka.

Idi Enero 30, 2008, ni Victor nga agtawen 27 ket nagkameng iti NPA. Ti umuna nga alyas na ket Ka Sid. Saan pulos a nag-lie low wenno nagsardeng iti trabaho ti armado a dangadang ti NPA uray iti ababa a panawen. Nagtultuloy ken naregta a nakipaset iti panagbukel iti base a masa, agraryo a rebolusyon ken iti panangiyabante iti armado a dangadang iti napalabas a 17 a tawen kas pultaym a Nalabbaga a mannakigubat.

Kinapudno na, nagbalin isuna a natured ken kumprehensibo a pangpulitika ken militar a kadre iti larangan gerilya. Naideploy isuna iti nadumaduma a prubinsya iti Cordillera agingga iti yunit ti NPA iti sub-rehiyon ti Ilocos ken timmulong iti rebolusyonaryo a trabaho idiay. Saan a malipatan ti kakadwa ni Ka Changli kas nalaing iti trabaho ti propaganda, edukasyon a pangpulitika kasta met ti trabaho a pang-ideolohiya.

Bigbigbigen ti kakadwa ni Ka Changli kas nalaka a pakilangenan ken mannakaawat a kadwa. Nalaing met a mangtarabay ken mangisuro kadagiti baro a kakadwa. Segun iti kakadwa, mahilig met isuna iti trabaho a kultural ken nalaing agkanta. Naan-anay ti ayat na iti rebolusyon. Mangiyun-una iti panagkonsolida kadagiti kakadwa a mapakpakapsutan ti pakinakem. Uray kadagiti saan a natalged a kasasaad, saan a kimmapsut ti pakinakem na. Awan kapada ti kinatured na iti panangsango iti armado a kabusor ti umili. Isu a kagurgura dagiti terorista nga AFP isuna gapu ta adun ti napatennag na kadagiti pwersa da.

Iti unos ti 17 a tawen na iti NPA, pangig-iggeman ni Ka Changli iti awan-sarday a pigsa ti masa iti rebolusyonaryo a dangadang. Natibker ti pammati na a ti bileg ti maidadanes ken magungundawayan a masa ti sadiri ti rebolusyonaryo a dangadang tapno gibusan ti agar-ari a mangidadanes ken mananggundaway a sistema ti agdama a malakolonyal ken malapyudal a gimong a Pilipinas. Daytoy a rebolusyonaryo pammati iti pigsa ti maidadanes ken magungundawayan a masa a Pilipino, kinapudno na ket isu ti tulbek nu apay nga iti unos ti nasurok maysa ket kagudwa a dekada a pannakakipaset na iti rebolusyon ket balligi nga umab-abante daytoy agingga iti agdama.

Sapay koma ta ti rebolusyonaryo a biag ni Ka Changli ket mangted inspirasyon kadagiti annak dagiti mangmangged, mannalon, katutubo nga umili, mangngalap, nakurapay iti syudad kasta met iti progresibo nga intelihensya iti urban. Sapay koma ta agbalin a pagwadan kadakwada ti rebolusyonaryo a biag ken takder ni Ka Changli babaen ti pannakitipon da iti NPA tapno iyabante ti gubat ti umili iti nangatngato a tukad agingga a magun-od iti nailyan a balligi kadagiti sumaruno a dekada.

Agbiag ti lagip ni Ka Changli!

Agbiag ti NPA!

Agbiag ti CPP!

Agbiag ti rebolusyon a Pilipino!