IBINASURA NG Department of Justice ang kasong kidnapping laban kay Atty. Katherine Panguban, pinuno ng Women and Children’s Committee ng National Union of People’s Lawyers, noong Hunyo 28. Ang pagbasura ay ibinatay ng korte sa testimonya ng ina at anak nitong menor de edad na nagsasabing kusang loob silang sumama at boluntaryong nagpailalim sa kustodiya ni Panguban.
Nag-iisang saksi ang menor de edad na lalaki sa nangyaring Sagay 9 masaker noong Oktubre 20, 2018 sa Hacienda Nene, Sagay City, Negros Occidental. Idinetine ng pulisya ang batang saksi at isinailalim sa kustodiya ng Social Welfare and Development ng syudad nang walang pahintulot mula sa kanyang ina.