NIINING MILABAYNG DUHA ka tuig, walay-hunong ang paggamit sa rehimen sa mga eroplano ug helikopter nga gikan sa US sa pagpamomba sa mga sibilyang komunidad. Nagbunga kini og grabeng teror sa katawhan ug dakung kadaut sa kalasangan.

Niining Oktubre, gipagula sa Bagong Hukbong Bayan-Surigao del Sur ang mga hulagway sa guba nga kalasangan tungod sa pataka nga pagpamomba sa Armed Forces of the Philippines (AFP). Ayha niini, gitaho sa mga yunit sa prubinsya ang upat ka pagpamomba nga gipahigayon sa Eastern Mindanao Command niadtong Mayo ug Hulyo. Gamit ang mga eroplanong FA-50, mga helikopter nga AgustaWestland ug MG-520, mga kanyon ug drone, gibomba sa militar ang mga barangay sa Libas Sud ug Siagao sa San Miguel niadtong Mayo 14 ug 18; Diatagon sa Lianga niadtong Hulyo 7; ug Anahaw Daan sa Tago niadtong Hulyo 14.

Okupado sa 401st, 402nd ug 901st IBde ang mga baryo sa Cortez, Lanuza, Carmen, Cantilan, San Miguel, Tago ug Lianga.