Gipasirado sa Facebook niadtong Setyembre 22 ang kapin 100 ka akawnt ug page nga ginapadagan sa Armed Forces of the Philippines (AFP) ug Philippine National Police (PNP), ingonman ang dugang nga 100 maki-Duterte nga akawnt nga nasutang ginapadagan gikan sa China.
Matud sa Facebook, ang maong mga akawnt milapas sa lagda sa kumpanya kalabot sa coordinated inauthentic behaviour o koordinadong pagpagwas og mga post aron ingnong tinuod ang usa ka panghitabo o upinyon. Buot ipasabot, peke ang maong mga akawnt ug tinuyong gihimo aron magpakaylap og pekeng mga balita aron impluwensyahan ang upinyon sa publiko.

Nag-unod kini og mga balita ug upinyon kalabot sa pulitika ug militar sa Pilipinas, pagsuporta sa mga balaod sa rehimeng Duterte ilabina ang bag-ong Anti-Terrorism Law ug ang pag-red-tag sa mga aktibista ug kritiko niini. Nakapunting ang maong mga akawnt sa pagdemonyo sa rebolusyonaryong armadong kalihukan isip “terorista.” Puno ang maong mga akawnt og bakak, pagpangtuis ug kabangis.

Ang grupo usab sa mga akawnt nga ginapadagan gikan sa China maoy nag-espesyalisa sa pagpakaylap sa mga maki-China nga pamahayag ug pag-atake sa mga upisyal ug magbabalaod nga nagasupak niini.

Mamatikdan sa maong mga akawnt ang promosyon kang Sara Duterte isip mosunod nga presidente, ug mga pagdayeg kang Imee Marcos.
Tin-aw ang kalambigitan sa rehimeng Duterte, AFP, PNP sa mga akawnt nga gipasirado sa Facebook. Naila ang mga akwant nga gihimo ug ginapadagan ni Capt. Alexandre Cabales, ang hepe sa Social Media Center sa AFP nga nakapailalum sa Civil Military Operations Regiment. Usa dinhi ang Facebook page nga “Hands Off Our Children” nga ginagamit sa militar aron i-red-tag ang mga kabatan-onang aktibista, nag-una ang representante sa Kabataan Partylist nga si Sarah Elago.

Upat ka beses na nga nagsirado ang Facebook sa mga Pilipinong akawnt nga maki-Duterte sa milabayng duha ka tuig. Usa ka beses na usab nga nagsirado ang Twitter sa mga susamang akawnt. Lakip sa mga gipasirado ang mga network nga gipadagan ni Nic Gabunda, ang direktor ni Duterte sa pagpangampanya sa social media niadtong eleksyong 2016.