Atubangan sa pagsagayad sa presyo sa pagpalit sa humay, gipanghingusog sa Kilusang Magbubukid ng Pilipinas (KMP) nga magpagawas og pondo ang rehimeng Duterte isip subsidyo aron babagan ang labing pagkalugi sa mga mag-uuma sa humay. Matud sa KMP, lakip sa mamahimong gamiton mao ang P10.727 bilyong nakulekta sa pag-import og bugas, nga matud niini makasuporta sa kapin-kun-kulang 72,800 pamilyang mag-uuma. Niining Oktubre, mikunhod ang presyo sa humay hangtud P10-P14 kada kilo.

Gilunsad usab niadtong Oktubre 1 ang usa ka kampanya aron iasdang ang agrikulturang nakasubay sa agroekolohiya, usa ka pamaagi sa pag-uma gamit ang natural nga mga rekurso nga walay ginaguba nga natural nga bahandi. Gipangunahan kini sa Pesticide Action Network Asia Pacific katimbayayong ang Unyon ng Manggagawa sa Agrikultura, SAKA ug MASIPAG.