Giulan og pagmakmak si US Pres. Donald Trump human dayag siyang manghulhog og kabangis ug rasismo sa gipahigayon nga unang US Presidential Debate 2020 niadtong Setyembre 29. Gawas sa subli-subli nga pagpanginsulto ug pagpakgang ni Trump sa kandidato sa Democratic Party nga si Joe Biden, mitataw sa maong debate ang pasistang barog sa presidente kalabot sa nagpadayon nga mga protesta sa kalihukang Black Lives Matter.

Dihang gipangutana kung ginakundena ba niya ang mga grupong ultra-Too nga nalambigit sa pagpanghasi sa mga protesta niadtong milabayng mga semana, gisimang niya ang pagbasol sa mga aktibista ug giduso nga kinahanglan silang tugbangan. Gimandoan niya ang grupong paramilitar nga Proud Boys nga “molikay ug magbantay.” Lakip ang maong grupo sa mga naglunsad og mga armadong patrol sa mga lugar nga may pagkilos aron direktang manakit ug manghasi o di kaha manghulhog og kabangis. Pugos nga gipagawas ni Trump nga ang oposisyong pulitikal ang responsable sa matud niya “bangis nga protesta” ug dili ang maong mga grupo.

Human miani og kritisismo dili lamang gikan sa mga Democrat kundi lakip na usa sa iyang mga kapartidong Republican, natukmod si Trump nga kundenahon ang Proud Boys ug uban pang mga grupong pasista human ang duha ka adlaw.

Nakatakdang ipahigayon ang eleksyon sa US sa Nobyembre 3. Samtang, nataho nga natakdan sa Covid-19 si Trump niadtong Oktubre 2.