Magkasunod nga giatake sa Bagong Hukbong Bayan (BHB) ang mga sundalong protektor sa magun-ubong operasyon sa mga kumpanya sa mina ug troso sa dagkung burgesyang-kumprador sa Mindanao niining milabayng mga bulan. Kwarenta ka sundalo ang natahong patay ug dili moubos sa 34 ang samaron sa ambus niini sa mga prubinsya sa Sultan Kudarat ug Surigao del Sur.

Giambus sa BHB-Far South Mindanao Region niadtong Setyembre 2 ang tropa sa 37th IB nga sakay sa trak sa militar sa Barangay Sta. Clara, Kalamansig, Sultan Kudarat. Napatay ang 24 ka sundalo ug 28 ang nasamdan. Padulong ang mga sundalo sa Barangay Datu Andong sa parehong lungsod aron depensahan ang ABU-Gemma Construction Company.

Pipila ka oras ayha niini, giparalisa sa BHB ang usa ka backhoe sa maong kumpanya nga nagpalapad sa kalsada aron gamiton sa dinagkung operasyong pagpangtroso sa D.M. Consunji Incorporated sa unang distrito sa prubinsya. Niadtong Agosto 17, giambus sa mga Pulang manggugubat ang usa ka yunit sa 37th IB sa parehong barangay. Tulo ka sundalo ang patay ug usa ang nasamdan.

Sa Surigao del Sur, sunud-sunod nga armadong aksyon ang gilunsad sa hukbong bayan batok sa mga nag-operasyong tropa sa 3rd SFB, 36th IB, 65th IB ug 75th IB nga nagsilbing protektor sa magun-ubong mga operasyong mina sa prubinsya. Napatay sa mga panagsangka si 2nd Lt. Danus ug 12 pa ka sundalo. Lima ka sundalo ang nasamdan.

Gipabusikaran sa BHB ang mga sundalo sa Barangay Hinapuyan, Carmen niadtong Hulyo 30. Sa barangay Libas Sud at Siagao, San Miguel, tulo ka operasyong haras ang gilunsad sa BHB sukad Mayo 14 hangtud 18.

Naglunsad usab ang BHB og usa ka ambus ug tulo ka operasyong haras batok sa magkakumbinang pwersa sa 36th IB, 75th IB ug 65th IB niadtong Agosto 4-8.