Hugot nga gibatukan sa blokeng Makabayan ang balaodnon nga gisumite sa Kongreso niadtong Marso 2 nga motangtang sa batakang katungod nga ilhong inosente ang usa ka indibidwal hangtud nga dili mapamatud-an ang iyang krimen.

Matud niini, ginatangtang sa House Bill No. 7814 ang batakang mga proseso sa hustisya sa mga gisuspetsahang suspek sa iligal nga droga.

Ilalum niini, dihadiha dayong toohang sad-an isip protektor o tigpanalipod ang usa ka tawo kung aduna siyay kaila nga naga-eksport og iligal nga droga ug ginatabangan niya kining makaikyas sa aresto.

Sad-an usab dayon ang usa ka makuhaan og resibo o unsamang papeles nga adunay kalambigitan sa importasyon o eksport niini. Ang unsamang ebidensya nga naghatag og pondo ang usa ka iladong importer o eksporter sa droga sa usa ka indibidwal awtomatikong pagailhong “ebidensya” batok kaniya. Daghan pang ubang probisyon nga motangtang sa batakang katungod sa mga indibidwal nga mamahimong lambigit o wala nalambigit sa iligal nga droga.