2 lider-aktibista, inaresto sa Bicol
Dalawang lider-aktibista ang magkasabay na inaresto ng mga pulis sa Bicol noong madaling araw ng Mayo 2. Inaresto si Dan Balucio, pangkalahatang kalihim ng Bayan-Bicol at pastor ng National Council of Churches in the Philippines, sa kanyang bahay sa Sto. Domingo, Albay. Inaresto naman si Sasah Sta. Rosa, tagapagsalita ng Jovenes Anakbayan, sa Villa Obiedo, Cararayan, Naga City.
Para palabasing lehitimo ang mga operasyon, tinamnan ng mga pulis ng mga baril at pasabog ang mga bahay ng biktima. Inakusahan din silang mga kasapi ng Bagong Hukbong Bayan (BHB). Kasabay ding nireyd ng mga pulis ang bahay ni Justine Mesias, tagapagsalita ng Youth Act Now Against Tyranny Bicol, ngunit wala siya roon. Ang mga mandamyento na ginamit sa mga reyd na ito ay inilabas ni Judge Edgar Armes ng Legazpi City Regional Trial Court.
Sa Antipolo City, inaresto ng 80th IB at Philippine National Police-Rizal ang 30 Dumagat sa Barangay Calawis noong Abril 13. Nilinlang ang mga katutubo at pinapunta sa barangay hall para umano tumanggap ng ayuda. Inakusahan silang may kaugnayan sa BHB.
Bago nito, mayroon ding 30 katutubo mula sa Barangay Puray, Rodriguez, Rizal ang sinampahan ng kasong rebelyon noong ikalawang linggo ng Marso. Inaresto rin sa parehong bayan si Benito Lucido, tagapangulo ng Integrated Association of Agrarian Reform Beneficiaries, at ang kanyang asawa noong Mayo 6. Dinala sila sa istasyon ng pulis at hindi pa malinaw kung ano ang isasampang kaso sa kanila.
Inaresto rin sa araw na iyon ang katutubong Dumagat na si Garry Doroteo sa kanyang bahay sa Tanay. Kabilang si Doroteo sa mga tumututol sa Kaliwa Dam.
Sa General Nakar, inaresto at isinakay ng militar sa helikopter ang kagawad ng Barangay Lumutan na si Loreto Miranda Bolino. Hindi pa rin siya inililitaw hanggang sa kasalukuyan.
Sa Bohol, iligal na inaresto ang magsasakang si Alfie Sarsale sa Barangay Rizal, Batuan noong Abril 30. Sinalakay ng mga pulis ang kanyang bahay at maging ng kanyang mga magulang. Ninakaw din ang may ₱23,000 na kita ng mag-anak mula sa pagbebenta ng kanilang kalabaw.
Pamamaslang. Pinaslang ng mga elemento ng 15th IB si Frederico Rivera, residente ng Barangay Pinggot, Ilog, Negros Occidental noong Abril 24. Pinalabas ng mga sundalo na nasawi ang biktima sa isang engkwentro.
Pekeng pagsurender. Sapilitang pinasurender ng 2nd ID ang mga residente ng Barangay San Jose, Antipolo City noong Abril 23 bilang mga taga-suporta ng BHB.
Pinasurender din ng 15th IB at 11th IB ang mga residente ng Sityo Taya-o sa Barangay Narra at Sityo Malabago sa Barangay Tambad, Cauayan, Negros Occidental noong Abril. Bahagi ito ng nakapokus na operasyong militar ng naturang mga yunit sa lugar.
Militarisasyon. Halos isang buwan nang nagpapatupad ng blokeyo ang 1st IB at 80th IB sa mga komunidad ng mga katutubong Dumagat at Remontado sa Barangay Puray, Rodriguez Rizal at Barangay Umiray, General Nakar, Quezon.
Sa Negros Occidental, kinordon ng 15th IB ang Sityo Barangay Pinggot, Ilog, Negros Occidental mula pa noong Abril 24. Istriktong kinokontrol ng mga sundalo ang paglalabas-masok at galaw ng mga residente sa nabanggit na mga komunidad.
Pandarahas. Nireyd ng 62nd IB ang apat na bahay sa Himamaylan, Negros Occidental noong Marso 22. Binugbog ang ilang residente at tinutukan ng baril habang iniinteroga.