Presyo ng pinrosesong pagkain, tataas pa
Walang pag-asang bababa sa susunod na mga buwan ang presyo ng pinrosesong mga pagkain, tulad ng delata, hotdog at iba pang nakaasa sa dayuhang sangkap, at mga pagkaing nakasalalay sa imported na produkto tulad ng tinapay at gatas. Ito ay dahil tuluy-tuloy ang pagtaas ng presyo ng mga batayang produktong pagkain sa pandaigdigang pamilihan.
Ayon sa Bloomberg Agriculture Spot Index noong Abril, pumalo ang mga presyo ng trigo, mais at soybean sa pandaigdigang pamilihan sa pinakamataas na antas nito mula 2013. Ito ay dahil sa mahinang ani ng mga bansang nag-iimport ng naturang mga produkto at paglamon ng China ng papalaking bolyum ng naturang mga produkto para sa konsumo ng mga industriya nito.
Ginagamit ang trigo sa paggawa ng tinapay at ibang katulad na produkto, habang ang mais at soybean ay ginagamit bilang feeds (pagkain ng hayop). Sangkap din ito sa paggawa ng toyo, tokwa at iba pang produkto.
Apektado ang Pilipinas sa gayong mga pagtaas dahil inaangkat nito ang 100% pangangailangan na trigo at halos 99% ng soybean. Ang pagtaas sa presyo ng feeds (pagkain ng manok at baboy) ay nararamdaman ngayon sa bansa sa porma ng matataas na presyo ng karneng baboy at manok sa lokal na mga pamilihan.
Noong Abril 8, naglabas na ng taya ang Food and Agriculture Organization ng United Nations na patuloy na tataas ang presyo ng mantika, karne at gatas.
Sa nakaraang sampung taon, papataas ang import dependency ratio ng Pilipinas sa usapin ng pagkain. Mula 18% noong 2010, nasa 29% na ito noong 2019. Ibig sabihin, mahigit sangkapat na ng pagkain ng bansa ay nakaasa sa suplay—o kakulangan nito—sa pandaigdigang pamilihan. Kabilang sa taun-taong tumataas ang bolyum ng inaangkat na bigas (23% ng lokal na suplay noong 2019), karneng baboy, baka at manok. Halos buung-buo na inaangkat ng mga nagmamanupaktura ng pagkain at inumin ang mga sangkap na ginagamit nila sa produksyon.