Helikopter ng hunta, napabagsak sa Myanmar
Isang helikopter ang napabagsak ng Kachin Independence Army (KIA) sa opensiba nito noong Mayo 3 sa Momauk, estado ng Kachin sa Myanmar (dating Burma). Ang KIA ay isa sa mga armadong grupo ng mga pambansang minorya na lumalaban sa huntang militar. Ilang linggo nang binobomba ng mga helikopter at fighter jet ng hunta ang naturang lugar. Ayon sa tagapagsalita ng KIA, nagresulta na sa pagkamatay ng tatlong sibilyan at pagkasugat ng siyam na iba pa ang mga pambobomba ng hunta. Limang libo na ang napilitang magbakwit.
Noon namang Abril 27, nagapi at sinunog ng Karen National Liberation Army ang kampo militar sa hangganan ng Thailand at Myanmar. Ginawa ang reyd matapos ang pamamaril ng mga sundalo sa mga bangka ng mga sibilyan na tumatawid sa ilog. Bilang ganti, nagpadala ng fighter jet ang hunta para bombahin ang lugar.