Anum ka mangunguma ang ginreport nga iligal nga gin-aresto sang armadong ahente sang estado sining nagligad nga mga semana. Kadungan sini ang pagpanglighot sang militar sa mga komunidad sang mga mangunguma kag pagpamilit nga magsurender.

Sang Oktubre 17, gindakop sang pulis si Cristina Magistrado, anay organisador sang Amihan-Cagayan sa iya balay sa Binangonan, Rizal base sa himu-himo nga kaso. Gindala siya sa istasyon sang pulis sa Tuguegarao City kag didto ginhunong kag gin-interogar.

Sa Sorsogon, gin-aresto pagkatapos tamnan sang ebidensya nga pusil si Sonny G. Nace kag ginpasibangdan nga katapu sang Bagong Hukbong Bayan (BHB). Residente si Nace sang Barangay Tulatula Sur, Magallanes kag nagatrabaho bilang ahente sang small-town lottery (STL).

Sa Sorsogon gihapon, duha ka bulan na nga ginatublag sang 31st IB kag mga pulis ang indi magnubo sa siyam ka barangay sa Donsol kag pito sa katambi nga banwa sang Pilar. Ginreport sang BHB-Sorsogon sang Oktubre 14 nga masobra 20 sibilyan halin sa lugar ang gin-ipit kag ginpwersa nga magsurender bilang mga myembro sang BHB.

Sang Septyembre 27, gindakup sang 85th IB ang mag-asawa nga sanday Leonina Ilag kag Poli Naval sa Sityo Hagakhak, Barangay Malaya, General Luna, Quezon pagkatapos magluntad ang inaway sa tunga sang isa ka yunit sang BHB kag 85th IB malapit sa ila balay.

Duha ka residente man sang Barangay Maraiging, Jabonga, Agusan del Norte ang gin-aresto sang 29th IB pagkatapos sang reyd sang BHB sa lugar sang Septyembre 28. Ginkilala ang mga biktima nga sanday Andre Pinao kag Tungan Lauro.