Natapos na ang pagplastar sang papeles sa pagkandidato sang Oktubre 8 pero wala pa natapos ang paghilera sang mayor nga mga partido. Sa ulihi nga adlaw sang pagplastar, ginhimo nga kaladlawan sang guban ni Rodrigo Duterte ang proseso sang hinali nga nagtuhaw si Sen. Ronald de la Rosa bilang kandidato sa pagkapresidente sang PDP-Laban. Mismo si De la Rosa ang nagpabutyag nga ang iya pagdalagan bangud wala pa nag-anunsyo sang kandidatura si Sara Duterte.

Sa ulihi nga paghilera, anum nga presidente kag lima ka presidente ang nagadalagan sa idalom sang mga reaksyunaryo kag konserbatibong partido pangpulitika. Ang mga nabilog nga magpartner ang masunod: Leni Robredo-Kiko Pangilinan para sa Liberal Party, Isko Moreno-Willie Ong para sa Aksyon Demokratiko, Ping Lacson-Tito Sotto sa Partido Reporma, Bato de la Rosa-Bong Go (paksyon Cusi), kag Manny Pacquiao-Lito Atienza sa partido Promdi. Nagadalagan nga wala sang kapartner si Ferdinand Marcos Jr. sa idalom sang Partido Federal ng Pilipinas, isa ka partido nga gintukod sang mga tinawo ni Duterte.

Wala gihapon natapos ang hilera sa pagkasenador. Nag-init sining Oktubre ang wala paglakip kay Neri Colmenares sang koalisyong Makabayan sa kubay nga gintukod sang magpartner Robredo-Pangilinan. Sa baylo, gin-upod sa hilera nga ini sanday Juan Miguel Zubiri, Joel Villanueva kag Richard Gordon, mga senador nga may malaba nga rekord sang pakigbuligay kay Duterte.

Samtang, gin-upod sang magpartner Pacquiao-Atienza sanday Colmenares kag Elmer Labog, lider sang Kilusang Mayo Uno, sa ila kubay sang mga kandidato. Gin-endorso man sila sang grupong Lakas ng Masa nga nagplastar man sang kandidatura bilang presidente kag bise-presidente.