Napulo’g duha ka armadong aksyon ang ginreport nga ginlunsar sang mga yunit sang Bagong Hukbong Bayan (BHB) sa mga rehiyon sang Eastern Visayas, Northeast Mindanao kag Ilocos-Cordillera.

Gin-ambus sang BHB-Northern Samar (Rodante Urtal Command) ang tingub nga pwersa sang militar kag pulis sang Abril 3 sa Barangay San Miguel, Las Navas. Duha ang napatay kag duha ang napilasan sa tropa sang militar kag pulis.

Antes sini, ginpalukpan sang command-detonated explosives sang BHB ang tropang militar nga naga-operasyon sa Barangay MacArthur, Las Navas sang Marso 25. Tatlo ka suldado ang napatay.

Masunod ini sang pag-atake sang BHB sa 20th IB sa Nagoocan, Catubig sang Marso 22. Isa ang napilasan sa amo nga aksyon. Samtang, magkasunod nga operasyong haras ang ginlunsar sang BHB sang Marso 4-5 sa Barangay Tranque, Catarman kag sa kampo sang 43rd IB sa Barangay Santander, Bobon. Isa ang napatay samtang isa ang napilasan sa mga suldado.

Ginsilutan sang kamatayon sang BHB-Central Negros ang elemento sang CAFGU nga si Jeger Flores sa Barangay Sandayao Patrol Base sang 62nd IB sa Guihulngan City, Negros Oriental sang Abril 10. Imbolbado si Flores sa pagpatay kay Arnold Suerte, isa ka mangunguma, sang Enero.

Sa Surigao del Norte, gin-ambus sang BHB ang tingub nga pwersa sang 30th IB kag PNP sa Barangay Binukaran, Malimono sang Marso 26 sang hapon. Duha ang ginreport nga napilasan sa kubay sang mga suldado kag pulis.

Sang Abril 6, duha ka elemento sang CAFGU sa idalom sang 30th IB ang napilasan sa ambus sang BHB sa Sityo Tumay-as, Barangay Ferlda, Alegria sa pareho nga prubinsya. Sa masunod nga adlaw, gin-aresto sang mga Pulang hangaway ang duha ka aktibo nga aset sang 30th IB sa Barangay Mayag, Sison.

Nakuha sang yunit halin diri ang pila ka kagamitan militar lakip ang duha ka backpack, combat boots, mga selpon, GPS tracker kag isa ka pistola.

Gin-ambus naman sang Pulang hangaway sang BHB-Agusan del Norte ang nagaoperasyon nga 40-katawo nga yunit sang 29th IB sa Palor 12, Barangay Poblacion 2, Santiago sang Abril 14. Duha ka suldado ang napatay.

Samtang, tatlo ka suldado ang napilasan sa operasyong haras sang BHB-Kalinga sa detatsment sang CAFGU sa Barangay Mabaca, Balbalan sang Pebrero 4. Apat nga elemento naman sang 24th IB ang napatay sa kontra-reyd nga ginhimo sang BHB sa Barangay Anayan, Tineg, Abra sang Marso 23.