Masobra 100 elemento sang Armed Forces of the Philippines ang nagsalakay sa mga sityo sang Malikoliko kag Cunalom sa Barangay Carabalan kag sa Sityo Tigbao sa Barangay Buenavista, Himamaylan City, Negros Occidental sang Abril 22. Ginapangita nila ang 2-bulan nga lapsag kag 2-tuig bata nga mga anak kuno sang mga Pulang hangaway. Ginransak sang 30 suldado ang apat ka balay sa Sityo Malikoliko para pangitaon ang duha ka bata.

Ginpaandaman sang mga suldado ang lola sang mga bata kag pito pa ka residente. Kadungan sini, ginkordon sang mga berdugo ang komunidad, gindumilian nga maggwa ang sin-o man o magkadto sa ila nga ulumhan. Sa kabilugan, 42 indibidwal ang napalayas sa lugar—14 kababainhan kag 21 mga bata. Lakip diri ang pamilya sang ginpatay nga mag-utod nga Jayson kag Arnulfo Sabanal sang Marso.

Pagpamatay. Wala hawid-hawid nga ginpalukpan sang mga tropa sang 48th IB ang lima ka mangunguma sa Barangay Talisay, San Isidro, Davao Oriental sang Abril 23. Duha ang gilayon nga napatay samtang tatlo ang gin-aresto kag ginpaggwa nga mga katapo sang Bagong Hukbong Bayan (BHB). Mabaskog ini nga ginpanginwala sang NDF-Southern Mindanao. Siling nila, ang matuod, wala sang Pulang hangaway o yunit sang BHB sa lugar sang adlaw nga ina. Ginkontra man sang mga residente sang San Isidro ang pahayag nga ini sang AFP.

Sa Sorsogon, ginpatay sang mga suldado sang 31st IB sanday Alvin Orpiada, Randy Radana kag Christopher Nimo sa Sityo Small, Barangay Sta. Cruz, Donsol sang kaagahon sang Mayo 2. Ginpaggwa sang militar nga mga myembro sang BHB ang mga biktima nga napatay sa engkwentro.

Sa South Cotabato, ginpatay sang mga ahente sang estado si Eugene Latrella, katapo sang Bayan Muna kag konsehal sang Barangay Veterans, Surallah sang Abril 27. Ginluthang siya samtang nagamaneho sang motor sa kalsada sang Barangay Sinolon, T’boli.

Blokeyo. Nagpatuman sang blokeyo ang mga elemento sang PNP-SAF, 68th IB, 4th IB kag 67th IB sa mga banwa sang Calintaan kag Rizal sa Occidental Mindoro halin Abril 26 tubtob Abril 27 sa tabon sang paglagas sang isa ka yunit sang BHB. Gindumilian nila nga magdala sang pagkaon ang mga mangunguma sa ila nga kaingin.