Giparangalan ug gidumdum sa Communist Party of India (Maoist) ang mga martir sa rebolusyong Indian gikan Hulyo 28 hangtud Agosto 3, Semana sa Paghandum sa mga Martir. Gisaluduhan nila ang mokabat sa 124 ka Indian nga namartir samtang nagpatuman sa tagsatagsa nilang rebolusyonaryong tahas sa milabayng tuig ug sa ilang mga bantugang lider sama nilang Charu Majumdar (namatay 50 ka tuig na ang milabay) ug Kanhai Chatterjee (namatay 40 ka tuig na ang milabay.)

“Gisaluduhan sa Komite Sentral ang tanang mga martir nga naghalad sa ilang kinabuhi alang sa tinguha sa pagtukod sa sosyalismo… ug alang sa bag-ong demokratikong rebolusyon sa India,” matud sa pamahayag ni Abhay, tigpamaba sa CPI (Maoist).

Sa laing pamahayag sa CPI (Maoist) Central Region Bureau, gisaluduhan nila ang mga martir sa mga Adivasi o lumad sa nasud ug ang ilang nagpadayon nga pakigbisog.

Nanawagan usab sila og suporta alang sa pagbarog sa mga Adivasi batok sa imperyalistang pagpangawkaw ug pagpanalipud sa ilang yutang kabilin lambigit sa umalabot nga Pangkalibutang Adlaw sa mga Katutubo sa Agosto 9.

Biktima sa pasistang rehimen ang mga lumad kung asa ginapig-ot ug ginapadaplin sa estado ang mga dili kabahin sa relihiyong Hindu. Kapin 8% sa populasyon sa India ang mga katutubo ug namilegro karon tungod sa mga anti-lumad nga balaod nga pugos nga pagparehistro, bag-ong balaod lambigit sa pagpanag-iya sa lasang ug uban pa.