Sa takuban sa mga pekeng engkwentro Mabdos, 2 ka bata ug 3 ka mag-uuma, gipatay sa militar

, ,
Kini nga artikulo adunay hubad sa PilipinoEnglishHiligaynon

Sunud-sunod ang mga kaso sa paturagas nga pagpamusil sa mga sundalo sa Armed Forces of the Philippines (AFP) niining milabayng mga semana. Ginapagawas sa mga sundalo nga napatay ang mga biktima sa mga engkwentro ug nga myembro sila sa Bagong Hukbong Bayan (BHB).

Napatay sa pagpamusil sa 62nd IB ang 5-ka-bulang mabdos nga si Christina Jacolbe sa Sityo Banderahan, Barangay Trinidad, Guihulngan City, Negros Oriental niadtong Hulyo 26, alas-5 sa buntag. Kauban niya sa gipuy-ang balay ang iyang 16 anyos nga anak nga si Everly Kee Jacolbe ug paryente nga si Rodan Montero, nga namatay usab sa insidente. Kanhing magtutudlo sa daycare si Christina ayha pugos nga miundang sa trabaho human gi-red-tag ug gipig-ot sa militar.

Sa Batangas, napatay sa pagpamusil sa 59th IB sa Sityo Centro, Barangay Guinhawa, Taysan niadtong Hulyo 18 ang 9-anyos nga si Kyllene Casao. Pauli siya ug iyang amahan gikan sa pagtugway sa ilang kanding dihang gipamusil sila sa mga sundalo.

Ginapugngan sa 59th IB ang mga grupo sa tawhanong katungod nga mag-imbestiga sa nahitabuan sa insidente ug gitago ang amahan ni Kyllene. Sa pakignegosasyon sa lokal nga gubyerno, napaduso sa mga grupo sa tawhanong katungod ang paglunsad og usa ka independyenteng imbestigasyon kauban ang mga grupong nanalipud sa katungod sa mga bata ug ang United Nations Children’s Fund.

Gipusil usab sa 59th IB si Maximo Digno, usa ka mag-uuma sa Barangay Malapad na Parang, Lobo niadtong Hulyo 26. Matud sa mga residente, adunay problema sa pangutok si Digno. Usa ka adlaw ayha niini, paturagas nga namusil ang mga sundalo sa 59th IB sa kasikbit nga lugar.

Sa Occidental Mindoro, gipatay sa 76th IB si Dante Yumanaw, usa ka Mangyan-Batangan ug residente sa Sityo Tiyabong, Barangay Ligaya, Sablayan niadtong Hulyo 15. Kapitan siya sa maong barangay.

Ginapig-ot sa mga sundalo sa AFP ang pamilya sa mga biktima ug gibawalang mobisita sa lubong.

Mabdos, 2 ka bata ug 3 ka mag-uuma, gipatay sa militar