Lima ka aktibista ang sunud-sunod nga giaresto sa mga pwersa sa estado niining milabayng mga semana.

Gidakop sa giusang pwersa sa militar ug pulis si Marites Pielago, koordineytor sa Makabayan sa Bicol ug kanhing nominado sa Bayan Muna sa gama-gamang kasong pagpatay ug pakyas nga pagpatay niadtong Hulyo 28. Gidumog sa mga pwersa sa estado ang Dr. Nilo O. Roa Memorial Foundation Hospital sa Barangay San Francisco, Naga City kung asa nagpatambal si Pielago.

Managsuon nga Lumad usab ang gidakop sa gama-gamang kasong human trafficking sa adlaw sa State of the Nation Address (SONA) ni Ferdinand Marcos Jr niadtong Hulyo 25. Si Mawing ug Ismael Pangadas, mga estudyante sa Bakwit School, gidagit sa mga pulis human ang rali kontra-SONA sa Freedom Park, Roxas, Davao City.

Giaresto usab sa mga pulis sa gama-gamang kasong rebelyon ang mag-uumang si Gina Montenegro niadtong Hulyo 22 sa Purok 3, Hinapuyan, Carmen, Surigao del Sur.

Niadtong Hulyo 15, giaresto usab sa mga elemento sa estado si Arjay Verdera, myembro sa Anakpawis Partylist, sa Bulusan, Sorsogon. Ginapagawas sa mga pulis nga nakumpiska gikan kaniya ang usa ka kalibre .38 nga pistola ug mga bala.

Pugos nga pagpasurender. Gilingla ug pugos nga gipasurender sa mga elemento sa 15th IB ug NTF-Elcac ang mga myembro sa asosasyon sa Cauayan, Negros Occidental niadtong Hulyo 7-8. Lakip sa gipatambong nga grupo ang Caliling Small Agricultural Farm Workers Association, Tuyom Farmers Association, Small Farmers of Manuling, Paghiliusa sang mga Mangingisda sa Lugway ug Paghiliusa sang Mangingisda sa Guiljungan.

Sa pakigtinabangay sa militar sa lokal nga gubyerno, gipagawas nga tanyagan sila og programa alang sa panginabuhian apan ang tinuod, gipasurender sila isip mga Pulang manggugubat.

Pagpalayas. Sa pagpanguna sa 2nd IB, kakunsabo ang mga upisyal sa lokal nga barangay, gipalayas ang kapin 94 ka pamilya sa mag-uuma nga naga-ugmad sa may 550 ka ektaryang yuta nga kabahin sa 1,807 ektaryang “pastuhan” nga gihatag na kanila sa gubernador sa Masbate nga si Antonio Kho.

Langkub sa yuta nga ilang ginaugmad ang mga barangay sa Cabungahan, Calapayan ug Villaluna sa Cawayan. Usa ka agrikultural ang maong yuta, ug gideklarang pastuhan aron makalikay sa repormang agraryo.