Giaresto ug giinteroga sa 94th IB niadtong Nobyembre 14 ang 14-anyos nga batang babate nga si Jelca Ariola sa Sityo Suba-Suay, Barangay Mahalang sa Himamaylan City, Negros Occidental sa pasangil nga anak siya sa Pulang manggugubat. Pauli gikan sa eskwelahan si Ariola dihang giduulan sa militar ug gidala sa detatsment. Gibuhian siya human ang pipila ka oras nga pagpamig-ot ug pagpanghadlok. Sa parehong syudad, gikulata ug giinteroga sa 94th IB si Tata Balasabas sa Sityo Pisok, Barangay Buenavista niadtong Nobyembre 11.

Iligal nga giaresto ang mag-uuma nga si Charlie Lelis niadtong Nobyembre 1 sa Barangay Sangat, Gubat, Sorsogon sa gama-gamang kasong pagpatay ug sulayng pagpatay. Gilambigit si Lelis sa usa ka engkwentro sa Bagong Hukbong Bayan ug mga sundalo.

Gipabuthan og M203 ug giistraping sa 203rd IBde ang mga palibot sa Barangay Rizal, Aguas, ug Pitogo sa Rizal, Occidental Mindoro, ala-1 sa kaadlawon niadtong Nobyembre 6. Sa misunod nga adlaw, walay puas nga gipaulanan og bala ang kasikbit nga barangay sa Manoot, Rizal. Gibanabanang 100 ka pamilya ang mibakwit alang sa ilang kaluwasan.

Operasyong militar sa Negros

Gikan Nobyembre 2, nag-operasyon na ang 300-400 ka tropa sa 62nd IB sa utlanan sa mga lungsod sa Binalbagan ug Isabela sa Negros Occidental ug La Libertad sa Negros Oriental. Dili moubos sa 10 ka barangay ug 20 ka sityo ang apektado sa maong operasyon. Sa pipila ka lugar, nagpahamtang og curfew ang mga sundalo. Nagakampo usab sila sa mga sentro sa barangay, balay sa mga lumulupyo ug uban pang sibilyang istruktura. Nagagamit sila og mga drone nga nagbunga og kahadlok sa mga lumulupyo tungod sa hagonghong niini.

Niadtong Nobyembre 5, iligal nga giaresto si Tonie Elod human giutingkay sa 62nd IB ang iyang balay sa Sityo Mabato, Barangay Talaon, La Libertad. Gidakop usab nila si Joel Carpio, kumprador sa baboy nga taga-Barangay Cansumandi. Giputos og selopin ang iyang ulo samtang gikastigo.

Pito ka mag-uuma ang giinteroga ug gihadlok sa mga sundalo, ug dili moubos sa lima ka kabalayan ang gisulod ug usa ka balay ang giransak didto sa barangay Macasilao ug Winaswasan sa Calatrava ug barangay Bug-ang ug Magticol, Toboso niadtong Oktubre 19. Ang maong mga kalapasan bunga sa bag-ong bwelo sa mga nakapokus nga operasyong millitar sa mga lungsod sa Northern Negros mula Oktubre.