Adlaw sa Paghandum sa mga martir sa rebolusyon, gilunsad

,
Kini nga artikulo adunay hubad sa PilipinoEnglishHiligaynon

Kadungan sa pag-ugbok sa mga kandila, dunga-dungan nga gidumdum ug gipasidunggan sa mga Pulang manggugubat sa mga yunit sa Bagong Hukbong Bayan (BHB) sa Mindanao ang mga bayani ug martir sa demokratikong rebolusyon sa katawhan. Kalabot kini sa gilunsad nga adlaw sa paghandum sa mga martir niadtong Nobyemre 7 sa pagpanguna sa National Democratic Front (NDF)-Mindanao. Giatol kini sa adlaw sa pagdaug sa Sosyalistang Rebolusyon sa Russia niadtong 1917.

Gihalad ang pagdumdum kan Jorge Madlos (Ka Oris), nasudnong tigpamaba sa BHB, Antonio Cabanatan (Ka Manlimbasog), myembro sa Komisyon sa Mindanao sa Partido, Menandro Villanueva (Ka Bok), nasudnong kumander sa BHB, ug daghang maayong kadre sa Partido ug kumander ug manggugubat sa BHB nga nagbuhis sa ilang kinabuhi para sa rebolusyon.

Sa Surigao del Sur, nagtapok ang masa sa lokalidad ug mga Pulang manggugubat para ilunsad ang ilang simpleng aktibidad. Naghatag og mga mensahe ang mga manggugubat ug bisan ang mga masa nga misalmot sa panagtapok. Wala usay gipalabay ang higayon aron magtanyag og mga pangkulturang pasundayag ang mga misalmot alang sa programa.

“Angay lang nga suportahan ug mosalmot sa pakigbisog hangtud sa kadaugan,” matud sa usa ka lumulupyo nga mitambong. Saysay pa sa usa, “tinuod gyud diay nga ang BHB ang tigpanalipud ug sundalo sa masang dinaugdaug.”

Naglunsad usab og susamang panagtapok ang yunit sa BHB sa Agusan del Norte ug uban pang bahin sa Mindanao. Napuno og emosyon ang mga panagtapok apan sa kinaulahian subling gipalig-on matag usa ang determinasyon nga moabante.

Adlaw sa Paghandum sa mga martir sa rebolusyon, gilunsad