Giambus sa Bagong Hukbong Bayan (BHB) ang mga elemento sa CAFGU sa Barangay Manlut-od, Placer, Masbate niadtong Nobyembre 7. Duha ka elemento ang napatay ug nakumpiska kanila ang duha ka mubong armas, mga magasin, mga bala ug uban pang gamit militar.

Ang maong ambus dugang sa kapin 20 ka aksyong gerilyang gilunsad sa prubinsya sa mga yunit sa BHB niining tuiga. Matud sa yunit, halos platun ang gidaghanon sa mga kaswalti sa han-ay sa reaksyunaryong armadong pwersa sa mga aksyon.

Samtang, magkadungan nga aksyong militar ang gilunsad sa BHB-Central Negros batok sa mga berdugong tropa sa 62nd IB niadtong Nobyembre 12.

Nahitabo ang unang opensiba bandang alas-5:32 sa hapon batok sa detatsment sa militar sa Barangay Budlasan, Canlaon City. Pagkagabii, gipabuthan sa Pulang hukbo ang nagtapok nga mga sundalo sa 62nd IB sa gym sa Barangay Trinidad National High School, Guihulngan City. Usa ang napatay ug duha ang nasamdan sa mga pasista sa mga armadong aksyon.

“Ang pagpondo ug pagkampo sa militar sa mga eskwelahan ug uban pang pangpublikong lugar tin-aw nga paglapas sa mga lagda sa balaod sa gubat ug Comprehensive Agreement on Respect for Human Rights and International Humanitarian Law,” matud sa BHB-Central Negros.

Sa Abra, gipabuthan sa yunit sa BHB ang usa ka kolum sa 54th IB ug 102nd IBde niadtong Nobyembre 4 sa Barangay Mogao, Licuan-Baay. Tulo ka pasistang sundalo ang napatay. Lakip sila sa tropang naglunsad og nakapokus nga operasyong militar sa prubinsya sa milabayng mga bulan.