Global Climate Strike. Gilunsad niadtong Nobyembre 12 ang mga protesta sa lain-laing bahin sa kalibutan atol sa COP27 (27th Conference of the Parties). Sa Pilipinas, nagtapok ang mga demokratikong grupo sa Bantayog ng mga Bayani ilalum sa panawagang Climate Justice Now ug End Climate Imperialism.

Suhulan Patas-an, Presyo Paubsan. Petisyon ug serye sa mga protesta ang gilunsad sa mga unyon ug grupo sa mamumuo aron itukmod ang estado nga patas-an ang suhulan ug paubsan ang presyo sa mga palaliton. Gisugdan ang petition signing sa Cubao, Quezon City niadtong Nobyembre 11. Niadtong Nobyembre 16, miadtu sila sa Kongreso aron ipanawagan ang pagbalaod sa Anti-Union Interference Bill.

Dugang-badyet sa mga ospital. Nagpiket atubangan sa Senado ang mga myembro sa Alliance of Health Workers niadtong Nobyembre 17 aron iduso ang dugang-badyet alang sa mga pangpublikong ospital, taas nga suhulan ug dugang nga mga mamumuong regular.

Unity walk batok sa ROTC. Naglunsad og usa ka “unity walk” ang gatusan ka estudyante gikan sa lain-laing unibersidad sa Metro Manila niadtong Nobyembre 18, Internasyunal nga Adlaw sa Mga Estudyante. Gibatukan nila ang pagbalik sa Mandatory ROTC sa mga eskwelahan nga ginaduso ni Bise Presidente Sara Duterte.