Magkasunod nga kaso sa paglapas sa tawhanong katungod sa mga pwersa sa Armed Forces of the Philippines (AFP) ang nataho sa Masbate, Isabela, Negros Occidental ug Oriental, ug Sultan Kudarat sa milabayng mga semana. Nahitabo kini taliwala sa pagdumdum niadtong Agosto 12 sa Kalibutanong Adlaw alang sa International Humanitarian Law (IHL).

Dugang ang maong mga kaso sa 954 paglapas sa rehimeng Marcos Jr sa unang tuig niini sa poder.

Sa Sultan Kudarat, gipatay sa 37th IB si Rowe Jhon Libot, boluntir nga magtutudlo sa eskwelahan sa mga Lumad, niadtong Hulyo 27 sa Kalamansig. Ginapaimbestigahan sa mga grupo sa tawhanong katungod ang pagpatay kang Libot nga giila nilang paglapas sa internasyunal nga makitawhanong balaod ug mga lagda sa gubat nga aplikable sa mga lugar nga adunay nagatunhay nga armadong panagbangi.

Sa Masbate, gidakop sa 96th IB ug 2nd IB niadtong Agosto 5 ang mga mag-uumang silang Nonoy ug Bongbong Francisco, ug Ome Malaque sa utlanan sa Barangay Bonifacio ug Simawa sa Uson.

Gidagit ug gikulata usab sa mga sundalo si Dante Dionan sa parehong lugar niadtong Agosto 6. Iligal usab nga giransak ang balay ug gikawatan si Letot Francisco sa Malapinggan, Barangay Sawmill, Mobo. Niadtong Agosto 7, walay puas nga girakrakan ang usa ka wala pa nailang sibilyan sa Sityo Irong-irong sa utlanan ng Barangay Mabuhay, Sawmill ug Baang sa lungsod sa Mobo.

Sa Isabela, gipig-ot ug giinteroga sa mga sundalo sa 502nd IBde ang balay ni Ka Reolita Rivera, usa ka tigulang nga lider mag-uuma, sa lungsod sa Angadanan niadtong Agosto 8. Ang lokal nga organisasyon ni Rivera kaabag sa Danggayan Cagayan Valley, nga rehiyonal nga organisasyon sa Kilusang Magbubukid ng Pilipinas.

Sa Negros Occidental, iligal nga giaresto sa 94th IB ang 60-anyos nga mag-uumang si Romeo Balsimo sa Sityo Cunalom, Barangay Carabalan, Himamaylan City niadtong Agosto 7. Gilambigit siya sa usa ka armadong aksyon sa BHB niadtong 2020 kasikbit nga lugar. Niadtong ulahing semana lamang sa Hulyo, gitortyur ug iligal nga gipriso sa mga sundalo ang iyang anak nga si Romeo Balsimo.

Sa Negros Oriental, wala pa gihapon milayas ang mga sundalo sa 62nd IB nga nagkampo sa elementary school sa Sityo Agulang, Barangay Villegas, Guihulngan City gikan pa niadtong Agosto 3. Okupado pa gihapon sa mga CAFGU sugod niadtong Agosto 5 ang Kambairan Elementary School sa Barangay Trinidad, Guihulngan City. Makanunayon usab ang walay puas nilang pagpangransak sa mga balay sa mga residente.

Samtang, pipila ka hugna na nga nagpabuto ang dili kilalang mga indibidwal sa gawas sa balay sa lider mag-uuma nga si Alvin Dimaracut sa Tarlac niadtong Agosto 6. Si Dimaracut ang bag-ong lider sa Makisama-Tinang nga nagduso sa hinanali nga pag-apud-apud sa yuta sa mga benepisyaryo sa reporma sa yuta sa Hacienda Tinang sa Concepcion, Tarlac.