Nakumpiska sa mga yunit sa Bagong Hukbong Bayan (BHB) sa isla sa Negros ang upat ka riple ug lima ka pistola sa duha ka taktikal nga opensiba sa milabayng duha ka semana. Nataho usab ang ambus sa BHB-Masbate batok sa mga CAFGU ug ahenteng militar.

Giambus sa BHB-Northern Negros ang kontra-insurhensiyang yunit sa Philippine National Police (PNP) nga nagpatrolya sa Sityo Calanugan, Barangay Minapasuk, Calatrava, Negros Occidental niadtong Agosto 9. Nasakmit kanila ang upat ka ripleng armas, usa ka .45 kalibreng pistola ug mga bala.

Napatay ang usa ka pulis ug nasamdan ang tulo pa sa ambus. Samtang, gisiguro sa hukbong bayan ang kaluwasan sa mga sibilyan nga sakay sa usa ka canter truck ug sakyanang pang-reskyu nga nagsunod sa sakyanang pangpatrulya sa pulis.

Sa Negros Oriental, nakumpiska sa BHB-Central Negros ang upat ka pistola gikan sa ahente sa militar nga si Pen-pen Fajardo sa Sityo Mora, Barangay Pinukawan, Vallehermoso niadtong Agosto 13. Si Fajardo iladong nakig-lambigitay ug nakigtinabangay sa mga sundalo. Daghan usab siyag kaso sa pagpangabuso ug pagpamig-ot sa mga residente, lakip ang walay puas nga pagpamusil sa komunidad.

Sa Masbate, nasamdan ang mga elemento sa CAFGU ug kauban nilang mga vigilante nga ahente sa militar sa ambus sa BHB sa Barangay Bonifacio, Uson, Masbate niadtong Agosto 9. Sakay sila sa usa ka pick-up truck dihang gipabusikaran sa mga Pulang manggugubat.