Dugang-sweldo, duso sa mga empleyado. Nagtapok ang mga empleyado sa gubyerno gikan sa mga departamento sa edukasyon, panglawas ug uban pang ahensya atubangan sa Kongreso niadtong Agosto 10 aron iduso ang dugang nga badyet alang kanila samtang ginadungog sa House Committee on Appropriations ang sugyot nga ₱5.768 trilyong nasudnong badyet sa rehimeng Marcos Jr alang sa 2024.

Petisyon alang sa dugang-suhulan sa Rehiyon 4-A ug 7. Nagtapok ang mga mamumuo ilalum sa Workers’ Initiative for Wage Increase-ST sa RWB 4-A sa Batangas City niadtong Agosto 7 aron ipanghingusog nga ipataas ngadto sa ₱750/adlaw ang minimun nga suhulan sa rehiyon. Samtang, nagpiket atubangan sa DOLE-7 sa Cebu City niadtong Agosto 9 ang mga mamumuo ilalum sa AMA-Sugbo-KMU kadungan sa pagsumite nila sa petisyon alang sa ₱100/adlaw nga dugang-suhulan sa tibuok Rehiyon 7.

Kontra-mina sa Samar. Nagmartsa niadtong Agosto 7 sa sentro sa Borongan City, Eastern Samar ang kapin 2,000 ka residente gikan sa lain-laing bahin sa Samar aron ipanawagan ang pagpahunong sa magun-ubong proyektong mina sa isla sa Homonhon ug Manicani ug uban pang bahin sa isla.

First day fight! Gisugat og protesta sa mga estudyante sa University of Sto. Tomas (UST) ang unang adlaw sa ilang klase niadtong Agosto 9 atubangan mismo sa ilang unibersidad aron ipanawagan ang pagpanalipud sa katungod sa edukasyon sa mga kabatan-onan ug pagpabasura sa 6% pagtaas sa ilang matrikula ug lain pang balayrunon.

Sukol, UP. Nagmartsa ang mga lider kabatan-onan gikan sa lain-laing kampus sa University of the Philippines nga delegado sa General Assembly Student Councils niadtong Agosto 16 atubangan sa kampus sa UP Mindanao aron ipanawagan ang dugang nga badyet sa mga pangpublikong unibersidad ug kundenahon ang pagpamig-ot nga nasinati sa mga estudyante sa kamot sa mga ahente sa estado lakip ang gihimo kanila sa mga kapulisan padulong sa orihinal nga lugar nga tapukanan nila sa Freedom Park sa Davao.