Walo ka indibidwal ang brutal nga gipatay sa Armed Forces of the Philippines (AFP) sa mismong adlaw nga gidumdum ang ika-51 nga anibersaryo sa deklarasyon sa baload militar niadtong Setyembre 21. Lima kanila ang hors de combat ug tulo ang sibilyan. Niadto usang Setyembre 29, gipatay sa mga pwersa sa estado ang usa ka organisador sa kalihukan sa mamumuo sa Rizal.

Sa Masbate, namatay sa pagpamusil sa mga sundalo ug elemento sa CAFGU ang mag-asawang Jover “Dodo” Villegas, 40, ug Aimee Villegas nag taga-Sityo Basak, Barangay Luna, Placer. Gipagawas sa militar nga mga myembro sa Bagong Hukbong Bayan (BHB) nga napatay sa engkwentro ang duha. Miigpot ang mata ni Jover sa kadaghan sa iniguan sa bala sa iyang nawong.

Sa Negros Occidental, gimasaker sa 47th IB ang unum ka indibidwal nga sakay sa traysikel ug nagabyahe sa Sityo Lubi, Barangay Tabugon, Kabankalan City. Gipatay sa insidente ang lima ka myembro sa BHB nga dili armado ug walay kapasidad nga mosukol, ug ang ilang sibilyang drayber.

Mga medik sa BHB silang Bobby Pedro (Ka Rekoy), Mario Mullon (Ka Goring), ug Janice Flores (Ka Joyce.) Naka-medical leave usab ang mag-asawang Alejo de los Reyes (Ka Bravo) ug Melissa de la Pena (Ka Diane) nga 6-ka-bulang mabdos. Giila ang sibilyang drayber sa traysikel nga si Robin Gaitan.

Sa Binangonan, Rizal, gipusil sa mga pulis sulod sa iyang gisak-ang balay si Jude Fernandez, beteranong organisador sa Kilusang Mayo Uno. Gipagawas nga “nanlaban” (misukol) siya bisan og dili siya armado.

Pag-aresto. Dili makatarunganong giaresto sa mga pwersa sa estado sa gama-gamang kaso si Michael Eraña, 46, sa Barangay Nilumisu, Echague, Isabela niadtong Setyembre 21. Ginapagawas nga nakumpiska kaniya ang mga pusil, bala, granada ug kagamitang militar.

Pagpamig-ot. Niadtong Agosto, nakadawat ang Community Empowerment Resource Network (CERNET), Inc. sa Central Visayas og subpoena (pagpapatawag) gikan sa Department of Justice kalabot sa kaso sa “terrorist financing” sa 27 ka indibidwal nga kanhi ug kasamtangan niining mga upisyal ug istap. Lakip sa kaso si Jaime Paglinawan, presidente sa AMA Sugbo-KMU, nga alyadong organisasyon sa CERNET.

Kadungan niini, “gibisita” ug gipig-ot sa mga pulis niadtong Setyembre ang duha ka mamumuo sa takuban sa Executive Order 23 nga nagtukod sa daw komiteng manalipud sa katungod sa mga mamumuo nga mag-organisa.

Pagpamomba. Perwisyo ang gibunga sa duha ka adlaw nga pagpamomba sa 2nd IB ug 5th Field Artillery Battalion sa mga bukid sa Bagulayag, Uac ug Irong-irong sa Uson, Mobo ug Milagros sa Masbate. Dili moubos sa 46 ka beses nga gikanyon sa AFP ang lugar niadtong Setyembre 23-24.

Pagpamusil. Nagpaulan og bala ang mga sundalo sa 2nd IB sa utlanan sa mga lungsod sa Cataingan ug Palanas sa Masbate niadtong Setyembre 29. Nagbunga kini og kahadlok sa mga komunidad, ilabina sa mga estudyante ug magtutudlo. Napwersang magkansela sa klase ang mga eskwelahan sa mga apektadong barangay.