Gidumdum sa liboan ka Pilipino niadtong Setyembre 21 ang ika-51 nga anibersaryo sa pagdeklara sa balaod militar atubangan sa nagkagrabeng pasismo ug korapsyon sa rehimen ni Ferdinand Marcos Jr. Gilunsad sa mga progresibong grupo sa pagpanguna sa Bagong Alyansang Makabayan ang demonstrasyon sa Maynila kadungan sa mga protesta sa siyam ka prubinsya ug walo ka nasud sa temang “Martial Law kanhi, Terror Law karon.”

Kapin 6,000 ang nagmartsa gikan sa Liwasang Bonifacio padulong Mendiola sa Maynila. Nanawagan sila og hustisya alang sa libu-libong biktima sa paglapas sa tawhanong katungod sa panahon sa diktadurya ug sa mga misunod nga mga rehimen. Gipatataw nila sa protesta ang panawagang ibasura ang Anti-Terrorism Act of 2020 (ATA). Matud nila, ang kultura sa impunidad sa panahon karon ug pagtabon sa mga krimen sa estado kabahin sa “kabilin sa balaod militar” nga gipadayon sa rehimeng Marcos Jr.

Ayha niini, nagpiket ang mga organisasyon gikan sa Southern Tagalog atubangan sa embahada sa US ug sa Korte Suprema sa parehong adlaw. Naglunsad usab og mga protesta ang mga grupo sa kabatan-onan sa 12 ka unibersidad sa Metro Manila. Sa Intramuros, gipangunahan sa mga nagakontra sa pagpanglimbong sa eleksyong 2022 ang usa ka misang bayan atubangan sa Commission on Elections.

Sa Baguio City, kapin 800 ka kabatan-onan ang migawas sa ilang klase ug nagmartsa sa kadalanan sa Session Road. Sa Tacloban City, gipahigayon ang protesta gikan sa sulod sa UP-Tacloban. Naglunsad usab og susamang mga programa ang mga myembro sa progresibong organisasyon sa Cavite ug Pampanga, ug sa Legazpi City ug Naga City.

Nagtapok sa usa ka misang bayan ang mga Negrosanon sa Escalante City, samtang usa ka protesta ang gilunsad sa Bacolod City. Kaparehong mga protesta ang gilunsad sa mga syudad sa Iloilo, Cebu, Davao ug Tuguegarao.

Sa gawas sa nasud, nagpahigayon og dakung protesta ang Malaya Movement USA sa New York City niadtong Setyembre 18, kadungan sa kongreso niini. Giduso niining tapuson ang ayudang militar ug pondo sa pasismo sa gubyerno sa US sa rehimeng Marcos. Gipasiugdahan sa mga progresibong organisasyon sa US ang mga protesta sa siyam pa ka syudad sa US. Naglunsad usab og aktibidad ang mga organisasyong Pilipino sa Australia, Hong Kong, New Zealand, South Korea, Thailand, Japan, ug Canada.

Pagtuis sa kasaysayan

Kabahin sa tema sa mga protesta ang pagbutyag sa mga bakak ug pagpanuis sa pamilyang Marcos sa kasaysayan. Gimakmak sa mga grupo ang pagpagawas og memorandum sa Department of Education nga gipangulohan ni Sara Duterte nga nagtangtang sa pangalang “Marcos” sa “diktadurang Marcos” sa kurikulum sa elementarya.

Gawas dinhi, gibanhaw ug pugos usab nga ginapatulon sa pamilyang Marcos sa katawhan ang mga programa sa kanhing diktador sama sa mga Kadiwa Store, Masagana 99 ug ang “rebranding” nga Bagong Pilipinas gikan sa “Bagong Lipunan” sa iyang amahan.

Sama sa ginadahum, walay imik si Marcos Jr sa adlaw sa komemorasyon sa brutalidad sa iyang amahan. Walay ulaw pang naglunsad og “pagbalik-lantaw sa maayong epekto sa balaod militar” si Imee Marcos, kauban ang kanhing mga heneral ni Marcos Sr aron kontrahon ang pagpangdaut kuno sa ilang pamilya.