Dugang sa nagkadaghang biktima sa pagdagit ug sikretong detensyon sa rehimeng Marcos ang lima ka indibidwal sa magkabulag nga insidente niadtong Setyembre.

Gidagit sa mga pwersa sa 4th IB niadtong Setyembre 19 silang Job Abednego David, Peter del Monte ug Alia Encela sa Sityo Malaglag, Barangay Lisap, Bongabong, Oriental Mindoro.

Naga-imbestiga ang tulo sa mga pagpamomba ug pagpanganyon sa 203rd IBde sa lugar niadtong Abril. Ginatuki usab nila ang epekto sa pagkwari sa armour rock sa gagmayng mag-uuma ug magkokopra sa lungsod sa Bongabong.

Niadtong Oktubre 4, 16 ka adaw human sila gidagit, nakumpirma sa mga grupo sa tawhanong katungod nga gunit sila sa 203rd IBde ug gipriso sa kampo militar nga walay nakasang-at nga kaso.

Samtang, duha ka indibidwal ang gidagit sa Barangay Bantug, Gabaldon, Nueva Ecija sa tunga-tunga sa ala-1 ug alas-2 sa kaadlawon niadtong Setyembre 29. Ulahing nakita sa mga residente sa maong barangay sila Norman Ortiz ug Lee Sudario nga pugos nga gisakay sa usa ka van sa mga lalaking naka-unipormeng sundalo. Nakadagan ang usa pero nadakpan ra gihapon ug giguyod pabalik sa van. Niadtong Nobyembre 2022, giakusahan sa mga pulis si Sudario nga milapas sa Anti-Terrorism Act. Parehong nakasinati og makanunayong pagpamig-ot ang mga pamilya sa duha ayha ang pagdagit.

Sa Eastern Visayas, nataho niining bag-o lang nga adunay dili moubos sa 10 ka indibidwal ang biktima sa pagdagit ug sikretong detensyon sa Task Force Storm ug 8th ID ilalum sa rehimeng Marcos. Gittuuhang nabalhog ang mga biktima sa kampo sa 8th ID sa Barangay Maulong, Catbalogan.

Lakip sa mga sikretong gipriso ang duha ka bag-ong inahan nga silang Mariel Rebato ug Monica Ogacho ug ilang bag-ong gipanganak.