Nagprotesta ang mga grupo sa mag-uuma ug kababayen-an sa Mendiola sa Maynila niadtong Pebrero 14 aron ipanawagan ang pagbasura sa Rice Liberalization Law (RLL), nga nabalaod sa susamang adlaw niadtong 2018. Gibatikos nila ang liberalisasyon sa pag-import og bugas nga nagresulta sa labaw pang pagsaka sa presyo sa bugas, sukwahi sa saad niining mapaubsan ang presyo. Niadtong katapusan sa 2023, narekord ang pinakataas nga “rice inflation” sa tantos nga 19.6%, pinakapaspas sa milabayng 14 ka tuig. Kumpara sa 2022, misaka og halos ₱10 ang bugas kada kilo niadtong milabayng tuig. Pagsulod sa 2024, misaka pa og ₱1-₱2 ang bugas kada kilo. Labaw usab nga miubos ang presyo sa pagpalit sa humay sa nasud.