Nagprotesta ang mga grupo sang mangunguma kag kababainhan sa Mendiola sa Manila sadtong Pebrero 14 para ipanawagan ang pagbasura sa Rice Liberalization Law (RLL), nga napasar sa laye sa amo man nga adlaw sadtong 2018. Ginsaway nila ang liberalisasyon sang pag-pasulod sang bugas nga nagresulta sa ilabi pa nga pagtaas sang presyo sang bugas, kabaliskaran sa pasalig sini nga panubuon ang presyo. Sadtong katapusan sang 2023, nalista ang pinakamataas nga “rice inflation” sa tantos nga 19.6%, pinakamadasig sa nagligad nga 14 ka tuig. Kumpara sa 2022, nagtaas sang halos ₱10 ang bugas kada kilo sadtong nagligad nga tuig. Pagsulod sang 2024, nagtaas pa sang ₱1-₱2 ang bugas kada kilo. Ilabi naman nga nagnubo ang presyo sang baklanay sang humay sa pungsod.