Nataho sa milabayng mga semana ang sunud-sunod nga mga kaso sa pag-aresto, pagpaniktik ug pagpamig-ot sa mga elemento sa militar ug pulis batok sa mga progresibo ug aktibista sa rehiyon sa Negros, Bicol ug Southern Tagalog.

Sa Negros Occidental, giaresto sa mga pulis si Pertinisa Jereula Charita, 55, samtang nagaduaw sa iyang bana sa prisohan sa San Carlos City niadtong Pebrero 13. Matud sa Human Rights Advocates Negros (HRAN), ginapagawas sa mga pulis nga nakumpiska kang Pertinisa ang usa ka kalibre .22 nga pistola dihang gikapkapan.

Si Pertinisa, myembro sa Kapatid-Negros ug National Federation of Sugar Workers (NFSW), asawa ni Leon Charita nga giaresto niadtong Setyembre 2019 sa kasong illegal possession of firearms and explosives. Kauban ni Pertinisa ang iyang mga anak ug apo dihang miduaw kang Leon aron saulugon ang iyang adlawng natawhan sulod sa prisohan.

Sa Albay, gitiktikan ug gipig-ot sa mga sundalo sa 9th ID ang mga paryente sa mga myembro sa Farmer’s Assistance for Resource Management, Education and Rehabilitation Incorporated (FARMER Inc) nga silang Maggie Seva, upisyal administratibo niini, ug istap nga si Fidel Mirando niadtong unang katunga sa Pebrero. Gipailalum sa iligal nga interogasyon ang mga paryente sa duha.

Sa Rizal, nagbalay-balay ang usa ka elemento sa 2nd ID sa Barangay San Isidro, Antipolo City, Rizal niadtong ikaduhang semana sa Pebrero ug nangusisa kalabot sa mga lider-masa sa progresibong kalihukan sa Rizal. Nakasibilyan ang sundalo ug nagpasumangil nga empleyado sa Antipolo City Hall aron ipatuman ang pagpaniktik. Matud sa mga silingan, ginakuha kanila sa sundalo ang mga personal nga impormasyon ug numero sa selpon sa mga lider-masa.

Sa Oriental Mindoro, nangsamok-samok ug nanghadlok ang mga personel militar ug pulis sa mga mangingisda ug makitawhanong grupo nga nagpahigayon og Boat Construction Project sa Naujan niadtong Pebrero 7. Laraw sa proyekto nga maghatag og mga bangka ug himan sa pagpangisda sa mga naapektuhan sa oil spill niadtong milabayng tuig. Human gisamok ang programa, walay ulaw nga giangkon sa militar nga kabahin sa kampanya sa National Task Force-Elcac ang programa.