Nagtapok niadtong Pebrero 15 ang kapin 100 ka mga organisasyon ug indibidwal ilalum sa No to Chacha Network aron babagan ang pakana sa rehimeng Marcos nga bag-ohon ang Konstitusyong 1987 (charter change o chacha), pinaagi sa unsamang porma. Gisulti usab nila ang pagdumdum sa ika-38 nga kasumaran sa Panag-alsang EDSA, nga matud nila basihan kung nganong namugna ang maong konstitusyon.

Supak ang mga grupo sa mga pagsulay nga amyendahan ang konstitusyon pinaagi man sa mini nga people’s initiative o constituent assembly. Matud nila, kini nga mga pagsulay “wala gikinahanglan, masiaksiakon, gasto kaayo, ug nakapukos nag-una sa pagpabilin sa pwesto sa mga anaa sa poder.”

Imbis nga unahon ang chacha, nanawagan ang mga grupo ug indibidwal nga hatagag pagtagad sa mga anaa sa pwesto ang pagpataas sa suhulan ug kita, pagpaubos sa presyo sa mga palaliton ug batakang yutilitad, pagpanindot sa mga katilingbanong serbisyo, pagsumpo sa korapsyon ug red tape (taas nga proseso ug linya sa burukrasya), pagpanalipud sa mga tawhanong katungod, hustisya ug kalinaw, pagpanalipud sa soberanya sa West Philippine Sea, pagprotekta sa kinaiyahan ug pagsiguro sa limpyo ug masaligang eleksyon.

Mitambong sa panagtapok ang mga nasudnon-demokratikong organisasyon, mga kongresista sa blokeng Makabayan, myembro sa 1Sambayan, kanhing upisyal sa gubyerno, tawong-simbahan, grupong estudyante, magtutudlo, uban pang grupo sa mamumuo ug daghan pang uban. Mitambong usab silang Justice Antonio Carpio, Commissioner Rene Sarmiento, Atty. Neri Colmenares, Sr. Mary John Mananzan, kanhing DSWD Sec. Judy Taguiwalo, Bishop Gerardo Alminaza, lider sa One Negros Ecumenical Council (ONE-C) ug obispo sa San Carlos City ug daghan pang uban.

Mipirma usab sa giusang deklarasyon ang kanhing senador nga si Kiko Pangilinan, Atty. Lutgardo Barbo sa PDP Laban ug sa upisina ni Sen. Koko Pimentel, Fr. Daniel Franklin Pilario, presidente sa Adamson University, Dr. Noel Leyco, kanhing presidente sa Pamantasan ng Lungsod ng Maynila, ug si Diwa Guinigundo, kanhing deputy governor sa Bangko Sentral ng Pilipinas.

Samtang, walag too nga aktibidad ang gilunsad niining bulana sa lain-laing grupo aron babagan ang chacha.

Sa Bacolod City, nagtapok ang mga tawong-simbahan ug mga demokratikong organisasyon sa pagpanguna sa ONE-C niadtong Pebrero 10 aron ilunsad ang usa ka malukpanong kampanya batok sa chacha. Niadtong Pebrero 8, naghugpong sa alyansang Way Chacha (Walay Chacha) ang lain-laing indibidwal sa Davao City batok dinhi. Gitukod usab sa lain-laing demokratikong mga organisasyon ang No To Charter Change Coalition-Panay sa Iloilo City niadtong Pebrero 20.

Sa Valentines Day, nagmartsa padulong sa Mendiola ang mga grupo sa mag-uuma ug kababayen-an batok sa Rice Liberalization Law. Panawagan nila: pagkaon sa lamesa, dili chacha!

Niadtong Pebrero 16, nagmartsa ang mga kabatan-onan ug estudyante sa University Belt sa Maynila aron ipadayag ang pagbabag sa komersyalisasyon sa edukasyon ug pagbatok sa makilangyaw nga chacha sa rehimeng Marcos. Matud nila, pagatugutan sa chacha ang hingpit nga langyawng pagpanag-iya sa pagpadagan sa edukasyon nga labawng magpaantus sa mga kabatan-onan.

Sa parehong adlaw, nagtapok ang mga mamumuo sa EDSA Shrine ilalum sa panawagang “dugang suhulan, dili chacha.” Ayha niini, niadtong Pebrero 14, naglunsad sila og protesta atubangan sa Senado, kadungan sa pagdungog sa sugyot nga ₱100 dugang-suhulan nga gisumite sa katiguman.