Subling gipakyas sa mga residente sa Sityo Balubad, Barangay Anunas, Angeles City ang lain na usab nga pagsulay sa pulis, kakunsabo ang Clarkhills Properties Corporation, nga idemolis ang ilang komunidad gikan niadtong Pebrero 7. Dili moubos sa 100 ka pulis ug mga myembro sa SWAT, dugang sa 50 katawo, ang gipadala sa sityo aron gamiton sa pugos nga pagpalayas sa mga residente.

Apektado sa planong demolisyon ang kapin 500 ka balay sa 72-ektaryang yuta nga ginailog sa maong kumpanya. Gibanabanang 2,000 ka residente ang biktima sa pagpangilog sa yuta. Gawas dinhi, gikabalak-an usab nga maapektuhan sa pagpangilog ug demolisyon ang kasikbit nga mga barangay sa Cuayan ug Sapangbato.

Luyo sa kawad-on sa memorandum order, subling pugos nga gisulod sa mga pulis, SWAT ug tim sa demolisyon ang barikada sa residente sa Sityo Balubad. Gikawatan na, gikulata pa sa mga berdugo ug gisamaran sa tiil ang tag-iya sa balay nga gisulayan nila sa pagguba. Dihadihang miresponde ang laing mga residente ug midepensa sa ilang komunidad.

Walay hunong ang mga pulis sa pagpanghulga sa mga residente. Gikasahan nila og pusil ang mga sibilyan. Gibato sa tim sa demolisyon ang mga residente kung asa 20 ang nasamdan. Mibalik pa pagka-ugma ang mga pwersa sa estado ug tim sa demolisyon ug pugos nga gisulod ang barikada.

Tungod sa panaghiusa ug pagpanalipud sa mga residente, subli nilang napalayas ang mga pulis ug napugngan ang demolisyon. Ingon niini usab ang nahitabo niadtong Oktubre 2023 dihang gisulayan sa pagbungkag ang ilang barikada aron ipatuman ang demolisyon.

Duso sa mga pamilya sa sityo, ila ang yuta ug aduna silay mga dokumento (certificate of land ownership award) ug resibo sa pagbayad niini sa Landbank of the Philippines.