Magkadungan nga hublag protesta ang ginlunsar sang kababainhan sa idalom sang Gabriela sadtong Marso 1 sa pagsugod sang Bulan sang Kababainhan. Panawagan nila: Palangabuhian, Kinamatarung, Kahilwayan, indi chacha sang dumuluong kag pipila!

Sa amo man nga adlaw, nagpadulong ang mga myembro sang Gabriela Youth, upod ang iban pa nga grupo sang pamatan-on, sa Mendiola sa Manila para ipahayag ang ila pagpamatuk sa chacha sang rehimen Marcos.

Naghiwat man sang kasubong nga hublag sa sulod sang University of the Philippines-Los Baños nga ginpangunahan sang Gabriela Youth-UPLB. Base sa grupo, ang hublag ang pakig-isa sa gintalana nga Purple Day of Action.

Kadungan sini, naglunsar sang saot-protesta ang kababainhan nga mamumugon sa idalom sang Women Workers United kag Kilusang Mayo Uno para sa sweldo, trabaho, kinamatarung kag pagtapos sa kapintas sa pamugon. Sadtong Marso 5, naglunsar man sang protesta sa Manila ang Gabriela-NCR.