Pagtambong ni Marcos sa ASEAN sa Australia, gindugok sang protesta. Sundanay nga protesta ang ginlunsar sang mga migranteng Pilipino kag progresibo nga grupo sa Melbourne, Australia halin Marso 4 tubtob Marso 6, kaangot sang ginlunsar nga ASEAN-Australia Special Summit kag pagtambong diri ni Ferdinand Marcos Jr. Sa pagpamuno sang Bagong Alyansang Makabayan (Bayan)-Australia, ginsubol sang mga protesta ang ASEAN Summit kag ang mga aktibidad ni Marcos.

Hustisya sa Bilar 5 kag mga biktima sang pasistang AFP-PNP. Nagtililipon ang pamatan-on kag mga progresibo nga organisasyon sang Central Visayas sa University of the Philippines (UP)-Cebu Ampitheater sadtong Marso 3 para hatagan pagsaludo kag pasidungog ang Bilar 5, ang lima ka Pulang hangaway nga ginmasaker sang mga pwersa sang estado sa Bilar, Bohol. Samtang, naglunsar naman sang isa ka candle lighting protest ang mga pamatan-on sang UP Cebu sadtong Pebrero 29.

Sadtong Marso 5, nagprotesta ang mga grupo sa tawhanon nga kinamatarung sa Camp Aguinaldo sa Quezon City para kundenaron ang asud-asod nga mga kaso sang pag-abdak, pagpamomba kag hungod nga pagpatay sa mga aktibista, progresibo kag rebolusyonaryo sang AFP-PNP.

Philippine Mining Act, ibasura. Naglunsar sang protesta ang Katribu, Kalikasan PNE kag iban pa nga demokratiko nga grupo sa atubang sang Department of Environment and Natural Resources sadtong Marso 4 para ipanawagan ang pagbasura sa Philippine Mining Act sang 1995. Sa 29 ka tuig nga pagluntad sang laye, naghatag ini sang wala tupong nga kahalitan sa kinaiyahan kag mga komunidad sang mga tumandok kag mangunguma.