Bag-ong serye sa pagpanangtang sa Nexperia. Gikundena sa Nexperia Workers Philippines Inc. Workers Union (NWPIWU)-NAFLU-KMU ang lain na usab nga serye sa pagpanangtang nga ipatuman sa Nexperia Philippines gikan Abril hangtud Setyembre. Gipahibalo sa kumpanya ang unyon niadtong Marso 4 nga adunay mahitabong halos duha ka semana nga shutdown sa usa ka erya niini ug manangtang og 53 ka mamumuo. Hulga sa kumpanya, una pa lamang kini sa serye sa posibleng pagpanangtang karong tuiga. Ang malukpanong pagpanangtang nga ipahamtang sa Nexperia paglapas sa mga kundisyon nga nakasulat sa CBA niini sa unyon. Kasamtangang nakignegosasyon alang sa CBA 2024-2026 ang unyon.

Benepisyo sa mga dyanitor sa PUP, giduso. Nagpiket ang mga dyanitor ug myembro sa Samahan ng Janitorial (SJ), mga myembro sa Anakbayan ug mga estudyante sa Polytechnic University of the Philippines (PUP) sa Santa Mesa, Manila niadtong Marso 13 aron iduso ang natanggong nga mga benepisyo sa mga dyanitor gikan sa Starcom Manpower Agency. Giatol ang protesta sa pakigdayalogo sa mga mamumuo sa representante sa ahensya. Niadtong milabayng tuig pa unang giduso sa mga dyanitor ang ilang pangayo sa administrasyon sa PUP ug sa ahensya alang sa ilang insentibo, 13th month pay, retroactive pay, ug kawalay transparency sa pagsuhol kanila.

Nasudnong Adlaw sa Paghandum sa mga Migrante. Nagprotesta ang mga myembro sa Migrante sa Department of Migrant Workers (DMW) niadtong Marso 17 isip kabahin sa ilang pagdumdum sa Nasudnong Adlaw sa Paghandum sa mga Migrante. Samtang, nagpiket ang mga overseas Filipino workers gikan Saudi Arabia aron ipanghingusog ang ilang gipaningkamutang suhulan ug benepisyo nga wala pa nila nadawat sukad nga gisisante sila niadtong 2016 sa maong nasud. Sa banabana sa DMW, mikabat sa 9,000 ang ihap sa maong mga mamumuo.