Gidayeg sa Komite Sentral sa Partido Komunista ng Pilipinas (PKP) ang Bagong Hukbong Bayan (BHB) sa okasyon sa ika-56 nga anibersaryo niini. Among gihatag ang militanteng pagsaludo sa kaisog ug kamabayanihon sa mga Pulang manggugubat ug kumander nga padayong nanglimbasog sa pagpaasdang sa gubat sa katawhan aron ipakigbisog ang pangandoy sa katawhang Pilipino alang sa nasudnong kagawasan ug tinuod nga demokrasya.

Among gitimbaya ang BHB sa tanang gipaningkamotan niining mga kadaugan sa kapin lima ug tunga sa dekada nga pag-asdang sa gubat sa katawhan. Gipasidunggan kamo sa katawhang Pilipino isip ilang labing hinigugmang mga manggugubat. Wala kamoy kahadlok nga misukol alang sa katawhan aron tapuson ang dominasyon sa imperyalismo, pyudalismo ug burukratang kapitalismo, ug maisugong gisuklan ang rehimeng US-Marcos.

Niining mahinundanong takna, gipasidunggan sa liderato ug tibuok ginsakpan sa Partido ang tanang namartir nga mga bayani sa BHB nga naghalad sa katapusang sakripisyo sa pagpiling alagaran ang katawhan aron suklan ang mga nangdaugdaug ug nagpahimulos kanila. Sila ang mga martir sa katawhan, modelo sa bug-os nga dedikasyon sa rebolusyonaryong kawsa.

Gipasidunggan namo kamo sa inyong hugot nga pag-ila sa liderato sa Partido ug aktibong pagpaasdang sa kalihukang pagtul-id sugod niadtong Disyembre 2023. Pinaagi sa pagka kritikal sa kaugalingon ug pagtul-id sa miaging mga kasaypanan ug kahuyangan, hinay-hinay ninyong subling nabawi ang inyong kusog subay sa lalum ug lapad nga suporta sa masa, ug sa paglunsad og gerilyang pakiggubat subay sa inyong makaya.

Daghan pa ang kinahanglang himuon aron mabawi ang nawalang base, subling palagsikon ang hukbo ug ang baseng masa, ug subling kab-uton ang kanhing ang-ang sa kusog. Kinahanglan natong patigbabawan ang daghang babag ug kalisdanan. Desperado ang kaaway sa laraw niining pukanon ang Bagong Hukbong Bayan, aron walay manalipud sa katawhan ug walay pwersa nga mosukol alang sa ilang tinguha. Naglulunsad ang kaaway og usa ka bangis ug mangtas nga gubat, apan kini, nagmalampuson lamang sa pagtukmod sa katawhan nga mosukol sa tumang kusog ug determinasyon.

Kinahanglang maningkamot pag-ayo ang tibuok Partido aron pakusgon ang Bagong Hukbong Bayan ug iasdang ang rebolusyonaryong armadong pakigbisog, nga maoy nag-unang armas sa masang Pilipino, dili lamang sa pagpanalipud sa ilang mga kaugalingon batok sa mga pasistang nangdaudaug ug nagpahimulos kanila, kundili aron kab-uton usab ang ilang tinguha alang sa nasudnon ug katilingbanong paglingkawas. Ang tahas sa pagpakusog sa BHB mao ang kasamtangang labing nag-unang katungdanan sa Partido ug kinahanglang abagahon sa tanang kadre ug komite, lakip ang nakabase sa mga syudad, ingonman sa mga langyawng nasud. Ang pagtuman sa maong tahas usa ka rekisito sa pagpaasdang sa tanang lain pang gimbuhaton. Kinahanglang magsilbi ang tanang uban pang gimbuhaton sa tinguhang iasdang ang rebolusyonaryong armadong pakigbisog.

Kahimtang ug mga tahas sa Bagong Hukbong Bayan

Ang kalihukang pagtul-id nga kasamtangang ginalunsad sa Partido padayong migamot, mikaylap ug mibunga og positibong mga resulta, partikular sa natad sa rebolusyonaryong armadong pakigbisog. Sa kapin usa ka tuig lamang sukad nga gilunsad ang kalihukang pagtul-id, subsub ang atong mga paningkamot sa pagkonsolida ug subling pagpalagsik sa BHB. Ilalum sa kalihukang pagtul-id, lagsik nga gipatuman sa Partido sa han-ay sa BHB ang usa ka internal nga kampanya sa pagtuon ug pagtuon balik sa Marxismo-Leninismo-Maoismo, sa batakang mga prinsipyo sa Partido ug estratehiya ug taktika sa paglunsad sa malungtarong gubat sa katawhan.

Aron iasdang ang kalihukang pagtul-id, naglunsad og mga kumperensya ang BHB sa ang-ang sa rehiyon ug uban pang ang-ang sa kumand aron sumadahon ang mga kasinatian aron puntingon ug tubagon ang mga kasaypanan, kahuyangan ug kakulangon sa miagi. Gipalig-on, gipakaylap ug gipalalum niini ang yaweng mga kritikal nga obserbasyon sa Komite Sentral dihang gisugdan ang kalihukang pagtul-id niadtong Disyembre 2023. Gipalig-on ang mga resolusyon nga nagtinguhang pakusgon ang BHB ug kumprehensibong iduso paabante ang gubat sa katawhan. Determinado kaayo ang mga Pulang manggugubat sa BHB nga mosukol alang sa katawhan batok sa brutal nga pag-atake sa pasista ug malupigong rehimeng US-Marcos.

Kusganong ginasaway ug ginasalikway sa Partido ug sa BHB ang nagpatigbabaw nga Toong oportunistang tendensya nga misangpot sa mga kasaypanan, kahuyangan ug kakulangan, ug nga nagresulta sa pag-ungot ug pag-atras. Nag-unang dagway niini mao ang konserbatismo ug pagbuhi sa gerilyang inisyatiba, pareho sa gimbuhatong militar ug pulitika, nga nagpahuyang sa BHB ug sa baseng masa niini.

Nagresulta kini sa mga tendensya sa pagpig-ot sa kaugalingon (self-constriction), sama sa tigdugay nga pagbase sa bukid sa mga pormasyon sa BHB ug kapakyasang palapdon ang erya sa operasyon sa mga yunit sa BHB gawas sa ilang “paboritong” mga baseng erya. Nagbunga kini sa paghuyang sa kapasidad sa BHB nga makalunsad og sustenido ug malukpanong katilingbanong pagtuki, propaganda ug pag-organisa sa han-ay sa mayorya sa masang mag-uuma. Adunay pipila ka yunit sa BHB ang nagsugod sa pagsalig sa mga alyadong adunahang mag-uuma aron pangulohan ang mga pakigbisog sa masa, imbes nga tukuron ang organisadong kusog, nag-una sa kabus nga mag-uuma ug mamumuong panguma, kaabag ang ubos nga hatungang mag-uuma ug tunga sa hatungang mag-uuma. Aduna usay tendensya nga magsalig lamang sa paghatag og mga proyektong sosyo-ekonomiko o pangkomunidad, nga nagpalayo sa masa sa kamahinungdanong tukuron ang ilang organisasyong masa alang sa paglunsad sa makihut-ong nga pakigbisog aron suklan ang pyudal ug semipyudal nga mga porma sa pagpangdaugdaug ug pagpahimulos. Nahitabo ang tagdugay nga pagbiya sa sistematikong paningkamot nga tukuron ang mga yunit milisya ug maghimo og inisyatiba sa gerilyang pakiggubat. Isip resulta niining tanan, naangkon nato ang pagsigpit ug pagmabaw sa baseng masa.

Wala hugot nga nahuptan ang yaweng tahas sa paglunsad sa rebolusyong agraryo. Wala nalunsad ang mga kampanya sa reporma sa yuta nga makapalihok sa bagang duut sa mag-uuma, sa ang-ang sa gikusgon ug gilapdon, isip tubag sa nagkagrabe ug nagkakaylap nga mga porma sa pyudal ug semipyudal nga pagpahimulos, kumbersyon sa yuta, ug pagpangilog sa panginabuhian sa minilyong mag-uuma, mamumuong panguma ug mangingisda sa kabanikanhan. Wala nakonsolida ug napataas ang miaging mga kalampusan sa paglunsad sa reporma sa yuta. Dili sustenidong napatuman ang pagpakusog sa mga lokal nga sanga sa Partido ug organisasyong masa.

Atong nakita kung giunsa sa maong mga kahuyangan ug kakulangan sa pagtukod ug pagpalapad sa baseng masa nakaapekto sa kapasidad ug kumpyansa sa BHB nga maglunsad og mga taktikal nga opensiba nga nag-unang tumong mao ang hinay-hinay nga pukanon ang armadong pwersa sa kaaway, ug kumpiskahon ang ilang mga armas. Hinunua, adunay tendensyang labaw nga magsalig sa panagsang harasment ug uban pang atritibong taktikal nga opensiba, nga wala sistematikong mipahuyang sa kusog sa kaaway, ni nakatabang sa makanunayong pagkonsolida sa kusog sa BHB. Labaw kining gipagrabe sa tendensyang mahimong pasibo atubangan sa pangmilitar nga superyoridad sa kaaway, nga resulta sa sigpit ug mausa-ka-bahin nga pagtan-aw sa balanse sa mga pwersa, ug kapakyasang ilhon ang taktikal nga kusog sa kaaway ug estratehikong kahuyangan niini sa diyalektikal nga panglantaw.

Gipakaylap usab sa Toong oportunistang tendensya ang ultra-demokrasya ug gipahuyang ang pangsulod nga disiplinang militar sa BHB, ug pang-ideolohiyang prinsipyo sa mga Pulang manggugubat. Nagbunga ang ultra-demokrasya sa pagpakontento, ug nag-anak sa “sibilyanisasyon” sa han-ay sa mga Pulang manggugubat. Dili hugot nga ginasunod ang batakang mga lagda ug oryentasyon sa dagan sa ilang inadlaw-adlaw nga aktibidad sa kampo, sa pagmartsa, o sa gimbuhatong masa o gimbuhatong militar. Kanunay niining gipalangan ang mga maniobra, ginapugngan ang inisyatiba, ug mas grabe, mibalda sa ilang kapasidad nga epektibong makigsangka sa kaaway. Nakumpromiso ang gerilyang pagsekreto sa pag-abusar sa paggamit sa mga linya sa suplay, pagmaniobra sa daang mga ruta nga nahibaloan na sa kaaway, ug pagpasagad sa batakang mga palisiya sa pag-amping sa paggamit sa himang elektroniko ug radyo. Tungod sa kakulang sa hugot nga pagtuman sa mga palisiya, milampus ang kaaway sa pipila ka higayon nga magpasulod og mga GPS tracker nga ginagamit alang sa takdo nga mga aerial strike.

Lain pang manipestasyon sa ultra-demokrasya ang sobrang dispersal sa mga yunit, kakulang sa lig-on nga sistema sa kumand ug kontrol, kapakyas nga regular nga magreport ug mokontak sa ilang nahataas nga kumand, ug pagpasagad sa pagpalambo ug pagpakusog sa usa ka paspas ug masaligang sistema sa komunikasyon. Naghatag dalan usab ang Toong oportunismo sa burukratismo, kung asa pakyas ang mga kumand nga mangulo gilayon aron hatagag direksyon o motabang sa pag-atubang sa mga problema o isyu nga giatubang sa nahaubos nga mga yunit. Sa pinakagrabe, gianak sa burukratismo ang “eksepsiyonalismo” kung asa dili patas nga ginatuman ang palisiya sa mga kumander ug manggugubat, nga mipahuyang sa pangsulod nga panaghiusa sa pipila ka yunit sa hukbong bayan.

Ato usang nakita ang mga “Walang” oportunistang tendensya isip sekundaryong tendensya, lakip ang absoluto o tagdugay nga konsentrasyon sa mga platun ug mas dagkung pormasyon, mga taktikang “expansion by fire” nga sayop nga naglatag sa direksyon sa BHB, pag-target sa lig-on nga kaaway, wala sa panahon nga pagpokus sa mga taktikal na opensiba gamit ang kusog-kumpanya dungan sa pagpadaplin sa taktikal nga opensiba gamit ang gagmayng yunit, ug uban pa.

Ang anam-anam nga paghinay sa baseng masa, ang makanunayong pag-us-us sa kapasidad nga makalunsad og anihilatibong mga taktikal nga opensiba, nagkadaghang paglapas sa gerilyang disiplina, ug paglambo sa burukratismo sa han-ay sa BHB tanan mitampo sa mga kakulangan sa pagtuman sa taktikal nga linya sa paglunsad sa lapad ug subsub nga gerilyang pakiggubat subay sa nagkalapad ug nagkalalum nga baseng masa. Nagresulta kini sa pag-ungot sa malungtarong gubat sa katawhan sa tungang yugto sa estratehikong depensiba sa taas nga panahon.

Tungod sa maong mga kahuyangan ug kasaypanan, nabutang ang BHB sa bulnerableng pusisyon sa gipasubsub nga pagliyok ug pag-atake sa kaaway. Gikan 2017 ug 2018, mitataw ang walay hunong nga nakapokus ug sustenidong operasyong militar (FSMO) nga nagmobilisa sa liboang tropang pangkombat sa tibuok nasud, aron magdeploy og usa o pipila ka batalyon kada natarang gerilya. Bangis ug walay hunong nga giatake sa kaaway ang baseng masang mag-uuma pinaagi sa pagpanghamlet, saywar, intimidasyon, kampanya sa pagpasurender, pagdagit, ekstra-hudisyal nga pagpatay, masaker, aerial bombing ug pagpanganyon. Sa takuban sa ginatawag og “retooled community support program” (RCSP) o “modified community support program,” permanenteng gipalungtad ang madaugdaugong presensya sa mga tim sa pasistang tropa sa tunga sa sibilyang populasyon.

Tungod sa pagpig-ot sa kaugalingon, mihuyang ang pulitikanhong pusisyon sa BHB, nga nagtukmod sa daghang yunit ngadto sa sitwasyong lunlon militar hinungdan nga nawala ang ilang inisyatiba ug nahimong bulnerable sa mga atake. Tungod niini ug sa uban pang internal nga mga kahuyangan ug kakulangan, nakasinati ang BHB og signipikanteng pag-atras sa 2017-2022 sa pag-atubang sa bangis nga kampanya sa aerial bombing nga suportado sa US ug mga operasyong kombat sa rehimeng US-Duterte. Daghan sa mga yunit ang wala damha ang gidugayon sa kampanya sa kaaway diin ang uban naghunahuna nga kayanon nila kining “palurangon.” Bisan pa man, lahi kini sa kanhing mga kampanya sa kaaway nga mas mubo ang siklo nga milungtad og pipila ka semana hangtud usa ka bulan. Mas malanaton ang mga FSMO sa kaaway gikan 2017, nga molungtad og pipila ka bulan hangtud usa ka tuig o mas dugay pa. Nagpatuman ang kaaway og taktikang “blockhouse” sa pagtukod og permanenteng mga kampo militar ug detatsment sa mga barangay ug komunidad. Sa pipila ka natarang gerilya, walay hunong ang mga FSMO sa kaaway nga karon milungtad na og 7-8 ka tuig.

Sa daghang katuigan, gigamit sa kaaway ang linya sa saywar nga nakab-ot na niini ang estratehikong kalampusan batok sa BHB. Nag-imbento kini sa gipadaku nga ihap sa ginasulting “nabungkag” o “napahuyang” nga natarang gerilya. Ang mga hepe sa AFP nagpasiatab nga aduna na lang kunoy usa ka “huyang nga natarang gerilya” ang BHB, bisan og tataw nga padayon gihapon silang nag-usik-usik og binilyong piso sa aerial bombing, mga operasyong kombat ug saywar batok sa BHB ug sa katawhan.

Sa sulsol sa AFP, nagpagawas og mga pekeng deklarasyon ang mga upisyal sa prubinsya ug lokalidad nga ang ilang mga prubinsya o lungsod “insurgency-free” na (o wala nay BHB), nga gipanghimakak sa mga taktikal nga opensiba nga gilunsa sa mga yunit sa BHB sa maong mga erya. Dili malimod sa AFP ang reyalidad nga padayong nakatagamtam ang BHB sa lalum ug lapad nga suporta gikan sa katawhan tungod kay padayon niining ginapanalipdan ang ilang mga pangandoy alang sa hustisya ug tinuod nga kagawasan.

Niadtong 2022 pa lamang, daghan sa mga rehiyunal nga komite sa Partido ang nagsumada sa ilang kasinatian nga mipunting sa mahinungdanong kasaypanan, kahuyangan ug kakulangan sa paglunsad sa lapad ug subsub nga gerilyang pakiggubat subay sa nagkalapad ug nagkalalum nga baseng masa. Gipatuman ang hinanaling mga kausaban sa kondukta sa mga yunit sa BHB aron bawion ang inisyatiba ug palapdon ang baseng masa ug maglunsad og mga taktikal nga opensiba subay sa makaya. Sa paglunsad og kalihukang pagtul-id niadtong Disyembre 2023, gihimong sumbanan sa Komite Sentral ang maong mga inisyal nga paningkamot, mas sistematikong gipunting ang mga pang-ideolohiyang ugat sa maong mga kahuyangan, ug mas hait nga gipunting ug gisaway ang lain-laing Toong oportunistang tendensya nga nagresulta sa istagnasyon ug pag-atras sa paglunsad og gubat sa katawhan. Giila sa Partido ug sa BHB ang maong mga hagit, ang bag-ong sitwasyon ug ang bag-ong han-ay sa mga tahas nga katambayayong niini.

Kasamtangang anaa sa proseso ang BHB sa subling pagdeploy ug subling pagbansay sa mga yunit niini subay sa mga rekisito sa paglunsad og lapad ug subsub nga gerilyang pakiggubat subay sa nagkalapad ug nagkalalum nga baseng masa. Anam-anam nga napatigbabawan sa mga natarang gerilya sa BHB ang pagkapasibo ug nakaangkon og inisyatiba. Sa milabayng tuig, nahimong relatibong malampuson sila sa pagpreserba sa kaugalingong pwersa, ug pagpakyas sa walay hunong ug gipagrabeng kampanya sa pagpuo ug pagliyok sa kaaway. Nawad-an og kapuslanan ang malukpanong mga FSMO sa kaaway. Tungod niini, bisan atol sa gipagrabeng operasyong kombat ug pag-utingkad sa kaaway niadtong Disyembre 2024 ug hangtud Enero, nakalunsad pa ang BHB og mga asembleya sa pagkonsolida ug nakapasulod og pipila ka bisita aron magpahigayon og mga aktibidad sa edukasyon ug kultura.

Sa paggamit sa mga taktikang konsentrasyon, dispersal ug pagbalhin, pinaspas nga paglihok, pagpabilin sa taas nga ang-ang sa pagsekreto, ug sa pagpalapad sa ilang erya sa operasyon. Kasagaran, napabiling bungol ug buta sa mga yunit gerilya sa BHB ang kaaway ug gipakgang ang mga kampanyang militar ug aerial bombing niini. Sa paglunsad og aktibong depensa, mitaas ang katakus sa mga yunit sa BHB nga ig-on ang nagaatakeng mga pwersa sa kaaway. Ang mga tropang pangkombat sa AFP gigamit isip pangbala sa kanyon sa mga operasyong kombat nga naghulat nga maambus. Samtang, aron ipabilin ang ilusyon nga nahimo na niining “estratehikong napildi ang BHB,” sistematikong ginatago sa AFP ang nagkadakung ihap sa mga kaswalti, napatay ug nasamdan, resulta sa mga pakyas nga pag-atake batok sa BHB.

Ingonman, sama sa atong ginaduso niadtong Disyembre 2024, daghan pang angayang buhaton aron makita nato ang hingpit nga pagbunga sa kalihukang pagtul-id. Sa okasyon sa ika-56 nga anibersaryo sa BHB, subli natong ginabalik ug gipatin-aw ang hinanaling mga tahas sa ideolohiya, pulitiko-militar ug organisasyon sa BHB ug sa bag-as sa Partido kalabot sa kalihukang pagtul-id sa Partido.

Kinahanglan natong ipataas ang ang-ang sa teoretikal nga pagsabot sa mga Pulang kumander ug manggugubat ug sa mga giya sa pulitika. Labaw pang palagsikon ang pagtuon sa Marxismo-Leninismo-Maoismo ug mga batakang prinsipyo sa Partido, pinaagi sa paggamit niini isip giya sa pag-ases ug pagsumada sa atong mga kasinatian, ug sa pagplano sa mga lakang sa umalabot. Kinahanglang hatagag pagtuon ug reperensya ang mga Pulang kumander ug manggugubat sa mga sinulat militar ni Tsirman Mao Zedong. Pursigidong tun-an ang “Ang mga Partikular nga Kinaiya sa Atong Gubat sa Katawhan” ni Amado Guerrero ingonman ang uban pang mga artikulo sa Komite Sentral, aron adunay tin-aw nga pagsabot kung paunsa inang-ang nga molambo ang malungtarong gubat sa katawhan. Tun-an ang katapusang mensahe ni Ka Joma nga “Dili mabuntog ang demokratikong rebolusyon sa katawhan” ug hugot nga huptan ang mga hinungdan kung nganong dili mapildi ang Bagong Hukbong Bayan.

Maglunsad og kampanya sa ideolohiya ug kultura aron labaw pang palig-onon ang determinasyon sa mga Pulang manggugubat nga maglunsad og rebolusyonaryong armadong pakigbisog ug pahugton ang ilang bug-os nga dedikasyong alagaran ang katawhan. Maglunsad og mga parangal aron handumon ang mga bayani ug martir sa rebolusyong Pilipino nga nagsilbing mga ehemplong angay sundan. Ibutyag ug isalikway ang mga traydor ug bayaran nga giluiban ang katawhan ug ang rebolusyon.

Maglunsad og sustenidong kampanya sa pang-ideolohiyang remolding sa han-ay sa mga Pulang kumander ug manggugubat sa BHB. Himuon ang regular nga pagsaway ug pagsaway sa kaugalingon, ug ebalwasyon. Ipataas ang ang-ang sa disiplinang militar ug kapasidad sa mga Pulang manggugubat pinaagi sa padayon nga pagtuon balik sa batakang oryentasyong militar ug mga palisiya, pagbansay, ug regular nga ehersisyong pisikal. Regular nga maghimo og mga pagbansay aron ipataas ang katakus sa mga yunit nga hiniusang molihok.

Ipataas ang pulitikanhong kahimatngon sa mga Pulang manggugubat pinaagi sa regular nga pulitikanhong edukasyon mahitungod sa mga init nga isyu ug sa nasudnon ug internasyunal nga sitwasyon. Hashasan ang ilang pulitikanhon ug teknikal nga kahanas pinaagi sa mga pagbansay sama sa katilingbanong pagtuki, pagkighinabi sa publiko, pagsulat ug uban pa.

Maglunsad og kampanyang rekoberi o subling pagpalihok, ekpansyon ug konsolidasyon sa baseng masa nga adunay tinguhang magtukod og kusog-kumpanyang mga natarang gerilya. Padayon nga subling magdeploy ug subling magbansay og mga yunit sa BHB subay sa mga rekisito sa paglunsad og lapad ug subsub nga gerilyang pakiggubat subay sa nagkalapad ug nagkalalum nga baseng masa. Padayon nga magtukod ug magpalig-on sa mga platun sa BHB isip batakang yunit, nga nagmantini og usa ka sentro de grabidad alang sa kumand ug komunikasyon; pleksibleng magdeploy ug magdispers og mga iskwad ug tim niini alang sa gimbuhatong masa ug mga taktikal nga opensibang kaya sa gagmayng yunit; magkonsentra alang sa konsolidasyon, pagbansay ug mas dinagkung taktikal nga opensiba; ug magbalhin-balhin aron batukan ang pagliyok sa kaaway ug aron magpalapad.

Maglunsad og lagsik nga kampanya sa pagrekrut og mga Pulang manggugubat gikan sa mga lokal nga komite sa Partido ug organisasyong masa sa mga mag-uuma, ilabina gikan sa han-ay sa mga kabataang aktibista nga aktibong mosalmot sa mga pakigbisog sa masa sa kabanikanhan. Ang mga komite sa Partido ug organisasyong masa sa mga syudad ug sentrong lungsod kinahanglang aktibong magpropaganda, ug maglunsad og mga kampanya aron mangrekrut og mga Pulang manggugubat gikan sa mga mamumuo ug petiburgesyang intelektwal ug uban pang sektor. Kinahanglang magplano ang mga unyon ug organisasyong masa nga regular nga magpadala og gagmayng tim alang sa eksposyur o deployment sa BHB.

Maglunsad og mga pulitiko-militar nga pagbansay para magpatumaw og bag-ong mga upisyal nga adunay kapasidad nga mangulo sa mga tim, iskwad ug platun sa BHB sa gimbuhatong masa ug kombat.

Himuon ang katilingbanong pagtuki ug pakisusi sa hut-ong sa langkub nga mga lungsod ug prubinsya, linya sa mga pananum o industriya, aron ilhon ang labing hinanaling mga sosyo-ekonomikanhon ug pulitikanhong isyu ug problema sa masa. Subay dinhi, kinahanglan kitang magtukod, subling magpalihok, o magpalapad sa mga rebolusyoaryong organisasyong masa sa mga mag-uuma, kabatan-onan, kababayen-an, mga bata ug mamumuong pangkultura. Kinahanglan natong isalikway ang mekanikal nga “subling pagsugod sa wala” nga lakang-lakang nga pamaagi sa pag-organisa nga walay pagkunsidera sa rebolusyonaryong kasaysayan sa katawhan sa mga natarang gerilya o baseng erya. Kinahanglang walay kakapoy nga maglunsad og propaganda ug edukasyon aron konsolidahon ang masa ug ipataas ang ilang militansya. Magtukod, tukuron balik o subling palihukon ang mga organo sa pulitikanhong gahum sa mga barangay, inter-barangay o sa ang-ang lungsod.

Maglunsad og mga kampanya ug pakigbisog sa masa aron palihukon ang mayorya sa mga mag-uuma batok sa pyudal ug semipyudal ug uban pang porma sa pagpangdaugdaug. Iasdang ang pakigbisog sa masang mag-uuma alang sa pangayong paubsan ang abang sa yuta, paphaon ang usura, makabaton og patas nga presyo sa pagpalit sa ilang mga produktong agrikultural ug uban pa. Palihukon ang masa batok sa pagpangawkaw sa yuta ug mga operasyon sa mina ug uban pang dagkung negosyo nga nagaguba ug nagahilo sa kinaiyahan. Kinahanglang hinanaling maghimo og plano ang mga organo sa pulitikanhong gahum, lokal nga sanga sa Partido, mga organisasyong masa, ug mga yunit sa BHB para tabangan nga makasugakod ang katawhan sa mga katalagman, lakip ang pag-ayo sa mga umahan, sistema sa irigasyon, pagpangita ug pagreskyu, ug pagrikober ug paglubong sa mga namatay.

Maglunsad og anti-pasistang mga kampanya ug pakigbisog. Ibutyag ang mas nagkagrabeng mga pag-abuso, kabangis ug krimen nga hinimo sa mga yunit sa AFP ug mga sundalo niini, lakip ang mga paglapas sa demokratikong katungod ug internasyunal nga makitawhanong balaod. Ibutyag ug batikuson ang tanang kaso sa intimidasyon, Red-tagging, arbitraryo ug lapas-sa-balaod nga detensyon, pagdagit, tortyur, ekstra-hudisyal nga pagpatay ug masaker. Ibutyag ang mga kaso sa aerial bombing, istraping ug pagpanganyon nga naghulga sa kinabuhi sa mga sibilyan ug sa ilang mga kabtangan nga lapas sa internasyunal nga makitawhanong balaod.

Kinahanglang aktibong magpropaganda ug magkontra-propaganda ang mga kumand sa BHB, hangtud sa ang-ang sa prubinsya ug nataran, pinaagi sa ilang mga tigpamaba o upisyal sa impormasyon. Kinahanglan nilang gamiton ang tanang pamaagi aron aktibong pukawon ang katawhan nga suklan ang madaugdaugong mga palisiya ug programa sa pag-ilog sa ilang panginabuhian, ug labawng pagpaantus kanila. Kinahanglang aktibo nilang ibutyag ang saywar nga mga bakak sa kaaway ug disimpormasyon nga ginapakaylap ngadto sa publiko.

Kinahanglang aktibo ug sustenidong tukuron sa mga lokal nga sangay ug komiteng seksyon sa Partido ang mga yunit sa milisyang bayan, uban sa mga yunit depensa sa kaugalingon sa mga organisasyong masa. Labaw sa tanan, kinahanglan natong iduso, sa teorya ug praktika, ang mahinungdanong papel sa mga yunit milisya sa BHB sa paglunsad og gerilyang pakiggubat. Kinahanglan natong buhian ang inisyatibang militar sa mga yunit depensa sa kaugalingon sa katawhan pinaagi sa pagbansay ug pag-aghat kanila nga gamiton ang tanang posibleng porma sa armadong pagsukol sa kaaway. Ang milisyang bayan mahinungdanong kaabag sa mga pultaym nga horisontal nga yunit sa BHB. Gipalapad nila ang langkub sa gubat sa katawhan aron pugson ang kaaway nga inaton ang pwersa niini ug ibutyag ang ilang kahuyangan.

Maglunsad og mga taktikal nga opensibang tukma sa kapasidad sa mga tim, iskwad ug platun sa BHB. Puntingon ug ig-on ang hhuyang nga bahin sa kaaway, lakip ang mga armadong ginsakpan niining nagapondo sa mga barangay sa kabanikanhan, mga nagrekorida, nagbantay sa tsekpoynt, naghimo og mga operasyong kombat, ug uban pa. Planuhon ang pagkumpiska sa armas sa kaaway para maarmasan ang bag-ong mga rekrut. Lunsaron ang gatusan ka taktikal nga opensiba sa gagmayng mga yunit aron makasakmit og armas.

Hugot nga tamdan ang mga palisiyang nakadisenyo aron siguruhon ang pagsekreto ug seguridad sa mga gerilyang kampo ug pagmaniobra. Abtik nga magbantay batok sa tanang hulga sa kaaway nga magpalusot og elektronikong tracker sama sa mga GPS transmitter, pinaagi sa mga linya sa suplay ug uban pang pamaagi. Ilhon ug sulbaron ang tanang mga paglapas sa palisiya sa seguridad nga nagpeligro sa gerilyang pagsekreto.

Aseson ang nakolekta nga impormasyong paniktik sa kaaway ug wad-an kinig kapuslanan. Bungkagon ang kutay sa paniktik sa kaaway ug tukuron ang lokal nga kutay paniktik sa BHB ug mga yunit milisya. Makanunayong ibutyag ug isalikway ang kontra-rebolusyonaryong mga gimbuhaton sa mga bayaran ug traydor, ug sulbaron ang pangayo sa katawhan nga silutan ang mga aktibong nakigkunsaba sa kaaway isip mga ahenteng militar o espiya.

Maglunsad og pulitikanhong gimbuhaton sa han-ay sa kaaway. Kinahanglan natong sistematikong tigumon ang impormasyon sa internal nga sitwasyon, mga reklamo ug kontradiksyon sa han-ay sa mga platun, kumpanya, batalyon ug mas taas nga istruktura sa kumand sa kaaway. Ibutyag ang mga pagpangabuso batok sa mga rank-and-file nga ginsakpan sa militar ug mga gipugos nga magparamilitar. Ibutyag ang korapsyon sa han-ay sa mga upisyal sa sistema sa pagpasweldo ug pagdilatar sa paghatag og sweldo ug alawans, paghuthot sa pondo alang sa ginatawag nga mga “balik-loob,” koleksyon sa kikbak sa lokal nga mga proyekto (ilabina ilalum sa Support to Barangay Development Programa sa NTF-Elcac), ug uban pa. Ibutyag kung paunsa padayong ginagamit sa US ang AFP ug PNP isip proxy ug instrumento sa heyopulitikal nga laraw niini, ilabina sa pagpanghulhog og gubat sa kaatbang niining imperyalistang China. Magrekrut og progresibo ug patriyotikong upisyal ug ginsakpan sa Crispin Tagamolila Movement.

Magpahigayon og regular ug espesyal nga mga kumperensya sa kumand sa ang-ang rehiyon ug mas ubos pa aron tukion ang disposisyon ug plano sa kaaway, siguruhon ang hustong distribusyon sa atong mga pwersa, maghimo og pangkinatibuk-ang plano aron iasdang ang gubat sa katawhan sa erya sa operasyon, magtibuok og hiniusang plano sa kampanyang militar, ug siguruhon ang maayong koordinasyon.

Pakusgon ang sistema sa kumand sulod sa Bagong Hukbong Bayan, gikan sa Nasudnong Kumand sa Operasyon ug sa Rehiyunal nga Kumand sa Operasyon, ug gikan sa rehiyunal nga kumand sa operasyon hangtud sa subrehiyon ug mga nataran, sa mga platun, iskwad ug tim niini. Padayon nga magpalambo, magpakahanas ug magpakusog sa usa ka paspas ug masaligang sistema sa komunikasyon, kapwa sa elektroniko ug pisikal. Siguruhong adunay kapin usa ka linya ug sistema sa back-up.

Padayon nga ipatuman ug palambuon ang mga palisiya ug lagda aron taguan ug ampingan ang sensitibong impormasyon pinaagi sa kompartmentalisasyon, pagkoda sa mga file ug nakasulat nga rekord, regulasyon sa paggamit sa mga kompyuter, smartphone, selpon ug uban pang himang elektroniko.

Padayon nga nahimong tabunok ang yuta alang sa paglunsad og rebolusyonaryong armadong pakigbisog ilalum sa rehimeng Marcos, nga ginauna ang interes sa nagharing mga hut-ong ug sa mga langyawng gamhanang sa ekonomiya ug heyopulitika, nga labaw pang nabutyag sa dunot ug korap nga nagharing sistema. Gihimo kini sa kaalautan sa lapad nga masa sa katawhang Pilipino, diin ang nag-antus ang dakung mayorya sa nagkagrabeng kundisyon sa kinabuhi. Ang sistematikong pagpanumpo sa mga demokratikong katungod sa kasyudaran ug dayag nga pagharihari sa militar sa kabanikanhan nga nagatarget sa mga mamumuo, mag-uuma ug uban pang demokratikong mga hut-ong, mitukmod sa katawhan nga mag-armas, mosukol, panalipdan ang ilang mga katungod ug makigbisog alang sa ilang nasudnon ug demokratikong mga pangandoy.

Nagkahait nga krisis sa ekonomiya ug pulitika sa nagharing sistema

Padayong migrabe ang nagtingang semikolonyal ug semipyudal nga sistema tungod sa pagpatuman sa rehimeng US-Marcos sa mga palisiyang kontra-katawhan ug anti-nasyunal nga pagpagrabe sa krisis sa ekonomiya, pagpahugot niini sa kapyot sa poder nga nagpagrabe sa krisis sa pulitika, ug pagpakaitoy niini sa imperyalismong US nga labaw mipahinay sa nasudnong soberanya.

Taliwala sa nagkakusog nga proteksyunismo sa dagkung industriyal nga kapitalistang gahum, padayong ginapatuman sa rehimeng Marcos ang kanhing mga palisiyang neoliberal nga nagresulta sa walay kaparehong pagguba sa mga lokal nga pwersa sa produksyon sa milabayng upat ka dekada. Ang maong mga palisiya gipahimuslan sa mga monopolyo kapitalistang korporasyon ug institusyong pangpinansya ug nagpadatu sa mga lokal nga dagkung burgesya-kumprador, sa kadaut sa lapad nga masang mamumuo ug hatungang mga hut-ong. Gipalalum sa maong mga palisiya ang atrasado, agraryo ug dili industriyalisado ng ekonomiya, ug gipagrabe ang disempleyo, kalisud ug pagpangdaugdaug. Nahimong labawng nagsalig ang nasud sa pag-import ug labawng nalubong sa utang.

Samtang padayong ginaablihan ni Marcos ang ekonomiya, ang mga sentro sa kalibutanong kapitalismo nagpatuman og palisiyang proteksyunista aron protektahan ug subling palagsikon ang ilang mga lokal nga industriya. Sa maong konteksto, labaw nga kontra-produktibo ang mga palisiyang neoliberal ug pagsalig sa rehimen sa US. Gihikyad niini ang nasud sa mas grabeng pagpahimulos ug dili patas nga mga kundisyon sa pamatigayon. Labaw niining palalumon ang pagsalig sa langyawng ekonomiya, ug magpagrabe sa sitwasyon sa katawhan, samtang nahagba ang mga merkado sa eksport sa Pilipinas ug nagkapuliki ang rehimen nga danihon ang langyawng kapital.

Labawng nagkagrabe ang katilingbanon ug ekonomikanhong pag-antus sa lapad nga masa sa katawhang Pilipino. Bisan og itago sa upisyal nga estadistika, labaw nga migrabe ang kawalay trabaho. Nagpabiling ubos ang suhulan ug kita, naglisud ug dili makasugakod sa nagkataas nga presyo sa pagkaon, lana, mga batakang panginahanglan, yutilidad ug serbisyo. Ang pagsaka sa inadlaw nga gasto sa kinabuhi ilalum ni Marcos mitukbod sa minilyong katawhan sa kapit-os ug nagkagrabeng kalisud ug kagutom. Kapin 20 milyon ka pamilya (mokabat sa 80%) ang naglisud ug bulnerable ang kahimtang sa pinansya, lakip ang minilyong pamilya nga ginapagawas nga anaa sa hatungang hut-ong. Sukad nga nakalingkod si Marcos sa gahum niadtong 2022, nadoble gikan 3 milyon ngadto sa 7.2 milyon ang gidaghanon sa pamilyang grabeng naglisud ug nagutom. Tungod sa kawalay panginabuhian, ubos nga kita ug kakulang sa katilingbanong serbisyo, padayon nga miubos ang kalidad sa kinabuhi sa mayorya sa katawhang Pilipino.

Napuliki pa gihapon ang rehimeng Marcos sa pagbaligya sa nasud ngadto sa langyawng monopolyong kapital. Aron agnihon ang langyawng kapital, gitugutan ni Marcos ang pagpagrabe sa pagpahimulos sa mga mamumuo pinaagi sa paglansang sa suhulan ug sweldo. Gitugutan niya ang pagpangdaugdaug ug pagpangilog sa panginabuhian sa mga mag-uuma, mga katutubong komunidad, mangingisda ug uban pang anakpawis, ug ang pagguba sa kinaiyahan, pinaagi sa paghatag sa mga langyawng monopolyo kapitalistang empresa ug sa iyang mga kroni nga dagkung burgesya-kumprador og kagawasang kawkawon ug minahon ang lapad nga kayutaan, suba ug kadagatan, o mag-opereyt sa ilang plantasyon, proyektong real estate, mga proyektong pang-ekolohiya o pangklima, tipiganan sa ginaimport nga liquefied natural gas (LNG) gikan sa US, ug uban pang operasyon alang sa ganansya.

Grabe ang pagpangilog og yuta partikular sa Mindanao kung asa nakigkunsaba ang mga warlord sa militar aron abugon ang mga Moro ug Lumad sa ilang yuta, pabor sa mga plantasyon sa oil palm, kawayan, kape ug uban pang gipanag-iyahan sa mga korporasyong multinasyunal. Gakahitabo kini bisan sa mga lugar sa awtonomyang rehiyon sa Bangsamoro, nga gustong kontrolon ni Marcos, sa kaalautan sa kasabutang pangkalinaw sa Moro Islamic Liberation Front, ug sulsulan ang subling pag-ulbo sa armadong pagsukol sa katawhang Moro.

Ginalansang sa rehimeng Marcos ang suhulan sa mga mamumuo ubos sa ang-ang sa disenteng pagpanimuyo (apan gidoble ang ginahatag nga allowance sa mga pasistang sundalo). Aron mabuhi, napugos ang mga mamumuo, gagmayng propesyunal ug kasagarang mga empleyado nga mangita og dugang trabaho. Minilyong Pilipino ang walay trabaho o walay regular nga panginabuhian. Gani, halos 4/5 (78%) sa upisyal nga giingong adunay trabaho mga partaym, temporaryo o kontraktwal, o impormal nga mamumuo. Tungod sa grabeng krisis sa disempleyo sa Pilipinas, napugos ang halos 2.5 milyong Pilipino nga mangitag trabaho sa abrod niadtong milabayng tuig, nga nagpadaku sa ihap sa mga overseas Filipino workers (OFW) og hangtud 11.5 milyon.

Ang nagkagrabeng sosyo-ekonomikanhong kahimtang nagpasamot sa kawalay kaangayan sa katilingban tali sa mga nagharing oligarko ug sa lapad nga masa sa katawhan. Ubos ni Marcos, mikabat og 1.5 milyon hangtud 20.1 milyon ang gidaghanon sa panimalay nga walay tinigum, samtang kapin doble (108%) ang giusbaw sa kita ngadto sa ₱1.8 trilyon sa tulo ka labing adunahan sa Pilipinas—si Enrique Razon, Manuel Villar ug Ramon Ang. Sila ug ang mga kasosyo nilang langyawng kapitalista ang labing dakung nakapahimulos sa mga kontrata ug pabor sa gubyerno. Samtang ginakibhangan ang ilang buhis, ginahatagan og tax holiday ug uban pang insentibo sa pinansya, gipaantus usab ni Marcos ang katawhan sa bug-at nga mga buhis sa mga batakang panginahanglan—lakip ang pinakataas nga “value added tax” sa rehiyon, excise tax sa diesel ug uban pang produktong petrolyo nga nagamahal sa panahong nagataas ang presyo, ug uban pang buhis sa pagkonsumo nga labing nagpaantus sa mga kabus ug mga hatungang hut-ong.

Kontra-produktibo ang badyet ni Marcos ug paantus sa katawhan. Dakung bahin niini ang mapadulong sa pagbayad utang, kontra-produktibong gasto sa militar, ug grandyosong imprastruktura lakip ang mahal kaayong proyektong pang-pork barrel. Gikibhangan ang kinatibuk-ang badyet sa ayuda, apan mas daku usab ang napadulong sa direktang kontrol sa mga pulitiko alang sa kampanya sa eleksyon. Daku usab ang gikibhang sa badyet alang sa edukasyon, panglawas ug uban pang serbisyo publiko, lakip na sa agrikultura, samtang walay pondo alang sa industriyalisasyon.

Ang ₱1.5 trilyong depisito sa badyet sa gubyernong Marcos niadtong miaging tuig katugbang sa 5.7% sa gross domestic product o GDP)—kini ang pinakagrabe sa milabayng 40 ka tuig, wala pay labot dinhi ang mas dakung depisito atol sa lockdown niadtong pandemya. Padayon nga migrabe ang pagpangutang ilaum ni Marcos—mokabat na kini sa ₱16.3 trilyon ug gilaumang moabot og ₱17.4 trilyon sa katapusan sa tuig. Walay susama ang pagpangutang sa rehimeng Marcos nga miabot na og ₱188.7 bilyon kada bulan, na milapas sa ₱130.7 bilyon kada bulan nga pagpangutang ni Duterte.

Padayon ang kaylap nga korapsyon ilalum sa gubyernong Marcos, gikan sa mga kikbak sa mga proyektong gubyerno, hangtud sa paggamit sa pangpublikong pondo (Maharlika Investment Fund) alang sa pribadong pamuhunan. Sukad makalingkod sa gahum niadtong 2022, dili moubos sa siyam ka kasong korapsyon (nga nagkatidad og kapin ₱200 bilyon) batok sa mga Marcos ang gibasura sa mga korte. Mabawi na sa mga Marcos ang mga bahandi nga iligal nga gikawkaw ilalum sa balaod militar, lakip kadtong gunit sa mga kroni sama nilang Lucio Tan ug Ramon Ang (nga kanhing gunit ni Danding Cojuangco). Gikuha na sa mga Marcos, sa ilang mga paryente ug kroni ang kontrol sa mga sindikato ug kartel nga nagpaluyo sa importasyon ug ismagling sa bugas ug uban pang produkto.

Aron siguruhon ang ilang paghari ug ipadayon ang pagpangilog sa bahandi, gipaspasan ni Marcos ang konsolidasyon sa pulitikanhong gahum aron siguruhon ang kontrol lapas sa 2028. Tungod dinhi, gipalalum usab niya ang pulitikanhong krisis sa nagharing sistema. Laraw niyang paphaon ang hulga sa mga Duterte sa 2028, nga kaalyado niya niadtong 2022 aron siguruhon ang eleksyon pinaagi sa kanhi gunit ni Duterte nga dekompyuter nga pag-ihap sa boto. Karong gunit na niya ang sistema sa dekompyuter nga eleksyon, plano ni Marcos nga manipulahon ang resulta sa umalabot nga midterm election aron gunitan ang tanang ang-ang sa gubyerno gikan sa Senado, kongreso ug mga upisyal sa lokal nga gubyerno.

Niadtong Pebrero, gikoordina ni Marcos ang pag-impeach sa kongreso kang Vice President Sara Duterte. Pipila ka semana ang milabay, gigamit niya ang gahum aron ipaaresto ug ipapriso si Rodrigo Duterte sa International Criminal Court sa The Hague, aron taralon sa lapad ug sistematikong mga pagpatay nga naglangkub sa krimen batok sa katawhan. Gipagrabe ug gipataas sa maong mga maniobra ang pulitikanhong krisis sa nagharing sistema. Gisulayan sa mga Duterte, nga iladong nagagamit sa mga langyawng kumpanyang eksperto sa data analytics ug influence strategy, nga magpasiugda og pulitikanhong kaguliyang batok sa rehimeng Marcos pinaagi sa paghulma sa opinyong publiko gamit ang sistematikong disimpormasyon ug pasistang manipulasyon sa social media, pagpahimulos sa reklamo sa katawhan, paggamit sa taktikang distraksyon para ilayo ang atensyon sa mga abuso ug krimen ilalum sa tiranikong paghari ni Duterte, ug pagpatoo nga sila mga biktima aron makuha ang simpatya sa publiko. Nagsulay silang mag-organisa og mga rali ug maniak sulod sa militar ug pulis.

Ang pagpatigbabaw sa bangi sa mga Marcos ug Duterte labaw nga nagbutyag sa kadunot sa nagharing sistema. Gipakita niini kung giunsa sa kasamtangang nagharing sistema gidominahan sa duka ka labing korap ug mangtas nga reaksyunaryong paksyon, nga parehong nagarepresenta sa ekonomikanhong interes sa dagkung burgesya-kumprador ug dagkung agalong yutaan, mga burukrata-kapitalista, mga itoy sa langyawng imperyalistang gahum, mga anti-katawhan ug madaugdaugon. Samtang nagkagrabe ang kahimtang sa ekonomiya sa Pilipinas, nagkagamay ang makawat ug pribilehiyong pagabahin-bahinon sa naglantugiay nga burukrata-kapitalista. Nagpabilin ang hulga nga mograbe pa ug bangis nga moulbo ang pulitikanhong krisis sa nagharing sistema.

Aron labawng ikonsolida ug monopolyohon ang pulitikanhong gahum, ginapagrabe usab ni Marcos ang pulitikanhong pagpanumpo batok sa mga organisasyong masa sa mga mamumuo, mag-uuma, kabatan-onan, kababayen-an ug uban pang demokratikong sektor. Nagkagrabe ang pagpaniktik sa estado, mga pagdagit, tortyur, masaker ug uban pang grabeng paglapas sa tawhanong katungod nga binuhatan sa reaksyunaryong militar ug pulis. Pinakagrabe ang sitwasyon sa libuan ka barangay sa kabanikanhan nga gimando ni Marcos nga ipailalum sa balaod militar.

Taliwala sa krisis sa ekonomiya, mikaylap ang diskontento sa lapad nga masa sa katawhan ug makanunanyong padaku sa ilang organisadong pagsukol. Ang mga mamumuong gikapoy na sa taas nga panahong mumho nga umento, karon, nangayo og hinanaling pagtaas sa suhulan para makasugakod sa nagmahal nga gasto sa panimuyo. Nagkakusog usab ang maong panawagan sa mga empleyado sa gubyerno, ug mga magtutudlo sa publiko ug pribadong eskwelahan, nga nangayo sa makatarunganong sweldo. Ang singgit alang sa pagpataas sa suhulan ug mas maayong kundisyon sa pamuo, siguradong magpadilaab sa mas daghang welga ug uban pang porma sa pakigbisog sa masa.

Nagkakusog ang singgit batok sa walay-puas nga importasyon sa bugas, lakip na sa isda ug uban pang produktong agrikultural na nagapatay sa lokal nga produksyon. Ginabatukan sa mga mag-uuma ug mga komunidad sa katawhang minorya ang mga minahan ug uban pang proyektong nagaguba sa kinaiyahan ug nagailog sa ilang yuta. Mibarog usab ang lain-laing sektor, lakip ang mga drayber ug opereytor sa dyip, mangingisda ug uban pa alang sa ilang mga katungod ug kusganong ginasuklan ang mga programang nagailog sa ilang panginabuhian. Gipanghingusog sa mga estudyante ang mas dakung subsidyo sa estado alang sa edukasyon ug gibatukan ang pagtaas sa twisyon, ug panawagan alang sa trabaho taliwala sa krisis sa disempleyo.

Padayon nga midaku ang pagbatok sa interbensyon militar sa US sa Pilipinas. Nagkakusog ang pagsupak sa paghatag sa US og ayudang militar sa malupigong rehimen; sa mga base ug pasilidad militar sa US sa nasud nga ginagamit alang sa mga langyawng operasyong militar; sa pagsulod, pag-agi ug pagdunggo sa mga US carrier strike group nga adunay kargang mga armas nukleyar; sa paggamit sa militar sa Pilipinas sa pagpanghulhog og armadong tensyon sa China; ug sa pag-angin sa nasud ngadto sa peligro sa inter-imperyalistang gubat.

Nakigbisog ang lapad nga demokratikong sektor batok sa nagkagrabeng porma sa pag-abuso ug paglapas sa tawhanong katungod sa reaksyunaryong militar ug pulis. Gikalipay nila ang pagtaral kang Duterte sa ICC isip higayon aron panubagon siya sa dili maihap nga krimen batok sa katawhan sa pagpatuman sa iyang mini nga “gera kontra-droga.” Dungan niini, ila usang gipanawagan nga papanubagon si Marcos sa dinaghang mga pagpatay, pagdagit ug uban pang krimen batok sa katawhang nakigbisog.

Ang nagkalalum nga krisis sa ekonomiya ug pulitika sa nagharing sistema tin-aw nga nagbutyag sa bangrap nga semikolonyal ug semipyudal nga sistema, ug ang tagos-sa-bukog kadunot sa estadong neokolonyal, nga giharian sa kaylap nga korapsyon ug brutal nga pagpanumpo. Ang bugtong paagi aron tapuson ang kadena sa pagpangdaugdaug ug pagpahimulos, ug tapuson ang dili na maagwantang kalisud ug pag-antus sa lapad nga masang mamumuo, mag-uuma ug anakpawis sa Pilipinas, mao ang ibagsak ang imperyalismong US ug ang makihut-ong nga diktadurya sa dagkung burgesya-kumprador, dagkung agalong yutaan, ug mga burukrata-kapitalista.

Walay laing alternatibo ang katawhang Pilipino gawas sa walay pagduha-duhang pagpaasdang sa rebolusyonaryong pakigbisog, aron ibagsak ang madaugdaugon ug mapahimuslanong nagharing mga hut-ong, ug tukuron ang demokratikong gahum sa katawhan. Hinanali, makatarungan ug labing gikinahanglang pakusgon ug palapdon ang Bagong Hukbong Bayan ug iasdang ang gubat sa katawhan.

Gipagrabe sa rehimeng Trump ang krisis sa kalibutanong sistemang kapitalista

Gilaumang paspas nga mahugno sa lalum nga kaguliyang ang kapitalistang kalibutan atubangan sa walay kasulbarang kapitalistang krisis sa sobrang produksyon, ug atubangan sa dayag nga pagduso sa gubyerno US ilalum sa rehimeng Trump nga iduso ang mga imperyalisang interes niini. Girepresentahan sa gubyernong Trump ang labing reaksyunaryo ug labing sobinistang mga elemento sa oligarkiya sa pinansya sa US. Gihubo niini ang maskarang “kampyon sa demokrasya” sa US ug gibutyag ang mga hegemonistang palisiya niini, sa desperadong pagsulay nga baliktaron ang estratehikong pag-ubos sa imperyong Amerikano, ug ibalik ang kaugalingon isip nag-inusarang superpower.

Ginapakita sa mga datos niadtong miaging tuig nga nakasagayad pa gihapon sa malanatong istagnasyon (gikan pa 2008) ang mga kapitalistang ekonomiya, human temporaryong nakarekobir pagkahuman sa pandemya niadtong 2020. Mihagba ngadto sa 2.8% niadtong 2023 ug 2024 ang kalibutanong paglambo sa ekonomiya, gikan 5.8% sa panahon sa pagbangon human sa pandemya. Mas ubos kini sa abereyds nga 3.2% nga paglambo sa miaging dekada (2010-2019). Misaka ang kalibutanong utang sa bag-ong ang-ang nga $318.4 trilyon niadtong milabayng tuig, tulo ka pilo (328%) nga mas daku sa kantidad sa kalibutanong produksyon niadtong 2024. Dili lamang kini imposibleng bayaran, imposible usab kining mapuslan sa taas nga panahon. Padayon nga mihinay ang paglambo sa kalibutanong pamatigayon sa mga produkto, mihagba sa 2% niadtong 2024, nga mas ubos kaysa sa 4.5% niadtong 2010-2019. Miubos og 8% niadtong 2024 ang langyawng direktang pamuhunan sa tibuok kalibutan. Gibira kini sa 45% nga paghagba sa European Union, ug 29% sa China, taliwala sa 10% paglambo sa mga langyawng direkrang pamuhunan sa US tungod sa pagpamuhunan sa Taiwan ug South Korea sa mga bag-ong pabrikang semikonduktor.

Atubangan sa malungtarong kapitalistang istagnasyon, mas agresibong ginaduso sa gubyerno ni Trump ang hugot ug desperadong mga lakang sa ekonomiya ug pamatigayon sa tinguhang buhion ang lokal nga produksyon. Sa maong mga lakang, gisupak niini ang sistemang multilateral nga apil nga gitukod niini sa panahon sa globalisasyong neoliberal. Gani, niadtong 2008 pa kini mipaling sa direksyon ilalum sa gubyerno ni Obama, dihang gisugdan sa US ang paghatag og mga insentibo aron ibalik ang mga langyawng pamuhunan sa US. Epektibo niining giwad-an og kapuslanan ang sistema sa World Trade Organization sa paghusay sa bangi, ug nawala ang bili sa mga kasabutan niini. Sulod sa halos usa ka dekada, malukpanong gigamit sa US ang mas taas nga taripa, mga restriksyon sa pag-eksport, mga restriksyon sa teknolohiya ug mas hugot nga regulasyon sa mga pamuhunan batok sa China.

Ang agresibong paggamit sa gubyernong Trump sa maong mga palisiya sa pamatigayon ug ekonomiya batok sa ubang nasud mipataas sa ang-ang sa antagonismo bisan ngadto sa mga tradisyunal nga imperyalistang kaalyado niini. Gawas sa China, gipahamtangan o gihulgang pahamtangan og mas taas nga taripa ang dakung bahin sa pamatigayon gikan sa Canada, Mexico, European Union ug uban pang mga nasud, nga adunay deklaradong tumong nga protektahan ang mga kumpanyang Amerikano ug palagsikon ang lokal nga produksyon. Naghulga si Trump nga subling aseson ang alyansang militar sa US sa Japan, nga gitubag sa Japan sa saad pakusgon ang pag-import og liquefied natural gas gikan sa US, ug dugangan ang pamuhunan sa US hangtud $1 trilyon. Ingonman, wala misanong dinhi ang ubang mga kaalyado sa US. Gianunsyo sa Canada ug Mexico ang plano niining magpahamtang og kontra-taripa sa mga produktong ginaimport gikan sa US. Naghulga usab ang gubyerno sa France nga mobalos sa mga taripa sa US.

Sa pikas bahin, miangal ang China, ug gipataas ang taripa ug gibawal nga mag-import og soybeans ug troso gikan sa US, ug nagdeklarang andam kining mosugakod “sa unsamang porma sa gubat” sa US. Ginatukod ug ginapalapad niini ang mga estratehikong alyansang diplomatiko, pang-ekonomiya ug pangmilitar, sama sa BRICS, G-77, Shanghai Cooperation Organization, Forum on China-African Cooperation, RCEP ug uban pa.

Dugang sa pagpahamtang o hulgang paghamtang sa dugang nga mga taripa, gideklara ni Trump ang kaandam sa paggamit og pwersang militar aron makuha ang kontrol sa Panama Canal (kung asa nagaagi ang 40% sa kargamentong pamatigayon sa US), Greenland (usa ka awtonomong rehiyon sa Denmark nga adunay dagkung deposito sa mga rare-earth mineral, ug estratehikong makuha sa rehiyon sa Arctic), ug ang Gaza Strip nga gustong ni Trump nga “panag-iyahan” sa US nga direktang nagyatak sa mga katungod sa katawhang Palestino.

Daw ginasunod karon ni Trump ang palisiya sa pakighusay sa Russia kalabot sa Ukraine, human makita nga taliwala sa dagkung kadaut sa Russia sa gubat, pakyas pa gihapon ang US nga pahuyangon ang estratehikong kapasidad sa Russia nga makiggubat, pinaagi sa pagbungkagon sa ekonomiya, paghulhog og panag-alsa batok sa rehimen, o siak-siakon ang Russia. Ang maong pag-usab sa palisiya, nagbutyag sa kamatooran nga ang gubat sa Ukraine, sa sinungdanan pa lang, usa ka proxy war tali sa US ug Russia, bisan pa og adunay mga hisgutanan sa teritoryo tali sa Ukraine ug Russia. Ginaduso sa gubyernong Trump ang Ukraine nga mouyon sa pakighunong-buto sa Russia, dungan sa pagpirma sa usa ka kasabutang maghatag sa US og dakung bahin sa mga deposito sa rare-earth mineral, isip bayad sa gibanabanang $70 bilyong hinabang militar sa US gikan niadtong 2022.

Sukwahi sa palisiya sa pakighusay sa Russia, padayong gipataas sa gubyernong Trump ang tensyon niini sa China ug North Korea, ug gipabilin ang posibilidad sa pag-ulbo sa gubat. Padayon na ginapagawas sa militar sa US ang mga pwersa niini ilalum sa ginatawag nga estratehiyang Indo-Pacific. Bag-o lang, naglunsad kini og malukpanong mga war games sa South Korea, ug nakatakdang maglunsad og mga war games sulod ug palibot sa South China Sea, Pilipinas, Taiwan ug Japan nga adunay estratehikong laraw nga liyukan ang China. Kanhi lang, gibuhian sa US ang palisiya niining “dili suportahan ang kagawasan sa Taiwan,” nga usa ka dayag nga paghagit sa China.

Gipakusog usab sa gubyerno ni Trump ang imperyalistang interbensyon sa Middle East, labawng gipakusog ang pagsuporta sa agresyon ug okupasyon sa Zionistang estado sa Israel sa Gaza. Gimando niini bag-o lang ang pagpadala og $3 bilyong kantidad sa mga misayl ug bomba sa Israel, ug gisuportahan ang subling pag-atake sa Gaza nga mipatay sa gatusa ka Palestino, ug mitapos sa duha ka bula nga hunong-buto. Isip suporta sa Israel, gimando usab ni Trump ang mga pag-atakeng misayl batok sa mga pwersang Houthi sa Yemen, nga aktibong nagasuporta sa pakigbisog alang sa kagawasan sa Palestino. Sa pakigkunsaba sa Israel, Turkey ug uban pang mga nasud sa NATO, gipalig-on usab sa gubyernong Trump ang pusisyon niini sa bag-ong gubyerno sa Syria, aron iduso ang armadong pagpig-ot sa Iran, subay sa estratehikong laraw nga kontrolon ang mga reserbang lana sa Middle East.

Gipangulohan ni Trump ang paspas nga paggrabe sa krisis sa pulitika sa US, kung asa dayag nga mipaling ang kasamtangang nangulong oligarkiya sa pagpasiugda sa pasistang ideolohiya. Gipalibutan niya ang kaugalingon sa mga tig-ulug-ulog ug tigpalakpak isip mga upisyal sa gabinete. Nangulo siya pinaagi sa mga kamanduan, ug ginalapas ang mando sa mga korte, nga usa ka dakung lakang padulong sa awtoritaryanismo. Aron tungaon ang hut-ong mamumuo, gisulsulan ni Trump ug sa iyang mga upisyal ang diskriminasyon sa mga minorya, mga imigrante, ug komunidad sa LGBT, ug nagpakaylap og mga tuo-tuo ug dili mga siyentipikong tinuohan. Liboan ka empleyado sa gubyerno sa US ang dinalian nga gitangtang aron kuno makatipid. Gimando niya ang pagsumpo sa mga demokratikong katungod, partikular, batok sa katungod nga magtapok ug sa kagawasan sa pagpadayag sa mga unibersidad. Migamit siya og bangis ug abitraryong deportasyon sa liboan ka imigrante.

Sa pinaspas nga pagpahamtang sa inyang mga palisiyang anti-demokratiko ug anti-mamumuo, gisugnuran sa rehimeng Trump ang malukpanong kalihukang protesta sa US nga lagmit nga mokaylap ug moulbo sa dagkung demonstrasyon sa tibuok nasud sa umalabot nga mga bulan. Ang mga protesta batok sa imperyalismong US siguradong motumaw usab sa tibuok kalibutan isip tubag sa mga imperyalistang palisiya sa pamatigayon ug ekonomiya nga agresibong ginaduso sa rehimeng Trump, ug sa iyang walay hunong nga pagpanulsol og gubat. Sigurado nga motumaw ug molapad ang mas daghan pang rebolusyonaryong armadong kalihukan tungod kay wala nay laing pamaagi nga nakita ang mga katawhang gidaugdaug sa imperyalismo ug pasismo aron panalipdan ang nasudnon ug katilingbanong paglingkawas.

Iasdang ang rebolusyonaryong pagsukol, nag-una pinaagi sa armadong pakigbisog

Mubo natong gilatag ang labing bag-ong mga panghitabo sulod ug gawas sa nasud aron ipakita ang obhetibong kundisyong nagtukmod sa lapad nga masa sa katawhang Pilipino nga mag-asdang og rebolusyonaryong pakigbisog aron panalipdan ug kab-uton ang ilang pangandoy alang sa nasudnong paglingkawas, demokrasya ug sosyalismo. Ang pakigbisog sa katawhang Pilipino hugot nga nakasumpay sa rebolusyonaryong pakigbisog sa tanang katawhang dinaugdaug ug pinahimuslan sa tibuok kalibutan.

Gilunsad sa katawhang Pilipino ang tanang porma sa pakigbisog aron iasdang ang nasudnon-demokratikong kawsa. Naglunsad sila og ligal nga mga porma sa pakigbisog pareho sa kasyudaran ug kabanikanhan nga nagapukaw, naga-organisa ug nagapalihok sa bagang duut masa batok sa mga nangdaudaug kanila. Gitukod nila ang ilang mga unyon ug organisasyong masa, nanghingusog sa mga negosasyon sa mga kapitalista ug burukratang upisyal sa estado, nagwelga sa mga pabrika, naglunsad og boykot, walk-out, mga pangmasang demonstrasyon ug uban pang kolektibong aktibidad. Misalmot sila sa reaksyunaryong eleksyon aron iasdang ang nasudnon-demokratikong kawsa ug ikampanya ang mga progresibong kandidato ug partido. Pinaagi National Democratic Front, nakignegosasyong pangkalinaw sila sa reaksyunaryong gubyerno, aron pasiugdahan ang tinguha sa katawhan alang sa makatarunganon ug malahutayong kalinaw.

Ang armadong pakigbisog ang nag-unang porma sa pakigbisog sa pag-asdang sa demokratikong rebolusyon sa katawhan sa Pilipinas. Sa paglunsad og armadong pakigbisog kita makasukol aron ibagsak ang imperyalismong US ug ang mga nagharing hut-ong dagkung burgesya-kumprador ug dagkung agalong yutaan. Ginakab-ot niini ang sentral nga tahas sa rebolusyong Pilipino nga pagpukan sa armadong papet nga estado sa imperyalismong US ug mga nagharing hut-ong, ug pagtukod og demokratikong estado sa katawhan ilalum sa pagpangulo sa proletaryado. Pinaagi lamang sa demokratikong estado sa katawhan mapatuman ang katilingbanong rebolusyonaryong transpormasyon.

Sa okasyon karong adlawa sa ika-56 nga anibersaryo sa Bagong Hukbong Bayan, nanawagan kami sa tanang komite, kadre ug mga myembro sa Partido, nga kanunay tagdon ang dakung tahas nga iasdang ang rebolusyonaryong armadong pakigbisog ug pagpakusog sa BHB sa pagtuman sa inyong mga tahas sa lain-laing natad sa pakigbisog.

Among giawhag ang tanang Pulang manggugubat sa Bagong Hukbong Bayan nga pakusgon ang determinasyon ug ipataas ang kapasidad nga tumanon ang mga tahas sa kalihukang pagtul-id. Sigurado kami nga makab-ot sa BHB ang dagku pang kadaugan sa subling pagpalagsik ug pagpalapad sa baseng masa ug sa pag-abante sa gerilyang pakiggubat batok sa pasistang rehimeng US-Marcos.

Mabuhi ang dili matay-og nga diwang rebolusyonaryo sa mga Pulang manggugubat sa Bagong Hukbong Bayan!

Pakusgon ug palapdon ang BHB!

Pakyason ang brutal ug teroristang gubat pagpanumpo sa rehimeng US-Marcos!

Palapdon ug pakusgon ang gerilyang pakiggubat!

Iasdang ang rebolusyonaryong armadong pakigbisog!

Iasdang ang demokratikong rebolusyon sa katawhan!

Mabuhay ang Bagong Hukbong Bayan!

Mabuhi ang Partido Komunista ng Pilipinas!

Mabuhi ang proletaryo ug katawhang Pilipino!