Nagahatag sang pagsaludo ang Komite Sentral sang Partido Komunista ng Pilipinas (PKP) sa Bagong Hukbong Bayan (BHB) sa okasyon sang ika-56 nga anibersaryo sini. Ginahatag namon ang amon hugot nga pagsaludo sa kaisog kag kaisganan sang mga Pulang hangaway kag kumander nga padayon nga nagapaninguha sa pagsulong sang inaway banwa agud ipakig-away ang handum sang pumuluyong Pilipino para sa pungsodnon nga kahilwayan kag matuod nga demokrasya.

Amon ginapanginbulahan ang BHB sa tanan nga mga ginpangabudlayan sini nga maagum sa masobra lima kag tunga ka dekada nga pagsulong sang inaway banwa. Ginapasidunggan kamo sang pumuluyong Pilipino bilang ila pinaka-pinalangga nga mga hangaway. Wala sang kahadlok kamo nga nagpakig-away para sa pumuluyo agud tapuson ang palas-anon sang imperyalismo, pyudalismo kag burukrata kapitalismo, kag nagalunsar sang masingki nga paghimakas batuk sa rehimen US-Marcos.

Sa malahalon nga adlaw nga ini, ang pamunuan kag bug-os nga katapuan sang Partido nagahatag sang pagsaludo sa tanan nga nagtaliwan nga mga baganihan sang BHB nga naghalad sang pinakamataas nga sakripisyo sa pagpili nga alagaran ang pumuluyo agud pakig-awayan ang mga nagapamigos kag nagapanghimulos sa ila. Sila ang mga martir sang pumuluyo, nga nagakadapat nga himuon nga huwaran ang kabuhi sang wala sang pagkangilin nga paghatag sang dedikasyon sa rebolusyonaryo nga kawsa.

Ginadayaw namon kamo sa inyo malig-on nga pagtib-ong sang pagpamuno sang Partido kag aktibo nga pagsulong sang kahublagan panadlong halin sadtong Disyembre 2023. Sa pagka-kritikal sa kaugalingon kag pagtadlong sa nagligad nga mga kasaypanan kag kahuyangan, amat-amat ninyo nga liwat nagakabawi ang inyo kusog sa basehan sang madalum kag malapad nga suporta sang masa, kag sa paglunsar sang pakig-away gerilya sandig sa inyo ikasarang.

Madamo ang kinahanglan pa nga himuon agud mabawi ang nadula nga base, liwat nga papagsikon ang hukbo kag ang baseng masa, kag liwat agumon ang lebel sadto nga kusog. Kinaghanglan naton nga pangibabawan ang madamo nga upang kag kabudlayan. Desperado ang kaaway sa kagustuhan nga dugmokon ang Bagong Hukbong Bayan, para madulaan sang tigpangapin ang pumuluyo kag madulaan sang pwersa nga makig-away para sa ila kawsa. Nagalunsar ang kaaway sang mapintas kag wala-puas nga gyera, apang sa kasagsagan sini, magamadinalag-on lang ini nga iduso ang pumuluyo nga determinado kag ubos-kusog nga makig-away.

Dapat ubos-kusog nga magpanikasog ang bug-os nga Partido agud pabaskugon ang Bagong Hukbong Bayan kag isulong ang rebolusyonaryong armadong paghimakas, nga amo ang mayor nga armas sang mga Pilipino, indi lang sa pagpangapin sa ila mga kaugalingon batuk sa mga pasista nga nagapamigos kag nagahimulos sa ila, kundi agud lab-uton ang ila handum para sa pungsodnon kag sosyal nga kahilwayan. Sa pangkabug-osan ang katungdanan sang pagpabaskog sa BHB amo subong ang pinaka-nagapanguna nga katungdanan sang Partido, kag dapat abagahon sang tanan nga kadre kag komite, lakip ang nakabase sa syudad, subongman sa luwas sang pungsod. Ang pagpatuman sang katungdanan nga ini rekisito sa pagsulong sang tanan nga iban pa nga katungdanan. Dapat magserbe ang tanan nga iban pa nga katungdanan sa katuyuan sang pagpasulong sang rebolusyonaryong armadong paghimakas.

Kahimtangan kag mga katungdanan sang Bagong Hukbong Bayan!

Ang kahublagan panadlong sa subong nga ginalunsar sang Partido dapat padayon nga mag-ugat, maglapnag kag magbunga sang positibo nga mga resulta, partikular sa patag sang rebolusyonaryong armadong paghimakas. Sa masobra lang isa ka tuig halin sang ginlunsar ang kahublagan panadlong, nakaangkon kita sang pursigido nga pagpaninguha sa pagkonsolida kag liwat nga pagpapagsik sa BHB. Sa idalum sang kahublagan panadlong, mapagsik nga gintib-ong sang Partido sa kubay sang BHB ang isa ka pangsulod nga kampanya sang pagtuon kag pagbalik-tuon sa Marxismo-Leninismo-Maoismo, sandig sa mga prinsipyo sang Partido kag estratehiya kag taktika sang paglunsar sang malawigon nga inaway banwa.

Agud isulong ang kahublagan panadlong, naglunsar sang mga kumperensya ang BHB sa lebel sang rehiyon kag iban pa nga lebel sang kumand agud sumahon ang mga inagihan para tumuron kag atubangon ang mga kasaypanan, kahuyangan kag mga kakulangan sang nagligad. Ginpalig-on, ginpasangkad kag ginpadalum sang mga ini ang yabe nga mga kritikal nga obserbasyon sang Komite Sentral sang sugdan ang kahublagan panadlong sadtong Disyembre 2023. Ginpalig-on ang mga resolusyon nga may katuyuan nga pabaskugon ang BHB kag komprehensibo nga iduso nga paabantihon ang inaway banwa. Ang mga Pulang hangaway sang BHB labi nga determinado nga makig-away para sa pumuluyo batuk sa brutal nga pagpang-atake sang pasista kag mapiguson nga rehimen US-Marcos.

Pursigido nga ginasaway kag ginasikway sang Partido kag sang BHB ang nagapangibabaw nga Tuo nga oportunistang tendensya nga nagdangat sa mga kasaypanan, kahuyangan kag kakulangan, kag nagresulta sa pagkaguot kag pag-atras. Ang mga ini nagapanguna sa porma sang konserbatismo kag pagbuhi sa gerilyang inisyatiba, sa hilikuton militar kag pulitika, nga nagpahuyang sa BHB kag sa baseng masa sini.

Nagresulta ang mga ini sa mga tendensya sa pagpakitid sang kaugalingon, kaangay sang malawigon nga pagbase sa bukid sang mga pormasyon sang BHB kag kapaslawan nga palaparon ang erya sang operasyon sang mga yunit sang BHB lapaw sa ila “paborito” nga mga baseng erya. Ginbunga sini ang paghuyang sang ikasarang sang BHB nga makalunsar sang sustenido kag lapnagon nga sosyal nga imbestigasyon, propaganda kag pag-organisa sa kubay sang dalagko nga isip sang masang mangunguma. May pila ka yunit sang BHB ang nagsugod nga magsalig sa mga alyadong manggaranon nga mangunguma agud pamunuan ang mga paghimakas masa, imbes nga bug-oson ang organisadong kusog, mayor sang mga imol nga mangunguma kag mamumugon sa uma, kabulig ang manubo nga nahanunga nga mangunguma kag tunga nga nahanunga nga mangunguma. May tendensiya man nga magsalig lang sa paghatag sang mga proyekto nga sosyo-ekonomiko ukon pang-komunidad, nga nagapahilayo sa masa sa kakinahanglanon nga tukuron ang ila organisasyon masa para sa paglunsar sang makasahi nga paghimakas agud pakig-awayan ang pyudal kag mala-pyudal nga mga porma sang pagpamigos kag pagpanghimulos. Nakaangkon sang malawigon nga pagbalewala sa sistematiko nga pagtinguha nga tukuron ang mga yunit milisya kag buhian ang ila inisyatiba sa pakig-away gerilya. Bilang resulta sang tanan nga mga ini, naaguman naton ang pagkitid kag pagnabaw sang baseng masa.

Wala hugot nga nauyatan ang yabe nga katungdanan sang paglunsar sang rebolusyon agraryo. Wala nalunsar ang mga kampanya sa reporma sa duta nga makapahulag sa pinakadamo nga mangunguma, sa lebel sang kusog kag sakup nga sabat sa nagalala kag mas nga nagalapnag nga mga dagway sang pyudal kag mala-pyudal nga pagpanghimulos, pagpabag-o gamit sang duta, kag pagpang-agaw sa palangabuhian sang minilyon nga mangunguma, mamumugon sa uma sa kaumhan kag mga mangingisda. Wala nakonsolida kag napasaka ang mga nagligad nga kadalag-an sa paglunsar sang reporma sa duta. Indi sustenido nga napatigayon ang pagpabaskog sang mga lokal nga sanga sang Partido kag organisasyon masa.

Natalupangdan naton kon paano ang mga kahuyangan kag kakulangan nga ini sa pagtukod kag pagpalapad sang baseng masa nangin upang sa ikasarang kag kumpyansa sang BHB nga maglunsar sang mga taktikal nga opensiba nga may nagapanguna nga katuyuan nga parte-parte nga dugmokon ang armadong pwersa sang kaaway, kag agawon ang ila mga armas. Imbes, may tendensya nga labi nga paboran ang lapta-lapta nga harasment kag iban pa nga atritibo nga taktikal nga opensiba, nga wala sistematiko nga nagawasak sa kusog sang kaaway, ukon nakabulig sa tayuyon nga pagtipon sang kusog sang BHB. Mas ginpa-igting sini ang tendensya nga mangin pasibo sa atubang sang pang-militar nga superyoridad sang kaaway, nga resulta sang makitid kag isa ka bahin nga pagtan-aw sa balanse sang mga pwersa, kag kapaslawan nga makaangkon sang diyalektikal nga pagtan-aw sa taktikal nga kusog sang kaaway kag sa estratehikong kahuyangan sini.

Ginpalapnag man sang Tuo nga oportunistang tendensya ang ulta-demokrasya kag ginpahuyang ang pangsulod nga disiplina militar sang BHB, kag panindugan pang-ideolohiya sang mga Pulang hangaway. Nagbunga ang ultra-demokrasya sang pagpakontento, kag nag-anak sang “sibilyanisasyon” sa kubay sang Pulang hangaway. Ang mga sandigan nga pagsulundan kag oryentasyon indi hugot nga ginasunod sa dalagan sang ila adlaw-adlaw nga aktibidad sa kampo, sa pagmartsa, ukon sa hilikuton masa ukon hilikuton militar. Sige-sige sini nga ginapahinay ang pag-maniobra, ginapunggan ang inisyatiba, kag sa ulihi naga-upang sa ila ikasarang nga epektibo nga makigsumpong sa kaaway. Nakompromiso ang gerilyang pagka-sekreto sa paggasgas sa mga linya sang suplay, pagmaniobra sa mga daan nga rota nga tumod na sang kaaway, kag pagbalewala sa sandigan nga mga patakaran sa paghalong sa paggamit sa gamit elektroniko kag radyo. Tungod sa kakulangan sa hugot nga pagpatuman sa mga patakaran, nagmadinalag-on ang kaaway sa pila ka higayon nga magpasulod sang GPS tracker nga ginagamit para sa pat-ud nga mga aerial strike.

Iban pa nga manipestasyon sang ultra-demokrasya ang sobra nga dispersal sang mga yunit, kakulangan sang malig-on nga sistema sang kumand kag kontrol, kapaslawan nga regular nga mag-report kag makig-angot sa ila mataas nga kumand, kag pagbalewala sang pagpauswag kag pagpabaskog sang isa ka madasig kag masaligan nga sistema sang komunikasyon. Naghatag man sang ligwa ang Tuo nga oportunismo sa burukratismo, kon diin napaslawan ang mga kumand nga tungdan ang madasig nga pagpamuno para hatagan sang direksyon ukon buligan nga atubangon ang mga problema ukon hambalanon nga gina-atubang sang manubo nga mga yunit. Sa pinakalala, nag-horma ang burukratismo sang “eksepsiyonalismo” kon diin ang mga patakaran indi patas nga ginapatuman sa mga kumander kag hangaway, kabangdanan agud wasakon ang pangsulod nga paghiliusa sang pila ka mga yunit sang hukbo sang banwa.

Natalupangdan man naton ang mga “Wala” nga oportunistang tendensya bilang sekondaryo nga kalakaran, lakip ang absoluto ukon ginpadugay nga konsentrasyon sang mga platun kag mas dalagko nga pormasyon, mga taktika nga “expansion by fire” nga sayup nga nagabuyagyag sa direksyon sang BHB, pagbira sang mga matig-a nga target nga kaaway, indi husto nga pokus sa mga taktikal nga opensibang kusog-kumpanya kadungan ang pagbalewala sa mga magagmay nga yunit nga taktikal nga opensiba, kag iban pa.

Ang amat-amat nga pagka-agnas sang baseng masa, ang hinay-hinay nga pagbuhin sang ikasarang nga makalunsar sang anihilatibong mga taktikal nga opensiba, nagadamo nga kakulangan sa gerilyang disiplina, kag nagadabong nga burukratismo sa kubay sang BHB nag-amot tanan sa mga kakulangan sa pagpatuman sang taktikal nga linya sang paglunsar sang malapad kag dasok nga pakig-away gerilya base sa nagalapad kag nagadalum nga baseng masa. Nagresulta ini sa pagka-ungot sang malawigon nga inaway banwa sa tunga-tunga nga halintang sang estratehikong depensiba sa malawig nga panahon.

Tungod sa mga kahuyangan kag kakulangan nga ini, nabutang ang BHB sa bulnerable nga pusisyon sa ginpasingki nga gyera sa pagkubkob kag pagpapas sang kaaway. Sugod 2017 kag 2018, naga-unod ini sang wala-puas nga nakapokus kag sustenido nga operasyon militar (FSMO) nga nagapahulag sang puluan ka libo nga tropang pangsumpong sa bug-os nga pungsod, agud magtalana sang isa ukon pila ka batalyon kada larangan gerilya. Mapintas kag wala-untat nga gina-atake sang kaaway ang baseng masa sang mangunguma paagi sa paghamlet, saywar, intimidasyon, kampanyang pagpasungka, pag-abdak, ekstra-hudisyal nga pagpamatay, masaker, aerial bombing kag pagpangkanyon. Sa tabon sang ginatawag nga “retooled community support program” (RCSP) ukon “modified community support program,” permanente nga ginapabilin ang mapiguson nga presensya sang mga grupo sang pasistang tropa sa tunga sang sibilyan nga populasyon.

Tungod sa pagpakitid sa kaugalingon, naghuyang ang pangpulitika nga pusisyon sang BHB, nga nagtulod sa madamuan nga yunit sa sitwasyon lunsay militar, kabangdanan nga madula ang ila inisyatiba kag mangin bulnerable sa mga atake. Tungod sa mga ini kag iban pa nga pangsulod nga mga kahuyangan kag kakulangan, nag-agum ang BHB sang signipikante nga pag-atras sa panahon sang 2017-2022 sa pag-atubang sa mapintas nga kampanya sang aerial bombing nga suportado sang US kag mga operasyon pangsumpong sang rehimen US-Duterte. Madamo sa mga yunit ang sayup nga nagtantya sa kadugayon sang kampanya sang kaaway kon diin nagpanghuna-huna ang iban nga masarangan lang nila nga “pahupason” lang ang mga ini. Apang, tuhay sa iban nga daan nga mga kampanya sang kaaway nga mas malip-ot ang siklo nga nagalawig sang pila ka semana tubtob isa ka bulan, mas madugay ang mga FSMO sang kaaway sugod sang 2017, nga nagalab-ot sang pila ka bulan tubtob isa ka tuig ukon mas sobra pa. Nagpatuman ang kaaway sang taktika nga “blockhouse” sa pagtukod sang permanente nga mga kampo militar kag detatsment sa mga barangay kag komunidad. Sa pila ka larangan gerilya, wala lang-at ang mga FSMO sang kaaway nga subong nagadugay na sang 7-8 ka tuig sa subong.

Sa madamo na nga tuig subong, ginagamit sang kaaway ang linya sa saywar nga yara sa banas na ini sang estratehikong kadalag-an batuk sa BHB. Nag-imbento ini sang pinakadako nga isip sang ginatawag nga “nabungkag” ukon “ginpahuyang” nga larangan gerilya. Ang mga lider upisyal sang AFP nagpaguwa sang binuang nga mga pahayag nga may yara na lang sang isa ka “ginpahuyang nga larangan gerilya” ang BHB, bisan pa wala nila ginatago ang kamatuoran nga padayon ini nga nagawaldas sang binilyon ka pisos sa aerial bombing, mga operasyon pangsumpong kag saywar batuk sa BHB kag batuk sa pumuluyo.

Sa sulsol sang AFP, ang mga upisyal sa probinsya kag lokalidad nagpaguwa sang mga peke nga deklarasyon nga ang ila mga probinsya ukon banwa “insurgency free” (wala na sang NPA), nga sang ulihi masakpan nga binutig sa panahon nga maglunsar sang taktikal nga opensiba ang mga yunit sang BHB. Indi mahimutig sang AFP ang reyalidad nga padayon nga nagatamasa ang BHB sang madalum kag malapad nga suporta halin sa pumuluyo tungod sa padayon sini nga ginapakig-away ang ila mga handum para sa hustisya kag matuod nga kahilwayan.

Sadtong 2022 pa lang, madamo sa mga pang-rehiyon nga komite sang Partido ang nagsuma sang ila inagihan nga nagtumod sa mga malahalon nga kasaypanan, kahuyangan kag kakulangan sa paglunsar sang malapad kag dasok nga pakig-away gerilya base sa nagalapad kag nagadalum nga baseng masa. Ginpatuman ang gilayon nga mga pagbag-o sa kondukta sang mga yunit sang BHB para bawion ang inisyatiba kag palaparon ang baseng masa kag maglunsar sang mga taktikal nga opensiba sandig sa ikasarang. Sa paglunsar sang kahublagan panadlong sadtong Disyembre 2023, gintungtungan sang Komite Sentral ang mga inisyal nga pagtinguha nga ini, mas sistematiko nga gintumod ang mga pang-ideolohiya nga ugat sang mga kahuyangan nga ini, kag mas matalum nga gintumod kag ginsaway ang lain-lain nga Tuo nga oportunistang tendensya nga nagdulot sang istagnasyon kag pag-atras sa paglunsar sang inaway banwa. Ginkilala sang Partido kag sang BHB ang mga hangkat nga ini, ang bag-o nga sitwasyon kag ang bag-o nga nakahilera nga mga katungdanan nga kaupod sini.

Sa subong yara sa proseso ang BHB sang liwat nga pagpakat kag liwat nga paghanas sang mga yunit sini santo sa mga rekisito sang paglunsar sang malapad kag dasok nga pakig-away gerilya base sa nagalapad kag nagadalum nga baseng masa. Hinay-hinay nga nakapangibabaw ang mga larangan gerilya sang BHB sa pasibidad kag nakabawi sang inisyatiba. Sang nagligad nga tuig, nangin relatibo madinalag-on sila sa pagpreserbar sang kaugalingon nga pwersa, kag pagpaslaw sa wala-puas kag ginpasingki nga kampanya sang pagkakubkob kag pagpapas sang kaaway. Ang malaparon nga sakup nga mga FSMO sang kaaway lubos nga nadulaan sang kapuslanan. Tungod sini, bisan sa panahon sang ginpasingki nga operasyon kombat kag pagsuyod sang kaaway sadtong Disyembre 2024 kag tubtob Enero nakalunsar pa ang BHB sang mga asembliya sang pagkonsolida kag nakapasulod sang puluan ka bisita para magpatigayon sang mga aktibidad sa edukasyon kag pang-kultura.

Sa paggamit sang mga taktikang konsentrasyon, dispersal kag pagbalhin, madasig nga paghulag, pagpabilin sang mataas nga lebel sang pagka-sekreto, kag sa pagpalapad sang ila erya sang operasyon, sa pangkabug-osan napabilin sang mga yunit gerilya sang BHB nga bungol kag bulag ang kaaway kag gindula ang kapuslanan sang iya mga kampanyang militar kag aerial bombing. Sa paglunsar sang aktibo nga depensa, nagataas ang ikasarang sang mga yunit sang BHB nga halitan ang naga-atake nga mga pwersa sang kaaway. Ang mga tropang pangsumpong sang AFP ginagamit bilang bala sa kanyon sa mga operasyon kombat nga nagahulat nga maambus. Samtang, agud ipabilin ang ilusyon nga nahimo na sini nga “estratehikong nalutos ang BHB” sistematiko nga gintago sang AFP ang nagadamo nga isip sang mga kaswalti, napatay kag napilasan, resulta sang mga paslaw nga pag-atake batuk sa BHB.

Apang, pareho sa ginadun-an naton sadtong Disyembre, madamo pa ang kinahanglan nga himuon agud makita naton ang lubos nga pagbunga sang kahublagan panadlong. Sa okasyon sang ika-56 nga anibersaryo sang BHB, liwat namon nga ginasulit kag ginapaathag ang hinanali nga mga katungdanan sa ideolohiya, pulitiko-militar kag organisasyon sang BHB kag sang bag-as sang Partido kaangot sa kahublagan panadlong sang Partido.

Dapat naton ipasaka ang lebel sang teoritikal nga paghangup sang mga Pulang kumander kag hangaway kag sang mga giya pangpulitika. Labi nga papagsikon ang pagtuon sa Marxismo-Leninismo-Maoismo kag mga sandigan nga prinsipyo sang Partido, paagi sa paggamit sa mga ini bilang ubay sa pagpasaka kag pagsuma sa aton mga inagihan, kag sa pagplano sa mga tikang sa palaabuton. Dapat mahatagan ang mga Pulang kumander kag hangaway sang mga sinulat militar ni Tsirman Mao Zedong para matun-an kag tamdan. Matutom nga tun-an ang Ang mga Partikular nga Kinaiya sang Aton Inaway Banwa ni Amado Guerrero subongman ang iban pa nga mga artikulo sang Komite Sentral, agud makaangkon sang maathag nga paghakus kon paano huluhalintang nga mag-uswag ang pangmalawigon nga inaway banwa. Tun-an ang ulihi nga artikulo ni Ka Joma nga “Indi mapierde ang demokratikong rebolusyon sang banwa” kag hugot nga hakson ang mga aspeto kon nga-a indi malutos ang Bagong Hukbong Bayan.

Maglunsar sang kampanya sa ideolohiya kag kultura agud mas nga pandayon ang determinasyon sang mga Pulang hangaway nga maglunsar sang rebolusyonaryong armadong paghimakas kag padalumon ang ila wala sang pangduha-duha nga dedikasyon nga alagaran ang pumuluyo. Maglunsar sang mga pasidungog agud handurawon ang mga baganihan kag martir sang rebolusyon Pilipino nga nagaserbe nga mga halimbawa nga dapat sundon. Ibuyagyag kag isikway ang mga traidor kag bayaran nga nagtraidor sa pumuluyo kag sa rebolusyon.

Maglunsar sang sustenido nga kampanya sang pang-ideolohiya nga pagpabag-o sang kaugalingon sa kubay sang mga Pulang kumander kag hangaway sang BHB. Tigayunon ang regular nga pagsaway kag pagsaway sa kaugalingon, kag ebalwasyon. Ipasaka ang lebel sang disiplina militar kag ikasarang sang mga Pulang hangaway paagi sa tayuyon nga pagbalik-tuon sa sandigan nga oryentasyon militar kag mga patakaran, paghanas, kag regular nga ehersisyo pisikal. Regular nga magpatigayon sang mga pag-ensayo para ipasaka ang ikasarang sang mga yunit nga maghulag bilang isa.

Ipasaka ang pangpulitika nga kamuklatan sang mga Pulang hangaway paagi sa regular nga pangpulitika nga edukasyon tuhoy sa mga mainit nga isyu kag sa pangkabug-osan nga pungsodnon kag internasyunal nga sitwasyon. Hormahon ang ila ikasarang pangpulitika kag teknikal paagi sa mga paghanas pareho sang sosyal nga imbestigasyon, paghambal sa publiko, pagsulat kag iban pa.

Maglunsar sang kampanyang rekoberi ukon liwat pagpahulag, ekspansyon kag konsolidasyon sa baseng masa nga may katuyuan nga tukuron ang kusog-kumpanya nga mga larangan gerilya. Padayon nga liwat magpakat kag liwat maghanas sang mga yunit sang BHB sandig sa mga rekisito sang paglunsar sang malapad kag dasok nga pakig-away gerilya base sa nagalapad kag nagadalom nga baseng masa. Padayon nga tukuron kag palig-unon ang mga platun sang BHB bilang sandigan nga yunit, nga nagamentinar sang sentro de grabidad para sa kumand kag komunikasyon, pleksible nga nagapakat kag nagapalapta sang mga iskwad kag tim sini para sa hilikuton masa kag mga taktikal nga opensiba nga masarangan sang gagmay nga yunit, nagakonsentrar para sa konsolidasyon, paghanas kag mas dalagko nga taktikal nga opensiba, kag nagabalhin agud awayon ang pagkubkob sang kaaway kag para magpalapad.

Maglunsar sang mga mapagsik nga kampanya agud magrekrut sang mga Pulang hangaway halin sa mga lokal nga komite sang Partido kag organisasyon masa sang mga mangunguma, ilabi na halin sa kubay sang mga pamatan-on aktibista nga aktibo nga nagapakigbahin sa mga paghimakas masa sa kaumhan. Ang mga komite sang Partido kag organisasyon masa sa mga syudad kag sentro sang banwa dapat aktibo nga magpropaganda, kag maglunsar sang mga kampanya para mag-rekrut sang mga Pulang hangaway halin sa mga mamumugon kag petiburgesyang intelektwal kag iban pa nga sektor. Ang mga unyon kag organisasyon masa dapat magplano nga regular nga magpadala sang gagmay nga tim para sa eksposyur ukon pagtalana sang mga tinawo sa BHB.

Maglunsar sang mga pulitiko-militar nga paghanas para magpatuhaw sang bag-o nga mga opisyal nga may ikasarang mamuno sa mga tim, iskwad kag platun sang BHB sa hilikuton masa kag kombat.

Tigayunon ang sosyal nga imbestigasyon kag pag-analisa sa sahi sa sakup sang mga banwa kag probinsya, linya sang mga pananum ukon industriya, para tumuron ang pinakahinanali nga mga isyu kag problema sosyo-ekonomiko kag pangpulitikang masa. Sa sining mga basehan, dapat naton tukuron, liwat pahulagon, ukon palaparon ang mga rebolusyonaryong organisasyon masa sang mga mangunguma, pamatan-on, kababaehan, mga bata kag mamumugon pangkultura. Dapat naton likawan ang mekanikal nga “liwat pagsugod sa wala” nga huluhalintang nga pamaagi sang pag-organisa nga napaslawan nga ikonsiderar ang rebolusyonaryong kasaysayan sang pumuluyo sa mga larangan gerilya ukon baseng erya. Dapat wala sang kakapoy nga maglunsar sang propaganda kag edukasyon agud konsolidahon ang masa kag ipasaka ang ila militansya. Tukuron, liwat tukuron ukon liwat pahulagon ang mga organo sang gahum pangpulitika sa mga barangay, inter-barangay ukon sa lebel banwa.

Maglunsar sang mga kampanya kag paghimakas masa para pahulagon ang pinakadako nga isip sang mga mangunguma batuk sa pyudal kag mala-pyudal kag iban pa nga porma sang pagpamigos. Isulong ang paghimakas sang masang mangunguma para sa demanda nga panubuon ang arkila sa duta, dulaon ang usura, makaangkon sang patas nga presyo sa pagbakal sang ila mga produkto pang-agrikultura kag iban pa. Pahulagon ang masa batuk sa pagpang-agaw sang duta kag mga operasyon sa mina kag iban pa nga mga dalagko nga negosyo nga nagaguba kag nagahilo sa kapalibutan. Dapat gilayon nga maghimo sang plano ang mga organo sang gahum pangpulitika, lokal nga sanga sang Partido, mga organisasyon masa, kag mga yunit sang BHB agud buligan nga makapasanto ang pumuluyo sa mga kalamidad pangklima, lakip ang pagkaayo sang mga ulumhan, sistema sa patubig, pagpangita kag pagsalbar, kag pagkuha kag paglubong sa mga napatay.

Maglunsar sang kontra-pasista nga kampanya kag paghimakas. Ibuyagyag ang mas nga nagalala nga pagpang-abuso, katontohan kag krimen nga ginapatigayon sang mga yunit sang AFP kag mga soldado sini, lakip ang mga paglapas sa demokratikong kinamatarung kag internasyunal nga makatawo nga layi. Ibuyagyag kag batikuson ang tanan nga kaso sang intimidasyon, Red-tagging, artbitraryo kag lapas sa layi nga detensyon, pag-abdak, tortyur, ekstra-hudisyal nga pagpamatay kag masaker. Ibuyagyag ang mga kaso sang aerial bombardment, istraping kag pagpangkanyon nga nagabutang sa peligro sa mga kabuhi sang sibilyan kag ila pagkabutang nga lapas sa internasyunal nga makatawo nga layi.

Dapat aktibo nga magpropaganda kag magkontra-propaganda ang mga kumand sang BHB, tubtob sa lebel sang probinsya kag larangan, paagi sa ila mga tigpamaba ukon upisyal sa impormasyon. Dapat ila gamiton ang tanan nga pamaagi para aktibo nga pukawon ang pumuluyo nga pakigbatuan ang mapiguson nga mga patakaan kag programa sang pagpang-agaw sa ila palangabuhian, kag nagapaidalum sa ila sa mas nga malala nga pag-antus. Dapat aktibo nila nga ibuyagyag ang saywar nga binutig sang kaaway kag disimpormasyon nga ginapalapta sa masa.

Dapat aktibo kag matutom nga tukuron sang lokal nga sanga kag komiteng seksyon sang Partido ang mga yunit sang milisyang bayan, kadungan ang mga yunit pangapin sa kaugalingon sang mga organisasyon masa. Labaw sa tanan, dapat naton dun-an, sa teroya kag praktika, ang malahalon nga papel sang mga yunit milisya sang BHB sa paglunsar sang pakig-away gerilya. Dapat naton buhian ang inisyatibang militar sang mga yunit pangapin sa kaugalingon sang pumuluyo paagi sa paghanas kag pag-engganyo sa ila nga gamiton ang tanan nga posible nga porma sang armadong pakig-away sa kaaway. Ang milisyang bayan importante nga kabulig sang mga pultaym nga horisontal nga yunit sang BHB. Ginapalapad nila ang sakup sang inaway banwa agud iduso ang kaaway nga unyaton ang pwersa sini kag ibuyagyag ang ila mga mahuyang nga bahin.

Maglunsar sang mga taktikal nga opensiba nga santo sa ikasarang sang mga tim, iskwad kag platun sang BHB. Tukibon kag iguon ang mga mahuyang nga bahin sang kaaway, lakip ang mga armadong tinawo sini nga nagasakup sa mga barangay sa kaumhan, mga nagarekorida, nagabantay sa tsekpoynt, nagapatigayon sang mga operasyon pangsumpong, kag iban pa. Planuhon ang pagkumpiskar sa mga armas sang kaaway para maarmasan ang bag-o nga mga rekrut. Maglunsar sang ginatos ka taktikal nga opensiba nga ginalunsar sang magagmay nga yunit para makakumpiskar sang armas.

Hugot nga sundon ang mga patakaran nga naka-desenyo para segurohon ang pagsekreto kag seguridad sang mga gerilyang kampo kag pagmaniobra. Alerto nga magbantay batuk sa tanan nga pagtinguha sang kaaway nga magpasulod sang elektronikong tracker pareho sang mga GPS transmitter, paagi sa mga linya sang suplay kag iban pa nga pamaagi. Tumuron kag solbaron ang tanan nga mga paglapas sa patakaran sa seguridad nga nagahalit sa gerilyang pagsekreto.

Tasahon ang natipon nga impormasyon paniktik sang kaaway kag dulaon ang kapuslanan sini. Bungkagon ang network sa intelidyens sang kaaway kag tukuron ang lokal nga lambat paniktik sang BHB kag mga yunit milisya. Pursigido nga ibuyagyag kag sikwayon ang kontra-rebolusyonaryong mga buluhaton sang mga bayaran kag traidor, kag sabton ang demanda sang pumuluyo nga silutan ang mga aktibo nga nagapakighimbon sa kaaway bilang mga ahenteng militar ukon espiya.

Magpatigayon sang hilikuton pangpulitika sa kubay sang kaaway. Dapat naton sistematiko nga tipunon ang impormasyon sa internal nga sitwasyon, mga reklamo kag kontradiksyon sa kubay sang mga platun, kumpanya, batalyon kag mas mataas nga istruktura sa kumand sang kaaway. Ibuyagyag ang mga pagpang-abuso batuk sa mga rank-and-file nga tinawo militar kag mga ginpwersa nga mag-paramilitar. Ibuyagyag ang korapsyon sa kubay sang mga upisyal sa sistema sang pagpasweldo kag naatrasar nga pagpaguwa sang sweldo kag alawans, paghuthot sang pondo para sa ginatawag nga mga “nagbalik sa sabak sang gobyerno,” koleksyon sang kikbak sa lokal nga mga proyekto (ilabi na sa idalum sang Support to Barangay Development Program sang NTF-Elcac), kag iban pa. Ibuyagyag kon paano padayon nga ginagamit ang AFP kag PNP sang militar sang US bilang proxy kag instrumento sa heyopulitikal nga katuyuan sini, ilabi na sa pagpang-garit-garit sang armadong kagamo sa imperyalistang kasumpong nga China. Magrekrut sang progresibo kag patriyotiko nga upisyal kag tinawo sa Crispin Tagamolila Movement.

Magpatigayon sang regular kag ispesyal nga mga kumperensya sa kumand sa lebel sang rehiyon kag mas manubo pa agud analisahon ang disposisyon kag plano sang kaaway, segurohon ang husto nga distribusyon sang aton mga pwersa, maghimo sang pangkabug-osan nga plano agud isulong ang inaway banwa sa erya sang operasyon, maghimo sang gin-isa nga plano nga kampanyang militar, kag segurohon ang maayo nga koordinasyon.

Pabaskugon ang sistema sang kumand sa sulod sang Bagong Hukbong Bayan, halin sa Pungsodnon nga Kumand sa Operasyon kag sa Pang-rehiyon nga kumand sa operasyon tubtob sa subrehiyon kag larangan, sa mga platun,iskwad kag tim sini. Padayon nga magpauswag, magpaayo kag magpabaskog sang isa ka madasig kag masaligan nga sistema sang komunikasyon, sa elektronik ukon pisikal man. Segurohon nga makaangkon sang sobra sa isa ka linya kag sistema sang back-up.

Padayon nga ipatuman kag pauswagon ang mga patakaran kag pagsulundan agud segurohon kag tipigan ang sensitibo nga impormasyon paagi sa kompartmentalisasyon, pagkoda sang mga file kag nakasulat sa listahan, regulasyon sa paggamit sang mga kompyuter, smartphone, selpon kag iban pa nga kagamitan elektroniko.

Padayon nga nangin matambok ang duta para sa paglunsar sang rebolusyonaryong armadong paghimakas sa idalum sang rehimen Marcos, nga gina-una ang interes sang nagahari nga sahi kag sang mga dumuluong nga mga gamhanan sa ekonomiya kag heyopulitika, kabangdanan nga labi nga nabuyagyag ang dunot kag korap nga nagahari nga sistema. Ginpatigayon ini sa kahalitan sang malapad nga masa sang pumuluyong Pilipino, kon diin ang dako nga mayoriya nagaantus sa nagabulusok nga kundisyon sa pagpangabuhi. Ang mga sistematikong pagpang-ipit sa mga demokratikong kinamatarung sa mga syudad kag hayag nga paghari militar sa kaumhan nagatarget sa mga mamumugon, mangunguma kag iban pa nga demokratikong mga sahi, nagatulod sa pumuluyo sa banas sang pag-armas agud makig-away, pangapinan ang ila mga kinamatarung kag maghimakas para sa ila pungsodnon kag demokratikong handum.

Nagatalum nga krisis sa ekonomiya kag pulitika sang nagahri nga sistema

Padayon nga nagalala ang nagahuyango nga mala-kolonyal kag mala-pyudal nga sistema, sa pagpatuman sang rehimen US-Marcos sang mga patakaran kontra-pumuluyo kag kontra-nasyunal nga nagpalala sa krisis sa ekonomiya, pagpahugot sini sa kapit sa poder nga nagpalala sa krisis sa pulitika, kag pagyaob sini sa imperyalismong US nga labi nga nagabutang sa peligro sang pungsodnon nga sobereniya.

Sa pihak sang nagabaskog nga proteksyunismo sang nagapangunga nga industriyal nga mga kapitalistang gahum, padayon nga ginasulong sang rehimen Marcos ang mga daan nga mga patakaran nga neoliberal nga nagresulta sa wala sang tupong nga pagwasak sa mga lokal nga pwersa sa produksyon sa nagligad nga apat ka dekada. Ang mga patakaran nga ini ginpanginpuslan sang mga monopolyo kapitalistang korporasyon kag institusyon pangpinansya kag nagpamanggad sa mga lokal nga mga dalagko nga burgesya kumprador, sa kahalitan sang malapad nga masang mamumugon kag nahanunga nga sahi. Ginpadalum sang mga patakaran nga ini ang ekonomiyang atrasado, agraryo kag indi industriyalisado, kag ginpalala ang disempleyo, kaimolon kag pagpamigos. Nangin mas nagasalig na ang pungsod sa pag-import kag mas nga nagakalumos sa utang.

Padayon nga ginabuksan ni Marcos ang ekonomiya bisan ang kabaliskaran sini ang ginaduso nga patakaran proteksyunista sang mga sentro sang pangkalibutanon nga kapitalismo agud protektahan kag liwat buhion ang ila mga lokal nga industriya. Sa sining konteksto, mas kontra-produktibo ang mga patakaran neoliberal kag pagsandig sang rehimen sa US. Ginabuksan sini ang pungsod sa mas malala nga pagpanghimulos kag indi patas nga mga kondisyon sa baligyaanay. Labi pa sini nga padalumon ang pagduko sa ekonomiya, kag palalaon ang sitwasyon sang pumuluyo, sa pagbagsak sang mga merkado pang-eksport sang Pilipinas kag mas nga desperado nga pagganyat sang rehimen sa dumuluong kapital.

Mas nagalala ang sosyal kag pang-ekonomiya nga pag-antus sang malapad nga masa sang pumuluyong Pilipino. Bisan pa taguon sang opisyal nga estadistika, mas nagalala ang kawad-on sang palangabuhian. Ang sweldo kag kita nagpabilin nga manubo, nabutang sa peligro kag labi ka kulang agud updan ang nagatimbuok nga presyo sang pagkaon, lana, mga sandigan nga kinahanglanon, yutiliti kag serbisyo. Ang pagtimbuok sang inadlaw nga gasto sa pangabuhi sa idalum ni Marcos nagtulod sa minilyon ka pumuluyo sa peligro sa pinansya kag naga-grabe nga kaimolon kag kagutuman. Masobra sa 20 milyones ka pamilya (nagalab-ot sa 80%) ang naga-antus kag bulnerable ang kahimtangan sa pinansya, lakip ang minilyon ka pamilya nga peke nga ginapaguwa nga yara sa nahanunga nga sahi. Halin sang nakapungko sa poder si Marcos sadtong 2022, nagdoble halin sa 3 milyones padulong sa 7.2 milyon ang kadamuon sang pamilya nga sobra nga naga-antus kag nagakagutom. Tungod sa kawad-on sang palangabuhian, tayuyon nga ginabutong paidalum ang kalidad sang pangabuhi sang dako nga mayoriya sang pumuluyong Pilipino.

Nagabuang-buang pa gihapon ang rehimen Marcos sa pagbaligya sang pungsod sa pagpanghimulos sang dumuluong monopolyong kapital. Agud ganyaton ang dumuluong kapital, ginpasugtan ni Marcos ang pagpasingki sang pagpanghimulos sa mga mamumugon sa paglansang sang suhol kag sweldo sang mga mamumugon. Ginpasugtan niya ang pagpamigos kag pagpang-agaw sang palangabuhian sang mga mangunguma, mga tumandok nga komunidad, mangingisda kag iban pa nga anakbalhas, kag ang pagwasak sa kapalibutan, paagi sa paghatag sa mga dumuluong monopolyo kapitalistang empresa kag iya mga kroni nga mga dalagko nga burgesya kumprador sang lubos nga kahilwayan nga agawon kag minahon ang malagpad nga duta, suba kag kadagatan,ukon padalaganon ang ila plantasyon,proyektong real estate, ginatawag nga proyektong ekolohiya ukon pang-klima, tambakan sang gina-import nga liquified natural gas halin sa US, kag iban pa nga operasyon para sa ganansya.

Grabe ang pagpang-agaw sang duta partikular sa Mindanao kon diin nagapakighimbon ang mga warlord sa militar agud palayason ang mga Moro kag Lumad sa ila duta, pabor sa mga plantasyon sa oil palm, kawayan, kape kag iban pa nga ginapadalagan sang mga korporasyon multinasyunal. Nagakahitabo ini bisan sa mga lugar nga kuno may otonomiya ang rehiyon Bangsamoro, nga luyag kontrolon ni Marcos, bisan pa ibutang sa peligro ang kasugtanan pangkahilwayan sa Moro Islamic Liberation Front, kag sulsolan ang paglupok liwat sang armadong pakig-away sang pumuluyong Moro.

Ginalansang sang rehimen Marcos ang sweldo sang mga mamumugon sa manubo nga lebel sang disente nga pangabuhi (apang gindoble naman ang ginahatag nga allowance sa mga pasistang soldado). Para mabuhi, nagakapwersa ang mga mamumugon, gagmay nga propesyunal kag kinaandan nga empleyado nga mangita sang dugang nga trabaho. Minilyon ka Pilipino ang wala sang trabaho ukon wala sang regular nga palangabuhian. Kapin sa apat-sa-lima (78%) sang upisyal nga ginasiling may trabaho, sa pagkamatuod mga partaym, temporaryo ukon kontraktwal, ukon impormal nga mamumugon. Tungod sa grabe nga krisis sa disempleyo sa Pilipinas, napwersa ang kapin 2.5 milyon ka Pilipino nga mag-trabaho sa luwas sang pungsod sadtong nagligad nga tuig, nga nagpadako sang isip sang mga overseas Filipino workers (OFW) sa masobra sa 11.5 milyon.

Ang nagalala nga kahimtangan sosyo-ekonomiko nagpatalum sang sosyal nga indi pag-alalangay sa tunga sang mga nagahari nga oligarko kag sang malapad nga masa sang pumuluyo. Sa idalum ni Marcos, ang isip sang pumuluyo nga wala sang tinago nga kwarta nagdamo sang 1.5 milyon padulong sa 20.1 milyon, samtang lapaw sa doble (108%) naman ang gindako sang kita padulong sa ₱1.8 trilyon sang tatlo ka pinakamanggaranon sa Pilipinas—si Enrique Razon, Manuel Villar kag Ramon Ang. Sila kag ang mga kasosyo nila nga dumuluong kapitalista ang pinakadako nga nagabenepisyo sa mga kontrata kag pabor sang gobyerno. Samtang ginakaltasan ang ila buwis, ginahatagan sang tax holiday kag iban pa nga insentibo pang-pinansya, ginapaantus naman ni Marcos ang pumuluyo sang pabug-at nga mga buwis sa mga sandigan nga kinahanglanon—lakip ang pinakataas nga “value added tax” sa rehiyon, excise tax sa diesel kag iban pa nga produktong petrolyo nga nagadako kada magsaka ang presyo, kag iban pa nga buwis sa pagkonsumo nga pinakabug-at para sa mga imol kag mga nahanunga nga sahi.

Kontra produktibo ang badyet ni Marcos kag pabug-at sa pumuluyo. Kadam-an sini nagakadto sa pagbayad-utang, kontra-produktibo nga gasto militar, kag grandyoso nga imprastruktura lakip ang tuman ka mahal nga proyektong pang-pork barrel. Ginabuhinan ang pangkabug-osan nga badyet nga pang-ayuda, apang mas dako naman ang nagakadto sa direkta nga kontrol sang mga pulitiko para sa kampanya sa eleksyon. Samtang, dako ang ginbuhin sa badyet para sa edukasyon, ikaayong lawas kag iban pa nga serbisyong pangpubliko, pati na sa agrikultura, samtang wala pondo para sa industriyalisasyon.

Ang ₱1.5 trilyon nga depisito sa badyet sang gobyernong Marcos sadtong nagligad nga tuig katumbas sang 5.7% sang kabug-osan nga lokal nga produksyon (gross domestic product ukon GDP)—ini ang pinakalala sa nagligad nga 40 ka tuig, wala pa labot sa mas dalagko nga depisito sa kasagsagan sang lockdown sadtong pandemya. Padayon nga nagatimbuok ang pagpangutang sa idalum ni Marcos—yara sa ₱16.3 trilyon na ini kag ginasigahum nga magalab-ot sa ₱17.4 trilyon sa katapusan sang tuig. Wala sang tupong ang pagpangutang sang rehimen Marcos nga naglab-ot na sa ₱188.7 bilyon kada bulan, nga lapaw pa sa ₱130.7 bilyon kada bulan nga pagpangutang ni Duterte.

Padayon nga lapnagon ang korapsyon sa idalum sang gobyernong Marcos, halin sa mga kikbak sa mga proyektong gobyerno, tubtob sa paggamit sang pangpubliko nga pondo (Maharlika Investment Fund) para sa pribado nga pangapital. Sugod sang nagpungko sa poder sadtong 2022, indi magnubo sa siyam ka kaso sa korapsyon (nga may balor nga lapaw sa ₱200 bilyon) batuk sa mga Marcos ang ginbasura sang mga korte. Mabawi na sang mga Marcos ang mga pagkabutang nga iligal nga ginhugakom sa idalum sang layi militar, lakip ang yadtong gina-uyatan sang mga kroni pareho nila Lucio Tan kag Ramon Ang (para kay Danding Cojuangco). Ginkuha na sang mga Marcos, sang mga pamilya kag kroni nila ang kontrol sa mga sindikato kag kartel nga yara sa likod sang importasyon kag ismagling sang bugas kag iban pa nga produkto.

Agud segurohon ang ila paghari kag padayunon ang paghugakom sang manggad, ginapaspasan ni Marcos ang konsolidasyon sang gahum pangpulitika agud segurohon ang kontrol lapaw sa 2028. Tungod sini, ginpadalum man niya ang pangpulitika nga krisis sang nagahari nga sistema. Katuyuan niya nga kakason ang peligro sang pangpulitika nga paghangkat sang mga Duterte sa 2028, nga kaalyado niya sadtong 2022 para segurohon ang eleksyon paagi sa sadto ginauyatan ni Duterte nga dekompyuter nga pag-isip sang boto. Subong gina-uyatan na niya ang sistema sang dekompyuter nga pag-isip, plano ni Marcos nga manipulahon ang resulta sang maabot nga eleksyon midterm agud uyatan ang tanan nga lebel sang gobyerno halin sa Senado, Manubo nga Kapulungan kag mga upisyal sang lokal nga gobyerno.

Sadtong Pebrero, gin-koordinar ni Marcos ang pagpasaka sang kaso (impeachment) sang Manubo nga Kapulungan kay Vice President Sara Duterte. Pila ka semana ang nagligad, gingamit niya ang gahum agud ipaaresto kag ipapriso si Rodrigo Duterte sa International Criminal Court sa The Hague, agud bistahon sa malaparan kag sistematiko nga pagpamatay nga nagabug-os sang krimen batuk sa katawhan. Ginpasingki kag ginpasaka sa bag-o nga lebel sang mga tikang nga ini ang pangpulitika nga krisis sang nagahari nga sistema. Ginatilawan sang mga Duterte, nga kilala nga nagagamit sang mga dumuluong nga kumpanya nga eksperto sa data analytics kag influence strategy, nga magpakulo sang bagyo pangpulitika batuk sa rehimen Marcos paagi sa paghorma sang opinyon pangpubliko gamit ang sistematikong disimpormasyon kag pasista nga manipulasyon sa social media, paghimulos sa reklamo sang pumuluyo, paggamit sa taktika nga pagpaniplang agud ipalayo ang igtalupangod sa mga abuso kag krimen sa idalum sang tiraniko nga paghari ni Duterte, kag pagpaguwa nga sila mga biktima agud makuha ang simpatiya sang publiko. Gintilawan nila nga mag-organisa sang mga rali kag mangtunga sa sulod sang militar kag pulis.

Ang pagpangibabaw sang banggaan Marcos-Duterte mas nga nagbuyagyag sa kagarukan sang nagahari nga sistema. Ginapakita sini kon paano ang subong nga nagahari nga sistema ginadominahan sang duha ka pinaka-korap kag mapintas nga reaksyonaryong hubon, nga nagatiglawas sa pang-ekonomiya nga interes sang dalagko nga burgesya kumprador kag dalagko nga agalon mayduta, nga mga burukrata kapitalista, nga sunod-sunoran sa mga dumuluong imperyalistang gahum, nga kontra-pumuluyo kag mapiguson. Samtang nagalala ang kahimtangan sang ekonomiya sang Pilipinas, nagagamay ang kinawat kag pribilehiyo nga ginatunga-tunga sang nagaribalan nga burukrata kapitalista. Nagapabilin ang peligro nga magsingki pa kag mapintas nga maglupok ang pangpulitika nga krisis sang nagahari nga sistema.

Agud mas nga ikonsolida kag monopolyohon ang gahum pangpulitika, ginpasingki man ni Marcos ang pangpulitika nga pagpang-ipit batuk sa mga organisasyon masa sang mga mamumugon, mangunguma, pamatan-on, kababaehan kag iban pa nga demokratikong sektor. Nagalala ang pagpaniktik sang estado, mga pagpang-abdak, tortyur, masaker kag iban pa nga mga malala nga paglapas sa tawhanon nga kinamatarung nga ginahimo sang reaksyonaryong militar kag pulis. Pinakalala ang sitwasyon sang linibo ka barangay sa kaumhan nga ginmando ni Marcos nga ipaidalum sa layi militar.
Sa tunga sang krisis ekonomiya, nagalapnag ang pagkahangawa sang malapad nga masa sang pumuluyo kag malig-on nga nagasulong sang ila organisadong pakig-away. Ang mga mamumugon nga natak-an na sa pila ka tuig nga pagpangbarat sang sensilyo nga umento nagademanda sang gilayon nga signipikante nga pagsaka sa sweldo agud makabulig sa pagsaka sang gasto sa pangabuhi. Nagabaskog man ang panawagan nga ini sa mga empleyado sang gobyerno, kag mga manunudlo pangpubliko kag sa pribado, nga nagapangayo sang makatarungan nga sweldo. Ang singgit para sa pagpasaka sang sweldo kag mas maayo nga kundisyon sa pagtrabaho segurado nga magpasagrab sa mas madamo nga welga kag iban pa nga dagway sang paghimakas masa.

Nagabaskog ang singgit batuk sa wala-untat nga importasyon sang bugas, pati na isda kag iban pa nga produktong pang-agrikultura nga nagapatay sa lokal nga produksyon. Nagapakig-away ang mangunguma kag mga komunidad sang mga tumandok nga minorya batuk sa mga minahan kag iban pa nga proyekto nga nagaguba sa kapalibutan kag naga-agaw sang ila duta. Ang nanari-sari nga sektor, lakip ang mga drayber kag opereytor sang jeep, mananagat kag iban pa nagatindog man para sa ila mga kinamatarung kag ubos-kusog nga ginapamatukan ang mga programa nga naga-agaw sang ila palangabuhian. Ginapakig-away sang mga estudyante ang mas dako nga subsidyo sang estado para sa edukasyon kag ginakontra ang pagsaka sang matrikula, kag panawagan para sa trabaho sa tunga sang krisis sa disempleyo.

Padayon nga nagadako ang pagpamatuk sa pagpasilabot militar sang US sa Pilipinas. Nagabaskog ang pagbatikos batuk sa paghatag sang US sang ayuda militar sa mapangsumpo nga rehimen, batuk sa mga base kag pasilidad militar sang US sa pungsod nga ginagamit para sa mga dumuluong operasyon militar, batuk sa pagsulod, pag-agi kag pagdungka sang mga US carrier strike group nga may dala nga mga armas nukleyar, batuk sa paggamit sa militar sang Pilipinas sa pagsulsol sang armaadong tensyon sa China, kag sa pagganoy sa pungsod nga mas nagapadalom sa peligro sang inter-imperyalistang gyera.

Nagahimakas ang malapad nga demokratikong sektor batuk sa nagalala nga dagway sang pagpang-abuso kag paglapas sang tawhanon nga kinamatarung nga ginahimo sang reaksyonaryong militar kag pulis. Ginaabi-abi nila ang pagbista kay Duterte sa ICC bilang higayon nga pasabton siya sa indi maisip nga krimen batuk sa katawhan sa pagpatuman sang iya peke nga “gyera sa droga.” Kadungan sini, ginapangayo nila nga pasabton si Marcos sa madamo nga mga pagpatay, pag-abdak kag iban pa nga krimen batuk sa pumuluyo nga nakapakig-away.

Ang nagadalum nga krisis sa ekonomiya kag pulitika sang nagahari nga sistema maathag nga nagabuyagyag sa bangkarote nga mala-kolonyal kag mala-pyudal nga sistema, kag ang tudok-sa-tul-an nga dunot nga estadong neokolonyal, nga ang paghari may kinaiya sang lapnagon nga korapsyon kag brutal nga pagpang-ipit. Ang solo nga pamaagi para bugrason ang kadena sang pagpamigos kag pagpanghimulos, kag tapuson ang indi na maagwanta nga kaimolon kag pag-antus sang malapad nga masang mamumugon, mangunguma kag anakbalhas sa Pilipinas, amo ang ibagsak ang imperyalismong US kag ang makasahi nga diktadurya sang mga dalagko nga burgesya kumprador, mga dalagko nga agalon mayduta, kag mga burukrata kapitalista.

Wala sang iban nga alternatibo ang pumuluyong Pilipino kundi ang isulong ang tayuyon nga rebolusyonaryong paghimakas, agud ibagsak ang mapiguson kag mahimuslanon nga nagahari nga mga sahi, kag tukuron ang demokratikong gahum sang pumuluyo. Hinanali, makatarunganon kag tuman ka kinahanglanon nga pabaskugon kag palaparon ang Bagong Hukbong Bayan kag isulong ang inaway banwa.

Ginpalala sang Trump 2.0 ang krisis sang pangkalibutanon nga sistemang kapitalista

Nagabulusok sa madalum nga kagamo ang kapitalistang kalibutan sa atubang sang wala sang kasolbaran nga kapitalistang krisis sang sobra nga produksyon, kag sa atubang sang garapalan nga duso sang gobyerno sang US sa idalum sang rehimen Trump 2.0 nga ilargada ang mga imperyalistang interes sini. Ginatiglawas sang gobyernong Trump ang pinaka-reaksyunaryo kag pinaka-sobinista nga mga elemento sang oligarkiya sa pinansya sa US. Ginkakas sini ang maskara nga “kampyon sang demokrasya” nga suksok sang US kag ginbuyagyag ang mga patakaran sini nga hegemonista, sa desperado nga pagtinguha sini nga baliskaron ang estratehikong pagbulusok sang imperyong Amerikano, kag ibalik ang kaugalingon bilang solo nga superpower.

Ginpakita sang mga datos sadtong nagligad nga tuig nga nagsangyad pa gihapon sa malawigon nga istagnasyon (halin pa 2008) ang mga kapitalistang ekonomiya, pagkatapos temporaryo nga nagbangon pagkatapos sang pandemya sadtong 2020. Nagbulusok padulong sa 2.8% sadtong 2023 kag 2024 ang pangkalibutanon nga pag-uswag sang ekonomiya, halin 5.8% sa panahon sang pagbangon pagkatapos sang pandemya. Mas manubo ini sa abereyds nga 3.2% nga pag-uswag sa nagligad nga dekada (2010-2019).Nagtimbuok ang pangkalibutanon nga utang sa bag-o nga lebel nga $318.4 trilyon sadtong nagligad nga tuig, tatlo ka pilo (328%) nga mas dako sa balor sang pangkalibutanon nga produksyon sadtong 2024. Indi lang ini imposible nga bayaran, imposible man nga iserbisyo ini sa kadugayon. Padayon nga nagahinay ang pag-uswag sang pangkalibutanon nga baligyaanay sang mga produkto, nagsadsad sa 2% sadtong 2024, nga mas manubo sang sa 4.5% sadtong 2010-2019. Nagnubo sang 8% sadtong 2024 ang ilig sang dumuluong nga direktang pangapital sa bug-os nga kalibutan. Ginbutong ini sang 45% nga pagbagsak sa European Union, kag 29% sa China, sa pihak sang 10% nga pag-uswag sang mga dumuluong nga direkta nga pangapital sa US nga gintulod sang pangapital halin sa Taiwan kag South Korea sa mga bag-o nga pabrika nga semikonduktor.

Sa atubang sang malawigon nga kapitalistang istagnasyon, mas agresibo nga ginaduso sang gobyerno ni Trump ang mga hugot kag desperado nga tikang sa ekonomiya kag baligyaanay sa katuyuan nga buhion ang lokal nga produksyon. Tungod sini ginagamo sini ang sistemang multilateral nga ginbuligan sini nga itukod sa panahon sang globalisasyon neoliberal. Sa pagkamatuod, sadtong 2008 pa ini nagliso sang direksyon sa idalum sang gobyerno ni Obama, sang ginsugdan sang US ang paghatag sang insentibo agud ibalik ang mga dumuluong nga pangapital sang US. Gindula sini ang kapuslanan sang sistema sang World Trade Organization sa pag-ayos sang banggaan, kag ginkuhaan sang pagka-epektibo ang mga kasugtanan sini. Sa sulod sang kapin isa ka dekada, lapnagon nga ginagamit sang US ang mas mataas nga taripa, mga restriksyon sa pag-export, mga restriksyon sa teknolohiya kag mas hugot nga regulasyon sang mga pangapital batuk sa China.

Ang agresibo nga paggamit sang gobyernong Trump sang mga patakaran nga ini sa baligyaanay kag ekonomiya batuk sa iban nga pungsod nagapasaka sang lebel sang antagonismo bisan sa mga tradisyunal nga imperyalistang kaalyado sini. Wala labot sa China, ginpatawan ukon ginpahog nga patawan sang mas mataas nga taripa ang isa ka bugkos sang mga baligya halin sa Canada, Mexico, European Union kag iban pa nga mga pungsod, nga may deklarado nga katuyuan nga protektahan ang mga kumpaniya nga Amerikano kag papagsikon ang lokal nga produksyon. Nagpamahog si Trump nga repasuhon ang alyansang militar sang US sa Japan, nga ginsabat naman sang Japan sang pangako nga pabaskugon ang pag-import sang liquefied petroleum gas halin sa US, kag dugangan ang pangapital sa US tubtob $1 trilyon. Apang, indi amo ka palasunod ang iban nga mga kaalyado sang US. Gin-anunsyo sang Canada kag Mexico ang plano sini nga magpatuman sang kontra-taripa sa mga baligya nga gina-import halin sa US. Nagpamahog man ang gobyernong France nga magsabat sa mga taripa sang US.

Sa pihak nga bahin, nagbalos ang China, kag ginpasaka ang taripa kag gindumilian nga mag-import sang soybeans kag troso halin sa US, kag nagdeklarar nga handa ini maglusong “sa ano man nga dagway sang gyera” sa US. Gintukod kag ginpalapad sini ang mga estratehiko nga alyansang diplomatiko, pang-ekonomiya kag pangmilitar, kaangay sang BRICS, G-77, Shanghai Cooperation Organization, Forum on China-African Cooperation, RCEP kag iban pa.

Dugang sa pagpataw ukon pagpamahog sang dugang nga mga taripa, gin-deklarar ni Trump ang kahandaan nga maggamit sang pwersang militar agud makuha ang kontrol sa Panama Canal (kon diin naga-agi ang 40% nga kargamento nga baligya sang US), Greenland (isa ka otonomo nga rehiyon sa Denmark nga may mga dalagko nga deposito sang mga rare-earth mineral, kag estratehiko nga makita sa rehiyon sang Arctic), kag ang Gaza Strip nga luyag ni Trump nga “angkunon” sang US nga lubos nga pagtapak sa mga kinamatarung sang pumuluyong Palestino.

Daw ginasunod subong ni Trump ang patakaran sang pagpakig-uli sa Russia kaangot sa Ukraine, pagkatapos makita nga sa pihak sang mga dalagko nga kahalitan sang Russia sa inaway, napaslawan ang US sa lain-lain nga katuyuan sini nga pahuyangon ang ikasarang estratehiko sang Russia nga makig-gyera, wasakon ang iya ekonomiya, magatulod sang pag-alsa batuk sa rehimen, ukon tunga-tungaon ang Russia. Ang pagbag-o nga ini sa patakaran nagabuyagyag sa kamatuoran nga ang kagamo sa Ukraine, halin pa sang panugod, isa ka proxy war sa tunga sang US kag Russia, bisan pa may mga hambalanon sa teritoryo sa tunga sang Ukraine kag Russia. Gintulod sang gobyernong Trump ang Ukraine nga magpasugot sa pag-untat lupok sa Russia, magluwas sa pagpirma sa isa ka kasugtanan nga magahatag sa US sang dako nga bahin sang mga deposito sang rare-earth mineral, nga ginasiling dagway sang bayad sa ginatantya $70 bilyon nga bulig militar sang US halin sadtong 2022.

Taliw-as sa patakaran sang pagpakig-uli sa Russia, padayon nga ginapataas sang gobyernong Trump ang banggaan sini sa China kag North Korea, kag ginpabilin nga bukas ang posibilidad sang paglupok sang armadong kagamo. Padayon nga ginapabaskog sang militar sang US ang mga pwersa sini sa idalum sang ginatawag nga estratehiyang Indo-Pacific. Sang sini lang, nagpatigayon ini sang malaparan nga mga war games sa South Korea, kag natalana nga magpatigayon sang tayuyon nga war games sa sulod kag palibot sang South China Sea, Pilipinas, Taiwan kag Japan nga may estratehikong katuyuan nga ihigot ang China. Sang sini lang, ginbalewala sang US ang patakaran sini nga “indi pagsuporta sa kahilwayan sang Taiwan,” nga isa ka direkta nga probokasyon sa China.

Ginpabaskog man sang gobyernong Trump ang imperyalistang pagpasilabot sa Middle East, labi nga ginpabaskog ang pagsuporta sa agresyon kag okupasyon sang Zionistang estado sang Israel sa Gaza. Ginmando sini sang sini lang ang pagpadala sang $3 bilyones nga balor sang mga misayl kag bomba sa Israel, kag ginasuportahan ang liwat pag-atake sa Gaza nga nagpatay sa ginatos ka Palestino, kag nagtapos sa duha ka bulan nga untat-lupok. Bilang suporta sa Israel, ginmando man ni Trump ang mga pag-atake nga misayl batuk sa mga pwersang Houthi sa Yemen, nga aktibo nga nagasuporta sa paghimakas para sa kahilwayan sang Palestino. Sa pakighimbon sa Israel, Turkey kag iban pa nga mga pungsod sa NATO, ginpabakod man sang gobyernong Trump ang pusisyon sini sa bag-o nga gobyerno sang Syria, agud dun-an ang pagpang-ipit militar sa Iran, santo sa estratehikong katuyuan nga kontrolon ang mga manggad nga lana sa Middle East.

Yara sa putok-putokan si Trump sang madasig nga nagalala nga krisis sa pulitika sa US, kon diin lubos na nga nagaliko ang subong nga nagapamuno nga oligarkiya padulong sa hayagan nga pagtib-ong sang pasistang ideolohiya. Ginpalibutan niya ang kaugalingon sang tigdayaw kag tigpalakpak sa iya bilang mga upisyal sang gabinete. Nagapamuno siya paagi sa mga mando, kag nagalubag sang mando sang mga hukmanan, sa isa ka mabaskog nga duso padulong sa otoritaryanismo. Agud tungaon ang sahing mamumugon, ginsulsolan ni Trump kag sang iya mga upisyal ang diskriminasyon sa mga minorya, mga imigrante, kag komunidad sang LGBT, kag nagapalapta sang mga pagtuluohan kag pagpati nga lubos nga indi syentipiko. Ginatos ka libo ka empleyado sang gobyerno sang US ang gilayon nga ginpangkakas tungod kuno sa pagkinot. Ginmando niya ang pagpang-ipit sa mga kinamatarung demokratiko, partikular, batuk sa kinamatarung nga magtipon kag sa hilway nga pagpahayag sa mga unibersidad. Naggamit siya sang mga mapintas kag wala sang proseso nga deportasyon sang linibo ka imigrante.

Sa pagpalargada sang iya mga patakaran kontra-demokratiko kag kontra-mamumugon, ginasindihan sang rehimen Trump ang lapnagon nga kahublagan protesta sa US nga segurado nga magalapad kag magasagrab sa dalagkuan nga demonstrasyon sa bug-os nga pungsod sa mga maabot nga binulan. Ang mga protesta batuk sa imperyalismong US segurado nga magatuhaw man sa bug-os nga kalibutan bilang sabat sa mga imperyalistang patakaran sa baligyaanay kag ekonomiya nga agresibo nga ginaduso sang rehimen Trump, kag sa iya wala-untat nga pagpanulsol sang gyera. Segurado nga magatuhaw kag magalapad ang mas madamo pa nga rebolusyonaryong armadong kahublagan tungod ang mga pumuluyo nga ginapigos sang imperyalismo kag pasismo ginadingutan sang iban nga pamaagi agud ipakig-away ang pungsodnon kag sosyal nga kahilwayan.

Isulong ang rebolusyonaryong pakig-away, mayor paagi sa armadong paghimakas

Pahapyaw naton nga gintalakay ang mga sini lang nga mga panghitabo sa sulod kag guwa sang pungsod agud ipakita ang obhetibo nga kondisyon nga nagatulod sa malapad nga masa sang pumuluyong Pilipino nga magsulong sang rebolusyonaryong paghimakas agud ipakig-away kag lab-uton ang ila handum para sa pungsodnon nga kahilwayan, demokrasya kag sosyalismo. Ang paghimakas sang pumuluyong Pilipino hugot nga nakaangot sa rebolusyonaryong pahimakas sang tanan nga pungsod nga ginapigos kag ginahimuslan sa bug-os nga kalibutan.

Ginalunsar sang pumuluyong Pilipino ang tanan nga dagway sang paghimakas agud isulong ang pungsodnon-demokratiko nga katuyuan. Nagasulong sila sang ligal nga mga dagway sang paghimakas sa kasyudaran kag kaumhan nga madamuan nga nagapukaw, naga-organisa kag nagapahulag sa masa batuk sa mga nagapamigos sa ila. Gintukod nila ang ila mga unyon kag organisasyon masa, nagahimakas sa mga negosasyon sa mga kapitalista kag burukrata nga upisyal sang estado, nagawelga sa mga pabrika, nagapatigayon sang boykot, walk-out, mga pangmasa nga demonstrasyon kag iban pa nga kolektibo nga paghulag. Nagapakigbahin sila sa reaksyonaryong eleksyon agud itib-ong ang katuyuan nga pungsodnon-demokratiko kag ikampanya ang mga progresibo nga kandidato kag partido. Paagi sa National Democratic Front, nagapakig-negosasyon pangkalinong sila sa reaksyonaryong gobyerno, agud itib-ong ang handum sang pumuluyo para sa makatarunganon kag pangmalawigon nga kalinong.

Ang armadong paghimakas ang nagapanguna nga dagway sang paghimakas sa pagsulong sang demokratikong rebolusyon sang banwa sa Pilipinas. Sa pagsulong naton sang armadong paghimakas aton maaway agud mabagsak ang imperyalismong US kag ang mga nagahari nga sahi nga mga dalagko nga burgesyang kumprador kag mga dalagko nga agalon mayduta. Ginapatuman sini ang sentral nga katungdanan sang rebolusyon Pilipino nga pagwasak sang armadong papet nga estado sang imperyalismong US kag mga nagahari nga sahi, kag pagtukod sang demokratikong estado sang pumuluyo sa idalum sang pagpamuno sang proletaryado. Paagi lang sa demokratikong estado sang pumuluyo mapatigayon ang sosyal nga rebolusyonaryong transpormasyon.

Sa okasyon subong nga adlaw sang ika-56 nga anibesaryo sang Bagong Hukbong Bayan, nagapanawagan kami sa tanan nga komite, kadre kag mga katapo sang Partido, nga pirme hatagan sang atensyon ang mga dungganon nga katungdanan nga isulong ang rebolusyonaryong armadong paghimakas kag pagpabaskog sang BHB sa pagpatuman sang inyo mga katungdanan sa lain-lain nga patag sang paghimakas.

Ginapanawagan namon ang tanan nga Pulang hangaway sang Bagong Hukbong Bayan nga mas pa nga ipataas ang ila determinasyon kag ipasaka ang ikasarang nila nga tumanon ang mga katungdanan sang kahublagan panadlong. Segurado kami nga malab-ot sang BHB ang mas dalagkuan nga mga kadalag-an sa liwat nga pagpapagsik kag pagpalapad sang baseng masa kag sang pagsulong sang pakig-away gerilya batuk sa pasistang rehimen US-Marcos.

Mabuhay ang indi matay-og nga rebolusyonaryong espirito sang mga Pulang hangaway sang Bagong Hukbong Bayan!

Pabaskugon kag palaparon ang BHB!

Paslawon ang mga brutal kag teroristang gyerang pagpangsumpo sang rehimen US-Marcos!

Palaparon kag pasingkion ang pakig-away gerilya!

Isulong ang rebolusyonaryong armadong paghimakas!

Isulong ang demokratikong rebolusyon sang banwa!

Mabuhay ang Bagong Hukbong Bayan!

Mabuhay ang Partido Komunista sang Pilipinas!

Mabuhay ang proletaryo kag pumuluyong Pilipino!