Padpadayawan ti Komite Sentral ti Communist Party of the Philippines (CPP) ti New People’s Army (NPA) iti okasyon ti maika-56 anibersaryo daytoy. It-ited mi ti katataeran a saludo iti kinatured ken kinabanwar dagiti Nalabbaga a mannakigubat ken kumander nga agtultuloy nga agpingpinget iti panangiyabante ti gubat ti umili tapno ilaban ti tarigagay ti umili a Pilipino para iti nailyan a wayawaya ken pudno a demokrasya.

Kablaawan mi ti NPA iti amin a nagrigatan daytoy a gun-oden iti nasurok lima ket kagudwa a panangiyabante iti gubat ti umili. Padpadayawayan dakayo ti umili a Pilipino kas ipatpateg da a mannakigubat. Saan kayo nga agbuteng a lumablaban para iti umili tapno gibusan ti imperyalismo, pyudalismo ken burukrata kapitalismo, ken agisaysayangkat ti nainget a dangadang laban iti rehimen US-Marcos.

Iti daytoy a napateg nga aldaw, ti liderato ken intero a kamkameng ti Partido ket mangisagsagut ti pammadayaw iti amin a napasag a banwar ti NPA a nangidaton ti kangatwan a sakripisyo iti panangpili a pagserbian ti umili tapno labanan dagiti mangidadanes ken manggungundaway kadakuada. Isuda dagiti martir ti umili, a ti biag da nga awanan panagimbubukod a dedikasyon iti rebolusyonaryo a panggep ket rumbeng a pagtuladan.

Daydayawen dakayo iti natibker a panangitandudo yo iti panangidaulo ti Partido ken aktibo a panangiyabante ti tignay panagilinteg manipud idi Disyembre 2023. Iti kina-kritikal iti bagi ken panagilinteg iti napalabas a nagkamalian ken nagkapuyan, in-inot yo a masubsubbot ti pigsa yo basar iti nauneg ken nalapad a suporta ti masa, ken iti panangisayangkat ti gubat a gerilya basar ti kabaelan yo.

Adu pay ti kasapulan nga aramiden tapno masubbot ti napukaw a base, balbaliw a maparegta ti hukbo ken ti base a masa, ken balbaliw a gun-oden ti sigud a tukad ti pigsa. Kasapulan tayo a rimbawan ti adu a tubeng ken kinarigat. Desperado ti kabusor iti gagem daytoy a rebbeken ti New People’s Army, tapno maawanan ti umili ti salaknib ken maawanan ti pwersa a lumaban para iti tarigagay da. Agisaysayangkat ti kabusor ti naulpit ken awan-sarday a gera, ngem iti kangitingitan na, agbalballigi laeng daytoy nga iduron ti umili a lumaban a napigpigsa ken napingpinget.

Rumbeng a sipapasnek nga agsalukag ti intero a Partido tapno papigsaen ti New People’s Army ken iyabante ti rebolusyonaryo nga armado a dangadang, a kangrunaan nga armas dagiti Pilipino, saan laeng iti panangsalaknib iti bagbagi da laban kadagiti pasista a mangidadanes ken manggungundaway kadakuada, nu di ket gun-oden ti kalikagum da para iti wayawaya ti pagilyan ken kagimongan. Ti rebbengen ti panangpapigsa iti NPA ket agdama a kangrunaan a rebbengen ti Partido, iti kabuklan, ken nasken nga ibaklay ti amin a kadre ken komite, kabilang dagiti nakabase kadagiti syudad, kasta met iti ballasiw-taaw. Ti panangtungpal iti daytoy a rebbengen ket rekisito iti panangiyabante ti amin ken dadduma pay a rebbengen. Kasapulan nga agserbi ti amin a dadduma pay a rebbengen iti panggep ti panangiyabante ti rebolusyonaryo nga armado a dangadang.

Kasasaad ken dagiti rebbengen ti New People’s Army

Ti tignay panagilinteg a madama nga isaysayangkat ti Partido ket agtultuloy a rumamramut, sumaksaknap ken agibungbunga kadagiti positibo a resulta, partikular iti tay-ak ti rebolusyonaryo nga armado a dangadang. Iti nasurok makatawen laeng manipud idi naisayangkat ti tignay panagilinteg, naaddaan tayo ti napasnek a panagsalukag iti panangkonsolida ken balbaliw a panangparegta iti NPA. Iti sidong ti tignay panagilinteg, naregta nga intandudo ti Partido iti intar ti NPA ti maysa a pang-uneg a kampanya ti panagadal ken panangrepaso iti Marxismo-Leninismo-Maoismo, kadagiti basaran a prinsipyo ti Partido ken estratehiya ken taktika ti panangisayangkat ti naunday a gubat ti umili.

Tapno iyabante ti tignay panagilinteg, nagisayangkat ti kumperensya ti NPA iti tukad rehiyon ken dadduma pay a tukad ti kumand tapno lagumen dagiti kapadasan tapno itudo ken sangwen dagiti kamali, nagkapuyan ken dagiti nagkurangan iti napalabas. Pinasingkedan, dinitalye ken pinauneg dagitoy dagiti kangrunaan a kritikal nga obserbasyon ti Komite Sentral idi narugian ti tignay panagilinteg idi Disyembre 2023. Napasingkedan dagiti resolusyon iti panggep a papigsaen ti NPA ken komprehensibo nga iduron paabante ti gubat ti umili. Dagiti Nalabbaga a mannakigubat ti NPA ket ad-adda a determinado a lumaban para iti umili laban iti brutal a panagatake ti pasista ken mangidadanes a rehimen US-Marcos.

Sipapasnek a dildillawen ken laklaksiden ti Partido ken NPA ti rumimrimbaw a kannawan nga oportunista a tendensya a nagtennag kadagiti kamali, pagkapuyan ken pagkurangan, a nagresulta iti panagsardeng ken panag-atras. Dagitoy ket kangrunaan nga iti porma ti konserbatismo ken panagibbat iti gerilya nga inisyatiba, agpada iti trabaho a militar ken pulitika, nga agpada a nangpakapsut iti NPA ken iti base a masa daytoy.

Nagresulta dagitoy kadagiti tendensya ti panagpaakikid iti bagbagi, kas ti nabayag a panagbase iti bantay dagiti pormasyon ti NPA ken pannakapaay a palawaen ti erya ti operasyon dagiti yunit ti NPA labes kadagiti “paborito” da a base nga erya. Nagbunga daytoy ti panagkapsut ti kabaelan ti NPA a makaisayangkat ti sustenido ken nalawa a panagsukisok iti gimong, propaganda ken panag-organisa iti intar ti dakkel a bilang ti masa a mannalon. Adda ti sumagmamano a yunit ti NPA a nangrugi a nagsanggir kadagiti alyado a baknang a mannalon tapno idauluan dagiti dangadang ti masa, imbes a buklen ti organisado a pigsa ti mannalon ken mangmangged-talon, kabinnadang ti nababa-nga-akintengnga a mannalon ken tengnga-a-makintengnga a mannalon. Adda met ti tendensya nga agsanggir laeng iti panangited kadagiti proyekto a sosyo-ekonomiko wenno pangkomunidad, a mangiyad-adayo iti masa iti pagkasapulan a buklen ti organisasyon masa da para iti panangisayangkat ti naindasigan a dangadang tapno labanan dagiti pyudal ken malapyudal a porma ti panangidadanes ken pananggundaway. Napasamak ti nabayag a panagliway iti sistematiko a panagpinget a buklen dagiti yunit milisya ken palubosan ti inisyatiba da iti pannakigubat a gerilya. Kas resulta amin dagitoy, naimatangan tayo ti panag-akikid ken panagrabaw ti base a masa.

Saan a nairut a napangiggeman ti kangrunaan a rebbengen ti panangisayangkat ti rebolusyon agraryo. Saan a naisayangkat dagiti kampanya iti reporma ti daga a makapagpatignay iti kaadwan a mannalon, iti tukad ti pigsa ken saklaw a sungbat iti kumarkaro ken dagiti sumaksaknap a langa ti pyudal ken malapyudal a panaggundaway, panagsukat ti usar ti daga ken panang-agaw iti pagbiagan ti minilyon a mannalon, mangmangged-talon ken mangngalap iti kaaw-awayan. Saan a nakonsolida ken naingato dagiti napalabas a balligi iti panangisayangkat ti reporma iti daga. Saan a sustenido a naiyaramid ti panagpapigsa kadagiti lokal a sangay ti Partido ken organisasyon ti masa.

Napaliiw tayo nu kasano a dagitoy a pagkapuyan ken pagkurangan iti panangbukel ken panangpalawa iti base a masa ket nangpakapsut iti kabaelan ken kumpyansa ti NPA nga agisayangkat kadagiti taktikal nga opensiba nga addaan kangrunaan a panggep a paset-paset a rebbeken ti armado a pwersa ti kabusor ken rabsuten ti armas da. Ketdi, adda ti tendensya a palalo a paburan ti nawara-waras a harasment ken dadduma pay nga atritibo a taktikal nga opensiba, a saan a sistematiko a mangperperdi iti pigsa ti kabusor, wenno makatulong iti tuloy-tuloy a panagurnong ti pigsa ti NPA. Ad-adda pay a pinakaro daytoy ti tendensya nga agbalin a pasibo iti sango ti pangmilitar a superyoridad ti kabusor, a resulta ti akikid ken bangbangir a panangtan-aw iti balanse dagiti pwersa, ken pannakapaay a diyalektikal a tan-awan ti taktikal a pigsa ti kabusor ken iti estratehiko a pagkapuyan daytoy.

Naipasaknap met ti Kannawan nga oportunista a tendensya ken ultra-demokrasya ken napakapsut ti pang-uneg a disiplina a militar ti NPA ken ti pang-ideolohiya a takder dagiti Nalabbaga a mannakigubat. Ti ultrademokrasya ket nagbunga ti panagpakaanay ken nangipasngay ti “sibilyanisasyon” iti intar dagiti Nalabbaga a mannakigubat. Dagiti basaran a pagannurotan ken oryentasyon ket saan a nairut a masursurot iti taray ti inaldaw-aldaw nga aktibidad da iti kampo, iti panagmartsa wenno iti gawaing masa wenno trabaho a militar. Awan-labas na a pabpabuntogen dagitoy dagiti maniobra, laplapdan ti inisyatiba ken ti kakaruan ket mangtubtubeng iti kabaelan da nga epektibo a makirinnupak iti kabusor. Nakompromiso ti gerilya a panaglimed iti pananggasgas kadagiti linya ti suplay, panagmaniobra kadagiti daan a ruta nga ammon ti kabusor ken panagliway kadagiti basaran a patakaran iti panagannad iti panagamat ti ramit elektroniko ken radyo. Gapu iti saan a nairut a panagtungpal kadagiti patakaran, nagballigi ti kabusor iti sumagmamano a gundaway a mangiserrek kadagiti GPS tracker a maar-aramat para kadagiti presiso nga aerial strike.

Dadduma pay a manipestasyon ti ultra-demokrasya ket ti nalabes a dispersal dagiti yunit, kinakurang ti natibker a sistema ti kumand ken kontrol, pannakapaay a regular nga agulat ken makikoordina kadagiti nangatngato a kumand da ken panagliway iti panangpadur-as ken panangpapigsa ti maysa a napaspas ken mapangnamnamaan a sistema ti komunikasyon. Pinapigsa met ti Kannawan nga oportunismo ti burukratismo, nu sadinno a napaay dagiti kumand nga akemen ti napartak a panangidaulo tapno ikkan direksyon wenno tulungan a risuten dagiti problema wenno usapin a sangsangwen dagiti nababbaba a yunit. Ti kakaruan, ti burukratismo ket naaddaan porma iti “eksepsiyonalismo” nu sadinno a dagiti patakaran ket saan a patas a maipatpatungpal kadagiti kumander ken mannakigubat, rason tapno mapakapsut ti pang-uneg a panagkaykaysa ti dadduma a yunit ti soldados ti umili.

Napaliiw tayo met ti “Kannigid” nga oportunista a tendensya kas sekundaryo a turong, kabilang ti absoluto wenno pinabayag a konsentrasyon dagiti platun ken dagiti dakdakkel a pormasyon, dagiti taktika nga “expansion by fire” a kamali a mangiparparang iti direksyon ti NPA, panagdisnog kadagiti natatangken a target a kabusor, saan nga usto a pokus kadagiti taktikal nga opensiba a pigsa’t-kumpanya, kagiddan ti panagliway kadagiti babassit a yunit a taktikal nga opensiba ken dadduma pay.

Ti in-inot a panagkapsut ti base a masa, ti in-inayad a panagbaba ti kabaelan a makaisayangkat kadagiti anihilatibo a taktikal nga opensiba, umad-ado a kakurangan iti gerilya a disiplina ken dumakdakkel a burukratismo iti intar ti NPA ket nangibinglay amin kadagiti kakurangan iti panagtungpal iti taktikal a linya ti panangisayangkat ti nasaknap ken nairteng a pannakigubat a gerilya basar iti lumawlawa ken umun-uneg a base a masa. Nagresulta daytoy iti panagsardeng ti naunday a gubat ti umili iti makintengnga a tukad ti estratehiko a depensiba iti atiddog a panawen.

Gapu kadagitoy a pagkapuyan ken pagkurangan, naikabil ti NPA iti bulnerable a pusisyon iti pinairteng a gera ti panagkubkob ken panagparmek ti kabusor. Manipud 2017 ken 2018, limmatak ti awan-sarday a nakapokus ken sustenido nga operasyon militar (FSMO) a mangpatpatignay ti manopulo a ribo a tropa a pangkombat iti intero a pagilyan, tapno mangideploy ti maysa wenno mano a batalyon kada larangan gerilya. Narungsot ken awan-ressat nga inatake ti kabusor ti base a masa ti mannalon babaen ti panaghamlet, saywar, pammutbuteng, kampanya a panagpasuko, panagdukot, ekstra-hudisyal a pammapatay, masaker, panagbomba iti ere ken panagkanyon. Iti linged ti maaw-awagan a “retooled community support program” (RCSP) wenno “modified community support program,” permanente nga agtaltalinaed ti mangidadanes a presensya dagiti pangkat ti pasista a tropa iti tengnga ti sibilyan a populasyon.

Gapu iti panagpaakikid iti bagbagi, kimmapsut ti pangpulitika a pusisyon ti NPA, a nangiduron iti adu a yunit iti sitwasyon a puro militar, a makagapu ti pannakapukaw ti inisyatiba ken agbalin da a bulnerable kadagiti atake. Gapu kadagitoy ken dadduma pay a pang-uneg a pagkapuyan ken pagkurangan, nagsagaba ti NPA ti signipikante a panag-atras iti panawen ti 2017-2022 iti panagsango iti naulpit a kampanya ti panagbomba iti ere a suportado ti US ken dagiti operasyon a pangkombat ti rehimen US-Duterte. Adu kadagiti yunit ti kamali a nangtaya iti ibayag ti kampanya ti kabusor nu sadinno a pinanunot ti dadduma a kabaelan da a “palabasen” dagitoy. Nupay kasta, naiduma kadagiti dati a kampanya ti kabusor a naab-ababa ti siklo dagitoy nga agbaybayag ti mano a lawas agingga makabulan, napapapaut dagiti FSMO ti kabusor manipud 2017, a dumandanon iti mano a bulan agingga makatawen wenno nasurok pay. Nagipatungpal ti kabusor ti taktika a “blockhouse” iti panangitakder kadagiti permanente a kampo militar ken detatsment kadagiti barangay ken komunidad. Iti sumagmamano a larangan gerilya, awan-ressat dagiti FSMO ti kabusor nga tatta ket nagpauten ti 7-8 tawen.

Iti adun a tawen tatta, ar-aramaten ti kabusor ti linya iti saywar nga addan daytoy iti dana ti estratehiko a balligi laban iti NPA. Agim-imbento daytoy ti pinadakkel a bilang ti kunkunada a “narebbeken” wenno “napakapsuten” a larangan gerilya. Dagiti dadaulo nga upisyal ti AFP ket agirakrakurak kadagiti mauyong a pablaak nga adda laengen maysa a “pinakapsut a larangan gerilya” ti NPA, uray pay saan da nga ilemlemmeng ti kinapudno nga agtultuloy daytoy a mangbusbusbos ti binilyon a piso iti panagbomba iti ere, dagiti operasyon a pangkombat ken saywar laban iti NPA ken laban iti umili.

Iti sugsog ti AFP, dagiti upisyal iti prubinsya ken lokalidad ket agiruruar kadagiti peke a deklarasyon a dagiti prubinsya wenno ili da ket “insurgency-free” (awanen ti NPA), nga iti agangay ket mapaneknekan nga inuulbod iti panawen a nagisayangkat ti taktikal nga opensiba dagiti yunit ti NPA. Saan a mapaglibakan ti AFP ti kinapudno nga agtultuloy nga agsagsagrap ti NPA ti nauneg ken nalapad a suporta manipud iti umili gapu ta agtultuloy nga ilablaban daytoy dagiti tarigagay da para iti hustisya ken pudno a wayawaya.

Idi pay 2022, adu kadagiti pangrehiyon a komite ti Partido ti naglagom ti kapadasan da a nangitudo kadagiti signipikante a kamali, pagkapuyan ken pagkurangan iti panangisayangkat ti nasaknap ken nairteng a pannakigubat a gerilya basar iti lumawlawa ken umun-uneg a base a masa. Inpatungpal da dagiti madagdagus a panagbalbaliw iti kondukta dagiti yunit ti NPA tapno subboten ti inisyatiba ken palawaen ti base a masa ken agisayangkat kadagiti taktikal nga opensiba basar iti kabaelan. Iti panangisayangkat iti tignay panagilinteg idi Disyembre 2023, pinagbatayan ti Komite Sentral dagitoy nga inisyal a pagsisikap, ad-adda a sistematiko a natudo dagiti pang-ideolohiya a ramut dagitoy a pagkapuyan, ken natadtadem a tinudo ken dinillaw daytoy ti nadumaduma a Kannawan nga oportunista a tendensya a nangitunda ti istagnasyon ken panag-atras iti panagisayangkat ti gubat ti umili. Bigbigbigen ti Partido ken ti NPA dagitoy a karit, ti baro a a sitwasyon ken baro a linya dagiti rebbengen a kakuyog daytoy.

Ti NPA ket madama nga adda iti proseso ti balbaliw a panagpakat ken balbaliw a panagsanay dagiti yunit daytoy umannurot kadagiti rekisito ti panagisayangkat ti nasaknap ken nairteng a pannakigubat a gerilya basar iti lumawlawa ken umun-uneg a base a masa. In-inot a makarimrimbaw dagiti larangan gerilya ti NPA manipud iti kinapasibo ken makasubsubbot iti inisyatiba. Iti napalabas a tawen, nagbalin a relatibo a naballigi da iti panagpreserba ti bukod a pwersa ken panangpaay iti awan-sarday ken pinapigsa a kampanya ti panagkubkob ken panagparmek ti kabusor. Dagiti nasaknap nga FSMO ti kabusor ket ad-adda pay nga maaw-awanan ti serbi. Gapu ditoy, uray iti panawen ti pinairteng nga operasyon a kombat ken panagsuyod ti kabusor idi Disyembre 2024 agingga Enero ket nakaisayangkat pay ti NPA kadagiti asembleya ti panagkonsolida ken nangsangaili ti manopulo a bisita tapno agiyaramid kadagiti aktibidad iti edukasyon ken pangkultura.

Iti panagaramat kadagiti taktika a konsentrasyon, dispersal ken panagakar, napaspas a panagtignay, panangpatalinaed ti nangato a tukad ti panaglimed ken iti panagpalawa kadagiti erya ti operasyon da, iti kaadwan ket napagtalinaed dagiti yunit gerilya ti NPA a tuleng ken bulag ti kabusor ken mapagbalbalin da nga awan-mamaay na dagiti kampanya a militar ken panagbomba dagitoy iti ere. Iti panangisayangkat ti aktibo a depensa, ngumatnagto ti kabaelan dagiti yunit ti NPA a dadaelen ti umat-atake a pwersa ti kabusor. Dagiti tropa a pangkombat ti AFP ket maar-aramat kas bala iti kanyon kadagiti operasyon a kombat nga agur-uray a maambus. Kabayatanna, tapno pagtalinaeden ti ilusyon a naaramid daytoyen nga “estratehiko a maabak ti NPA,” sistematiko nga ilemlemmeng ti AFP ti umad-ado a bilang dagiti kaswalti, napapatay ken nasugatan, resulta dagiti napaay a panag-atake da iti NPA.

Nupay kasta, kas ti tinalmegan tayo idi Disyembre, adu pay ti kasapulan nga aramiden tapno makita tayo a naan-anayen ti panagbunga ti tignay panagilinteg. Iti okasyon ti maika-56 anibersaryo ti NPA, balbaliw mi nga ul-uliten ken ipalpalawag dagiti madagdagus a rebbengen iti ideolohiya, pulitiko-militar ken organisasyon ti NPA ken ti bugas ti Partido kanaig ti tignay panagilinteg.

Kasapulan nga ingato tayo ti teoretikal a panagawat dagiti Nalabbaga a kumander, mannakigubat ken giya a pangpulitika. Ad-adda pay a paregtaen ti panagadal iti Marxismo-Leninismo-Maoismo ken dagiti basaran a prinsipyo ti Partido, babaen ti panangaramat kadagitoy kas tarabay iti panangipangato ken pananglagom iti kapadasan tayo ken iti panagplano kadagiti addang iti masangwanan. Nasken a maikkan dagiti Nalabbaga a kumander ken mannakigubat kadagiti pangmilitar nga artikulo ni Pangulo Mao Zedong tapno mapagadalan ken maaramat a reperensya. Naanep a pagadalan ti Dagiti Partikular a Kagagalad ti Gubat ti Umili Tayo ni Amado Guerrero kasta met ti dadduma pay nga artikulo ti Komite Sentral, maaddaan ti nalawlawag a panang-agsep nu kasano a tukad-tukad a dumur-as ti naunday a gubat ti umili. Pagadalan ti maudi nga artikulo ni Ka Joma a “Saan a maatiw ti demokratiko a rebolusyon ti umili” ken nairut nga agsepen dagiti makagapu nu apay a saan a maatiw ti New People’s Army.

Agisayangkat ti kampanya iti ideolohiya ken kultura tapno ad-adda pay a tenneben ti determinasyon dagiti Nalabbaga a mannakigubat nga agisayangkat ti rebolusyonaryo nga armado a dangadang ken paunegen ti napudno a dedikasyon da a pagserbian ti umili. Agisayangkat kadagiti parangal tapno lagipen dagiti banwar ken martir ti rebolusyon a Pilipino nga agserserbi a pagwadan a rumbeng a tuladen. Ibunannag ken ilaksid dagiti traydor ken mabaybayadan a nangisagmak iti umili ken ti rebolusyon.

Agisayangkat ti sustenido a kampanya ti pang-ideolohiya a panagmuli-iti-bagi iti intar dagiti Nalabbaga a kumander ken mannakigubat ti NPA. Iyaramid ti regular a panagdillaw ken panagdillaw-iti-bagi ken ebalwasyon. Ingato ti tukad ti disiplina a militar ken kabaelan dagiti Nalabbaga a mannakigubat babaen ti tuloy-tuloy a panangrepaso iti basaran nga oryentasyon militar ken dagiti patakaran, pagsasanay, ken regular nga ehersisyo a pisikal. Regular nga agiyaramid kadagiti panag-ensayo tapno ingato ti kabaelan dagiti yunit nga agtignay a sangsangkamaysa.
Ingato ti pangpulitika a kamulatan dagiti Nalabbaga a mannakigubat babaen ti regular a pangpulitika nga edukasyon kanaig iti nababara nga isyu ken iti kabuklan a nailyan ken internasyunal a sitwasyon. Tenneben ti pangpulitika ken teknikal a kabaelan da babaen kadagiti pagsasanay kas ti panagsukisok iti gimong, panagsarita iti publiko, panagsurat ken dadduma pay.

Agisayangkat ti kampanya a rekoberi wenno balbaliw a panagpatignay, panagpalawa ken konsolidasyon iti base a masa nga addaan panggep nga agibangon ti pigsa’t-kumpanya a larangan gerilya. Ituloy a balbaliw nga agpakat ken balbaliw nga agsanay dagiti yunit ti NPA umannurot kadagiti rekisito ti panagisayangkat ti nasaknap ken nairteng a pannakigubat a gerilya basar iti lumawlawa ken umun-uneg a base a masa. Ituloy nga itakder ken patibkeren dagiti platun ti NPA kas basaran a yunit, a mangpatpatalinaed ti sentro de grabidad para iti kumand ken komunikasyon, pleksible nga agpakpakat ken agwarwaras dagiti iskwad ken tim daytoy para iti gawaing masa ken dagiti taktikal nga opensiba a kabaelan ti bassit a yunit, agkonkonsentra para iti konsolidasyon, panagsanay ken dagiti dakdakkel a taktikal nga opensiba ken umak-akar tapno labanan ti panagkubkob ti kabusor ken tapno agpalawa.

Agisayangkat ti nareregta a kampanya tapno agrekrut kadagiti Nalabbaga a mannakigubat manipud kadagiti lokal a komite ti Partido ken organisasyon masa dagiti mannalon, nangruna manipud iti intar dagiti kabataan nga aktibista nga aktibo a nakipaset kadagiti dangadang ti masa iti kaaw-awayan. Dagiti komite ti Partido ken organisasyon ti masa kadagiti syudad ken sentro ti ili ket kasapulan nga aktibo nga agpropaganda ken agisayangkat kadagiti kampanya tapno agrekrut kadagiti Nalabbaga a mannakigubat manipud kadagiti mangmangged ken petiburges nga intelektwal ken dadduma pay a sektor. Dagiti unyon ken organisasyon ti masa ket nasken nga agplano a regular nga agipatulod ti babassit a tim para iti eksposyur wenno panagideploy kadagiti pwersa iti NPA.

Agisayangkat kadagiti pulitiko-militar a panagsanay tapno agpataud kadagiti baro nga upisyal nga addaan kabaelan a mangidaulo kadagiti tim, iskwad ken platun ti NPA iti gawaing masa ken kombat.

Iyaramid ti panagsukisok iti gimong ken panagamiris iti dasig iti saklaw dagiti ili ken prubinsya, linya dagiti mulmula wenno industriya, tapno tuduen dagiti kadagusan nga isyu ken sosyo-ekonomiko ken pangpulitika a parikut ti masa. Kadagitoy a basaran, kasapulan nga agitakder, balbaliw nga agpatignay wenno agpalawa tayo kadagiti rebolusyonaryo nga organisasyon masa dagiti mannalon, kabataan, babbai, dagiti ubbing ken mangmangged iti kultura. Nasken a liklikan tayo ti mekanikal “balbaliw a panagrugi manipud iti awan” nga addang-addang a panag-organisa a saan nga ikunsidera ti rebolusyonaryo a pakasaritaan ti umili kadagiti larangan gerilya wenno base nga erya. Rumbeng a saan a mabannog nga agisayangkat ti propaganda ken edukasyon tapno konsolidaen ti masa ken ingato ti militansya da. Agibangon, balbaliw nga agibangon wenno balbaliw a patignayen dagiti organo ti bileg iti pulitika kadagiti barangay, inter-barangay wenno iti tukad ili.

Agisayangkat kadagiti kampanya ken dangadang ti masa tapno patignayen ti kadakkelan a bilang dagiti mannalon laban iti pyudal ken malapyudal ken dadduma pay a porma ti panangidadanes. Iyabante ti dangadang ti masa a mannalon para iti kadawatan nga ibaba ti abang ti daga, waswasen ti usura, maaddaan ti patas a presyo ti panaggatang iti pang-agrikultura a produkto da ken dadduma pay. Patignayen ti masa laban iti panagkamkam ti daga ken dagiti operasyon iti minas ken dadduma pay a dadakkel a negosyo a mangdaddadael wenno mangsabsabidong iti law-ang. Kasapulan a dagus nga agbukel ti plano dagiti organo ti bileg iti pulitika, lokal a sangay ti Partido, dagiti organisasyon ti masa ken dagiti yunit ti NPA tapno tulungan a makaannatop ti umili kadagiti didigra a pangklima, kabilang ti panagisimpa kadagiti pagtatalonan, sistema iti padanum, panagsapul ken panangisalbar ken panangala ken panangipunpon kadagiti natay.

Agisayangkat kadagiti anti-pasista a kampanya ken dangadang. Ibunannag ti kumarkaro a panagabuso, kinadangkes ken krimen nga inaramid dagiti yunit ti AFP ken dagiti soldado daytoy, kabilang dagiti panaglabsing iti demokratiko a karbengan ken internasyunal a makatao a linteg. Ibunannag ken babalawen ti amin a kaso ti pammutbuteng, Red-tagging, arbitraryo ken labsing-iti-linteg a panagibalud, panagdukot, tortyur, ekstra-hudisyal a pammapatay ken masaker. Ibunannag dagiti kaso ti panagbomba iti ere, istraping ken panagkanyon a mangipegpeggad kadagiti sibilyan a biag ken sanikua a labsing iti internasyunal a makatao a linteg.

Rumbeng nga aktibo nga agpropaganda ken agkontra-propaganda dagiti kumand ti NPA, agingga iti tukad ti prubinsya ken larangan, babaen kadagiti tapagsarita da wenno upisyal iti impormasyon. Nasken nga aramaten da amin a pamuspusan tapno aktibo a riingen ti umili a labanan dagiti mangidadanes a patakaran ken programa ti panagkamkam iti pagbiagan da ken mangituntunda kadakuada iti nalabes a panagsagaba. Kasapulan nga aktibo nga irakurak da ti saywar nga inuulbod ti kabusor ken disimpormasyon nga ipaspasaknap da iti masa.

Rumbeng nga aktibo ken napinget nga itakder dagiti lokal a sangay ken komiteng seksyon ti Partido dagiti yunit ti milisyang bayan, kagiddan dagiti yunit ti bukod-a- depensa dagiti organisasyon ti masa. Iti kaanoman, kasapulan a talmegan tayo, iti teorya ken praktika, ti napateg a papel dagiti yunit milisya ti NPA iti panangisayangkat iti gubat ti umili. Nasken a palubosan tayo ti inisyatiba a militar dagiti yunit ti bukod-a-depensa ti umili babaen ti panagsanay ken panangallukoy kadakuada nga aramaten ti amin a posible a porma ti armado a panaglaban iti kabusor. Ti milisyang bayan ket napateg a katimbang dagiti pultaym a horisontal a yunit ti NPA. Palpalapaden da ti saklaw ti gubat ti umili tapno iduron ti kabusor a bennaten ti pwersa daytoy ken iparang ti nakakapsut a paset da.

Agisayangkat kadagiti taktikal nga opensiba segun iti kabaelan dagiti tim, iskwad ken platun ti NPA. Takwaten ken puntaan ti nakakapsut a paset ti kabusor, kabilang dagiti armado a tropa daytoy a sumaksakop kadagiti barangay iti kaaw-awayan, dagiti agrekrekorida, agbanbantay iti tsekpoynt, agiyar-aramid kadagiti operasyon a pangkombat ken dadduma pay. Planuen ti panagsamsam iti armas ti kabusor tapno maarmasan dagiti baro a rekrut. Agisayangkat ti ginasut a taktikal nga opensiba nga isaysayangkat ti babassit a yunit tapno makasamsam ti armas.

Nairut nga agtungpal kadagiti patakaran a nakadisenyo tapno siguraduen ti panaglimed ken seguridad dagiti gerilya a kampo ken panagmaniobra. Alerto nga agbantay laban iti amin a gandat ti kabusor nga agiserrek ti elektroniko a tracker kas kadagiti GPS transmitter, babaen kadagiti linya iti suplay ken dadduma pay a pamuspusan. Tuduen ken sungbatan ti amin a panaglabsing iti patakaran iti seguridad a mangisagsagmak iti gerilya a panaglimed.

Tasaen ti naurnong nga impormasyon a paniktik ti kabusor ken pagbalinen dagitoy nga awan serserbi na. Dupraken ti network ti intelidyens ti kabusor ken itakder ti lokal nga iket-paniktik ti NPA ken dagiti yunit milisya. Naan-anay nga ibunannag ken ilaksid dagiti kontra-rebolusyonaryo nga aramid dagiti mabaybayadan ken traydor ken sungbatan ti kadawatan ti umili a dusaen dagiti aktibo a makikumkumplot iti kabusor kas ahente a militar wenno espiya.

Agisayangkat ti trabaho a pangpulitika iti intar ti kabusor. Rumbeng a sistematiko tayo nga urnongen ti impormasyon iti internal a sitwasyon, dagiti arungaing ken kontradiksyon iti intar dagiti platun, kumpanya, batalyon ken nangatngato nga istruktura iti kumand ti kabusor. Irakurak dagiti panagabuso laban kadagiti rank-and-file a tropa ti militar ken dagiti napilit nga agparamilitar. Ibulgar ti korapsyon iti intar dagiti upisyal iti sistema ti panagpasweldo ken maitantantan panagiruar ti sweldo ken alawans, panangkurakot ti pondo para iti maaw-awagan a “balik-loob,” koleksyon ti kikbak kadagiti lokal a proyekto (nangruna iti sidong ti Support to Barangay Development Programa ti NTF-Elcac) ken dadduma pay. Ibunannag nu kasano nga agtultuloy nga ar-aramaten ti militar ti US ti AFP ken PNP kas proxy ken instrumento iti heyopulitikal a panggep daytoy, nangruna iti panangprobprobokar ti armado a risiris iti imperyalista a kalaban daytoy a China. Agrekrut ti progresibo ken patriyotiko nga upisyal ken tauhan iti Crispin Tagamolila Movement.

Agiyaramid kadagiti regular ken espesyal a kumperensya iti kumand iti tukad ti rehiyon ken nababbaba pay tapno amirisen ti disposisyon ken plano ti kabusor, siguraduen ti usto a distribusyon dagiti pwersa tayo, agbukel kadagiti kabuklan a plano tapno iyabante ti gubat ti umili iti erya ti operasyon, agbukel ti napagmaymaysa a plano ti kampanya a militar, ken siguraduen ti naurnos a koordinasyon.

Papigsaen ti sistema ti kumand iti uneg ti New People’s army, manipud iti Nailyan a Kumand iti Operasyon ken iti Pangrehiyon a Kumand iti Operasyon, ken manipud iti pangrehiyon a kumand iti operasyon agingga iti subrehiyon ken larangan, kadagiti platun, iskwad ken tim daytoy. Ituloy nga agpadur-as, agpakasayaat ken agpapigsa ti maysa a napaspas ken mapangnamnamaan a sistema ti komunikasyon, agpada iti elektronik ken pisikal. Siguraduen nga maaddaan ti nasurok maysa a linya ken sistema ti back-up.

Ituloy nga ipatungpal ken padur-asen dagiti patakaran ken pagannurotan tapno siguraduen ken aywanan ti sensitibo nga impormasyon babaen ti kompartmentalisasyon, panagkoda kadagiti file ken nakasurat a minutas, regulasyon iti panagaramat kadagiti kompyuter, smartphone, selpon ken dadduma pay a ramit elektroniko.
Agtultuloy nga agbalbalin a nadam-eg ti daga para iti panagisayangkat ti rebolusyonaryo nga armado a dangadang iti sidong ti rehimen Marcos, a mangipangpangruna iti interes dagiti agar-ari a dasig ken dagiti gangannaet a bileg iti ekonomya ken heyopulitika, gapu na nga ad-adda a maiparparangarang ti bulok ken korap nga agar-ari a sistema. Maar-aramid daytoy iti pakaperdian ti nalawa a masa ti umili a Pilipino, nu sadinno a ti dakkel a mayorya ket agsagsagaba iti kumarkaro a kundisyon iti panagbiag. Ti sistematiko a panangipawil kadagiti demokratiko a karbengan kadagiti syudad ken naparang a panagari ti militar iti kaaw-awayan a mangpunpuntirya kadagiti mangmangged, mannalon ken dadduma pay a demokratiko a dasig, ket mangidurduron iti umili iti dana ti panagarmas tapno lumaban, salakniban dagiti karbengan ken makidangadang para iti nailyan ken demokratiko a tarigagay da.

Tumadtadem a krisis iti ekonomya ken pulitika ti agar-ari a sistema

Agtultuloy a kumarkaro ti agbugbugsot a malakolonyal ken malapyudal a sistema, iti panangipatungpal ti rehimen US-Marcos kadagiti patakaran a kontra-umili ken kontra-nasyunal a mangpakpakaro iti krisis iti ekonomya, panangpairut ti kapet daytoy iti poder a mangpakpakaro iti krisis iti pulitika, ken palalo a panagpakpakaaso-aso daytoy iti imperyalismo a US nga ad-adda a mangrebrebba iti nailyan a panagwaywayas.

Iti laksid ti pumigpigsa a proteksyunismo ti kangrunaan nga industriyal a kapitalista a bileg, agtultuloy nga iyab-abante ti rehimen Marcos dagiti dati a patakaran a neoliberal a nagresulta iti awan kapada a pannakadadael dagiti lokal a pwersa iti produksyon iti napalabas nga uppat a dekada. Dagitoy a patakaran ket nagnumaran dagiti monopolyo kapitalista a korporasyon ken institusyon ti pinansya ken nangpabaknang kadagiti lokal a dadakkel a burgesya komprador, a nakaperdian ti nalawa a masa ti mangmangged ken dagiti makintengnga a dasig. Pinauneg dagitoy a patakaran ti ekonomya nga atrasado, agraryo ken saan nga industriyalisado ken pinakaro dagitoy ti disempleyo. Ad-adda a nagbalin a managsanggir ti pagilyan iti panag-angkat ken ad-adda a mailumlomlom iti utang.

Agtultuloy a lukluktan ni Marcos ti ekonomya nga uray kabaliktad daytoy ti maidurduron a patakaran a proteksyunista dagiti sentro ti sangalubongan a kapitalismo tapno salakniban ken balbaliw a biagen dagiti lokal nga industriya. Iti daytoy a konteksto, ad-adda a kontra-produktibo dagiti patakaran a neoliberal ken ti panagsanggir ti rehimen iti US. Iluklukat daytoy ti pagilyan iti nakarkaro a panaggundaway ken kadagiti saan a patas a kundisyon iti linnakuan. Ad-adda daytoy a paunegen ti panagpaadipen iti ekonomya ken pakaruen ti sitwasyon ti umili, iti panagbagsak dagiti pagtagilakuan a pang-eksport ti Pilipinas ken ad-adda a desperado a panangguyugoy ti rehimen iti gangannaet a kapital.

Ad-adda a kumarkaro ti panggimong ken pang-ekonomya a panagsagaba ti nalawa a masa ti umili a Pilipino. Uray pay ilemmeng ti upisyal nga estadistika, ad-adda a kumarkaro ti kinaawan panggedan. Ti sweldo ken sapul ket agtaltalinaed a nababa, napeggad ken palalo a kurang tapno giddanan ti tumaytayok a presyo ti taraon, langis, dagiti basaran a pagkasapulan, yutiliti ken serbisyo. Ti panagngina ti inaldaw a gastos iti panagbiag iti sidong ni Marcos ket mangidurduron iti minilyon nga umili iti peligro iti pinansya ken kumarkaro a kinarigat ket panagbisin. Nasurok 20 milyon a pamilya (dumanon iti 80%) ti agrigrigat ken bulnerable ti kasasaad da iti pinansya, kabilang ti minilyon a pamilya a pammarang a maparparwar nga adda iti makintengnga a dasig. Manipud nagtugaw ni Marcos idi 2022, nadoble manipud 3 milyon agturong 7.2 milyon ti kinaadu ti pamilya a nalabes nga agrigrigat ken agbisbisin. Gapu iti kinaawan ti panggedan, nababa a sapul ken kinakurang ti serbisyo iti gimong, tuloy-tuloy a matentennag ti kalidad ti biag ti dakkel a mayorya ti umili a Pilipino.

Awan ti sabali a panpanunoten ti rehimen Marcos nu saan a ti panangilako ti pagilyan iti panaggundaway ti gangannaet a monopolyo kapital. Tapno guyugoyen ti gangannaet a kapital, pinalubosan ni Marcos ti panangpakaro ti panaggundaway kadagiti mangmangged iti panangilansa ti tangdan ken sweldo dagiti mangmangged. Pinalubosan na ti panangidadanes ken panangagaw iti pagbiagan ti mannalon, dagiti katutubo ti komunidad, mangngalap ken dadduma pay nga anakling-et ken ti panangdadael iti law-ang, babaen ti panangited kadagiti gangannaet a monopolyo kapitalista nga empresa ken dagiti kroni na a dadakkel a burgesya komprador ti naan-anay a wayawaya a kamkamen ken minasen ti nalalawa a daga, karayan ken kabaybayan wenno patarayen dagiti plantasyon da, proyekto a real estate, maaw-awagan a proyekto a pang-ekolohiya wenno pangklima, imbakan ti maang-angkat nga LNG manipud iti US ken dadduma pay nga operasyon para iti ganansya.

Nakaro ti panagkamkam ti daga partikular iti Mindanao nu sadinno a makikunkunsabos dagiti warlord iti militar tapno pagtalawen dagiti Moro ken Lumad iti daga da, pabor kadagiti plantasyon iti oil palm, kawayan, kape ken dadduma pay a patpatarayen dagiti korporasyon a multinasyunal. Mapaspasamak daytoy uray kadagiti kano lugar nga addaan awtonomya a rehiyon Bangsamoro, a kayat a kontrolen ni Marcos, uray pay maipeggad ti katulagan iti kapya iti Moro Islamic Liberation Front ken parnuayen ti balbaliw a panagbettak ti armado a panaglaban ti umili a Moro.

Ilanlansa ti rehimen Marcos ti sweldo dagiti mangmangged iti nababbaba iti tukad ti disente a panagbiag (ngem nadoble met ti mait-ited nga alawans kadagiti pasista a soldado). Tapno agbiag, mapupwersa dagiti mangmangged, babassit a propesyunal ken kadawyan nga empleyado nga agbirok ti nayon a trabaho. Minilyon a Pilipino ti awanan trabaho wenno awanan ti regular a pagsapulan. Dandani uppat-iti-lima (78%) ti upisyal a makunkuna nga addaan trabaho, kinapudno na ket partaym, temporaryo wenno kontraktwal wenno impormal a mangmangged. Gapu iti nakaro a krisis iti disempleyo iti Pilipinas, napwersa ti dandani 2.5 milyon a Pilipino a mangged iti ballasiw-taaw idi napalabas a tawen, a nangpadakkel iti bilang dagiti overseas Filipino workers (OFW) iti nasurok 11.5 milyon.

Ti kumarkaro a kasasaad a sosyo-ekonomiko ket mangpatpatadem ti saan a panagpapatas iti gimong iti baet dagiti agar-ari nga oligarko ken ti nalawa a masa ti umili. Iti sidong ni Marcos, ti bilang ti pamilya nga awanan urnong ket immado ti 1.5 milyon agturong 20.1 milyon, bayat a nasurok doble (108%) met ti indakkel ti sapul agturong ₱1.8 trilyon ti tallo a kabaknangan iti Pilipinas—ni Enrique Razon, Manuel Villar ken Ramon Ang. Isuda ken dagiti kasosyo da a gangannaet a kapitalista ti kadakkelan nga agnumnumar kadagiti kontrata ken pabor ti gubyerno. Bayat a makalkaltasan ti buwis da, maik-ikkan ti tax holiday ken dadduma pay nga insentibo iti pinansya, parparigaten met ni Marcos ti umili dagiti padagsen a buwis kadagiti basaran a pagkasapulan—kabilang ti kangatwan a “value added tax” iti rehiyon, excise tax iti diesel ken dadduma pay a produkto a petrolyo a dumakdakkel tunggal ngumatngato ti presyo ken dadduma pay a buwis iti panagkonsumo a kadagsenan para kadagiti nakurapay ken makintengnga a dasig.

Ti badyet ni Marcos ket kontra-produktibo ken padagsen iti umili. Kadakkelan ditoy ket mapmapan iti panagbayad iti utang, kontra-produktibo a gastos iti militar ken grandyoso nga imprastruktura kabilang ti nakanginngina a proyekto a pang-pork barrel. Nakissayan ti kabuklan a badyet a pang-ayuda, ngem dakdakkel met ti napan iti direkta a kontrol dagiti pulitiko para iti kampanya iti eleksyon. Kabayatanna, dakkel ti naikissay iti badyet para iti edukasyon, salun-at ken dadduma pay a serbisyo pangpubliko, karamanen iti agrikultura, idinto nga awanan pondo para iti industriyalisasyon.

Ti ₱1.5 trilyon a depisito iti badyet ti gubyerno a Marcos idi napalabas a tawen ket kabatog ti 5.7% ti kabuklan a lokal a produksyon (gross domestic product wenno GDP)—daytoy kakarwan iti napalabas a 40 tawen, ruar iti dakdakkel a depisito iti kangitingitan ti lockdown idi pandemya. Agtultuloy a tumaytayok ti panagutang iti sidong ni Marcos—addan iti ₱16.3 trilyon daytoy ken manamnama a dumanon iti ₱17.4 trilyon iti gibus ti tawen. Awan makaartap ti panagutang ti rehimen Marcos a dumandanonen iti ₱188.7 bilyon kada bulan, a limmabes iti ₱130.7 bilyon kada bulan a panagutang ni Duterte.

Agtultuloy ti nasaknap a korapsyon iti sidong ti gubyerno a Marcos, manipud kadagiti kikbak kadagiti proyekto ti gubyerno, agingga iti panagaramat ti pangpubliko a pondo (Maharlika Investment Fund) para iti pribado a panagpuonan. Manipud nagtugaw iti poder idi 2022, saan a bumaba iti siyam a kaso ti korapsyon (nga addaan gatad a labes iti ₱200 bilyon) laban kadagiti Marcos ti inbasura dagiti korte. Masubboten dagiti Marcos dagiti sanikua da nga iligal a kinamkam da iti sidong ti Martial Law, kabilang dagiti iggem dagiti kroni da kas kada Lucio Tan ken Ramong Ang (para ken Danding Cojuangco). Innalan dagiti Marcos, dagiti kabagyan ken kroni da ti kontrol kadagiti sindikato ken kartel nga adda iti likod ti importasyon ken ismagling ti bagas ken dadduma pay a produkto.

Tapno siguraduen ti panagari da ken ituloy ti panagkamkam ti kinabaknang, paspaspasan ni Marcos ti konsolidasyon ti bileg iti pulitika tapno siguraduen ti kontrol na labes iti 2028. Gapu ditoy, papaunegen na met ti krisis iti pulitika ti agar-ari a sistema. Panggep na nga ikkaten ti pangta ti pangpulitika a karit dagiti Duterte inton 2028, a kaalyado na idi 2022 tapno siguraduen ti eleksyon babaen ti dekompyuter a panagbilang ti botos, nga idi ket iggem ni Duterte. Tatta nga iggem nan ti sistema ti dekompyuter a panagbilang, plano ni Marcos a manipulaen ti resulta ti umay nga eleksyon a midterm tapno tenglen ti amin a tukad ti gubyerno manipud iti Senado, Kongreso ken dagiti upisyal ti lokal a gubyerno.

Idi Pebrero, kinoordina ni Marcos ti panangisaklang (impeachment) ti Kongreso ken Vice President Sara Duterte. Mano a lawas ti napalabas, inaramat na ti turay tapno ipaaresto ken ipakulong ni Rodrigo Duterte iti International Criminal Court idiay The Hague, tapno malitis iti nasaknap ken sistematiko a pammapatay a mangbukbukel ti krimen laban iti sangkataw-an. Pinakaro ken inngato iti baro a tukad dagitoy nga addang ti krisis iti pulitika ti agar-ari a sistema. Gangandaten dagiti Duterte, a mabigbig nga agar-aramat kadagiti gangannaet a kumpanya nga eksperto iti data analytics (siyensya iti panagamiris iti naata a datos tapno agaramid ti kongklusyon) ken influence strategy, nga agparnuay ti bagyo iti pulitika laban iti rehimen Marcos babaen ti panangpataud ti pangpubliko nga upinyon usar ti sistematiko a disimpormasyon ken pasista a manipulasyon iti social media, panaggundaway iti arungaing ti umili, panagaramat ti taktika iti panagtikaw tapno iyadayo ti imatang kadagiti abuso ken krimen iti sidong ti tiraniko a panagari ni Duterte, ken panangparwar nga isuda ket biktima tapno maala ti simpatya ti publiko. Gangandaten da nga agorganisa kadagiti rali ken manggudwa iti uneg ti militar ken pulis.

Ti panagrimbaw ti susik a Marcos-Duterte ket ad-adda a mangibunbunannag iti kinabulok ti agar-ari a sistema. Ipakpakita daytoy nu kasano a ti agdama nga agar-ari a sistema ket domdominaran ti dua iti kakaruan a korap ken naulpit a reaksyunaryo a bunggoy, agpada a mangibagbagi iti pang-ekonomya nga interes ti dadakkel a burgesya komprador ken dadakkel nga apo’t daga, agpada a burukrata kapitalista, agpada a paspasurot kadagiti gangannaet nga imperyalista a bileg, agpada a kontra-umili ken manangidadanes. Bayat a kumarkaro ti kasasaad ti ekonomya ti Pilipinas, bumasbassit ti tinakaw ken pribilehiyo a paggugudwaan ti agriribal a burukrata kapitalista. Agtaltalinaed ti pangta nga umirteng pay ken naranggas a bumtak ti krisis iti pulitika ti agar-ari a sistema.

Tapno ad-adda nga ikonsolida ken imonopolyo ti bileg iti pulitika, pakpakaruen met ni Marcos ti pulitikal a represyon kadagiti organisasyon ti masa dagiti mangmangged, mannalon, kabataan, babbai ken dadduma pay a demokratiko a sektor. Uming-inget ti panagtiktik ti estado, dagiti panagdukot, tortyur, masaker ken dadduma pay a nakakaro a panaglabsing iti karbengan-tao nga aramid ti reaksyunaryo a militar ken pulis. Kakaruan ti sitwasyon iti rinibo a barangay iti kaaw-awayan nga inmandar ni Marcos nga ipasidong iti linteg militar.

Iti tengnga ti krisis iti ekonomya, sumaksaknap ti pannakariribuk ti nalawa a masa ti umili ken natibker nga umab-abante ti organisado a panaglaban da. Dagiti mangmangged a nauman iti mano a tawen a panangbarat ti barya-barya nga umento ket dumawdawat ti madagdagus a signipikante a panagngato iti sweldo tapno makagiddan iti panagngato ti gastos iti panagbiag. Pumigpigsa met daytoy a panawagan kadagiti empleyado ti gubyerno ken kadagiti manursuro a pangpubliko ken iti pribado, a dumawdawat ti nainkalintegan a sweldo. Ti pukkaw para iti panangipangato ti sweldo ken nasaysayaat a kundisyon iti tegged ket sigurado a mangpasged iti ad-adu a welga ken dadduma pay a langa ti dangadang ti masa.

Pumigpigsa ti pukkaw laban iti awan-ressat nga importasyon ti bagas, uray ti ikan ken dadduma pay a produkto a pang-agrikultura a mangpatpatay iti lokal a produksyon. Lumablaban dagiti mannalon ken dagiti komunidad ti katutubo a minorya laban kadagiti minasan ken dadduma pay a proyekto a mangdaddadael iti law-ang ken mangag-agaw ti daga da. Ti nadumaduma sektor, kabilang dagiti drayber ken opereytor ti jeep, mangngalap ken dadduma pay ket tumaktakder met para iti karbengan da ken sipipigsa a lablabanan da dagiti programa nga umag-agaw iti pagbiagan da. Ilablaban dagiti estudyante ti dakdakkel a subsidyo ti estado para iti edukasyon ken konkontraen da ti panagngato ti matrikula ken panawagan para iti trabaho iti tengnga ti krisis iti disempleyo.

Agtultuloy a dumakdakkel ti panaglaban iti interbensyon a militar ti US iti Pilipinas. Pumigpigsa ti panagsupyat iti panangited ti US ti ayuda a militar iti represibo a rehimen, laban kadagiti base ken pasilidad militar ti US iti pagilyan a maar-aramat para kadagiti gangannaet nga operasyon militar, laban iti panagserrek, panaglabas ken panagsanglad dagiti US carrier strike group nga agaw-awit ti armas nukleyar, laban iti panagaramt iti militar ti Pilipinas iti panangprobokar ti armado a tensyon iti China, ken iti panangguyod iti pagilyan iti umad-adalem a peligro ti inter-imperyalista a gera.

Makidangdangadang ti nalawa a demokratiko a sektor laban iti kumarkaro a langa ti panagabuso ken panaglabsing iti karbengan-tao nga aramid ti reaksyunaryo a militar ken pulis. Kinablaawan da ti panagusig ken Duterte iti ICC kas gundaway a pagsungbaten isuna iti saan a mabilang a krimen laban iti sangkataw-an iti panangipatungpal iti pammarang a “gera iti droga” na. Kagiddan daytoy, dawdawaten da a pagsungbaten ni Marcos iti adu a pammapatay, panagdukot ken dadduma pay a krimen laban iti uli a lumablaban.

Ti umun-uneg a krisis iti ekonomya ken pulitika ti agar-ari a sistema ket nalawag a mangibunbunannag iti malakolonyal ken malapyudal a sistema ken ti estado a neokolonyal a bulok iti kaunggan na, a ti panagari na ket naigaladan iti nasaknap a korapsyon ken brutal a represyon. Ti kaykaysuna a pamuspusan tapno rebbeken ti kadena ti panangidadanes ken panaggundaway, ken gibusan ti saanen a maibturan a panagrigat ken panagsagaba ti nalawa a masa ti mangmangged, mannalon ken anakling-et iti Pilipinas, ket ti panangibagsak ti imperyalismo a US ken ti naindasigan a diktadura ti dadakkel a burgesya komprador, dadakkel nga apo’t daga ken dagiti burukrata kapitalista.

Awan ti dadduma nga alternatibo ti umili a Pilipino nu saan a ti panangiyabante ti awan-sarday a rebolusyonaryo a dangadang, tapno ibagsak dagiti manangidadanes ken mananggundaway nga agar-ari a dasig ken itakder ti demokratiko a bileg ti umili. Madagdagus, nainkalintegan ken kasapulan la unay a papigsaen ken palawaen ti New People’s Army ken iyabante ti gubat ti umili.

Pakpakarwen ti Trump 2.0 ti krisis ti sangalubongan a sistema a kapitalista

Agsusuwek iti nauneg a riribuk ti kapitalista a lubong iti sango ti saan a marisrisut a kapitalista a krisis ti sobra a produksyon ken iti sango ti garapalan a duron ti gubyerno ti US iti sidong ti rehimen Trump 2.0 nga idungpar dagiti imperyalista nga interes daytoy. Ibagbagi ti gubyerno a Trump ti pinakareaksyunaryo ken pinakasobinista nga elemento ti oligarkiya iti pinansya iti US. Lablabusan na ti maskara ti US a “kampyon ti demokrasya” ken iparparang na dagiti patakaran a hegemonista, iti desperado a gandat a baliktaden na ti estratehiko a panagbaba ti imperyo nga Amerikano, ken isubli ti bagbagi na kas kaykaysuna a superpower.

Ipakpakita dagiti datos idi napalabas a tawen a nakasadsad pay laeng iti napaut nga istagnasyon (manipud pay 2008) dagiti kapitalista nga ekonomya, kalpasan nga apagbiit a bimmangon da kalpasan ti pandemya idi 2020. Nagsuwek agturong ti 2.8% idi 2023 ken 2024 ti sangalubongan a panaglangto ti ekonomya, manipud 5.8% iti panawen ti panagbangon kalpasan ti pandemya. Nababbaba daytoy iti abereyds a 3.2% a panaglangto iti napalabas a dekada (2010-2019). Nagtayab ti sangalubongan nga utang iti baro a tukad a $318.4 trilyon idi napalabas a tawen, tallo a daras (328%) a dakdakkel iti gatad ti sangalubongan a produksyon idi 2024. Saan laeng nga imposible a bayadan, imposible met nga iserbisyo daytoy iti mabayag. Agtultuloy a bumunbuntog ti panaglangto ti sangalubongan a linnakuan dagiti produkto, simmadsad iti 2% idi 2024, a nababbaba ngem iti 4.5% idi 2010-2019. Bimmaba iti 8% idi 2024 ti ayus ti gangannaet a direkta a panagpuonan iti intero a lubong. Ginuyod daytoy ti 45% a panagbagsak idiay European Union ken 29% idiay China, iti laksid ti 10% a panaglangto dagiti gangannaet a direkta a panagpuonan iti US a duron ti panagpuonan manipud iti Taiwan ken South Korea kadagiti baro a pabrika ti semikonduktor.

Iti sango ti napaut a kapitalista nga istagnasyon, mas agresibo nga idurduron ti gubyerno ni Trump ti naiirut ken desperado nga addang iti ekonomya ken linnakuan iti panggep a biagen ti lokal a produksyon. Iti kastoy ket rebrebbaen na ti sistema a multilateral a tinulungan na nga itakder iti panawen ti globalisasyon a neoliberal. Kinapudno na, idi 2008 pay a nagbaw-ing ti direksyon iti sidong ti gubyerno ni Obama, idi rinugyan ti US ti panangited kadagiti insentibo tapno isubli dagiti gangannaet a panagpuonan ti US. Pinagbalin daytoy a saan nga epektibo ti sistema ti World Trade Organization iti panangurnos kadagiti susik, ken inikkatan ti bileg dagiti katulagan daytoy. Iti uneg ti dandani maysa a dekada, nasaknap nga us-usaren ti US dagiti nangatngato a taripa, dagiti restriksyon iti panag-eksport, dagiti restriksyon iti teknolohiya ken nair-irut a regulasyon dagiti panagpuonan laban iti China.

Ti agresibo a panagaramat ti gubyerno a Trump kadagitoy a patakaran iti linnakuan ken ekonomya laban iti sabali a pagilyan ket mangipangpangato iti tukad ti antagonismo uray kadagiti tradisyunal nga imperyalista a kaalyado daytoy. Malaksid iti China, pinatawan wenno pinangtaan a patawan na ti nangatngato a taripa ti maysa a talaksan dagiti tagilako manipud iti Canada, Mexico, European Union ken dadduma pay a pagilyan, nga addaan deklarado a panggep a salakniban dagiti kumpanya nga Amerikano ken paregtaen ti lokal a produksyon. Nagpangta ni Trump a repasuen ti alyansa a militar ti US iti Japan, a sinungbatan met ti Japan ti kari a papigsaen ti panag-angkat ti liquefied petroleum gas manipud iti US, ken nayunan ti panagpuonan iti US aginga $1 trilyon. Nupay kasta, saan a kasdiay a paspasurot dagiti dadduma a kaalyado ti US. Inyanunsyo ti Canada ken Mexico ti plano daytoy nga agipatungpal ti kontra-taripa kadagiti tagilako nga ang-angkaten manipud iti US. Nagpangta met ti gubyerno ti France a sumungbat kadagiti taripa ti US.

Iti sabali a bangir, nagbuwelta ti China, ken inngato daytoy ti taripa na ken inparit na nga agimport ti soybeans ken troso manipud iti US ken nagdeklara a nakasagana daytoy a sumaranget “iti anyaman a langa ti gubat” iti US. Ibangbangon ken palpalawaen daytoy dagiti estratehiko nga alyansa a diplomatiko, pang-ekonomya ken pangmilitar, kas ti BRICS, G-77, Shanghai Cooperation Organization, Forum on China-African Cooperation, RCEP ken dadduma pay.

Nayon iti panagipataw wenno panagpangta nga agipataw kadagiti nayon a taripa, indeklara ni Trump ti kinasagana na nga agaramat ti pwersa a militar tapno maala ti kontrol iti Panama Canal (nu sadinno a dumaldalan ti 40% ti kargamento a tagilako ti US), Greenland (maysa nga awtonomo a rehiyon iti Denmark nga addaan dadakkel a deposito kadagiti rare-earth mineral, ken estratehiko a masarakan iti rehiyon ti Arctic), ken ti Gaza Strip a gagem ni Trump nga aramiden a “sanikua” ti US nga agdadata a panangrabngis iti karbengan ti umili a Palestino.

Kasla sursuroten tatta ni Trump ti patakaran ti pannakiareglo iti Russia kanaig ti Ukraine, kalpasan a makita na nga iti laksid ti dadakkel a perdi ti Russia iti gubat, ket napaay ti US iti nadumaduma a panggep daytoy a pakapsuten ti estratehiko a kabaelan ti Russia a makigubat, dadaelen ti ekonomya, mangsugsog ti panagrukwas laban iti rehimen wenno gudwa-gudwaen ti Russia. Daytoy a panagbalbaliw iti patakaran ket mangibunbunannag iti kinapudno a ti susik iti Ukraine, manipud sipud ket maysa a proxy war iti baet ti US ken Russia, uray pay adda dagiti usapin iti teritoryo iti baet ti Ukraine ken Russia. Idurduron ti gubyerno a Trump ti Ukraine nga umanamong iti ceasefire iti Russia, malaksid iti panagpirma iti maysa a katulagan a mangted iti US ti dakkel a paset dagiti deposito ti rare-earth mineral, a kunkuna daytoy a kas bayad ti mapatta-patta a $70 bilyon a tulong militar ti US manipud idi 2022.

Kaniwas iti patakaran ti pannakiareglo iti Russia, agtultuloy a pakpakarwen ti gubyerno a Trump ti susik daytoy iti China ken North Korea, ken pagtaltalinaeden daytoy a silulukat ti posibilidad ti panagbettak ti armado a rinnupak. Itultuloy ti militar ti US a padakkelen dagiti pwersa na iti sidong ti maaw-awagan nga estratehiya nga Indo-Pacific. Itay laeng nabiit, nagiyaramid daytoy kadagiti dadakkel a war games iti South Korea, ken naituding a mangiyaramid ti tuloy-tuloy a war games iti uneg ken aglawlaw ti South China Sea, Pilipinas, Taiwan ken Japan nga addaan estratehiko a panggep a kubkoben ti China. Itay laeng nabiit, liniwayan ti US ti patakaran daytoy a “saan a panangsuporta iti wayawaya ti Taiwan,” a maysa nga agdadata a probokasyon iti China.

Pappapigsaen met ti gubyerno ni Trump ti imperyalista a pannakibiang idiay Middle East, ad-adda a pinapigsa ti panagsuporta iti agresyon ken okupasyon ti Zionista nga estado ti Israel iti Gaza. Inmandar daytoy itay nabiit ti panangipatulod ti agbalor $3 bilyon a misayl ken bomba iti Israel ken sinuportaran daytoy ti balbaliw a panagatake iti Gaza a nangpapatay iti ginasut a Palestino ken nangleppas iti dua a bulan a panagsardeng ti putokan. Kas suporta iti Israel, inmandar met ni Trump dagiti panagatake a misayl laban kadagiti pwersa a Houthi iti Yemen, nga aktibo a sumupsuporta iti dangadang para iti wayawa ti Palestino. Iti pannakikumplot iti Israel, Turkey ken dadduma pay a pagilyan iti NATO, patpatibkeren met ti gubyerno a Trump ti pusisyon daytoy iti baro a gubyerno ti Syria, tapno talmegan ti militar a panangliplipit iti Iran, umannurot iti estratehiko a panggep a kontrolen dagiti kinabaknang ti langis iti Middle East.

Adda ni Trump iti tuktok ti napaspas a kumarkaro a krisis iti pulitika iti US, nu sadinno a ti agdama a mangidadaulo nga oligarkiya ket agbawbaw-ing iti agdadata a panangitandudo iti pasista nga ideolohiya. Pinalikmutan na ti bagbagi na kadagiti patiray-ok ken para-palakpak kas upisyal iti gabinete na. Mangidadaulo isuna babaen kadagiti mandato ken mangsalsalungasing iti mandar ti ukom, iti maysa a napigsa a duron agturong iti awtoritaryanismo. Tapno gudwaen ti dasig a mangmangged, sugsugsogan ni Trump ken dagiti upisyal na ti diskriminasyon kadagiti minorya, dagiti imigrante ken komunidad ti LGBT ken agipaspasaknap kadagiti pammati nga agdadata a saan a siyentipiko. Ginasut a ribo nga empleyado ti gubyerno ti US ti basta laengen naikkat gapu kano iti panagsalimetmet. Inmandar na ti panangbekkel kadagiti demokratiko a karbengan, partikular, laban iti karbengan nga agtitipon ken iti nawaya a panagiyebkas kadagiti unibersidad. Nagaramat isuna ti nauulpit ken awanan proseso a deportasyon ti rinibo nga imigrante.

Iti panangidungpar kadagiti kontra-demokratiko ken kontra-mangmangged a patakaran na, ginangtan ti rehimen a Trump ti nasaknap a tignay protesta idiay US a sigurado a lumawa ken bumtak iti dadakkel a demonstrasyon iti intero a pagilyan kadagiti umay a bulan. Dagiti protesta laban iti imperyalismo a US ket sigurado a tumaud met iti intero a lubong kas sungbat kadagiti imperyalista a patakaran iti linnakuan ken ekonomya nga agresibo nga idurduron ti rehimen Trump, ken iti awan-sarday a panangsugsugsog na ti gera. Sigurado a tumaud ken lumawa ti ad-adu pay a rebolusyonaryo nga armado a tignay gapu ta ti umili nga idadanes ti imperyalismo ken pasismo ket mapapaidaman ti sabali a pamuspusan tapno ilaban ti nailyan ken panggimong a wayawaya.

Iyabante ti rebolusyonaryo a panaglaban, kangrunaan babaen ti armado a dangadang

Tinalantan tayo bassit dagiti paspasamak iti uneg ken ruar ti pagilyan itay nabiit tapno ipakita ti obhetibo a kundisyon a mangidurduron iti nalawa a masa ti umili a Pilipino a mangiyabante ti rebolusyonaryo a dangadang tapno ilaban ken gun-oden ti tarigagay da para iti nailyan a wayawaya, demokrasya ken sosyalismo. Ti dangadang ti umili a Pilipino ket nairut a nakasilpo iti rebolusyonaryo a dangadang ti amin a pagilyan a maidadanes ken magungudawayan iti intero a lubong.

Isaysayangkat ti umili a Pilipino ti amin a langa ti dangadang tapno iyabante ti nailyan-demokratiko a panggep. Agiyab-abante da kadagiti ligal a langa ti dangadang agpada iti kasyudadan ken kaaw-awayan nga aduan a mangririing, mangor-organisa ken mangpatpatignay iti masa laban kadagiti mangidadanes kadakuada. Ibangbangon da dagiti unyon ken organisasyon masa da, makidangdangadang iti negosasyon kadagiti kapitalista ken burukrata nga upisyal ti estado, agwelwelga kadagiti pabrika, agiyar-aramid ti boykot, walk-out, dagiti pang-masa a demonstrasyon ken dadduma a kolektibo a tignay. Makipaspaset da iti reaksyunaryo nga eleksyon tapno itandudo ti nailyan-demokratiko a panggep ken ikampanya dagiti progresibo a kandidato ken partido. Babaen ti National Democratic Front, sumsumrek da iti negosasyan iti kapya iti reaksyunaryo a gubyerno, tapno itandudo ti tarigagay ti umili para iti nainkalintegan ken mataginayon a kapya.

Ti armado a dangadang ti kangrunaan a langa ti dangadang iti panangiyabante ti demokratiko a rebolusyon ti umili iti Pilipinas. Iti panangiyabante ti armado a dangadang tayo a makalaban tapno ibagsak ti imperyalismo a US ken dagiti agar-ari a dasig ti dadakkel a burgesya komprador ken dadakkel nga apo’t daga. Tungtungpalen daytoy ti sentral a rebbengen ti rebolusyon a Pilipino a panangduprak iti armado nga estado nga aso-aso ti imperyalismo a US ken dagiti agar-ari a dasig, ken panangitakder ti demokratiko nga estado ng ti umili iti sidong ti panangidaulo ti proletaryado. Babaen laeng ti demokratiko nga estado ti umili a maipatungpal ti rebolusyonayo a transpormasyon ti gimong.

Iti okasyon tatta nga aldaw ti maika- ika-56 nga anibersaryo ti New People’s Army, agpanpanawagan kami iti amin a komite, kadre ken dagiti kameng ti Partido, a kanayon nga ikkan atensyon ti naindaklan a rebbengen nga iyabante ti rebolusyonaryo nga armado a dangadang ken panangpapigsa iti NPA iti panangtungpal ti rebbengen yo iti nadumaduma a tay-ak ti dangadang.

Aw-awagan mi ti amin a Nalabbaga a mannakigubat ti New People’s Army nga ad-adda a papigsaen ti determinasyon ken ingato ti kabaelan a tungpalen dagiti rebbengen ti tignay panagilinteg. Masigurado mi a magun-od ti NPA ti dagiti dakdakkel a balligi iti balbaliw a panangparegta ken panangpalawa ti base a masa ken ti panagabante ti pannakigubat a gerilya laban iti pasista a rehimen US-Marcos.

Agbiag ti saan a magungon a rebolusyonaryo a pakinakem dagiti Nalabbaga a mannakigubat ti New People’s Army!

Papigsaen ken palawaen ti NPA!

Paayen ti brutal ken terorista a gera a represyon ti rehimen US-Marcos!

Palawaen ken pairtengen ti pannakigubat a gerilya!

Iyabante ti rebolusyonaryo nga armado a dangadang!

Agbiag ti New People’s Army!

Agbiag ti Communist Party of the Philippines!

Agbiag ti proletaryo ken umili a Pilipino!