Naghahatag pasidungog an Komite Sentral han Partido Komunista ng Pilipinas (PKP) ha Bagong Hukbong Bayan ha okasyon han ika-56 nga anibersaryo hini. Iginhahatag namon an pinakamadig-on nga pagsaludo ha kaisog ngan kamabayanihon han mga Pula nga mangaraway ngan kumander ha padayon nga pagpupursige ha pagpasulong han gerra han katawhan agud ipakigbisog an hingyap han katawhan Pilipino para ha nasyunal nga katalwasan ngan tinuod nga demokrasya.

Ginbabati namon an BHB ha ngatanan nga mga ginsakripisyuhan hini nga makab-ot ha masobra lima ngan tunga kadekada han pagpapasulong han gerra han katawhan. Ginpapasidunggan kamo han katawhan Pilipino komo ira mga pinakahinigugma nga mga mangaraway. Waray kahadlok kamo nga naato para ha katawhan agud tapuson an yugo han imperyalismo, pyudalismo ngan burukrata kapitalismo, ngan naglalansar hin mapintas nga pakig-away kontra ha rehimen US-Marcos.

Hini nga importante nga adlaw, an pamunuan ngan bug-os nga kaapihan han Partido naghahatag pasidungog ha ngatanan nga martir nga mga bayani han BHB nga naghalad han pinakahitaas nga sakripisyo ha pagpili nga pagserbihan an katawhan agud atuhan an mga nananalumpigos ngan naniniyupi ha ira. Mga martir hira han katawhan, nga kaangayan subaron an kinabuhi hin waray pagkamakaiya nga dedikasyon ha rebolusyunaryo nga kawsa.

Gindadayaw namon kamo ha iyo madig-on nga pag-undong ha pamumuno han Partido ngan aktibo nga pagpasulong han kagiusan nga pagtutul-id tikang hadton Disyembre 2023. Ha pagin kritikal ha kalugaringon ngan pagtutul-id ha naglabay nga mga kasaypanan ngan kaluyahan, hinay-hinay niyo nga utro nga nababawi an iyo kusog basar ha hilarum ngan hiluag nga suporta han masa, ngan ha paglalansar hin ginerilya nga pakiggerra subay ha iyo kapas.

Damo an kinahanglan pa nga himuon agud mabawi an nawara nga base, utro nga parayhakon an hukbo ngan an base panmasa, ngan utro nga kab-uton an daan nga lebel han kusog. Kinahanglan naton ungbawan an damo nga ulang ngan kakurian. Desperado an kaaway ha karuyagon nga rumkon an Bagong Hukbong Bayan, agud mawarayan hin tagdepensa an katawhan ngan mawarayan hin pwersa nga makikigbisog para ha ira kawsa. Naglalansar an kaaway hin madarahug ngan waray wantas nga gerra, kundi ha butnga hini, nagmamanilampuson la ini nga iduso an katawhan nga umato hin may labaw nga kusog ngan determinasyon.

Kinahanglan hul-os nga manalinguha an bug-os nga Partido agud pakusgon an Bagong Hukbong Bayan ngan ipasulong an rebolusyunaryo nga armado nga pakig-away, nga prinsipal nga armas han mga Pilipino, diri la ha pagdepensa ha ira kalugaringon kontra ha mga pasista nga nananalumpigos ngan naniniyupi ha ira, kundi agud kab-uton an ira hingyap para ha nasyunal ngan pankatilingban nga katalwasan. An buruhaton han pagpapakusog ha BHB an presente nga pinakanangunguna nga buruhaton han Partido, ha kabug-usan ngan kinahanglan sugbungon han ngatanan nga kadre ngan komite, kaupod an nakabase ha mga syudad, sugad liwat ha gawas han nasud. Rekisito an pagpatuman hini nga buruhaton ha pagpasulong han ngatanan nga iba pa nga buruhaton. Kinahanglan magserbe an ngatanan nga iba pa nga mga buruhaton ha katuyuanan han pagpasulong han rebolusyunaryo nga armado nga pakig-away.

Sitwasyon ngan mga buruhaton han Bagong Hukbong Bayan

An kagiusan nga pagtutul-id nga iginlalansar ha presente han Partido padayon nga nagamot, nasamwak ngan nagbubunga hin positibo nga mga resulta, partikular ha natad han rebolusyunaryo nga armado nga pakig-away. Ha masobra la usa katuig han iginlansar an kagiusan nga pagtutul-id, nagkamayda kita hin pursigido nga mga panalinguha ha konsolidasyon ngan utro nga pagparayhak ha BHB. Ha ilarum han kagiusan nga pagtutul-id, marayhak nga igin-uundong han Partido ha ranggo han BHB an usa nga pansakob nga kampanya han pag-aram ngan pagrebyu ha Marxismo-Leninismo-Maoismo, ha balayan han mga prinsipyo han Partido ngan estratehiya ngan taktika ha paglalansar han panmaihaan nga gerra han katawhan.

Agud ipasulong an kagiusan nga pagtutul-id, naglansar hin mga kumperensya an BHB ha lebel han rehiyon ngan iba pa nga lebel han kumand agud sumahon an mga eksperyensya agud tudlukon ngan atubangon an mga kasaypanan, kaluyahan ngan mga limitasyon ha naglabay. Ginpadig-on, ginpahilwag ngan ginpahilarum hini an yawe nga mga kritikal nga obserbasyon han Komite Sentral han patikangan an kagiusan nga pagtutul-id hadton Disyembre 2023. Ginpadig-on an mga resolusyon ha katuyuanan nga pakusgon an BHB ngan komprehensibo nga iduso tipaunhan an gerra han katawhan. Labaw nga determinado an mga Pula nga mangaraway han BHB nga umato para ha katawhan kontra ha brutal nga pangatake han pasista ngan matalumpiguson nga rehimen US-Marcos.

Pursigido nga ginsususnan ngan iginsasalikway han Partido ngan BHB an naungbaw nga Tuo nga oportunismo nga tendensiya nga nahingadto ha mga kasaypanan, kaluyahan ngan pagkukulang, ngan nga nagresulta ha pagbiaw ngan pag-atras. Prinisipal nga aada ini ha porma han konserbatismo ngan pagbul-iw ha ginerilya nga inisyatiba, ngaduha ha buruhaton militar ngan pulitika, nga ngaduha nagpaluya ha BHB ngan ha base panmasa hini.

Nagresulta ini ha mga tendensiya han pagpahaligot-ha-kalugaringon, kapareho han tag-iha nga pagbabase ha bukid han mga pormasyon han BHB ngan kapakyasan nga pahiluagon an erya han operasyon han mga yunit han BHB lahos ha ira “paborito” nga mga base nga erya. Iginbunga hini an pagluya han kapas han BHB nga makaglansar han sustenido ngan hiluagan nga pankatilingban nga imbestigasyon, propaganda ngan pag-organisa ha ranggo han dako nga ihap han masa nga parag-uma. May pira nga yunit han BHB nga nagtikang nga sumarig ha mga alyado nga riko nga parag-uma agud pamunuan an mga pakigbisog han masa, imbes nga bug-uson an organisado nga kusog, prinsipal han mga kablas nga parag-uma ngan trabahador ha uma, kabakyang an ubos nga namumutngaan nga parag-uma ngan butnga han namumutngaan nga parag-uma. Mayda liwat tendensiya nga sumarig nala ha paghahatag hin mga sosyo-ekonomiko o pankomunidad nga proyekto, nga naghihirayo ha masa ha panginahanglan nga bug-uson an ira mga organisasyon masa para ha paglalansar hin makaklase nga pakigbisog agud atuhan an pyudal ngan bagapyudal nga mga porma han pananalumpigos ngan paniniyupi. Nagkamayda hin panmaihaan nga pagpiliw ha sistematiko nga paningkamot nga bug-uson an mga yunit milisya ngan buhion an ira inisyatiba ha ginerilya nga pakiggerra. Komo resulta hini ngatanan, nakit-an naton an paghaligot ngan paghamabaw han base panmasa.

Diri mahugot nga nakatinan an yawe nga buruhaton han paglansar han agraryo nga rebolusyon. Waray mahilansar an mga kampanya ha reporma ha tuna nga makakapagios ha pinakadamo nga parag-uma, ha lebel han kusog ngan lupgop nga katugbang han natikagrabe ngan dugang nga nasamwak nga mga porma han pyudal ngan bagapyudal nga paniniyupi, kumbersyon han tuna, ngan panlupot ha pakabuhi han milyun-milyon nga parag-uma, trabahador ha uma ngan parupangisda ha kabaryuhan. Waray mahikonsolida ngan maisa an naglabay nga mga kadaugan ha paglansar han reporma ha tuna. Diri sustenido nga nahimo an pagpakusog han mga lokal nga sanga han Partido ngan organisasyon masa.

Nakit-an naton kun tiunan-o ini nga mga kaluyahan ngan kakulangan ha pagbug-os ngan pagpahiluag han base panmasa nagpaluya ha kapas ngan kumpyansa han BHB nga maglansar hin mga taktikal nga opensiba nga may prinsipal nga katuyuanan nga paru-parte nga rumkon an armado nga pwersa han kaaway, ngan agawon an ira mga armas. Lugod, mayda tendensiya nga mas ginpaburan an sasrang nga harasment ngan iba pa nga atritibo nga taktikal nga opensiba, nga diri sistematiko nga nagruruba ha kusog han kaaway, o nakakabulig ha dirudiretso nga pagtirok han kusog han BHB. Mas ginpagrabe pa ini han tendensiya nga magin pasibo atubangan han panmilitar nga superyoridad han kaaway, nga resulta han haligot ngan usahan-nga-gapil nga pagtan-aw ha balanse han mga pwersa, ngan kapakyasan nga magkamayda hin diyalektikal nga pagtan-aw ha taktikal nga kusog han kaaway ngan ha estratehiko nga kaluyahan hini.

Ginpasamwak liwat han Tuo nga oportunista nga tendensiya an ultra-demokrasya ngan ginpaluya an pansakob nga panmilitar nga disiplina han BHB, ngan pan-ideolohiya nga panindugan han mga Pula nga mangaraway. Nagbunga an ultra-demokrasya han pagpapakasadang, ngan nag-anak han “sibilyanisasyon” ha ranggo han mga Pula nga mangaraway. An mga batakan nga pagsurundon ngan oryentasyon diri mahugot nga ginsusunod ha dalagan han ira matag-adlaw nga aktibidad ha kampo, ha pagmartsa, o ha buruhaton masa o buruhaton militar. Pirme hini ginlalangan an mga maniobra, ngan ginpupugngan an inisyatiba, ngan ha katapusan naulang ha ira kapas nga epektibo nga makig-asdangay ha kaaway. Nakompromiso an ginerilya nga pagsisikreto ha paggasgas han mga linya han suplay, pagmaniobra ha daan nga mga ruta nga aram na han kaaway, ngan pagpiliw ha mga batakan nga palisiya ha paghihirot ha paggamit han mga elektroniko nga higamit ngan radyo. Tungod ha kakulangan ha mahugot nga pagpatuman ha mga palisiya, nagmanilampuson an kaaway ha pira nga higayon nga magpasulod hin mga GPS tracker nga gin-gagamit para ha precision (eksakto) nga mga aerial strike.

Iba pa nga pangilal-an han ultra-demokrasya an sobra nga dispersal han mga yunit, kakulangan ha madig-on nga sistema han kumand ngan kontrol, kapakyasan nga regular nga magreport ngan makigsumpayan ha ira hiruhitaas nga kumand, ngan pagpiliw ha pagpauswag ngan pagpakusog han usa nga madagmit ngan malalauman nga sistema han komunikasyon. Naghagudalan liwat an tuo nga oportunismo ha burukratismo, diin pakyas an mga kumand nga ipatuman an agap nga pamumuno agud mahatagan direksyon o buligan nga atubangon an mga problema o karukayaknon nga ginkakaatubang han uruubos nga mga yunit. Ha pinakagrabe, nagporma an burukratismo ha “eksepsiyonalismo” diin an mga palisiya diri patas nga iginpapatuman ha mga kumander ngan mangaraway, hinungdan para paluyahon an pansakob nga pagkaurusa han pira nga mga yunit han hukbo han katawhan.

Nakit-an liwat naton an mga “Wala” nga oportunista nga tendensiya komo segundaryo nga kahiaraan, kalakip an absoluto o tag-iha nga konsentrasyon han mga platun ngan mas dagko nga pormasyon, mga taktika nga “expansion by fire” (pagpahiluag pinaagi han pagpabuto) nga sayop nga nagbubutad ha direksyon han BHB, pag-atake ha magtig-a nga target nga kaaway, diri tukma nga pokus ha mga taktikal nga opensiba nga kusog-kumpanya kadungan an pagpiliw ha mga gudti nga yunit nga taktikal nga opensiba, ngan iba pa.

An patalagudti nga pagkawara han base panmasa, hinay-hinay nga pag-iban ha kapas nga makaglansar hin anihilatibo nga mga taktikal nga opensiba, natikadamo nga kakulangan ha ginerilya nga disiplina, ngan narabong nga burukratismo ha ranggo han BHB nag-amot ngatanan ha mga kakulangan ha pagtuman han taktikal nga linya han paglalansar han hiluagan ngan sik-on nga ginerilya nga pakiggerra basar ha natikahiluag ngan natikahilarum nga base panmasa. Nagresulta ini ha pagbiaw han panmaihaan nga gerra han katawhan ha butnga nga balitang han estratehiko nga depensiba ha hilaba nga panahon.

Tungod hini nga mga kaluyahan ngan kakulangan, nahibutang an BHB ha bulnerable nga posisyon ha ginpapintas nga gerra han pagpalibot ngan paglipol han kaaway. Tikang 2017 ngan 2018, ginladawan ini han waray hunong nga nakapokus ngan sustenido nga operasyon militar (FSMO) nga nagpapagios hin pira kayukot nga pankombat nga tropa ha bug-os nga nasud, agud magdeploy hin usa o pira kabatalyon kada prente gerilya. Madarahug ngan waray-hunong nga gin-aatake han kaaway an base panmasa han parag-uma pinaagi han paghamlet, saywar, intimidasyon, kampanya nga pagpasurender, pagsikmit, ektra-hudisyal nga panmatay, masaker, aerial bombing ngan panganyon. Ha tahub han gintatawag nga “retooled community support program” (RCSP) o “modified community support program,” pirmihan nga ginpapabilin an matiyupion nga presensya han mga grupo han pasista nga tropa ha butnga han sibilyan nga populasyon.

Tungod ha pagpahaligot-han-kalugaringon, nagluya an pampulitika nga posisyon han BHB, nga nagduso ha damo nga yunit ha lus-ay militar nga sitwasyon, hinungdan nga mawara an ira inisyatiba ngan magin bulnerable ha mga atake. Tungod hini ngan iba pa nga pansakob nga mga kaluyahan ngan kakulangan, nahiagum an BHB han signipikante nga pag-atras ha panahon han 2017-2022 ha pag-atubang ha madarahug nga kampanya han aerial bombing nga suportado han US ngan mga pankombat nga operasyon han rehimen US-Duterte. Damo ha mga yunit an sayop nga nagtantiya ha kaihaon han kampanya han kaaway diin ginpinsar han iba nga maakos nira nga “palabayon” ini. Sugadman, labot ha daan nga mga kampanya han kaaway nga mas halipot an hugna nga nag-iiha han pira kasemana tubtub usa kabulan, mas hilawig an mga FSMO han kaaway tikang 2017, nga naabot hin pira kabulan tubtub usa katuig o masobra pa. Nagpatuman an kaaway hin taktika nga “blockhouse” ha pagtindog hin mga permanente nga kampo militar ngan detatsment ha mga barangay ngan komunidad. Ha pira nga prentre gerilya, waray pahuway an mga FSMO han kaaway nga ha yana nag-iha na hin 7-8 katuig.

Ha damo nga tuig na yana, gin-gagamit han kaaway an linya ha saywar nga aada na ini ha dalan han estratehiko nga pagdaug kontra ha BHB. Nag-imbento ini hin pinadako nga ihap han ginsesering nga “nabuhag” o “ginpaluya” nga prente gerilya. An mga pinuno nga upisyal han AFP nagpagawas hin linurong nga mga pahayag nga mayda na la usa nga “ginpaluya nga prente gerilya” an BHB, bisan pa diri nira igintatago an kamatuoran nga padayon ini nga nagmamalgastar hin bilyun-bilyon kapisos ha aerial bombing, mga pankombat nga operasyon ngan saywar kontra ha BHB ngan kontra ha katawhan.

Ha pagsulsol han AFP, nagpapagawas an mga upisyal ha prubinsya ngan lokalidad hin mga buwa nga deklarasyon nga an ira prubinsya o bungto “insurgency-free” (waray na NPA), nga ha dayuday ginpapahimuwa ha panahon nga naglansar hin taktikal nga opensiba an mga yunit han BHB. Diri madidiwara han AFP an reyalidad nga padayon nga nagtatagamtam an BHB han hilarum ngan hiluag nga suporta tikang ha katawhan tungod kay padayon nira nga iginpapakig-away an ira mga hingyap para ha hustisya ngan tinuod nga katalwasan.

Hadton 2022 pa la, damo ha mga panrehiyon nga komite han Partido an nagsuma han ira eksperyensya nga nagtudlok ha mga importante nga kasaypanan, kaluyahan ngan kakulangan ha paglansar hin hiluagan ngan sik-on nga ginerilya nga pakiggera basar han tikahiluag ngan tikahilarum nga base panmasa. Iginpatuman an kadagmitan nga mga pagbabag-o ha kondukta han mga yunit han BHB agud bawion an inisyatiba ngan pahiluagon an base panmasa ngan maglansar hin mga taktikal nga opensiba subay ha kapas. Ha paglalansar han kagiusan nga pagtutul-id hadton Disyembre 2023, ginbasaran han Komite Sentral ini nga mga patikang nga panalinguha, mas sistematiko nga gintudlok an mga pan-ideolohiya nga gamot hini nga mga kaluyahan, ngan mas matarum nga gintudlok ngan ginsusnan an magkalain-lain nga Tuo nga oportunista nga tendensiya nga nagdurot hin pagbiaw ngan pag-atras ha paglalansar han gerra han katawhan. Ginkikilala han Partido ngan han BHB ini nga mga ayat, an bag-o nga sitwasyon ngan an bag-o nga han-ay han mga buruhaton nga kalakip hini.

Aada yana ha proseso an BHB han utro nga pagdeploy ngan utro nga pagpapahiara han mga yunit hini subay ha mga rekisito han paglalansar han hiluagan ngan sik-on nga ginerilya nga pakigerra ha balayan han tikahilaug ngan tikahilarum nga base panmasa. Hinay-hinay nga nakakaungbaw an mga prente gerilya han BHB ha pagin pasibo ngan nakakabawi han inisyatiba. Ha naglabay nga tuig, nagin relatibo nga madinaugon hira ha pagpreserbar han kalugaringon nga pwersa, ngan pagpakyas ha waray hunong ngan ginpapintas nga kampanya han pagpalibot ngan paglipol han kaaway. Mas naawawarayan pulos an hiluagan-an-lupgop nga mga FSMO han kaaway. Tungod hini, bisan ha panahon han ginpapintas nga pankombat nga operasyon ngan pagsulay-sukay han kaaway hadton Disyembre 2024 ngan tubtub Enero, nakaglansar pa an BHB hin mga asembleya hin pagkonsolida ngan nakapatambong hin pira kanapulo nga bisita agud magpatuman hin mga aktibidad ha edukasyon ngan pankultura.

Ha paggamit hin mga taktika nga konsentasyon, dispersal ngan pagbalhin, madagmit nga paggios, pagpapabilin hin hitaas nga lebel han pagsikreto, ngan ha pagpapahiluag ha ira eya han operasyon, ha kadak-an nahipabilin han mga yunit gerilya han BHB nga bungol ngan buta an kaaway ngan nawarayan pulos an iya mga panmilitar nga kampanya ngan aerial bombing. Ha paglalansar hin aktibo nga depensa, nahitaas an kapas han mga yunit han BHB nga hibangon an naatake nga mga pwersa han kaaway. Gin-gagamit an mga pankombat nga tropa han AFP komo bala ha kanyon ha mga pankombat nga operasyon nga naghuhulat nga maambus. Samtang, agud igpabilin an ilusyon nga nahimo na hini nga “estratehiko nga maperdi an BHB,” sistematiko nga igintatago han AFP an nagtitikadamo nga ihap han mga kaswalti, napatay ngan nasamaran, resulta han mga pakyas nga pag-atake kontra ha BHB.

Kundi, kapareho han gindun-an naton hadton Disyembre, damo pa an kinahanglan himuon agud makit-an naton an hul-os nga pagbunga han kagiusan nga pagtutul-id. Ha okasyon han ika-56 nga anibersaryo han BHB, utro namon nga gin-uutro ngan iginpapaliwanag an pankadagmitan nga mga buruhaton ha ideolohiya, pulitiko-militar ngan organisasyon han BHB ngan han rubas han Partido kasumpay han kagiusan nga pagtutul-id han Partido.

Kinahanglan naton isahon an balitang han teoritikal nga pagsantop han mga Pula nga kumander ngan mangaraway ngan mga giya pampulitika. Dugang nga parayhakon an pag-aram ha Marxismo-Leninismo-Maoismo ngan mga batakan ng prinsipyo han Partido, pinaagi han paggamit hini komo giya ha pag-ases ngan pagsuma ha aton mga eksperyensya, ngan ha pagpaplano ha mga pitad ha tidaraon. Kinahanglan mahatagan an mga Pula nga kumander ngan mangaraway hin mga panmilitar nga sinurat ni Tagapangulo nga Mao Zedong agud adman ngan tamdan. Makurimot nga adman an An mga Partikular nga Kinaiya han Aton Gerra han Katawhan ni Amado Guerrero sugad liwat an iba pa nga artikulo han Komite Sentral, agud magkamayda hin klaro nga pagsantop kun tiunan-o baru-balitang nga mauswag an panmahiaan nga gerra han katawhan. Adman an urhi nga artikulo ni Ka Joma nga “Diri mapeperdi an demokratiko nga rebolusyon han katawhan” ngan hugot nga santupon an mga salik kay ano diri mapeperdi an Bagong Hukbong Bayan.

Maglansar han kampanya ha ideolohiya ngan kultura agud pur-sigido nga pandayon an determinasyon han mga Pula nga mangaraway nga maglansar hin rebolusyunaryo nga armado nga pakig-away ngan pahilarumon an ira waray pagkamakaiya nga dedikasyon nga pagserbihan an katawhan. Maglansar hin mga memoryal agud dumdumon an mga bayani ngan martir han rebolusyon Pilipino nga nagserbe nga mga modelo nga kinahanglan subaron. Ibuksas ngan isalikway an mga traydor ngan binaydan nga ginlingo an katawhan ngan an rebolusyon.

Maglansar hin sustenido nga kampanya han pan-ideolohiya nga pagremolde ha ranggo han mga Pula nga kumander ngan mangaraway han BHB. Himuon an regular nga suson ngan pagsuson ha kalugaringon, ngan ebalwasyon. Pahitas-on an lebel han panmilitar nga disiplina ngan kapas han mga Pula nga mangaraway pinaagi han dirudiretso nga pagrebyu ha batakan nga oryentasyon militar ngan mga palisiya, pagpapahiara, ngan regular nga pisikal nga ehersisyo. Regular nga maghimo hin mga treyning agud pahitas-on an kapas han mga yunit nga gumios komo usa.

Pahitas-on an pampulitika nga kapukawan han mga Pula nga mangaraway pinaagi han regular nga mga pampulitika nga edukasyon hiunong ha magpaso nga isyu ngan ha kabug-usan nga nasyunal ngan internasyunal nga sitwasyon. Bairon an ira pampulitika ngan teknikal nga kapas pinaagi han mga pagpapahiara sugad han pankatilingban nga imbestigasyon, pagyayakan ha publiko, pagsurat ngan iba pa.

Maglansar hin mga kampanya nga rekoberi o utro nga pagpapagios, ekspansyon ngan konsolidasyon ha base panmasa nga may katuyuanan nga magtukod hin kusog-kumpanya nga prente gerilya. Padayon nga utro nga magdeploy ngan utro nga magpahiara hin mga yunit han BHB subay ha mga rekisito han paglansar hin hiluagan ngan sik-on nga ginerilya nga pakiggerra ha balayan han natikahiluag ngan natikahilarum nga base panmasa. Padayon nga magtukod ngan magpadig-on hin mga platun han BHB komo batakan nga yunit, nga nagmementinar hin sentro de grabidad para ha kumand ngan komunikasyon, pleksible nga nagdedeploy ngan nagpapasarang hin mga iskwad ngan tim hini para ha buruhaton masa ngan mga taktikal nga opensiba nga akos han gudti nga yunit, nagkokonsentra para ha konsolidasyon, pagpapahiara ngan mas dagko nga taktikal nga opensiba, ngan nagbabalhin agud atuhan an pagpalibot han kaaway ngan agud magpahiluag.

Maglansar hin magrayhak nga kampanya agud magrekluta hin mga Pula nga mangaraway tikang ha mga lokal nga komite han Partido ngan organisasyon masa han mga parag-uma, labina tikang ha ranggo han mga kabatan-unan nga aktibista nga aktibo nga napartisipar ha mga panmasa nga pakigbisog ha kabaryuhan. An mga komite han Partido ngan organisasyon masa ha mga syudad ngan sentro nga bungto kinahanglan aktibo nga magpropaganda, maglansar hin mga kampanya para magrekluta hin mga Pula nga mangaraway tikang ha mga trabahador ngan petiburges nga intelektwal ngan iba pa nga sektor. Kinahanglan magplano an mga unyon ngan organisasyon masa nga regular nga magpadara hin gudti nga tim para ha eksposyur (integrasyon) o pagdeploy hin mga tawuhan para ha BHB.

Maglansar hin mga pulitiko-militar nga pagpapahiara agud magpalutaw hin bag-o nga mga upisyal nga may kapas nga mamuno ha mga tim, iskwad ngan platun han BHB ha buruhaton masa ngan kombat.

Himuon an pankatilingban nga imbestigasyon ngan pag-analisar ha klase ha lupgop han mga bungto ngan prubinsya, linya ha mga paninanum o industriya, agud tudlukon an pankadagmitan nga mga isyu ngan sosyo-ekonomiko ngan pampulitika nga problema han masa. Ha balayan hini, kinahangalan naton magtukod, utro nga magpagios, o magpahiluag han mga rebolusyunaryo nga organisasyon masa han mga parag-uma, kabatan-unan, kababayin-an, mga kabataan ngan trabahador pankultura. Kinahanglan naton likyan an mekanikal nga “utro nga pagtikang ha waray” nga papitad-pitad nga pamaagi han pag-oorganisa nga pakyas nga igkonsidera an rebolusyunaryo nga kasaysayan han katawhan ha mga prente gerilya o base nga erya. Kinahanglan waray kapagal nga maglansar hin propaganda ngan edukasyon agud konsolidahon an masa ngan pahitas-on an ira militansya. Magtukod, utro nga magtukod o utro nga pagiuson an mga organo han pampulitika nga poder ha mga barangay, inter-barangay o ha balitang han bungto.

Maglansar hin mga panmasa nga kampanya ngan pakigbisog agud pagiuson an pinakadako nga ihap han mga parag-uma kontra ha pyudal ngan bagapyudal ngan iba pa nga porma han paniniyupi. Ipasulong an pakigbisog han masa nga parag-uma para ha hingyap nga pahimub-on an plete ha tuna, paraon an usura, magkamayda hin patas nga presyo ha pagpalit han ira mga agrikultural nga produkto ngan iba pa. Pagiuson an masa kontra ha panlulupot han tuna ngan mga operasyon ha mina ngan iba pa nga dagko nga negosyo nga naghihibang ngan naghihilo ha kalibungan. Kinahanglan dagmit nga magbug-os hin plano an mga organo han pampulitika nga poder, lokal nga sanga han Partido, mga organisasyon masa, ngan mga yunit han BHB agud buligan nga makahaum an katawhan ha mga kalamidad ha klima, kalakip an pag-ayad ha mga umhanan, sistema han patubig, pagbiling ngan pagsalbar, ngan pagkuha ngan paglubong ha mga namatay.

Maglansar hin kontra-pasista nga mga kampanya ngan pakigbisog. Ibuksas an mas nagtitikagrabe nga pangabuso, karat-an ngan krimen nga ginhimo han mga yunit han AFP ngan mga sundalo hini, kalakip na an mga pagtalapas ha demokratiko nga katungod ngan internasyunal nga makatawo nga balaud. Ibuksas ngan suknaon an ngatanan nga kaso han intimidasyon, Red-tagging, arbitraryo nga iligal nga detensyon, pagsikmit, tortyur, ekstra-hudisyal nga panmatay ngan masaker. Ibuksas an mga kaso han aerial bombardment, istraping ngan panganyon nga nagbubutang ha mga kinabuhi ngan propyedad han sibilyan ha kadelikaduhan nga talapas ha internasyunal nga makatawo nga balaud.

Kinahanglan aktibo nga magpropaganda ngan magkontra-propaganda an mga kumand han BHB, tubtub ha lebel han prubinsya ngan prente, pinaagi han ira mga tagapagyakan o upisyal ha impormasyon. Kinahanglan nira gamiton an ngatanan nga pamaagi agud aktibo nga pukawon an katawhan nga atuhan an matalumpiguson nga mga palisiya ngan programa han pagngagaw ha ira pakabuhi, ngan nagpapailarum ha ira ha mas grabe nga pag-inantos. Kinahanglan aktibo nira nga ibuksas an saywar nga buwa han kaaway ngan disimpormasyon nga iginpapasarang ha masa.

Kinahanglan aktibo ngan makurimot nga tukuron han mga lokal nga sanga ngan komite han sekyson han Partido an mga yunit milisya, kadungan an mga yunit nga pagdepensa ha kalugaringon han mga organisasyon masa. Labaw san-o pa man, kinahanglan naton dun-an, ha teorya ngan praktika, an mahinungdanon nga papel han yunit milisya han BHB ha paglansar hin ginerilya nga pakiggerra. Kinahanglan naton buhian an panmilitar nga inisyatiba han mga yunit nga pandepensa ha kalugaringon han katawhan pinaagi han pagpapahiara ngan pag-aghat ha ira nga gamiton an ngatanan nga posible nga porma han armado nga pag-ato ha kaaway. Importante nga kabakyang an milisya han katawhan han mga pultaym nga horisontal nga pwersa han BHB. Ginpapahilapad nira an lupgop han gerra han katawhan agud iduso an kaaway nga unaton an pwersa hini ngan ibutad an ira magluya nga parte.

Maglansar hin mga taktikal nga opensiba nga nasubay ha kapas han mga tim, iskwad ngan platun han BHB. Diskubrihon ngan atakihon an magluya nga parte han kaaway, kaupod an mga armado nga tawuhan hini nga nalupgop ha mga barangay ha kabaryuhan, mga nagroronda, nagbabantay ha tsekpoynt, naghihimo hin mga pankombat nga operasyon, ngan iba pa. Planuhon an pagkumpiska ha armas han kaaway agud maarmasan an bag-o nga mga narekluta. Maglansar hin gatus-gatos nga taktikal nga opensiba nga iginlalansar han gudti nga yunit agud makakumpiska hin armas.

Mahugot nga sumunod ha mga palisiya nga nakadisenyo agud seguruhon an pagsisikreto ngan seguridad han mga gerilya nga kampo ngan pagmaniobra. Abtik nga magbantay ha ngatanan nga pag-atentar han kaaway nga makapasulod han elektroniko nga tracker sugad han mga GPS transmitter, pinaagi han mga linya ha suplay ngan iba pa nga pamaagi. Tudlukon ngan tagdon an ngatanan nga mga pagtalapas ha panseguridad nga palisiya nga nagbutang ha ginerilya nga pagsisikreto ha peligro.

Aseson an natirok nga impormasyon ha paniktik han kaaaway ngan pawarayan-pulos ini. Bungkagon an network ha intelidyens han kaaway ngan tukuron an lokal nga pukot paniktik han BHB ngan mga yunit milisya. Pursigido nga ibuksas ngan igsalikway an kontra-rebolusyunaryo nga mga buruhaton han mga binaydan ngan traydor, ngan batunon an hingyap han katawhan nga masirutan an mga aktibo nga nakikigkunsabuhay ha kaaway komo mga ahente militar o espiya.

Maghimo hin pampulitika nga buruhaton ha ranggo han kaaway. Kinahanglan naton sistematiko nga tirukon an mga impormasyon ha internal nga sitwasyon, mga hingyap ngan kontradiksyon ha ranggo han mga platun, kumpanya, batalyon ngan mas higtaas nga istruktura ha kumand han kaaway. Ibuksas an mga pangabuso kontra ha rank-and-file (ordinaryo/uruubos) nga tawuhan han militar ngan mga pinirit nga magparamilitar (CAFGU). Ibuksas an korapsyon ha ranggo han mga upisyal ha sistema han pagpasuhol ngan nadedelatar nga pagpagawas hin sweldo ngan alawans, paghuthot hin pondo para ha gintatawag nga “balik-loob”, koleksyon han kikbak ha lokal nga mga proyekto (labina ha ilarum han Support to Barangay Development Program han NTF-Elcac), ngan iba pa. Ibuksas kun tiunan-o padayon nga gin-gagamit an AFP ngan PNP han militar han US komo proxy ngan instrumento ha heyopulitikal nga katuyuanan hini, labina ha pagduso ha armado nga sumpakiay ha imperyalista nga karibal nga China. Magrekluta hin progresibo ngan patriyotiko nga upisyal ngan tawuhan ha Crispin Tagamolia Movement.

Maghimo hin regular ngan ispesyal nga mga kumperensya ha kumand ha balitang han rehiyon ngan mas uruubos pa agud analisaron an disposisyon ngan plano han kaaway, seguruhon an tukma nga distribusyon han aton mga pwersa, magbug-os hin pankabug-usan nga plano agud ipasulong an gerra han katawhan ha erya han operasyon, magbug-os hin gin-usa nga plano nga panmilitar nga kampanya, ngan seguruhon an maupay nga koordinasyon.

Pakusgon an sistema han kumand ha sakob han Bagong Hukbong Bayan, tikang ha Nasyunal nga Kumand ha Operasyon ngan ha Panrehiyon nga Kumand ha Operasyon, ngan tikang ha panrehiyon nga kumand ha operasyon tubtub ha subrehiyon ngan prente, ha mga platun, iskwad ngan tim hini. Padayon nga magpauswag, magpakaupay, ngan magpakusog han usa nga madagmit ngan malalauman nga sistema han komunikasyon, ngaduha ha elektronik ngan pisikal. Seguruhon nga magkamayda hin sobra usa nga linya ngan sistema han back-up.

Padayon nga ipatuman ngan pauswagon an mga palisiya ngan pagsurundon agud seguruhon ngan atamanon an sensitibo nga impormasyon pinaagi han kompartmentalisasyon, pagkokoda hin mga file ngan nakasurat nga rekord, regulasyon ha paggamit hin mga kompyuter, smartphone, selpon ngan iba pa nga elektroniko nga higamit.

Padayon nga nagigin matambok an tuna para ha paglansar hin rebolusyunaryo nga armado nga pakig-away ha ilarum han rehimen Marcos, nga gin-uuna an interes han naghahadi nga mga klase ngan han mga langyaw nga poderoso ha ekonomiya ngan heyopulitika, hinungdan nga dugang nga nabubutad an dunot ngan korap nga naghahadi nga sistema. Iginpapatuman ini ha kahibangan han hiluag nga masa han katawhan Pilipino, diin an dako nga mayoriya nag-aantos ha natikagrabe nga kundisyon ha panginabuhi. An sistematiko nga panmuypoy ha mga demokratiko nga katungod ha kasyudaran ngan butad nga paghahadi militar ha kabaryuhan nga nagtatarget ha mga trabahador, parag-uma ngan iba pa nga demokratiko nga mga klase, nagduduso ha katawhan ngadto ha dalan han pag-aarmas agud umato, depensahan an ira mga katungod ngan makigbisog para ha ira nasyunal ngan demokratiko nga mga hingyap.

Natikatarum nga krisis ha ekonomiya ngan pulitika han naghahadi nga sistema

Padayon nga nagtitikagrabe an tipatay nga bagakolonyal ngan bagapyudal nga sistema, ha pagpapatuman han rehimen US-Marcos han mga kontra-katawhan ngan kontra-nasyunal nga palisiya nga nagpapagrabe ha pan-ekonomiya nga krisis, pagpahugot hini han pagkapyot ha poder nga nagpapagrabe ha krisis ha pulitika, ngan pagpakaniyu-tiyo hini ha imperyalismo nga US nga mas nagpapaluya ha nasyunal nga soberaniya.

Ha luyo han natikakusog nga proteksyunismo han nangunguna nga industriyal nga kapitalista nga poder, padayon nga iginpapasulong han rehimen Marcos an daan nga mga neoliberal nga palisiya nga nagresulta ha waray katupong nga pagwakay ha mga lokal nga pwersa ha produksyon ha linabay nga upat kadekada. Ini nga mga palisiya ginpahimulsan han mga monopolyo kapitalista nga korporasyon ngan pampinansya nga institusyon ngan nagpariko ha mga lokal nga dagko nga burgesya komprador, ha kahibangan han hiluag nga masa nga trabahador ngan butnga nga klase. Ginpahilarum hini nga mga palisiya an atrasado, agraryo ngan diri industriyalisado nga ekonomiya, ngan ginpagrabe an disempleyo, kakurian ngan pananalumpigos. Nagin dugang nga dependyente an nasud ha importasyon ngan dugang nga nalulubong ha utang.

Padayon nga gin-aabrihan ni Marcos an ekonomiya bisan kun kabaliskaran hini an iginduduso nga proteksyunista nga palisiya han mga sentro han pankalibutan nga kapitalismo agud protehiran ngan utro nga buhion an ira mga lokal nga industriya. Hini nga konteksto, mas kontra-produktibo an mga neoliberal nga palisiya ngan pagsarig han rehimen ha US. Iginbubutad hini an nasud ha mas grabe nga paniniyupi ngan diri pantay nga mga kundisyon ha negosyuhay. Mas papahilarumon hini an pan-ekonomiya nga pagpakauripon, ngan pagagrabihon an sitwasyon han katawhan, ha pagbagsak han mga pan-eksport nga merkado han Pilipinas ngan mas desperado nga pagkayer han rehimen ha langyaw nga kapital.

Mas nagtitikagrabe an pankatilingban ngan pan-ekonomiya nga pag-inantos han hiluag nga masa han katawhan Pilipino. Bisan pa kun tahuban han upisyal nga estadistika (datos), mas nagtitikagrabe an kawaray trabaho. An suhol ngan kita nagpapabilin nga himubo, namemeligro ngan kulang kaupay agud dunganan an natikahitaas nga presyo han pagkaon, lana, mga batakan nga panginahanglan, yutiliti ngan serbisyo. An tigda nga paghitaas han matag-adlaw nga gastos ha panginabuhi ha ilarum ni Marcos nagduduso ha milyun-milyon nga katawhan ha pampinansya nga kadelikaduhan ngan natikagrabe nga kakurian ngan kagutuman. Masobra 20 kamilyon nga pamilya (maabot ha 80%) an nagkukuri ngan bulnerable an kamutangan ha pinansya, kaupod an milyun-milyon nga pamilya nga buwa nga ginpapagawas nga aada ha butnga nga klase. Tikang han liningkod hi Marcos hadton 2022, dinoble tikang 3 kamilyon ngadto ha 7.2 kamilyon an kadamuon han pamilya nga sobra nga nagkukuri ngan nagugutom. Tungod ha kawaray hin trabaho, himubo nga kita ngan kakulang ha pankatilingban nga serbisyo, dirudiretso nga nabubutong an kalidad han kinabuhi han dako nga mayorya han katawhan Pilipino.

Nalulurong pa gihapon an rehimen Marcos ha pagbaligya han nasud ha pagsingabot han langyaw nga monopolyo kapital. Agud kayeron an langyaw nga kapital, gintugutan ni Marcos an pagpapagrabe han paniniyupi ha mga trabahador ha pagraysang ha suhol ngan sweldo han mga trabahador. Gintugutan niya an pananalumpigos ngan panlupot ha pakabuhi han mga parag-uma, mga minoriya ha komunidad, parupangisda ngan iba pa nga anakbalhas, ngan an pagwakay ha kalibungan, pinaagi han paghatag ha mga langyaw nga monopolyo kapitalista nga negosyo ngan iya mga kroni nga dagko nga burgesya komprador hin kalibrihan nga luputon ngan minahon an higluag nga katunaan, salog ngan kadagatan, o paganahon an ira plantasyon, real estate nga proyekto, gintatawag nga pan-kalibungan o panklima nga proyekto, istakan han gin-import nga (liquified natural gas) LNG tikang ha US, ngan iba pa nga operasyon para ha ganansya.

Grabe an panlulupot han katunaan partikular ha Mindanao diin nakikigkonsabuhay an mga warlord ha militar agud palayason an mga Moro ngan Lumad ha ira tuna, pabor ha mga plantasyon ha oil palm, kawayan, kape, ngan iba pa nga ginpapadalagan han mga multinasyunal nga korporasyon. Nahitatabo ini bisan ha mga lugar ha kunuhay mayda otonomiya nga rehiyon nga Bangsamoro, nga karuyag kontrolon ni Marcos, bisan pa manelikado an pankamurayawan nga kasarabutan ha Moro Islamic Liberation Front, ngan iduso an utro nga paglarab han armado nga pag-ato han katawhan Moro.

Iginraraysang han rehimen Marcos an suhol han mga trabahador ha mamahimubo ha lebel han disente nga panginabuhi (kundi gindoble naman an iginhahatag nga allowance ha mga pasista nga sundalo). Agud mabuhi, napipiritan an mga trabahador, gudti nga propesyunal ngan ordinaryo nga empleyado nga magbiling hin dugang nga trabaho. Milyun-milyon nga Pilipino an waray trabaho o waray regular nga trabaho. Haros upat-ha-lima (78%) han upisyal nga ginsesering nga mayda trabaho, ha kamatuoran mga partaym, temporaryo o kontraktwal, o impormal nga trabahador. Tungod ha nga krisis ha dis-empleyo ha Pilipinas, napiritan an haros 2.5 kamilyon nga Pilipino nga magpakabuhi ha gawas han nasud hadton naglabay nga tuig, nga nagpadako ha ihap han mga overseas Filipino workers (OFW) ha masobra 11.5 kamilyon.

An nagtitikagrabe nga sosyo-ekonomiko nga kamutangan nagpapatarum han pankatilingban nga kawaray pagkapapreho giutan han mga naghahadi nga oligarkiya ngan han hiluag nga masa nga katawhan. Ha ilarum ni Marcos, an ihap han panimalay nga waray tirok nga kwarta dinamo hin 1.5 kamilyon ngadto ha 20.1 kamilyon, samtang lahos ha duha kapilo (108%) naman an igindako han kita ngadto ha ₱1.8 katrilyon han tulo nga pinakariko ha Pilipinas—hira Enrique Razon, Manuel Villar ngan Ramon Ang. Hira ngan an mga kasosyo nira nga langyaw nga kapitalista an pinakadako nga nagpupulos ha mga kontrata ngan pabor han gubyerno. Samtang gin-iibanan an ira buhis, gintatagan hin tax holiday (paglibre ha buhis) ngan iba pa nga pampinansya nga insentibo, ginpapakurian naman ni Marcos an katawhan han pagbug-at nga mga buhis ha mga batakan nga panginahanglan—kalakip an pinakahitaas nga “value added tax” ha rehiyon, excise tax ha diesel ngan iba pa nga produkto nga petrolyo nga nadako kada nahitaas an presyo, ngan iba pa nga buhis ha pankonsumo nga pinakamabug-at para ha mga kablas ngan mga butnga nga klase.

Kontra-produktibo an badyet ni Marcos ngan pabug-at ha katawhan. Kadam-an hini nahingangadto ha pagbayad-utang, kontra-produktibo nga gastos ha militar, ngan enggrande nga imprastraktura kalakip an ura-ura kamahal nga proyekto nga pan-pork barrel. Gin-ibanan an pankabug-usan nga badyet nga pan-ayuda, kundi mas dako naman an nahingadto ha direkta nga kontrol han mga pulitiko para ha kampanya ha eleksyon. Samtang, dako an igin-iban ha badyet para ha edukasyon, kalibsugan ngan iba pa nga pampubliko nga serbisyo, hasta na ha agrikultura samtang waray pondo para ha industriyalisasyon.

An ₱1.5 katrilyon nga depisito ha badyet han gubyerno nga Marcos hadton naglabay nga tuig katugbang hin 5.7% han kabug-usan nga lokal nga produksyon (gross domestic product o GDP)—ini an pinakagrabe ha naglabay nga 40 katuig, gawas ha mas dako nga depisito ha pungkay han lockdown hadton pandemya. Padayon nga nahitaas an pangutang ha ilarum ni Marcos—ada ha ₱16.3 katrilyon na ini ngan ginlalauman nga maabot ha ₱17.4 katrilyon ha katapusan han tuig. Waray katupong an pangutang han rehimen Marcos nga inabot na ha ₱188.7 kabilyon kada bulan, nga linahos ha ₱130.7 bilyon kada bulan nga pangutang ni Duterte.

Padayon an samwak nga korapsyon ha ilarum han gubyerno nga Marcos, tikang ha mga kikbak ha mga proyekto han gubyerno, tubtub ha paggamit han pampubliko nga pondo (Maharlika Investment Fund) para ha pribado nga pamumuhunan. Tikang han liningkod ha poder hadton 2022, diri mamenos ha siyam nga kaso han korapsyon (nga may balor nga lahos ₱200 kabilyon) kontra ha mga Marcos an iginbasura han mga korte. Mababawi na han mga Marcos an mga propyedad nga iligal nga nahakin ha ilarum han balaud militar, kalakip na adton katin han mga kroni sugad nira Lucio Tan ngan Ramon Ang (para kan Danding Cojuangco). Ginkuha na han mga Marcos, han mga kaurupdan ngan kroni nira an kontrol ha mga sindikato ngan kartel nga nagpapaluyo ha importasyon ngan ismagling han bugas ngan iba pa nga produkto.

Agud seguruhon an ira paghahadi ngan ipadayon an paghakin han karikuhan, ginpapadagmit ni Marcos an konsolidasyon han pampulitika nga poder agud maseguro an kontrol lahos ha 2028. Tungod hini, ginpahilarum liwat niya an pampulitika nga krisis han naghahadi nga sistema. Katuyuanan niya nga tanggalon an tarhug han pampulitika nga pag-ayat han mga Duterte ha 2028, nga kaalyado niya hadton 2022 agud seguruhon an eleksyon pinaagi han katin hadto ni Duterte nga dekompyuter nga pag-ihap han botos, plano ni Marcos nga manipulahon an resulta han tiaarabot nga midterm nga eleksyon agud katinan an ngatanan nga lebel han gubyerno tikang ha Senado, Kongreso ngan mga upisyal ha lokal nga gubyerno.

Hadton Pebrero, ginkoordina ni Marcos an impeachment han Kongreso kan Vice President Sara Duterte. Pira kasemana an linabay, gingamit niya an poder agud ipaaresto ngan igpapriso hi Rodrigo Duterte ha International Criminal Court ha The Hague, agud bistahon ha hiluagan ngan sistematiko nga panmatay nga nakomponer han krimen kontra ha katawhan. Ginpagrabe ngan iginpa-isa ha bag-o nga lebel hini nga mga pitad an pampulitika nga krisis han naghahadi nga sistema. Gin-aatentaran han mga Duterte, nga kilalado nga nagamit hin mga langyaw nga kompaniya nga eksperto ha data analytics ngan influence strategy, nga magpabutho hin pampulitika nga bagyo kontra ha rehimen Marcos pinaagi han pag-impluwensiya ha pampubliko nga opinyon gamit an sistematiko nga disimpormasyon ngan pasista nga manipulasyon ha social media, pagsingabot ha hingyap han katawhan, paggamit ha panlipat nga taktika agud ihirayo an atensyon ha pangabuso ngan krimen ha ilarum han tiraniko nga paghahadi ni Duterte, ngan pagpapagawas nga mga biktima hira agud makuha an simpatya han publiko. Nag-aantentar hira nga mag-organisa hin mga rali ngan mambuhag ha sakob han militar ngan pulis.

An pag-ungbaw han Marcos-Duterte nga sumpakiay dugang nga nagbubuksas ha kadunutan han naghahadi nga sistema. Iginpapakita hini kung tiunan-o nga an presente nga naghahadi nga sistetma gindodominaran han duha nga pinakakorap ngan madarahug nga reaksyunaryo nga paksyon, ngaduha nagtataglawas ha pan-ekonomiya nga interes han dagko nga burgesya komprador ngan dagko nga agaron maytuna, ngaduha mga burukrata kapitalista, ngaduha niyutiyo ha mga langyaw nga imperyalista nga poder, ngaduha kontra-katawhan ngan matalumpiguson. Samtang nagtitikagrabe an kamutangan han ekonomiya han Pilipinas, natikaguti an nakakawat ngan pribilehiyo nga ginbababhinan han nagpapa-isan-isanay nga burukrata kapitalista. Nagpapabilin an hulga nga pumintas pa gan madarahug nga bumuto an pampulitika nga krisis han naghahadi nga sistema.

Agud dugang nga ikonsolida ngan monopolyuhon an pampulitika nga poder, ginpagrabe liwat ni Marcos an pampulitika nga panmuypoy kontra ha mga panmasa nga organisasyon han mga trabahador, parag-uma, kabatan-unan, kababayin-an, ngan iba pa nga demokratiko nga sektor. Natikagrabe an paniniktik han estado, mga pagsikmit, tortyur, masaker ngan iba pa nga mga grabe nga pagtalapas ha tawhanon nga katungod nga hinimuan han reaksyunaryo nga militar ngan pulis. Pinakagrabe an sitwasyon ha yukut-yukot nga mga barangay ha kabaryuhan nga iginmando ni Marcos nga igpailarum ha balaud militar.

Ha butnga han pan-ekonomiya nga krisis, nasamwak an diskuntento han hiluag nga masa han katawhan ngan madig-on nga nasulong an ira organisado nga pag-ato. An mga trabahador nga nasusumhan na ha pira katuig nga panlibo ha sensilyo nga umento nagdedemanda hin kadagmitan nga makatadungan nga paghitaas ha suhol agud makalapay ha paghitaas han gastos ha panginabuhi. Nagtitikakusog liwat ini nga panawagan ha mga empleyado han gubyerno, ngan mga pampubliko ngan pribado nga magturutdo, nga nagdedemanda hin makatadungan nga sweldo. An guliat para ha pagpapahitaas han suhol ngan mas maupay nga kundisyon ha pagtrabaho segurado nga magpapalarab ha mas damo nga welga ngan iba pa nga porma han panmasa nga pakigbisog.

Nagtitikakusog an guliat kontra ha waray-wantas nga importasyon han bugas, hasta na an isda ngan iba pa nga agrikultural nga produkto nga nagpapatay ha lokal nga produksyon. Naato an mga parag-uma ngan mga komunidad han mga minoriya kontra ha mga minahan ngan iba pa nga proyekto nga naghihibang ha kalibungan ngan nanlulupot han ira katunaan. An magkalain-lain nga sektor, kaupod an mga drayber ngan opereytor han dyip, parupangisda ngan iba pa natindog liwat para ha ira katungod ngan bug-os kusog nga nga gin-aatuhan an mga programa nga nag-aagaw han ira pakabuhi. Iginpapakigbisog han mga estudyante an mas dako nga subsidyo han estado para ha edukasyon ngan ginkokontra an paghitaas han matrikula, ngan panawagan para ha trabaho ha butnga han krisis ha disempleyo

Padayon nga natikadako an pag-ato ha panmilitar nga panginlabot han US ha Pilipinas. Natikakusog an pagkundenar kontra ha paghatag han US han panmilitar nga ayuda ha mapanpuypoy nga rehimen, kontra ha mga base ngan panmilitar nga pasilidad han US ha nasud nga gin-gagamit para ha mga langyaw nga panmilitar nga operasyon, kontra ha pagsulod, pag-agi, ngan pagduong han mga US carrier strike group nga mayda mga dara nga mga higamit nukleyar, kontra ha paggamit ha militar han Pilipinas ha pagsulsol hin armado nga tensyon ha China, ngan ha pagdanas ha nasud ha natikahilarum nga peligro han inter-imperyalista nga gerra.

Nakikigbisog an hiluag nga demokratiko nga sektor kontra ha natikagrabe nga porma han pangabuso ngan pagtalapas ha tawhanon nga katungod nga ginhimo han reaksyunaryo nga militar ngan pulis. Ginbati nira an pabista kan Duterte ha ICC komo higayon nga papagbatunon hiya ha diri maihap nga krimen kontra ha katawhan ha pagpatuman han iya buwa nga “gerra ha druga.” Kadungan hini, gindedemanda nira nga papagbatuon hi Marcos ha damo nga panmatay, pagsikmit ngan iba pa nga krimen kontra ha katawhan nga naato.

Klaro nga an natikahilarum nga pan-ekomiya ngan pampulitika nga krisis han naghahadi nga sistema nagbubuksas ha bangkrap nga bagakolonyal ngan bagapyudal nga sistema, ngan an tahos-ha-tul-an nga dunot nga neokolonyal nga estado, nga an paghahadi ginlaladawan han hiluagan nga korapsyon ngan brutal nga panmuypoy. An pamaagi gud la agud rub-on an kadena han pananalumpigos ngan paniniyupi, ngan tapuson an diri na mailob nga kakurian ngan pag-antos han hiluag nga masa nga trabahador, parag-uma ngan anakbalhas ha Pilipinas, amo an ibagsak an imperyalismo nga US ngan an makaklase nga diktadura han dagko nga burgesya komprador, dagko nga agaron maytuna ngan mga burukrata kapitalista.

Waray iba nga alternatibo an katawhan Pilipino kundi an ipasulong an waray hunong nga rebolusyunaryo nga pakig-away, agud ibagsak an matalumpiguson ngan matiyupion nga naghahadi nga mga klase, ngan tukuron an demokratiko nga poder han katawhan. Kadagmitan, makatadungan ngan ginkikinahanglan nga pakusgon ngan pahiluagon an Bagong Hukbong Bayan ngan ipasulong an gerra han katawhan.

Ginpapagrabe han Trump 2.0 an krisis han pankalibutan nga sistema nga kapitalista

Dagmit nga natikabagsak ha hilarum nga kasamukan an kapitalista nga kalibutan atubangan han waray kasolbaran nga kapitalista nga krisis han sobra nga produksyon, ngan ha atubangan han butaray nga duso han gubyerno han US ha ilarum han rehimen Trump 2.0 nga igpirit an imperyalista nga interes hini. Gintataglawas han gubyerno nga Trump an pinakareaksyunaryo ngan pinakasobinista nga mga elemento han oligarkiya ha pinansya ha US. Ginhuhukas hini an maskara nga “kampyon han demokrasya” nga sul-ot han US ngan iginbubuksas an mga palisiya hini nga hegemonista, ha desperado nga pag-atentar hini nga baliskaron an estratehiko nga pagluros han imperyo nga Amerikano ngan igbalik an kalugaringon komo nag-uusahan nga superpower.

Iginpapakita han mga datos hadton naglabay nga tuig nga nakaludlod pa gihap ha panmaihaan nga istagnasyon (pagbiaw, tikang pa 2008) an mga kapitalista nga ekonomiya, kahuman an halipot nga pagbawi kahuman han pandemya hadton 2020. Binagsak ngadto 2.8% hadton 2023 ngan 2024 an pag-tubo han pankalibutan nga ekonomiya, tikang 5% ha panahon han pagbawi kahuman han pandemya. Mas himubo ini ha abereyds nga 3.2% nga pag-tubo ha naglabay nga dekada (2010-2019). Hinitaas an pankalibutan nga utang ha bag-o nga rekord nga $318.4 katrilyon hadton naglabay nga tuig, tulo kapilo (328%) nga mas dako ha balor han pankalibutan nga produksyon hadton 2024. Diri la ini imposible nga baydan, imposible liwat baydan an interes hini ha kaihaon. Padayon nga nahinay an pag-tubo han pankalibutan nga negosyuhay han mga produkto, binagsak ngadto ha 2% hadton 2024, nga mas himubo tanding ha 4.5% hadton 2010-2019. Naghimubo han 8% hadton 2024 an agos han foreign direct investment ha bug-os nga kalibutan. Ginbutong ini han 45% nga pagbagsak ha European Union, ngan 29% ha China, ha luyo han 10% nga pag-uswag han mga langyaw nga direkta nga pamuhunan ha US nga duso han pamumuhunan tikang ha Taiwan ngan South Korea ha mga bag-o nga semikonduktor nga pabrika.
Ha atubangan han panmaihaan nga kapitalista nga istagnasyon, mas agresibo nga iginduduso han gubyerno ni Trump an istrikto ngan desperado nga pitad ha ekonomiya ngan negosyuhay ha katuyuanan nga buhion an lokal nga produksyon. Ha sugad ginpapaluya hini an multilateral nga sistema nga ginbuligan hini nga tukuron ha panahon han neoliberal nga globalisasyon. Ngani, hadton 2008 pa ini binirik han direksyon ha ilarum han gubyerno ni Obama, han tikangan han US an paghatag hin insentibo agud mahibalik an mga langyaw nga pamuhunan han US. Ginpawarayan pulos hini an sistema han World Trade Organization ha paghingayad han sumpakiay, ngan gintanggalan hin epektibidad an mga kasarabutan hini. Ha sakob han haros usa kadekada, hiluagan nga gin-gagamit han US an mas hitaas nga taripa, mga restriksyon ha pag-eksport, mga restriksyon ha teknolohiya ngan mas istriko nga regulasyon han pamuhunan kontra ha China.

An agresibo nga paggamit han gubyerno nga Trump hini nga mga palisiya ha negosyuhay ngan ekonomiya kontra ha iba nga nasud nagpapahitaas han balitang han antagonismo bisan ha mga tradisyunal nga imperyalista nga kaalyado hini. Labot ha China, gin-imponeran o gintarhug imponeran hin mas hitaas nga taripa an usa nga bulto han mga produkto tikang ha Canada, Mexico, European Union ngan iba pa nga mga nasud, nga may deklarado nga katuyuanan nga depensahan an mga Amerikano nga kompaniya ngan pabuyluhon an lokal nga produksyon. Nagtarhug hi Trump nga rerebyuhon an panmilitar nga alyansa han US ha Japan, nga ginbaton naman han Japan hin saad nga pakukusgon an importasyon han liquified petroleum gas tikang ha US, ngan dudugngan an pamuhunan ha US tubtob $1katrilyon Kundi, diri gud masugtanon an iba nga mga kaalyado han US. Gin-anunsyo han Canada ngan Mexico an plano hini nga magpatuman hin kontra-taripa ha mga epektos nga gin-iimport tikang ha US. Nanarhug liwat an gubyerno han France nga mabaton ha mga taripa han US.

Ha luyo nga bahin binulos an China, ngan ginpahitaas an taripa ngan igindiri na an importasyon han soybeans ngan troso tikang ha US, ngan nagdeklara han kaandaman hini nga sumulod “ha anuman nga porma han gerra” ha US. Igintutukod ngan ginpapahilaug hini an mga estratehiko nga alyansa nga diplomatiko, pan-ekonomiya ngan panmilitar sugad han BRICS, G-77, Shanghai Cooperation Organization, Forum on China-African Cooperation, RCEP ngan iba pa.

Dugang ha pag-iimponer o pananarhug nga mag-imponer han kadugangan nga mga taripa, igindeklara ni Trump an kaandaman nga gumamit hin pwersa militar agud makuha an kontrol ha Panama Canal (diin naagi an 40% han kargamento nga epektos han US), Greenland (usa nga rehiyon han Denmark nga may otonomiya, nga mayda dagko nga deposito hin mga rare-earth mineral, ngan estratehiko nga matatad-an ha rehiyon han Arctic), ngan an Gaza Strip nga karuyag ni Trump himuon nga “pananag-iya” han US nga butad nga pagtamak ha mga katungod han katawhan nga Palestino.

Baga hin ginsusunod yana ni Trump an palisiya han pakigtuhay ha Russia kasumpay han Ukraine, kahuman makit-an nga ha luyo han dagko nga kahibangan han Russia ha gerra, pakyas an US ha magkalain-lain nga katuyuanan hini nga paluyahon an estratehiko nga kapas han Russia nga makiggerra, rub-on an iya ekonomiya, magsulsol hin pag-ato kontra ha rehimen, o babhinon an Russia. Ini nga pagbabag-o ha palisiya nagbubuksas ha kamaturoan nga an sumpakiay ha Ukraine, tikang ha katikangan, usa nga proxy war giutan han US ngan Russia, bisan pa kun mayda mga karukayaknon ha teritoryo giutan han Ukraine ngan Russia. Ginduduso han gubyerno nga Trump an Ukraine nga umabuyon ha pakig-ukoy-bubto ha Russia, labot ha pagpirma ha usa nga kasarabutan nga maghahatag ha US hin dako nga parte han mga deposito han rare-earth mineral, nga ginsesering nga porma han kabaraydan ha gintatantiya nga $70 kabilyon nga ayuda militar han US tikang hadton 2022.

Sukwahi ha palisiya han pakigtuhay ha Russia, padayon nga ginpapapintas han gubyerno nga Trump an sumpakiay hini ha China ngan North Korea, ngan ginpapabilin nga abrido an posibilidad han paglarab han armado nga sumpakiay. Padayon nga ginpapakusog han militar han US an mga pwersa hini ilarum han gintatawag nga estratehiya nga Indo-Pacific. Diri pala maiha, naghimo ini hin hiluagan nga mga war games ha South Korea, ngan nakatalaan nga maghimo hin dirudiretso nga war games ha sakob ngan palibot han South China Sea, Pilipinas, Taiwan ngan Japan nga may estratehiko nga katuyuanan nga palibutan an China. Diri pala maiha, ginpiliw han US an palisiya hini nga “diri pagsuporta ha katalwasan han Taiwan,” nga usa nga direkta nga pag-ayat ha Tsina.

Ginpakusog liwat han gubyerno ni Trump an imperyalista nga panginlabot ha Middle East, dugang nga ginpakusog an pagsuporta ha agresyon ngan okupasyon han Zionista nga estado han Israel ha Gaza. Diri pala maiha iginmando hini an pagpadara han $3 kabilyon nga balor hin mga misayl ngan bomba ha Israel, ngan ginsuportahan an utro nga pag-atake ha Gaza nga nagpatay ha gatus-gatos nga Palestino, ngan naghuman ha duha kabulan nga ukoy-bubto. Komo suporta ha Israel, iginmando liwat ni Trump an mga misayl nga pangatake kontra ha mga pwersa han Houthi ha Yemen, nga aktibo nga nasuporta ha pakigbisog para ha katalwasan han Palestino. Ha pakigkonsabuhay ha Israel, Turkey ngan iba pa nga mga nasud ha NATO, ginpadig-on liwat han gubyerno ni Trump an panindugan hini ha bag-o nga gubyerno han Syria, agud dun-an an militar nga pan-gigipit ha Iran, subay ha estratehiko nga katuyuanan nga kontrolon an mga karikuhan nga lana ha Middle East.

Aada hi Trump ha pungkay han madagmit nga nagrabe nga krisis ha pulitika ha US, diin hul-os nga nga binirik an presente nga namumuno nga oligarkiya ngadto ha butaray nga pag-undong ha pasista nga ideolohiya. Ginpalibutan niya an kalugaringon hin mga maguulo-ulog ngan paragpakpak komo mga upisyal han gabinete. Namumuno hiya pinaagi han mga kamanduan ngan nagtalapas ha mando han mga korte, ha usa nga makusog nga duso ngadto ha otoritaryanismo. Agud buhagon an klase nga trabahador, ginsulsulan ni Trump ngan han iya mga upisyal an diskriminasyon ha mga minoriya, mga migrante, ngan komunidad han LGBT, ngan nagpapasarang hin mga tuluohan ngan diri gud siyentipiko nga pagtuo. Gatus-gatos kayukot nga empleyado han gubyerno han US an gintanggal nala kunuhay tungod ha pagtitipid. Iginmando niya an pagpuypoy ha mga demokratiko nga katungod, partikular, kontra ha katungod nga magtirok ngan ha libre nga pagpahayag ha mga unibersidad. Gumamit hiya hin madarahug ngan waray proseso nga deportasyon han yukut-yukot nga imigirante.

Ha pagligis han iya kontra-demokratiko ngan kontra-trabahador nga mga palisiya, gindagkutan han rehimen Trump an hiluagan nga kagiusan protesta ha US nga segurado mahiluag ngan malarab ha tinagdagko nga demonstrasyon ha bug-os nga nasud ha mga tiarabot nga bulan. An mga protesta kontra ha imperyalismo nga US segurado nga mabutho liwat ha bug-os nga kalibutan komo baton ha mga imperyalista nga palisiya ha negosyuhay ngan ekonomiya nga agresibo nga iginduduso han rehimen Trump, ngan ha iya waray hunong nga panulsol han gerra. Segurado nga mabutho ngan mahiluag an mas damo pa nga rebolusyunaryo nga armado nga kagiusan tungod kay an katawhan nga gintatalumpigos han imperyalismo ngan pasismo, ginhihikawan han iba nga pamaagi agud ipakigbisog an nasyunal ngan pankatilingban nga katalwasan.

Ipasulong an rebolusyunaryo nga pag-ato, prinsipal pinaagi han armado nga pakig-away

Gintalakay naton an diri pala maiha nga mga panhitabo ha sakob ngan gawas han nasud agud igpakita an obhetibo nga kamutangan nga nagduduso ha hiluag nga masa han katawhan Pilipino nga magpasulong hin rebolusyunaryo nga pakigbisog agud ipakig-away ngan kab-uton an ira hingyap para ha nasyunal nga katalwasan, demokrasya ngan sosyalismo. An pakigbisog han katawhan Pilipino mahugot nga nakasumpay ha rebolusyunaryo nga pakigbisog han ngatanan nga tinalumpigos ngan tiniyupi ha bug-os nga kalibutan.

Iginlalansar han katawhan Pilipino an ngatanan nga porma han pakigbisog agud ipasulong an nasyual-demoktatiko nga katuyuanan. Nagpapasulong hira han ligal nga mga porma han pakigbisog ngaduha ha kasyudaran ngan kabaryuhan nga tinagdamo nga nagpupukaw, nag-oorganisa ngan nagpapagios ha masa kontra ha nananalumpigos ha ira. Igintutukod nira an ira mga unyon ngan organisasyon masa, nakikigbisog ha mga negosasyon ha mga kapitalista ngan burukrata nga opisyal han estado, nagwewelga ha mga pabrika, naghihimo hin boykot, walk-out, mga panmasa nga paggios ngan iba nga kolektibo nga paggios. Napartisipar hira ha reaksyunaryo nga eleksyon agud ig-undong an nasyunal-demokratiko nga katuyuanan ngan ikampanya an mga progresibo nga kandidato ngan partido. Pinaagi han National Democratic Front, nakikignegosasyon pankamurayawan hira ha reaksyunaryo nga gubyerno, agud ig-undong an hingyap han katawhan para ha makatadungan ngan panmaihaan nga kamurayawan.

An armado nga pakig-away an prinsipal nga porma han pakigbisog ha pagpasulong han demokratiko nga rebolusyon han katawhan ha Pilipinas. Ha pagpasulong han armado nga pakig-away naton maaatuhan agud ibagsak an imperyalismo nga US ngan an mga naghahadi nga klase han dagko nga burgesya kumprador ngan dagko nga agaron maytuna. Gintutuman hini an sentral nga buruhaton han rebolusyon Pilipino nga pagrumok ha armado nga niyutiyo nga estado han imperyalismo nga US ngan mga naghahadi nga klase, ngan pagtukod han demokratiko nga gubyerno han katawhan ilarum han pamumuno han proletaryado. Pinaagi la han demokratiko nga estado han katawhan mahihimo an pankatilingban nga rebolusyunaryo nga transpormasyon.

Ha okasyon yana nga adlaw han ika-56 nga anibersaryo han Bagong Hukbong Bayan, nananawagan kami ha ngatanan nga komite, kadre ngan mga kaapi han Partido, nga permi hatagan atensyon an dakila nga buruhaton nga ipasulong an rebolusyunaryo nga armado nga pakig-away ngan pagpapakusog ha BHB ha pagpatuman han iyo mga tahas ha magkalain-lain nga natad han pakigbisog.

Gintatawagan namon an ngatanan nga Pula nga mangaraway han Bagong Hukbong Bayan nga pahitas-on an determinasyon ngan isahon an kapas nga tumanon an mga tahas han kagiusan nga pagtutul-id. Naseseguro namon nga makakab-ot han BHB an mas dagko nga kadaugan ha utro nga pagpaparayhak ngan pagpapahiluag han base panmasa ngan pagpasulong han ginerilya nga pakiggerra kontra ha pasista nga rehimen US-Marcos.

Mabuhay an diri nababantad nga rebolusyunaryo nga diwa han mga Pula nga mangaraway han Bagong Hukbong Bayan!

Pakusgon ngan pahiluagon an BHB!

Pakyason an brutal ngan terorista nga mapanmuypoy nga gerra han rehimen US-Marcos!

Pahiluagon ngan Papintason an ginerilya nga pakigerra!

Ipasulong an rebolusyunaryo nga armado nga pakig-away!

Ipasulong an demokratiko nga rebolusyon han katawhan!

Mabuhay an Bagong Hukbong Bayan!

Mabuhay an Partido Komunista ng Pilipinas!

Mabuhay an proletaryo ngan katawhan Pilipino!