Inaramat manen dagiti tropa militar ti US iti didigra nga inpagteng ti supertyphoon Julian tapno makibiang ken ikalintegan ti presensya militar da ditoy pagilian.

Idi Oktubre 6, napan dagiti soldado iti US Armed Forces Third Marine Expeditionary Force (III MEF) ken Joint US Military Assistance Group (JUSMAG) sadiay probinsya iti Batanes tapno mangipaay kampay idi iti humanitarian assistance ken disaster relief (HADR) operations. Pudno a napalalo iti nagbalin nga epekto ti bagyo iti kabiagan dagiti Ivatan ngem saan a nasken a militar wenno ganggannaet nga armado a pwersa pay ti mangited iti ayuda ken tulong ta adda met dagiti sibilyan nga ahensya ken non-government organizations.

Nalawag a pambar laeng daytoy tapno ikondisyon ti kapanunotan iti umili, nangruna dagiti Ivatan iti “gagangay nga kaadda dagiti soldado nga Amerikano.” Uray ibagbaga a naggapu pay Okinawa, Japan dagiti tropa iti III MEF, siguden nga adda da iti naduma-duma a paset iti pagilian. Iti naglabas a lawas, nagirussuat iti multilateral maritime cooperative activity ti Pilipinas ken US, karaman ti Japan, Australia, New Zealand ken Canada idiay West Philippine Sea.

Numanpay awan ti deklarado a base militar iti US iti isla ti Batanes, adun a pasdek militar ti naibangonen sadiay ken nasaknap ken nairteng ti rekrutment kadagiti Ivatan agtawen 18-65 tapno agbalin a reservist. Paset daytoy iti balikas ni DND Sec Gilbert Teodoro nga “spearhead of the Philippines” ti probinsya iti Batanes, ken iti “first island chain” iti US iti kabuklan na.

Malagip nga idi June ket rinugian dagiti soldado nga Amerikano ti dredging idiay Basco Port a pagsangladan dagiti barko a panggubat iti US, kasta met ti panangibangon iti warehouse a pangidulinan kadagiti armas ken ramit militar. Sabali pay ti detatsment idiay Mavulis Island, ti pinakamurdong nga isla iti Pilipinas. Amin dagitoy a pasdek ket intakder iti linged ti HADR ngem agdadata a para iti panagsagana iti gerra. Kasilpo na, HADR met laeng ti pambar iti napasamak a Doshin-Bayanihan 4-24 bilateral exercise iti nagbaetan iti PAF ken Japan Air Self Defense Force (JASDF) idi Oktubre 1-7 idiay Benito Ebuen Air Base Mactan, Cebu, maysa nga “EDCA site.”

Saan a nairteng a militarisasyon ken panangisuko iti soberanya iti pagilian ti makarisut iti agnanayon a parikut iti didigra. Ad-adda ketdi a mairubo ken agsagaba ti umili a Pilipino iti panangisungsong ti imperyalismo nga US iti gerra.