Ramrambakan tayo ti Bulan ti Kababaihan tatta Marso, iti tengnga ti panagragrag-o ti umili a Pilipino iti pannakaarestar ken Rodrigo Duterte ti International Criminal Court tapno agsungbat kadagiti krimen na iti sangkataw-an. Ti pannakakemmeg na ket umuna a balligi ti umili a Pilipino iti naregget a dangadang da tapno maisaklang ken mapagsungbat ni Duterte, iti sistematiko ken nasaknap nga ekstra-hudisyal a pammapatay ken panaglabsing iti karbengan-tao, iti panangipatungpal daytoy iti narungsot nga “all-out war” a kontra-droga ken kontra-insurhensya.

Padayawan ti National Democratic Front (NDF)-Ilocos dagiti kapamilya dagiti biktima kadagiti krimen ni Rodrigo Duterte, dagiti mangitantandudo iti karbengan-tao kabilang dagiti demokratiko a timpuyog ti umili, dagiti abogado ken simbaan a natured, napasnek ken saan a nagsardeng a nangiduron kadagiti hudisyal nga addang ken proseso tapno maidarum agingga a maarestar ni Duterte. Padayawan mi ti umili a saan a nabannog nangpapaaweng iti pukkaw da tapno kundenaren dagiti nadara a kampanya ti rehimen na ken nagdemanda ti panagsardeng kadagitoy. Saluduan mi met ti New People’s Army nga awan-sarday ken napinget a nangiyabante iti armado a dangadang tapno salakniban ti masa laban iti tiranya ti rehimen Duterte, ken tapno maaddaan-sangi ti dangadang da. Amin dagitoy a dangadang ket nagibinglay iti pannakaipideg tatta ni Duterte. Balbaliw nga igangtan tayo ti kandila dagiti rinibribo a biktima ti kinaranggas ti rehimen Duterte, tapno isapata ti panangiyabante ti dangadang tapno naan-anay a maiserbi ti hustisya kadakuada.

Iti pannakagun-od iti daytoy nga umuna a balligi, agpanpanawagan ti NDF-Ilocos iti umili nga Ilokano a tumipon iti umili a Pilipino tapno suportaran ken iduron ti intero a proseso ti panag-usig ken Duterte agingga a madusa daytoy ken magun-od ti hustisya iti krimen na iti sangkataw-an.

Saan pulos a malipatan ti masa a Pilipino, ti nakaam-ames a panagrabngis iti demokratiko ken sibil a karbengan da iti todo gera kontra-droga, gera laban iti rebolusyonaryo a tignay iti sidong ti Oplan Kapayapaan ken gera kontra-Moro babaen ti naranggas a panangrebbek iti Marawi, iti mandar ti imperyalista a US ken panangipataw ti Martial Law idiay Mindanao idi 2017. Nagpangta isuna nga ipasapasap iti intero a pagilyan ti Martial Law. Saan man nga upisyal a naipatungpal daytoy, nagraira ti linteg militar iti intero a pagilyan.

Pinairteng ni Duterte ti “all-out war” laban iti rebolusyonaryo a tignay ken inraman na pay ti saan nga armado ken demokratiko a tignay ti masa. Iti linged ti Oplan Kapayapaan, pinasaknap ken pinairteng na dagiti focused military operations, panagbomba, okupasyon ken panaghamlet kadagiti komunidad, blokeyo iti pagbiagan ti masa ken nadumaduma a porma ti militarisasyon iti kaaw-awayan ken ekstra-hudisyal a pammapatay kadagiti rebolusyonaryo a pwersa, aktibista ken dagiti maatap laeng a karaman iti rebolusyonaryo a tignay. Binuangay ni Duterte ti kagurgura ti umili nga NTF-Elcac tapno ipasidong ti intero a makinarya ti estado iti militar a panagari. Inpatungpal na ti Anti-Terror Law tapno iddepen ti demokratiko a dangadang ti umili.

Iti Oplan Tokhang na, nagayus ti dara kadagiti kalsada ken komunidad iti kasyudadan kasta met iti kaaw-awayan. Nagibulos kadagiti pulis ken death squad a kas mauyong nga aso a nangipatungpal iti narungsot, nasaknap ken awan-ressat nga ekstra-hudisyal a pammapatay, a nangpuntirya uray kadagiti inosente ken ubbing. Isu nga iti intero a panawen a panagtakem na kas presidente manipud 2016 agingga 2019 ket dimmanon ti pinullo a ribo ti napapatay ken ti intero a pagilyan ket binalkot ti teror ti Oplan Tokhang.

Ni Duterte ket pasista a tiraniko a nagari iti kumpas ti imperyalista a US. Isuna ket mauyong nga aso nga inbulos ti imperyalista nga amo na tapno ipatungpal ti kampanya a counter-insurgency daytoy iti Pilipinas, a nagresulta iti ginabsuon a krimen na iti sangkataw-an.

Ti dangadang ti umili a Pilipino para iti hustisya ket saan nga agpatengga ken Duterte. Kadwa ni Duterte, ni Ferdinand Marcos Jr., ti dati a US President Joseph Biden ken agdama a US President Donald Trump ket indarum met ti umili a Pilipino iti International People’s Tribunal kadagiti krimen iti sangkataw-an wenno nasaknap a panaglabsing iti International Humanitarian Law. Iti pannakaarestar ni Duterte, agpanpannakkel tatta ni Marcos a “saan na a kasapulan a pumatay ti adu a tao iti pananglaban iti droga.” Ngem itultuloy ken pappapigsaen na pay ti mangidadanes ken naranggas a kampanya iti panangrebbek iti rebolusyonaryo ken demokratiko a tignay ti umili iti naregget a panangipatungpal daytoy iti Anti-Terror Law ken NTF-Elcac, nga agresresulta iti agtultuloy ken sumaksaknap nga ekstra-hudisyal a pammapatay kadagiti rebolusyonaryo a pwersa, dagiti aktibista ken inosente a sibilyan, umir-irteng a militarisasyon ken dagiti panagbomba iti kaaw-awayan, aduan a peke a panagpasurender kadagiti sibilyan, panaglipit ken adu pay a porma ti panangikuspil iti umili. Iti panagtakem ni Marcos tatta, ngumatngato pay ti bilang ken kinakaro dagiti panaglabsing iti karbengan-tao, ken adun ti napatay daytoy a rehimen.

Kamaudian na, ti pananggun-od ti hustisya ket saan nga agpatengga iti panangisaklang ken Duterte ken Marcos, nu di ket iti panangisaklang iti imperyalista a US nga agdisdisenyo ken agidikdiktar kadagiti pasista a kampanya iti Pilipinas ken iti nadumaduma a paset ti lubong tapno iturayan dagitoy. Ti imperyalista a US ti utek kadagiti krimen iti sangkataw-an ken numero uno a nagbasol kadagitoy.

Ti dangadang ti umili a Pilipino iti panangisaklang ken Duterte ken Marcos ket rumbeng nga iyabante ken ingato iti tukad ti gubat ti umili tapno rebbeken ti pagbatbatayanda a sistema ti pasismo ti estado ken imperyalismo. Labes kadagiti legal a proseso, ti armado a dangadang ti ultimo a dana iti pananggun-od ti hustisya kadagiti krimen iti karbengan-tao. Ti panangidadanes nga ituntunda dagiti pasista a kampanya dagiti tiraniko a rehimen ti mangsungsungrod iti pungtot ti umili tapno dalyasaten ti dana ti rebolusyonaryo nga armado a dangadang ken gun-oden ti pudno a kappia ken hustisya.#