Ipinagbubunyi ng Melito Glor Command, sampu ng mga mandirigma nito, ang ika-60 anibersaryo ng Kabataang Makabayan (KM). Nagpupugay kami sa mayamang kasaysayan ng pakikibaka ng KM para sa pambansang kalayaan at demokrasya. Mula Nobyembre 30, 1964, pinatunayan ng KM ang katapatan sa pagtataguyod ng rebolusyonaryong adhikain at buong pusong isinanib ang lakas at kasigasigan sa uring manggagawa at magsasaka upang kamtin ang tagumpay.

Ipinamalas ng kabataang Pilipino ang mahalagang papel nito sa rebolusyon sa mahabang kasaysayan ng pakikibaka ng bayan. Ang mga kabataan sa pangunguna ni Andres Bonifacio ang nagtatag ng Katipunan upang labanan ang Kolonyalismong Espanyol noong 1896. Bago ito, naging behikulo ang mga kabataan ng unang kilusang propaganda na binubuo nina Jose Rizal para mapukaw ang makabayang diwa ng mga Pilipino. Sila ang inspirasyon at puhunan para marubdob na labanan ang sumunod na pananakop ng imperyalismong US noong 1898. Sa mayamang tradisyong ito nakatuntong ang tungkulin ng KM na ipagpatuloy ang rebolusyon at ganap na isakatuparan ang pambansang pagpapalaya mula sa kuko ng imperyalismong US.

Tapat sa misyon ng KM na palayain ang sambayanan, naging susi ang ambag nito sa muling pagtatayo ng Communist Party of the Philippines noong Disyembre 26, 1968 at pagbubuo ng New People’s Army noong Marso 29, 1969. Kinilala nito at itinaguyod ang wastong linya ng armadong rebolusyon upang kamtin ang tunay na pagbabagong panlipunan. Hanggang ngayon, tinutupad ng KM ang papel nitong magsalin ng bagong dugo sa rebolusyong Pilipino. Nagsisilbi itong balon ng mga bagong kasapi ng Partido at mandirigma ng NPA.

Taliwas sa ipinangangalandakan ng estado na lipas na ang ideolohiya ng CPP, patuloy na ipinaglalaban ng KM ang prinsipyo nito na makikita sa patuloy na paglahok ng mga kabataan sa pambansa demokratikong rebolusyon sa lumipas na mga dekada. Patunay rito ang presensya ng mga kabataang Millenials at henerasyong GenZ sa bawat balangay ng KM. Katunayan, maraming kabataan ang mapangahas na tumanggap ng mga tungkulin at responsibilidad sa rebolusyon, bilang batang kadre ng Partido o batang kumander ng NPA.

Ang hindi nagmamaliw na paninindigan at pagmamahal ng mga kabataan sa malawak na inaapi at pinagsasamantalahang mamamayang Pilipino ay patunay na bigo ang bulok na estado na panatilihing mangmang ang mga ito. Dumaraming mga kabataan ang nagpapakita ng mataas na diwa ng boluntarismo at inisyatiba para sa pagbabago ng lipunan. Noong pandemyang COVID-19, nagsulputan ang mga community pantries na pinangunahan ng mga kabataan. Maingay ang mga kabataang estudyante sa pagbatikos sa palyadong blended learning sa panahon ng pandemya. Nangunguna rin ang mga kabataan sa pagtugon sa mga sakuna kagaya ng pagsabog ng bulkan Taal noong 2020 at mga bagyong Carina, Enteng, Nika, Kristine, Ofel at Pepito na sunud-sunod na nanalasa sa rehiyon at buong bansa ngayong taon.

Matapang ding pinupunit ng mga kabataan ang kasinungalingan ng rehimeng US-Marcos II sa anyo ng historical revisionism sa imbing layuning labusawin ang kasaysayan at itanghal ang sariling pamilya bilang mga bayani. Makikita ito sa pagkundena ng maraming kabataan sa kandidatura ni Marcos Jr. noong 2022. Bumubuo rin sila ng mga samahan upang labanan ang tiranya ng estado.

Samantala, isa sa mga tagumpay na nakamit ng kilusang kabataan ang Free Tuition Act na ipinatutupad sa mga state colleges and universities. Ang tagumpay na ito ay iniresulta ng konsistenteng pakikibaka ng mga kabataang estudyante para sa karapatan sa abot kaya at de kalidad na edukasyon. Patuloy pang nilalabanan ng mga kabataang estudyante ang neoliberal na patakaran sa edukasyon. Tinutuligsa nila ang maka-imperyalistang kultura na nang-eengganyo sa indibidwalismo, konsumerismo, nihilismo, elitismo at iba pang kaisipan na naglalayo sa mga kabataan sa kritikal na pag-iisip at landas ng rebolusyon.

Sa Timog Katagalugan, ikinalulugod naming batiin ang mga kabataan na patuloy na tumutungo sa batayang sektor upang makipamuhay at makiisa sa laban ng masang anakpawis. Kapuri-puri ang katapangang ipinamalas nila sa kabila ng patuloy na pandarahas ng estado. Sa nagdaang mga taon, iniambag ng mga kabataan sa rehiyon ang kanilang husay at galing upang ipatambol ang kalagayan at hinaing ng mga manggagawa, magsasaka, pambansang minorya, mangingisda, maralitang lungsod at mala-proletaryado kagaya ng mga tsuper. Matatag nilang hinarap ang pasismo at terorismo ng estado kung saan kabilang sila sa kinakasuhan ng rehimen gamit ang Anti-Terror Law at Anti-Terrorism Financing Law.

Hanggang nananatiling malakolonyal at malapyudal ang lipunang Pilipino, patuloy na sisibol ang mga rebolusyonaryong kabataan mula sa hanay ng mga manggagawa, magsasaka at petiburgesya, maging ng ilang nakaririwasang uri.

Nananawagan kami sa mga kabataan na lubusin ang pag-aambag sa lipunan sa paglahok sa pambansa demokratikong rebolusyon. Paramihin at palawakin ang mga balangay ng KM. Sumapi sa NPA at lumahok sa digmang bayan. Pag-aralan ang teorya ng Marxismo-Leninismo-Maoismo upang higit na lumalim ang paggagap sa tunggalian ng uri at kawastuhan ng armadong rebolusyon para sa kalayaan, demokrasya at sosyalistang bukas. Patuloy na magpanibagong-hubog at magpanday tungo sa pagiging susunod na mga lider ng rebolusyonaryong kilusan.

Ang paghugos ng mga kabataan sa lansangan at pagdami ng mga sumasampa sa kanayunan ay liwanag sa lukob ng kadilimang hatid ng rehimeng US-Marcos II. Gaanuman kahirap ang landas na ating binabagtas, tiyak na magwawagi tayo, katuwang ang KM at iba pang inaaping uri at sektor ng lipunan.