Ipinapaabot ng Kabataang Makabayan-Rizal ang taos-pusong suporta sa ika-56 na anibersaryo ng Bagong Hukbong Bayan! Sa loob ng mga dekada ng paglaban, patuloy nitong isinasapraktika ang matatag na diwa ng paglilingkod sa bayan at pagtatanggol sa interes ng mga maralita at inaapi.

Sa gitna ng malalim na krisis na kinakaharap ng lipunan mula sa lumalalang kahirapan, kawalan ng lupa, pagtatayo ng mga proyektong nagpapalayas sa mga maralita hanggang sa matinding militarisasyon sa hanay ng mga magsasaka, nanatiling matibay ang BHB-Rizal (Narciso Antazo Aramil Command) bilang tagapagtanggol ng mamamayang Rizaleño sa kanayunan.

Dahil sa kalakasan ng BHB, patuloy na pinalalawak ng kaaway ang kanilang mga kasinungalingan at propaganda. Kamakailan, pinalaganap ng 80th Infantry Battalion ang pahayag na ang mga miyembro ng NPA-Rizal ay kasya na lamang sa isang tricycle ang dami ngunit malinaw sa mamamayan na patuloy na lumalawak at lumalalim ang sumasapi sa hukbong bayan.

Hindi maikakaila ng estado ang patuloy na pagsasamantala at pang-aapi sa mga magsasaka, manggagawa, at katutubo. Ang mga extra-judicial killing, iligal na pag-aresto, at sapilitang pagpapasuko ay bahagi ng sistematikong pandarahas na ginagawa ng militar at pulis sa mga komunidad. Sa mga bayan ng Rizal, patuloy ang presensya ng militar at mga paramilitar na lumilikha terror sa hanay ng mamamayan.

Ngunit sa kabila ng karahasan, patuloy na bumabangon ang mas maraming anak ng bayan. Ang mga magsasaka na inagawan ng lupa, ang mga manggagawang pinagkaitan ng karapatan, at ang mga kabataang sawang-sawa na sa neoliberal na edukasyon ng estado ay nagiging bahagi ng armadong pakikibaka upang ipagtanggol ang kanilang kinabukasan.

Habang nananatili ang ugat ng tatlong salot sa lipunan at pagsasamantala, mananatili rin ang BHB at ang rebolusyonaryong kilusan. At sa pagtutulungan ng lahat ng pwersang naghahangad ng tunay na pagbabago, tiyak na mabibigo ang mga pakana ng kaaway at magtatagumpay ang demokratikong rebolusyon ng bayan.

Mabuhay ang Bagong Hukbong Bayan!