Supsupyaten ti umili nga Ilokano ti Balikatan Exercises 2024
Supsupyaten ti umili nga Ilokano ti Balikatan 2024. Agdandanag tatta ti umili iti Ilocos Norte, gapu ta maisayangkat met ti dadduma a paset ti ehersisyo iti gubat iti kampo ti 4th Marine Brigade iti igid ti baybay ti barangay Bobon, Burgos, Ilocos Norte.
Sigurado a maipasardeng manen ti panagtapog dagiti mangngalap ken mariribuk manen dagiti komunidad iti Burgos, kas idi naangay ti Balikatan Exercises iti probinsiya idi napan a tawen. Ditoy ket nag-live fire exercises da ken nadistorbo ti umili. Nagiyaramid da met ti simulation exercises nu sadinno a pinagpaset da dagiti sumagmamano a sibilyan iti war games, kas ti panagbagkat kadagiti soldado nga Amerikano a kampay idi ket makaswalti iti gubat.
Ammo ti masa nga Ilokano a daytoy a kadakkelan a war games ti imperyalista a US ket panagsagana iti gera na kontra iti China, nga iti aniaman a kanito ket bumtak. Isunga sangkasao da ita nga “awan ti agturog-turog ta madamdama ket aggubat ditoy paraangan tayo!”
Palalon a rigat ti biag dagiti mangngalap iti Ilocos iti agdama gapu iti El Niño, nakirang ti makalapan nga ikan. Kasta met dagiti mannalon a nalaylay dagiti mula da ken nakamagmaga ti daga, saan da a makapagtalon. Tatta, sumangsango da manen iti peggad nga aniaman nga oras ket mapasamak ti gubat ditoy Pilipinas, iti arubayanda iti Ilocos Norte, a kas iti panaggugubat tatta idiay Ukraine, Gaza ken Iran.
Ti kampo ti 4th Marine Brigade ket naaramid itan a “military tourism park.” Ditoy ket guyguyuguyenda ti umili a sumrek iti kampo tapno ipasindayag da ti military complex, dagiti eroplano ken ramramit da a panggubat. Idi pay maibangbangon daytoy, iparparamagen dagiti soldado nga Amerikano ti monitoring facility da iti uneg ti kampo, tapno paliiwen ti garaw ti China. Agpanpannakkel da a sisasagana da iti gubat, maysa a rumimrimbaw a galad ti imperyalista a rumaraut.
Daytoy a military tourism park idiay Burgos, Ilocos Norte ket pangawis met iti sibilyan a masa tapno kaluban ti terorista nga imahe ti militar. Ti doble-kara a taktika ti naparang a terorismo ken panangguyugoy ket taktika ti kontra-insurhensiya ti Amerikano a militar nga ipakpakat na iti Pilipinas, ken maysa kadagiti lalaunen ti Balikatan Exercises.
Makikaykaysa ti umili nga Ilokano kadagiti umili nga Ivatan, Cagayano ken dadduma pay nga umili a Pilipino iti panangsupyat iti maisaysayangkat tatta a Balikatan Exercises a mangirubrubo iti umili. Kadaytoy a gubat dagiti buklis nga imperyalista, pagiinnagawan da laeng ti kinabaknang ti lubong, karaman ti Pilipinas. Amin a gubat a parparnuayen na tatta kas iti China babaen ti Pilipinas, iti Russia babaen ti Ukraine, iti Palestine ken Iran babaen ti Zionista nga Israel ket gubat a pangraut ti imperyalista a US tapno gamruden ti kinabaknang ken tenglen ti bileg iti sangalubongan.
Nasken nga agkaykaysa, agorganisa ken agtignay ti umili nga Ilokano tapno labanan ti panagsagana ti imperyalista a US ti gubat iti teritoryo ti Pilipinas. Rumbeng a salakniban ti pagilian laban iti panagkamkam ti China ken dadduma pay nga imperyalista nga agpangpanggep a kamkamen daytoy kas ti Japan. Kasapulan nga irupir ti soberanya ti Pilipinas ken gun-oden ti bukod a pangngeddeng iti teritoryo ken rekurso ken gamgameng daytoy. Nasken nga ilaban nga ti umili a Pilipino ti rumbeng nga agsagrap kadagitoy a kinabaknang tapno agbiag a nasaliwanwan ken magun-od ti wayawaya ken talinaay.
Isardeng ti Balikatan Exercises 2024!
Isardeng ti panagparnuay ti imperyalista a gera!