Nahilway na sang Mayo 14 ang ginatawag nga Bakwit School 7 halin sa halos tatlo ka bulan nga pagkabilanggo pagkatapos ibasura sang korte sa Davao del Norte ang himu-himo nga mga kaso batuk sa ila. Ang Bakwit School 7 amo sanday Chad Booc, Roshelle Mae Porcadilla, Benito Bay-ao, Segundo Milong, Jomar Benag, Esmelito Oribawan kag Moddie Mansimuy-at. Gin-aresto sila sa ginhimo nga reyd sang pulis sa kampus sang University of San Carlos sa Cebu City sang Pebrero 15. Ginkasuhan sila sang kidnapping kag iligal nga detensyon sang mga bata nga Lumad.

Antes sini, gin-agaw sang militar kag pulis ang 26 estudyante nga Lumad kag “ginpapauli” sila sa Mindanao. Diseotso sa ila kag ila mga ginikanan napaidalom pa sa kontrol sang militar tubtob subong.

Sa pihak sang pagbasura sa kaso sang korte, nagpaandam ang NTF-ELCAC sang Mayo 19 nga liwat magpasaka sang mga kaso batuk sa pito.